Ⅱ
-A -ya -aꞌba ꞌꞌbhi ꞌzɔ *Zezii *Kliisɩꞌa ka
Ⅰ A -gblee, -bho a -ke *Kliisɩꞌa ꞌꞌyisisriɛ po amʋ ꞌkpa ꞌꞌyi, -ka ɔ -kmaꞌa aꞌba dɩ ꞌle a-bee -mnʋʋ kɩkmaꞌa -kɩkma dɩ, -bho ɛ po amʋ ꞌkpa ꞌꞌyi -lrɛɛ, ꞌle, -bho a -ke *-Lagɔꞌɔ Lisaazuzuꞌa ꞌꞌyisisriɛ -ke aꞌba ꞌꞌbhiꞌa tikpʋkpʋɛn po amʋ ꞌkpa ꞌꞌyi ꞌꞌbhalrɛɛke, -bho aꞌba ꞌlimʋ nɩnmɔ ꞌꞌkpi wɔn, -bho a -ka ngaze-e ꞌyɩye a,
Ⅱ ꞌꞌlemnɩɩ, a kɩkma -kɩkma dɩ ꞌꞌkɔmʋ, ꞌle a ꞌke -naagɩ -ke -pɔlʋ -lue ꞌbhle ꞌꞌkɔmʋ! ꞌLe, ꞌbʋbʋa ꞌɩn-ɩ liꞌa aꞌba dɩ, ɛ ꞌke ꞌtɔ ꞌꞌyiꞌbhɛ tenyɩ.
Ⅲ ꞌLe aꞌba nʋnʋkpli ꞌmʋ, aꞌba zi aꞌba ꞌꞌbhiꞌa ꞌꞌsɛꞌɛ dɩ -le, aꞌba ꞌbhɛɛ aꞌba ꞌꞌbhi ꞌꞌyi -le! Lɛ a ꞌka nʋ a, ꞌɩnnɛ ꞌmo-o, a -ya aꞌba ꞌꞌbhi ꞌzɔ, ꞌle a ꞌke a -bonyunyu ꞌꞌyiꞌbhɛɛ, ɛ ꞌke aꞌba ꞌꞌbhi -zi.
Ⅳ Nyɔꞌɔ zi ꞌɔ ꞌꞌsɛꞌɛ -zɛgɛꞌɛ dɩ -le, ɔ zi ꞌɔ -bonyunyuꞌa dɩ -lrɛɛ!
Ⅴ *Zezii Kliisɩꞌa -pɔlʋ ɔ ꞌbhleꞌa a, ꞌɛ -pɔlʋtu aꞌba ꞌwee ꞌke ꞌbhle:
Ⅵ A -gblee, -ka -Lagɔ ꞌbhɛꞌɛ ꞌꞌyi ꞌle ɔ -kɔꞌɔ lɩ ꞌwee, -ka -lue ꞌmnɔ ꞌka-a ɔ -nɩꞌo -lrɛɛ. Ɛ -nɩꞌa -kaa ꞌmʋ a, ɔ -see tiꞌbɔ ɔ ꞌke ꞌbɩklagba ꞌmnɛ ꞌꞌsrii klapaa,
Ⅶ ꞌle ɔ ꞌye ɛ ꞌꞌyitiꞌꞌtayi, ɔ ꞌye ꞌɔ ꞌꞌbhuo ꞌzɔ -ya -plɛɛɛn!, ɔ ꞌye ꞌnɔɔ ꞌkmʋ ꞌmʋ yi ꞌle ɔ ꞌye nyunyɔku ꞌmʋꞌꞌluo. -Ka nyɔ-ɔ ꞌwlʋꞌa, ꞌka-a ɔ ꞌwlʋꞌo -lrɛɛ ꞌle ɔ ꞌye ꞌnɔɔ ꞌkmʋ ꞌmʋ -a-bʋ nyunyuꞌa ꞌꞌklumʋ -nɩ.
Ⅷ Ɔ -yaꞌa ꞌɔ ꞌꞌbhuo ꞌzɔ ɔ, ɔ ꞌꞌdu-o ꞌbho -Lagɔ. ꞌƆ -Lagɔꞌɔ ꞌbhoduɛɛ ꞌmnɛ mu-oꞌo ɛ ꞌye ꞌɔ ꞌmɛmɛɛ ꞌꞌkpi bhla, -ka, -bho ꞌgbokobhleyi ꞌmɛ ꞌbho nyʋyrilbhaatu ꞌꞌyri ngazeka, ꞌwa ꞌlɔ ꞌɔ lɛ, ꞌɛ ꞌꞌnyinynimɛmɛɛtu ɔ ꞌwɔɔnꞌo.
Ⅸ ꞌƖnnɛ ꞌbhleꞌe ꞌnynɩꞌa dɩ a, -Lagɔ ꞌbhɛɛ ꞌnɔ ꞌꞌyi, ɔ ꞌye ɔ ꞌnynɩklagba ꞌꞌkpi po, ꞌle ɔ ꞌye ɔ ꞌbɩklagba ꞌꞌnyɩ ꞌle ɔ ꞌke lɩ ꞌwee -kɔ. ꞌNynɩ-ɩ ꞌbhɛꞌɛ ꞌꞌyi -ɛ ziꞌa ꞌnynɩ ꞌwee, ꞌɛ ꞌnynɩtu ɔ ꞌꞌnyɩ ɔꞌo.
Ⅹ ꞌKa-a ɛ -nɩꞌe ꞌmʋꞌa dɩ a, nyʋ ꞌwee -Lagɔ -yaꞌa ti ꞌle yaku ꞌli o, -daa ꞌbhlʋkpa ꞌꞌkpi o -ke ꞌmɛmʋ -ke ꞌꞌbhi-i -nɩꞌa ꞌle glu o, ꞌle ʋn ꞌke Zeziiꞌa ꞌnynɩ ꞌbʋꞌwɔn ɔ, ꞌwa ꞌwee, ʋn ꞌke ꞌwlɛ ꞌmʋ yi ꞌbho ꞌɔ ꞌꞌyigbeyi ꞌle ʋn ꞌke ɔ bʋbɔ,
Ⅺ ꞌle ʋn ꞌke ꞌɔ ꞌnynɩ ꞌꞌyiꞌbhɛɛ ꞌle ʋn ꞌke na, Zezii Kliisɩ, ꞌɩnnɔ ꞌmo-o lɩ ꞌweeꞌa -Kɔyi, nʋ. -Bho ʋn nʋ -kaa a, ꞌꞌlemnɩɩ -aꞌba -tɩta -Lagɔꞌɔ ꞌnynɩ-ɩ ꞌye-e ꞌꞌyiꞌbhɛ-ɛ -mʋ -lrɛɛ. ꞌBho Zeziiꞌa leyinɔɔ ti, ꞌbho-o ꞌya lɩtu ꞌke -nʋ-ɛ -nɩ.
Nʋnʋkpli *Zeziiꞌa nyʋ ꞌka ti-nɩ
Ⅻ ꞌKa-a ɛ -nɩꞌe ꞌmʋꞌa dɩ a, ꞌan dɩkmalotʋꞌa ꞌꞌnynuu-a, -Lagɔꞌɔ wluꞌa ꞌmʋzayi ꞌɩn ꞌꞌduꞌa dɩ a ꞌꞌdu ꞌbho ꞌɩnmʋ! -Da ꞌɩn -nɩꞌa ꞌle aꞌba ꞌꞌklumʋ a -nɩꞌe-e ꞌɛ kpli ti ꞌle a-a ꞌꞌduꞌo ꞌbho ꞌɩnmʋ. ꞌꞌYri -ke ꞌꞌyi ꞌɩn seꞌa ꞌbho -nɩ a, a nʋ -kaa ꞌꞌkɔmʋ! ꞌƖn na, a ꞌpʋn-oꞌo ꞌbho -Lagɔꞌɔ ꞌꞌyigbeyi. ꞌƐ dɩ a kuku ꞌmʋti, ꞌle, kplizɩgɩ nyɔ-ɔ ꞌpʋnꞌa ꞌka nʋ a, a ꞌke ɩ nʋ! -Bho a -kɩ ɩ-ɩ nʋ a, a ꞌꞌdu ꞌbho -Lagɔ ꞌle a ꞌke ꞌɔ -sɩanyɩ ku ꞌmʋti ꞌbhle, a ꞌke aꞌba ꞌꞌbhi ꞌꞌyriliꞌꞌdu ꞌle a -kaa ꞌɔ lbhʋ ꞌmnɛ nɛsrɛ -nɩ.
ⅩⅢ A -gblee, ꞌɔ ꞌꞌbhuo-o nʋ ɛꞌo ꞌle aꞌba -pɔlʋ gbo a ꞌke ɛ ꞌbhɛɛ. ꞌƖnnɛ ꞌmo-o, ɔ-ɔ nʋ -ɛꞌo ꞌle a-a ꞌwɔnꞌo, a-a nʋꞌo ꞌɔ ꞌgwlʋdɩ.
ⅩⅣ ꞌƖn-ɩ ꞌtmʋʋꞌo amʋ-ɛ, a ꞌꞌdu aꞌba ꞌꞌbhi ꞌꞌyrili, ɩ-bɩ ꞌɔ lbhʋ ꞌwee a-a nʋꞌa a, ꞌle a -kaa ꞌɛ dɩ ꞌzɔtiwluwlu. A nʋ ɩ! Aꞌba -pɔlʋꞌa ꞌgble-ɛ ꞌmʋ -le ꞌle a ꞌke ɩ nʋ -susueyi!
ⅩⅤ ꞌLe aꞌba -pɔlʋ ꞌke -kaa ꞌɔ ꞌꞌsɛ ꞌꞌkpi -nɩ a, a -see ꞌbɩ liꞌbhle yi ꞌle aꞌba dɩ ꞌke ꞌꞌyrili-nmɔ, a ꞌke ꞌɔ ꞌꞌyreetɩzɩgɩ ꞌꞌdu. ꞌLe ꞌnɔɔ ꞌkmʋ ꞌmʋꞌa nyʋ -ke ꞌꞌklumʋ a -nɩꞌa a, ʋn se ꞌꞌyiꞌsrɛɛ ꞌle ꞌwa kpli -nyniꞌe ꞌꞌyrili. ꞌƐ dɩ a, -ka ꞌcʋdrɩ-ɩ fanꞌa ꞌle yaku ꞌꞌyi ꞌle ɩ-ɩ poꞌa nyʋ -jolʋ gbo a, ꞌka-a a ꞌke -nɩ ʋ -bodɩ ꞌle a ꞌke ʋ *Zezii *Kliisɩꞌa ꞌꞌdɩzɩgɩ kpa,
ⅩⅥ ꞌle ʋn ꞌke ꞌꞌkɔgwlɛtinɩɛ ꞌye -lrɛɛ. -Bho a nʋ -kaa a, ꞌbho Kliisɩꞌa leyinɔɔ ꞌꞌyi, ꞌɩn-ɩ ꞌye-e ꞌbɛtɛ -wa -mʋ ꞌɩn ꞌke ꞌbʋbʋa li aꞌba dɩ, ɛbɛ ꞌmnɛꞌɛ kamʋ: -ka ꞌɩn -seeꞌa bhebhelbhʋ nʋ, ꞌbho-o ꞌɛ ꞌꞌyriꞌa ꞌbɩ-ɩ ꞌye ꞌwlʋ -nɩ mʋ.
ⅩⅦ A -gblee, -ka a deꞌa Zezii Kliisɩ ꞌꞌgwli, ꞌle a-a ꞌꞌduꞌa ꞌbho -Lagɔꞌɔ wlu ꞌle ɛ-ɛ bhlaꞌa aꞌba sɩasɩaa ꞌꞌkpi a, ɛ kɔɔꞌɔ-ɔ -ka nyɔ-ɔ zaꞌa *ꞌsraga ɔ -bodɩ. -Ka nyɔ-ɔ ꞌwlaꞌa nmɔ ꞌbho ꞌsragamʋzanmiꞌa ꞌꞌkpi ti -tanyɩke-ɔ ꞌle ɔ-ɔ zɛ ꞌɛ ꞌsraga ꞌmʋ ꞌle ɔ-ɔ nynia ꞌnɛ -kaa ꞌꞌyi, ꞌle a ꞌke Zezii ꞌꞌgwlideꞌa dɩ ꞌɩn sɩaꞌo tenyɩ, -bho ꞌɩn ꞌmɛ ꞌtɔ ꞌɛ -kaabolbhʋtuꞌa dɩ, ꞌka-a ɛ ꞌke ꞌkɩ ꞌmʋ-nɩ. ꞌƐ dɩ, -bho ɛ -nɩ -kaa a, ꞌbʋbʋa ꞌke ꞌɩnmʋ ꞌlbha ꞌle aꞌba ꞌweeꞌa dɩ ꞌɩn ꞌke amʋ ꞌꞌkpiꞌkpa ꞌle ꞌɩn -ke a ꞌke ꞌbʋbʋa -dalue -li -nɩ.
ⅩⅧ ꞌLe abʋ gbo ꞌya a, ꞌlotʋꞌa ꞌꞌnynuu-a, a li ꞌbʋbʋa -lrɛɛ ꞌle a ꞌke ꞌɩnmʋ ꞌꞌkpiꞌkpa ꞌan dɩ, ꞌle ꞌɩn -ke a ꞌke ꞌbʋbʋa li!
Kpanmʋmalbhʋ ꞌbho -Lagɔjeyi
ⅩⅨ ꞌBho ꞌɛ lemʋ a, ꞌlotʋꞌa ꞌꞌnynuu-a, ꞌɩn ꞌde-e ꞌꞌgwli na ɛ -see ꞌmʋ-gwle yi ꞌle -aꞌba -Kɔyi *Zezii ꞌke ꞌwɔn ꞌle ꞌɩn ꞌke Timotee lbho ꞌle a gbo. -Bho ɔ mu, ꞌle, aꞌba ꞌꞌdɩ -ke ɔ-ɔ ꞌyeꞌa le -yi mʋ, ɩ ꞌke ꞌɩnmʋ ꞌbʋbʋa ꞌꞌyi ꞌlbhaa.
ⅩⅩ A -gblee, nyɔ -yɔ ꞌka ꞌɔ ka -nɩ, ꞌɩn ꞌka ꞌle a gbo lbho a, ɔ se -laa ꞌan ꞌꞌtroli -nɩ, -bho ɛ -se ɔ -nɩ -lue ꞌtɩn, ꞌɔ ꞌꞌsɛ-ɛ popoꞌo aꞌba dɩ ꞌgwlʋti ꞌle ɔ-ɔ ꞌbɔꞌɔ ti ɔ ꞌke amʋ -kpa.
ⅩⅪ Nyʋ -yʋ ꞌwlaꞌa ꞌbho ti, ꞌwa ꞌꞌbhiꞌa -zɛgɛꞌɛ dɩ ʋn-ʋ ziꞌo. -Bho ɛ ꞌꞌdu Zezii *Kliisɩꞌa dɩ, ꞌwa dɩ se ɛ ꞌꞌkpi -nɩ.
ⅩⅫ -Yɔ ꞌma-a Timotee a, a yiboꞌo-o, nyɔzɛgɛ ɔ ꞌꞌduꞌo. ꞌƖn -ke ɔ -nɩ ꞌsɔn, -a ꞌye gbobhete ꞌle -a ꞌye Zeziiꞌa ꞌꞌdɩzɩgɩꞌa kpalbhʋ nʋ. ꞌLe ɛ-bɛ lbhʋ ꞌmnɛ nʋnamʋ, -ka ꞌꞌyu-u kpa ka ꞌɔ -tɩta, ꞌka-a ꞌɩn -ke ɔ ꞌꞌsisriꞌo.
ⅩⅩⅢ A ꞌye li-ɔ, -da ꞌɩn-ɩ ꞌyeꞌa ꞌan ꞌꞌkpidɩ ꞌmʋtiꞌwɔn -nɩ mʋ ꞌꞌsɩkɩsɩkɩ, ꞌbho-o ꞌɩn-ɩ ꞌye ɔ ꞌle amʋ gbo -lbho -nɩ mʋ.
ⅩⅩⅣ ꞌLe ꞌɩn deꞌe ꞌꞌgwli -lrɛɛ ɛ -see ꞌmʋ-gwle yi ꞌle -aꞌba -Kɔyi Zezii ꞌke ꞌwɔn ꞌle ꞌmna-aꞌa ꞌꞌbhuo ꞌke ꞌle a gbo yi ꞌle ꞌɩn -ke a ꞌke ꞌyɩye.
ⅩⅩⅤ ꞌLe ꞌꞌyri -ke ꞌꞌyi -a -nɩꞌa -laa, -aꞌba ꞌlotʋꞌa ꞌꞌyu Epafloditɩ -mnɔɔ -bodɩ a, ꞌɩn ꞌde-e ꞌꞌgwli ɛ -nmɔꞌɔ-ɔ ꞌꞌyrili ɔ ꞌke ꞌle a gbo le yi. ꞌƐ dɩ ꞌɩn-ɩ ꞌꞌnyɩ ꞌɔ -jolʋ. Ɔbɔ ꞌmnɔ, ꞌɩnnɔ a ꞌꞌnyɩꞌe ꞌjɛmɔni, ꞌle a ꞌye ɔ ꞌnɔɔ ꞌɩn gbo lbho ꞌan -kpakpakamʋ ꞌle lɩ -lrɩɩ ꞌmʋ ɔbɔ-ɔꞌɔ ꞌꞌbhuo ꞌke ꞌɩnmʋ -kpa -lrɛɛ. Ɔ yiꞌa a, -ziaka ɔ ꞌye ꞌɩnmʋ -kpa ꞌle ꞌɩn -ke ɔ ꞌye gbobhete -a ꞌye -Lagɔꞌɔ lbhʋ nʋ, ꞌle -a ꞌye ꞌꞌgwli-ku -a ꞌye Zeziiꞌa ꞌꞌdɩzɩgɩ nyʋ -bodɩ ꞌmʋ-za.
ⅩⅩⅥ A -gblee, -nɔɔ -lrɛɛ gbɛ ꞌli a ꞌwɔn-ɔ ꞌbɔ na ꞌɔ ꞌꞌlru ꞌbhatiꞌo tenyɩ. -Ka ꞌɔ ꞌꞌlrubhatiwlu nyniꞌa ꞌle amʋ gbo, ɔbɔ-ɔꞌɔ ꞌꞌbhuo yiboꞌo-o ꞌnaꞌa dɩ, ɔ -kaaa ꞌtraamʋ ꞌꞌlrubhatibhlʋkpa ꞌꞌyi-i ꞌwlʋ a, ꞌɔ -pɔlʋ -see bhlu ke. Ɔ-ɔ ꞌbɔ-ɔ ti ɔ ꞌke ꞌle a gbo le yi ɔ ꞌke amʋ -pɔlʋ ꞌꞌkpi zɩza.
ⅩⅩⅦ Kɩn! ꞌWɛ ꞌkpʋn -ɔꞌo -ziaka. Ɔ ꞌꞌtaflɛꞌɛ-ɛ ꞌmɛmɛɛ ꞌle -Lagɔ ꞌye ɔ ngaze ꞌye ꞌle ɔ ꞌye ꞌpʋn. Ɛ -se ꞌɔ ꞌꞌsɛꞌɛ dɩ -ko. -Bho ɔ -see ꞌmɛ, ꞌmna-aꞌa ngaze -Lagɔ ꞌyeꞌo -lrɛɛ, ꞌle ꞌɔ ꞌmɛmɛɛ -kaa ꞌan ꞌkleyeɛɛ ꞌꞌkpi po.
ⅩⅩⅧ ꞌƐ kamʋ ꞌɩn-ɩ ꞌꞌtɩtraꞌa li ꞌɩn ꞌke ɔ -jolʋ ꞌꞌnyɩ, ꞌle, -bho ɔ nyni ꞌle a gbo ꞌle a ꞌke ɔ ꞌye a, ꞌbʋbʋa ꞌke amʋ ꞌlbha ꞌle aꞌba -pɔlʋ ꞌke bhlu. -Bho ɛ -nɩ -kaa a, ꞌmna-aꞌa ꞌgwlʋtipopoɛ ꞌbho aꞌba ꞌꞌkpi, ɛ ꞌke ꞌꞌkpi-cɛ -lrɛɛ.
ⅩⅩⅨ -Bho ɔ yi ꞌle a gbo a, -ka nyɔ ꞌka -aꞌba -Kɔyi Zeziiꞌa nyɔ kpʋn, a kpʋn ɔ -kaa ꞌle a ꞌke ɛ nʋ ꞌle ꞌbʋbʋa ꞌmʋ, -ɛkedɩmaa, ɔ ꞌmo-o ꞌbho -aꞌba -Kɔyi ꞌmnɔꞌɔ -jolʋ ꞌꞌyiꞌa ꞌlotʋꞌa ꞌꞌyuzɛgɛ. -Kaabonyʋ -nɩꞌa -kaa, ꞌɩnnʋ a ꞌke ꞌbho ꞌꞌdu.
ⅩⅩⅩ A ꞌye li-ɔ, Zezii Kliisɩꞌa lbhʋ ꞌbhle-e ꞌnynɩꞌa dɩ ɔ ꞌꞌtaflɛꞌɛ ꞌmɛmɛɛ. Aꞌba ꞌꞌbhi se ꞌbhɛɛ a ꞌke ꞌbho ꞌɩn gbo yi a ꞌke ꞌɩnmʋ -kpaꞌa dɩ, ɔbɔ ꞌmnɔ, ɔ -see ꞌɔ ꞌꞌbhuoꞌa tinɩɛꞌɛ dɩ zi ꞌle ɔ ꞌye ꞌbho ꞌɩn gbo yi, ɔ ꞌye ꞌɩnmʋ -kpa ꞌbho aꞌba ꞌbɩ ꞌmʋ.