3
1 Hino Nnyahudi kabhegha na kilibhi kyoki kyanalumu kupitingana bhangi? Na kuyingihwa unyagho kungunogheha niki?
2 Kungunogheha muno kwa njila nhanganganiko kiyaha kalongohe Chapanga kakilamula kubhapegha Akaayahudi lilagho lyake.
3 Peni yabhegha bhuli handa amoo bhabhe bhakilihyubhalila ng'obhe lilagho lya Chapanga? Bhuli, Chapanga katalitenda ng'obhe lila lyakalongelite kukita katalitenda?
4 Aka kaa! Chapanga kanguhighala kukita kabhegha ghwa hoto, hata payibhele kila anamundu ndo nhwangi, handa payityekitwe mu malembo gha Chapanga,
“Kila paghulongela ghungulongela hoto,
na paghutosa toso yako ndo ya hoto.”
5 Peni handa uhokelo ghwetu ghungubhoneha kukita Chapanga kangutenda shaliya, twaalongelo niki? Bhuli, tulongele kukita kana shaliya ng'obhe pakatutosa? Kahone, nunguyobhela kianamundu.
6 Aka kaa, handa Chapanga kangabheghiteng'obhe ghwa hoto, kangahotola bhuli kubhagtosa bhandu bha unnima?
7 Pangi ghwaalongela, Handa megha ng'obhe na uhyubhaliko kwa mbande yangu ghungunnyimiha Chapanga kukita ndo nhyubhaliko kyanalumu na habhu kumpegha ukulu, hino ninganoghwite ng'obhe kutoswa kukita megha na ulemwa!
8 Ndo tela kulongela, “Tughendelele kutenda ulemwa ghati ghatuhikile gha maha,” bhandu bhangi bhangutukokela kukita hata twenga tunguhunda ubhwabhuabhu. Nnole, abho bhoha bhaatoswa kubhukana na ulemwa ghwabhe.
Kahone ywakabheghite ywa maha mu ulongolo ghwa Chapanga
9 Hino, tulongele niki? Bhuli, twenga Twakaayahudi ndo bha maha kyanalumu mu ulongolo ghwa Chapanga kupitingana bhangi? Aka kaa! Kiyaha ng'amula kala kutandila kalongohi Akaayahudi na bhandu bhanga kubhegha Ayahudi bhoha abhegha na ulemwa.
10 Handa bhula malembo gha kya Chapanga paghatyekitwe,
“Kahone nga yumu ywakabheghite ywa maha muulongolo ghwa Chapanga.
11 Kahone mundu ywakamanya hoto
ebu ywakanpalaha kuntundamila Chapanga.
12 Bhoha anleka Chapanga
Bhoha ahokela
kahone nga yumu yunakutenda gha maha pakibhungi kyake
13 Malagho mahakata ghanguhuma munnomo ghwabhe handa lunungo luhakata,
Nabho bhangubhakubhuha bhandu mu manjubha ghoha na kubhatenda bhandu ayoghope.
Malagho ghaabhalongela ghanguateluha bhandu handa palubhele lusungu lwa liyoka.
14 Mu maghombano ghabhe ghamema kuakotola bhandu bhangi na kuateluha.
15 Bhandu abho bhanguyumbatika kuatenda bhandu bhateluke na kuakoma.
16 Kwohele kwabhaghenda bhanguhanjaghana hilibhi na kuyambuha himbamanda.
17 Bhanguyimanya ng'obhe njila ya uhihimilo
18 Kupitingana kya agho bhangulema kuhokamila Chapanga.”
19 Hino, tungumanya kukita Malaghilo ghoha ghakapeghitwe Musa ghangubhanogha bhaabheghite mu makakala gha malaghilo agho, habhu bhaahotola ng'obhe kulikingikiha, na bhandu bha unnima ghwoha ghubhegha pahi ya toso ya Chapanga.
20 Kya habhu, kabhone anamundu hata yumu katabhonekana kukita kabhegha ywa maha muulongolo ghwa Chapanga kwa kughayitikila Malaghilo, kiyaha Malaghilo ghangututenda tung'amule ulemwa.
Kuyitikilwa na Chapanga kwa kunhyubhalila Yesu Kilisito
21 Peni hinu, njila ya Chapanga ya kubhayitikila bhandu kukita bhabhegha bha maha muulongolo ghwake yihwimulighwa, kangi kyanga kuhyubhalila Malaghilo. Malaghilo na ambuye bha Chapanga bhanguyimiha nnando aghu.
22 Chapanga kanguayitikila bhandu kukita bhabhegha bha maha kwa njila ya uhyubhalilo ghwabhe kwa Yesu Kilisito, Chapanga kangutenda habhu kwa bhoha bhaanhyubhalila Yesu, kya nga ubhaghulo kwa Akaayahudi na bhaabheghite ng'obhe Ayahudi.
23 Kiyaha bhandu bhoha atenda ulemwa na kutama kwabhe kungubhoneha ng'obhe ukulu ghwa Chapanga.
24 Peni kiyaha Chapanga ndo ghwa maha muno, katuyitikila kukita bha maha muulongolo ghwake kwa njila ya ukombohi ghuubheghite mu Kilisito Yesu.
25 Chapanga kakimmuha Yesu ngati kwa mwahi ghwake kabheghe njila ya kubhalekekeha bhandu ulemwa ghwabhe, kwa uhyubhalilo ghwabhe kwa ywombe. Kakitenda habho ngati kubhoneha kukita ywobhe ndo ghwa maha. Pakandahi apo Chapanga kakibhegha handa ywangamanya ulemwa ghwakatenditwe na bhandu kwa kualimbilila,
26 peni mu nndaluko aghu Chapanga kangughulimbilila ng'obhe ulemwa ghwa bhandu, kihyengo kyake kanguatenda ayitikilwe muulongolo ghwake, ngati kamokole kubhoneha umaha ghwake, na kwa njila ayi kangubhoneha kukita ywombe ndo ghwa maha na yuna kummalanga umaha yula ywakanhyubhalila Yesu.
27 Hino, kahone kilibhi kya kuntenda mundu kalidumbe, kiyaha mundu kaatendekwa ng'obhe ghwa maha muulongolo ghwa Chapanga kwa kughatughila malaghilo, ngati kwa kunhyubhalila Kilisito.
28 Habhu tungubhinilila kulongela, mundu kanguyitikilwa ng'obhe kubhegha muulongolo ghwa Chapanga kwa kuhyubhalila Yesu ghweka na maha ng'obhe kya kutenda kila kikwilikihitwe mu malaghilo.
29 Ebu bhuli, Chapanga ndo Chapanga ghwa bhandu bha abheghite Ayahudi ghweka? Bhuli ndo Chapanga ng'obhe ghwa bhandu bhaabheghite ng'obhe Ayahudi bhubho? Aka kaa, Kulyaghila ywombe ndo Chapanga bha Akaayahudi na bhanga kubhegha Ayahudi bhubho.
30 Chapanga ndo yumo, naywo kataatenda Akaayahudi bhayitikilwe muulongolo ghwake kwa uhyubhalilo ghwabhe, na bhandu bhaabheghite ng'obhe Ayahudi kwa uhyubhalilo ghwabhe.
31 Bhuli, tungughutumila uhyubhalilo ngati tukotoke kughayitikila Malaghilo? Kabhone, kihyengo kyake tungughatwihiliha malaghilo.