41
Ia ona aia inekei iamnii
1 Yusup isima runa uaso no niineu, musum ua raniku nea oyo ia ona aia inekei iamnii. Ineke iamnii iooi nau waene wani nanae Nil nusue.
2 Sira tau inoo koropou itu rahotu on poe waene rei. Koropou rai noore kopotuena samatoro pasa-pasanisia. Rahotu oyo raai monota sui waene nusue.
3 Ita koropou itu honu rahotu. Koropou rai mo rakahanokaso. Nene unta rapunu unia. Koropou kahanokana rai, raoo mai koropou waron pokotuena mai waene nusue.
4 Oyo koropou kahanokana rai, raai koropou pokotuena. Sani rei oyo ia ona aia ihanui.
5 Ita inekei honu. Ineke iamnii manei huaya itu waron mtuaya nea. Nene kania rai maka-makaya. Huaya itu rai raruhu tau nene sakate osa.
6 Ita hua itu raruhu honu. Ne ramkukuso. Isia iaka tewa. Ramotoso tau ihu titie.
7 Oyo kania waron ramkukuso rai rarono manei waron isia iaka rai. Taa san rei oyo ia ona aia ihanui samatoro isira ata inekei iamnii.
8 Nene omnanoe rei ia ona aia anoi ererau. Reiso ioi sio nau upua runa pakakasi upua. Oyo iruni ne niineu rai osiso. Ne ia osa-sa ianei nene manariti tewa.
9 Oyo ia mamsuhu tihu anggur iasau osi ia ona aia, iahata, “Ranie hatae reini matoro uamanaku we isanae. We isanae wani usima runa Yusup, ia makahaie, ne masana tewa. Anoku kanihue reiso usima runa ia makahaie wain ia Ibrani pan pui anoe rei ne masana tewa.
10 Naone ano akapuku tanuku runa ia mamkotu porotiu uama oyo aisosiso onusuma pan pui anoe poe ia kapitane tau sio mamsaka me numa.
11 Tau mono isa uama aneke aamnii. Uama ma niineu rai nene manariti osa tewa.
12 Ia isa rerihoni Ibrani ikatama pan rei. Ia mo ia makahaie tau ia kapitane rei. Ami aruni ma niineu rai osiki oyo isima runa nene manariti.
13 Pusire pannuhu sani iasaure rei. Ano ahiti au mai we tanei wani mataanoe honu. Ne aaisosiso ohunu ia mamkotu porotiu rei.”
14 Reiso ia ona aia iaisosiso na ohoka Yusup arihoni pui anoe. Reiso ohokai sansana. Yusup ikoma ne manapesiu samatoro iausahu ne apia oyo ieui ria ia ona aia.
15 Ia ona aia iahata, “Uneke uamnii, ne ia isa ianei we niine rei nene manariti tewa. Ia isa isima osiku rerihoni ano ata ano mo, aanei asima runa niine nene manariti.”
16 Ihata, “Upuku. Au uanei tewa. Ne Anahatana sahoro irui nene manariti rai.”
17 Iahata, “Uneke uamnii uooku nau Wae Nil nusue.
18 Oyo koropou itu rahotu on poe waene anoe. Koropou raimo kopotuena runa pasa-pasanisia. Rahotu oyo raai monota nau waene nusue rei.
19 Ita koropou itu honu rahotu. Koropou raimo kahanokana. Nene unta rapunu unia. Unoo koropou kahanokana san rei mai Mesir tewasi.
20 Koropou waron rakahanokaso rei raai pusi koropou waron kopotuena rai.
21 Ne koropou waron rakahanokaso rei rakahanokaso sirinia. Oyo uhanuku.
22 Ita unekeku honu. Uneke uamnii maneiu hua itu waron mtuaya nene isia iaka. Raruhu tau sakate osa.
23 Ita maneiu hua itu honu, maneiu raimo ramkukuso. Isia iaka tewa. Ramotoso tau ihu titie.
24 Maneiu waron ramkukuso rai rarono maneiu waron mtuaya rai. Uruni we niineu ua rai osi sio nau upua runa sio pakakasi upua ne ia isa ianei nene mamariti tewa.”
25 Iahata, “Upuku. Me niineu ua raimo, uare osa. Anahatana isima osia runa sae wani mka iunai.
26 Koropou itu waron pokotuena rai runa manei waron mtuaya, areimo musum itu. Uare nene manariti osa.
27 Ne koropou kahanokana itu waron rahotu tau muie runa manei kani kukuta tau ihu titie, areimo musum itu honu. Tau musum itu rai, mka musum muaine tewa.
28 Sani uasau osi upuku rei, Anahatana iatuhete osia sae wani mka iunai.
29 Musum itu, muaina panesi mai Mesir pusiki.
30-31 Oyo mka musum itu, muaine tewa. Na muaina panesi mka anori kanihua. Tau sae? Musum muaine tewa mka otoe reini sio anoo mtinta.
32 Me niineu ua raimo, nene manariti Anahatana ruai iautuei na mka iunai sansana.
33 Reiso nene iake mo, aroma ia isa wain ianei iheu iake. Ianei iaisosiso rotu-tu ne kaheute ereeu iake. Aromai oyo arui kawasa osiki na isaka otoe Mesir reini.
34-35 Kahurae ahiti mamsakaya tamena na arui kawasa osiso na oamanou maneiu umau. Oaisosi sio mamrahua rei na osama no maneiu tau pahakian nima. Pahakiani osa osi sio mamsakaya rai osakare, pahakian ate osi sio ruao oaire orahure. Aisosiso san rei tau musum itu rai muaina panesi. Oyo sio mamsakaya oaunutu no pahakian noi kotau na osakare.
36 Osakare rotu-tu musum itu muaine tewa. Mka ita mai otoe Mesir reini, oaire tau musum itu rai, na pene imata muaine.”
Ia ona aia ihiti Yusup tau ia mainae tau otoe Mesir
37 Ia ona aia runa ne makahaia oatinu tau Yusup ne anamanaya rai iake.
38 Reiso ia ona aia iasau osiso iahata, “Mka isupu ia isa iake sani Yusup reini tewa. Ia iake tau Anahatana Ne Inaha ikata runai.”
39 Reiso ia ona aia iasau osi Yusup iahata, “Anahatana irui pusire reini osia reiso ano aanei pusire anesi ia seia man.
40 Ano mo, mka uhitia tau ano mainae tau otoe Mesir reini. Mka sio pusiso oatinu tanua. Hasae au sahoro au mainae unesi ano.”
41-42 Reiso ia ona aia inosu ne sapauu arihoni hanai nakate. Sapauu rei sio ouna siaie tanui na oationa ata ia ona aia ne sapauu. Inosui oyo inusui tau Yusup hanai nakate. Iahata, “Runa sapauu reini uhitia na auna mainae akawasa mai otoe Mesir pusiki.”
Ita iausahu papi naue wani ohie osiki. Ita iausahu rante hunahane osiki oi.
43 Oyo irui kareta isa wani naitanane ereroriki. Kereta rei, areimo osi ia ona aia hanai wanane. Ia onate aia ne mamsakaya oeu oanaone arihoni kareta rei na oaka-akapona, “Suka arihoni arena. Suka arihoni ia ona aia hanai wanane.” Reiso ihiti Yusup na iuna ia mainae iakawasa otoe Mesir.
44 Ia ona aia iahata, “Au mo, au aia. Munata ano amanaku tewasi, utapi ia isa iuna sae isa tewasi.”
45 Oyo ia ona aia ihete nananake Mesir isa osi Yusup, areimo ikati nanai tau Sapnat-Paaneah. Irui ia pina isa osi Yusup tau sahai. Ia pina rei nanai Asnat. Ia mo, ia Potifera anai pina. Potifera, ia isaka ianori runa sio Mesir no anahatana ranie wani titue tewa. Isaka poe kota Heliopolis.
46 Yusup mato ipakarian osi ia ona aia tau ne musum hutu tonu. Reiso Yusup ieui iarihoni ia ona aia ne numa oyo ieu sui otoe Mesir na isaka sio wason oamanou manei kania.
47 Tau musum itu atuhu rahua panesi. Reiso muaina panesi.
48 Maneiu rai, Yusup iaisosiso oamanoure samatoro oaunuture sui kotau. Tau kota isa oaunutu maneiu waron sio onanare arihoni no nisiu haineke rei.
49 Maneiu waron oaunuture rai, panesi-panesi rotu-tu oarihoni oheu tanure. Oheure tewa nea. Tau sae? Panesi sani sisia nau nuae.
50 Musum itu muaina tewa rahoka tewasi. Musum itu muaina panesi asi. Yusup sahai Asnat isusu ne hehuka hanaia ua nea.
51 Yusup iahata, “Anahatana iuna anoku kanihue tau au sinsaraku runa wea enau arihoni amaku.” Reiso ihete anai hanaie manaonete nanai tau Manasye. Manasye mo, atinui sani sou Ibrani wani nene manariti anoi kanihue.
52 Ita iasau honu, “Anahatana irui we hehuka mai otoe wani au sinsaraku tanui.” Reiso ihete anai hanaie muie nanai tau Efraim. Efraim mo, atinui sani sou Ibrani wani nene manariti isusu nai ua.
53 Musum itu muaina panesi raniku nea.
54 Oyo musum itu muaina tewa. Ereeu sani Yusup iasau rei. Sui tuniai pusiki muaina tewa. Hasae mai otoe Mesir sahoro no muaina.
55 Taa sio Mesir no muaina pusire nea oyo oainisi muaine tau ia ona aia. Oyo ia ona aia iaisosiso san rei, “Oeu noi Yusup. Opusu sae wani ia iasau osimo.”
56 Taa sio panesi honu osupu no muaina tewa sui otoe rei, oyo Yusup iaisosiso ohuka numau waron oaunutu manei tanure nea. Ohukare oyo iahen manei osi sio Mesir.
57 Oni tuniai reini pusiki sio ohoka ohane manei mai Mesir arihoni Yusup. Tau muaina tewa mai tuniai reini pusiki.