15
Nkotoke kulinogheha mabhene ngati mubhanoghele bhangi
1 Twenga tuubheghite na tukamalite mu uhyubhalilo, yitunogha kubhatangatila bhaabheghite ayoyobhalo mu uhyubhalilo, hangi ng'obhe kya kuhiyeleha mitima yetu twabhene.
2 Ywohele nkati yetu yingunnogha kunnyeleha nnyake kwa milando ya maha, ngati kamokole kuntegeleka mu uhyubhalilo.
3 Kiyaha Kilisito kakiliyeleha mwene ng'obhe, ngati handa payityekitwe, “Maligho ghoha ghaakuligha ghwenga Chapanga ghakihikila nenga.”
4 Kiyaha hilibhi hyoha hiityekitwe pamakachu, hikityekwa ngati kutuhunda. Malembo agho ghangututangatilia kulimbilila na kututengeleha ngati tubheghe na udumbilo.
5 Chapanga ndo ywakatutangatila kubheghe na ulimbililo na tutengeleheke, nunguayupila ngati Chapanga kabhatende mmeghe na hwacho yimu, kiyaha Kilisito kangupala nntende habhu,
6 ngati mwenga mabhoha nhotole kuntika Chapanga Tate ghwa Bambo ghwetu Yesu Kilisito.
Nhalo ghwa Maha kwa Bhandu bhaabheghite ng'obhe Ayahudi
7 Nkingamane mwenga kwa mwenga handa Kilisito pakaakingamite mwenga ngati bhandu bhaantike Chapanga.
8 Kiyaha nunguaghombela, Kilisito kakiatumikila Akaayahudi ngati kahotole kubhoneha uhyubhaliko ghwa Chapanga, na kutwihiliha yila naghilo ya Chapanga yaakamuhitwe aghohi bhetu,
9 kangi bhandu bhaabheghite ng'obhe Ayahudi bhantike Chapanga kwa lipyanda lyake. Handa paghatyekitwe Malembo.
“Kya habhu ndaghutika nkati ya bhandu bhaabheghite ng'obhe Ayahudi,
na ndakuyimbila miyimbo ya kukutika ghwenga.”
10 Kangi ghatyekwa,
“Mwenga mabhandu mummeghite ng'obhe Ayahudi, nnyelelwe papamu na bhandu bhake Chapanga!”
11 Na kangi,
“Muntike Chapanga bhandu bhoha mummeghite ng'obhe Ayahudi,
bhandu bhoha bhantike Bambo.”
12 Kangi mbuye Isaya kakilongela,
“Mundu yumu kuhuma mu kibheleko kya Yese, katahika
naywo kataatabhala bhandu bha milima yoha,
nabho bhaandumbila kukita katabhalopoha.”
13 Hino, Chapanga ndo ywakatupegha udumbilo, na kututenda tumemekehwe uyelelo ghwoha na uhihimilo kubhukana na uhyubhalililo ghwenu, ngati udumbilo ghwenu ghuyonjokeheke kwa makakala gha Nhuki ghwa Chapanga.
Nningo ghwa Paulo kutyeka kya uhwadali
14 Maalongo bhangu, numwene nunguhyubhalila kukita mmemekwa na umaha ghwa Chapanga na umanyi ghwoha, kangi munguhotola kuhundana mabhene kwa mabhene.
15 Nubhatyekela kwa uhwadali patangalo mu lihamba ali kuakulungwa kangi kya ghula umaha ghwa Chapanga ghuungamuhitwe na Chapanga,
16 ngati meghe nndumitumi ghwa Kilisito Yesu kwa bhandu bhaabheghite ng'obhe Ayahudi pamegha na utendehi ghwa undundame ghwa kulandamiha Nhalo ghwa Maha ghwa Chapanga, ngati bhandu bhaabheghite ng'obhe Ayahudi abheghe handa nyambi yiinnogheha Chapanga, na yiiyohitwe na Nhuki ghwa Chapanga.
17 Kya habhu, kiyaha nililunga na Kilisito nungulilokela kuntendela lihengo Chapanga.
18 Ndayigha ng'obhe kulubhulila kilibhi kingi maha nga kila kyakakitendite Kilisito kukindila nenga, ngati bhandu bhaabhegite ng'obhe Ayahudi amokole kuyitikila. Kakitenda habhu kwa malagho na ndendelo,
19 kwa makakala gha naho na mang'eha, na kwa makakala gha Nhuki ghwa Chapanga, pameghite mu mwanja kuhuma Yelusalemu mbaka mu bwegha mbwegha yake yoha mbaka ku Iluliko, nnandamiha kala kya utwihiliko Nhalo ghwa maha ghwa Kilisito.
20 Mu agho ghoha nungukakalika kulandamiha Nhalo ghwa Maha pala pene bhandu bhakilandamihwa ng'obhe ya kya kilisito. Nungutenda habho ngati ngotoke kuyandiha lihengo kangi kya uhyono pala pene munduyungi kayandiha kala.
21 Peni handa paghatyekitwe Malembo,
“Bhandu bhoha bhaalandamihitwe ng'obhe mihalo yake bhaalola,
na bhala bhaayihwite ng'obhe bhaamanya.”
Likaho lya Paulo kughenda ku Loma
22 Lihengo alyo ndo likinganikiha patangalo kuhika kwa mwenga.
23 Peni kiyaha hinu nyomola kala lihengo lyangu mu milima ayi, na kiyaha mu ngungwa ndangalo nikibhegha na likaho lya kuhika kwa mwenga,
24 hinu nunguhyubhalila kuhika kwa mwenga pamegha mu mwanja kughenda ku nnima ghwa Hisipania. Akwo nda tama na kuyelelwa na mwenga kwa manjubha gha mandina mbole ndaaghendelela na mwanja, habhu nunguayupa utangwo mu mwanja aghwo.
25 Hinu naha nungughenda ku Yelusalemu kwa kya kubhatendela lihengo bhala bhandu bha Chapanga ghwa akwo.
26 Kiyaha Mingwemuko ya bhandu bhaanhyubhalila Kilisito bha akwo Akaya na Mekadonia bhakilamula kubhuha nhango kwa amoo bhandu bha Chapanga bhaabheghite kapukwa.
27 Bhombe bhakilamula kutenda habhu, peni kulyahila aghwo ndo ghwa bhene kughutenda. Kiyaha handa bhandu bhaabheghite ng'obhe Ayahudi alilunga na unonelo ghwa munhuki ghwa Akaayahudi, ngati Ayahudi nabho alilunge na nonelo yabhe ya mihalo yaayipala ya kila linjubha kwa kulama.
28 Kya habhu mbole ya kulitwihiliha lihengo ali na kubhakamuha nchango aghwo ghuukunganitwe kwa kya bhombe, ndabhapitila mwenga pamegha mu mwanja kughenda ku Hisipania.
29 Pamegha akwo papamu na mwenga, Kilisito katabhanonela muno.
30 Hino maalongo bhangu, nunguasigha kwa Lihina lya Bambo ghwetu Yesu Kilisito na kwa upalo ghwa Nhuki ghwa Chapanga, kulilunga na nenga mukunyupila kwa Chapanga.
31 Nnyupe ngati mokole kulopoleghwa na bhala bhanga kuhyubhalila bhaabheghite akwo Uyahudi, na kukita lihengo lyangu akwo Yelusalemu liyitikilwe na bhandu bha Chapanga bha akwo,
32 ngati kwa mapalo gha Chapanga mokole kuhika kwa mwenga kwa mwoyo ghwa uyelelo, na kuyonjokehana myoyo papamu na mwenga.
33 Nungunnyupa Chapanga ghwa uhihimilo kabheghe na mwenga mabhoha. Ayi mwika.