ⅩⅣ
*Zezii ꞌꞌdu-o *ꞌɔ -namʋ ꞌꞌdɩ ꞌmʋ
Ⅰ Ɩ ziꞌa -kaa, ꞌle *Zezii ꞌye ꞌbho ꞌkpa ꞌle ɔ-ɔ ꞌꞌduꞌo *ꞌɔ -namʋ ꞌꞌdɩ ꞌmʋ ꞌle ɔ na: Aꞌba ꞌbhɔ ꞌɩn -ke -Lagɔꞌɔ ꞌꞌgwlideɛꞌɛ dɩ -le! Nymɔ ꞌbhɔ amʋ ꞌgwlʋ ꞌꞌsidɩ!
Ⅱ ꞌNɔɔ ꞌan -tɩta -Lagɔ -nɩꞌa ꞌle yaku ꞌli, ꞌbɩ-ɩ ꞌwlaꞌa ꞌle ti. ꞌƖn-ɩ muꞌo ꞌle-ɛ ꞌle ꞌɩn ꞌke aꞌba -denɩ nmaze. -Bho ɛ -se ꞌkɩ-ɩ -ziadɩ, ꞌɩn -zɩ ɩ ꞌkɩ amʋ -bodɩ ꞌmʋ-ɔ see.
Ⅲ -Bho ꞌɩn gwɛ ꞌya nmazeɛ ꞌꞌyi, ꞌle ꞌɩn ꞌke aꞌba dɩ yi, ꞌle, -da ꞌɩn -nɩꞌa a, a-bee -mnʋʋ ꞌke ꞌbho -nɩ -lrɛɛ.
Ⅳ -Jolʋ muꞌa ꞌle, a yibo nɛ-ɛꞌo see.
Ⅴ ꞌLe Tomaa na: ꞌAn -Kɔyi, ꞌnɔɔ -a ꞌyeꞌa -mu mʋ, -a-bʋ seꞌa ꞌle yibo ꞌle, kbhoo -a ꞌke ꞌleꞌa -jolʋ yiboꞌa?
Ⅵ ꞌLe ɔ na: -Bho nyɔ ꞌke -Lagɔ yibo, ꞌle ꞌan ꞌꞌsɛ ꞌmʋ ɔ ꞌke -zi -nɩ. -Ka -Lagɔꞌɔ dɩ ꞌꞌduꞌa -ziadɩ, -bho ɔ ꞌke ɩ yibo ꞌle ɔ ꞌke ꞌꞌkɔgwlɛtinɩɛ ꞌye, ꞌle ꞌɩn ꞌmʋ ꞌɔ nyɔtu ꞌke -zi -nɩ -lrɛɛ.
Ⅶ -Bho a yibo ꞌkɩ ꞌɩnmʋ -ziaka, a-a yibo ꞌko-o ꞌan -tɩta -Lagɔ -lrɛɛ. ꞌTraamʋꞌa ꞌꞌbhuo, a ꞌye -ɔꞌo ꞌle a yibo nɔꞌo!
Ⅷ Ɔ ꞌlɛꞌɛ -kaa, ꞌle Filiipʋ na: ꞌAn -Kɔyi, -bho -aꞌba ꞌgwlʋ ꞌke ꞌwɔn, -tɔ -amʋ -aꞌa -tɩta -Lagɔ ꞌꞌyi!
Ⅸ ꞌLe ɔ na: Filiipʋ, ꞌɩn -ke a -gwleꞌe-e -nanamʋ, leedɩ -ɩn se ꞌɩnmʋ yiboꞌa? Leedɩ -a nʋꞌo ꞌɩn -tɔ nɔ amʋ ꞌꞌyiꞌa? Nyɔ -yɔ ꞌyeꞌa ꞌɩnmʋ a, ɔ ꞌye -ɔꞌo -lrɛɛ.
Ⅹ -Ka ꞌɩn -ke ɔ ꞌꞌsisriꞌa ꞌꞌyi, -ɩn -see ɩ ꞌꞌgwlide ꞌmaae? Dɩ ꞌɩn-ɩ zaꞌa amʋ -bodɩ ꞌmʋ, ɛ -se ꞌɩnmɔ ɩ-ɩ ꞌwlʋ ꞌmʋ ꞌnɩ -ko. ꞌAn -tɩta -Lagɔ -ke ꞌɩn ꞌꞌsisriꞌa ꞌꞌyi, ꞌɔ wlu moꞌo. ꞌƖnmɔ ɔ-ɔ zi nɩꞌe ꞌmʋ, ꞌle ɔ-ɔ nʋꞌo ꞌɔ lbhʋ.
Ⅺ -Bho ꞌɩn nʋ ꞌɩn -ke ɔ ꞌꞌsisriꞌe-e ꞌꞌyi a, a ꞌlɩ ɩ -ziadɩ, ꞌle ꞌɔ *wɔnkulɩꞌa ꞌꞌlru ꞌꞌyi, a ꞌwɔɔn nɩ ꞌꞌbhalrɛɛke!
Ⅻ -Ziadɩ ꞌɩn-ɩ zaꞌa amʋ -bodɩ ꞌmʋ, wɔnkulɩ ꞌɩn-ɩ nʋꞌa, nyɔ-ɔ deꞌa ꞌɩnmʋ ꞌꞌgwli, ɔ-ɔ ꞌye -ɩ -nʋ -mʋ -lrɛɛ. ꞌƖn-ɩ ꞌmu-o ꞌan -tɩta -Lagɔ gboꞌa dɩ, -yɩ ɔ-ɔ ꞌyeꞌa -nʋ mʋ, ɩ-ɩ ꞌye ꞌꞌyiꞌbhɛ mʋ ꞌle ɩ ꞌke ꞌan nɩ ꞌmʋ-zi.
ⅩⅢ ꞌAn ꞌnynɩ a ꞌbhleꞌe ꞌꞌkpiꞌa dɩ, lɛꞌꞌo lɛ a ꞌbɔꞌɔ ti a, ꞌɩn-ɩ ꞌye ɛ amʋ ꞌꞌlruli-nʋ mʋ, ꞌle, ꞌɩnmɔ -Lagɔꞌɔ ꞌꞌyu, -ka ꞌɩn-ɩ ꞌbhɛɛꞌɛ ꞌɔ ꞌnynɩ ꞌꞌyi, nyʋ ꞌke ɩ yibo.
ⅩⅣ -Bho a ꞌbɔ ti, ꞌle ꞌan wɔnkuɛ ꞌmʋ ꞌɩn ꞌke amʋ lɛ -bodɩ nʋ, ꞌɩn-ɩ ꞌye -ɛ -nʋ -mʋ.
*Zezii ꞌꞌdu-o *ꞌɔ -namʋ *-Lagɔꞌɔ Lisaazuzu wɔn ꞌmʋti
ⅩⅤ Ɔ poꞌa wlu ꞌmnɛ ti a, ꞌle ɔ ꞌye ꞌbho wlu -lrɛɛ kɔ ꞌle ɔ na: -Bho a -kma ꞌan dɩ -ziaka, dɩ ꞌwee ꞌɩn-ɩ zaꞌa amʋ -bodɩ ꞌmʋ, a-a ꞌye -ɩ -lokui-po -mʋ ꞌle a ꞌke ɩ ꞌbho ꞌꞌdu.
ⅩⅥ ꞌƖn-ɩ ꞌye-e ꞌan -tɩta -Lagɔ ꞌtmʋʋ -mʋ, ɔ ꞌke amʋ aꞌba -kpayi -lrɔɔ -jeyi po ꞌle a -ke ɔ ꞌke -na ꞌꞌkɔmʋ. -Ka -Lagɔꞌɔ dɩ ꞌꞌduꞌa -ziadɩ, *ꞌɔ -zuzu zɩ ꞌɩ ꞌmʋ, ꞌɩnnɔ moꞌo.
ⅩⅦ Nyʋ -yʋ seꞌa -Lagɔ yibo, ɔ -see ɔ ʋ ꞌꞌnyɩ yi, -ɛkedɩmaa, ʋn se ꞌbhɛɛ ʋn ꞌke ɔ yibo. Ɛ -nɩꞌa -kaa ꞌmʋ, a-bee -mnʋʋ yibo nɔ-oꞌo, -ɛkedɩmaa, ɔ -nɩꞌe-e -laa aꞌba ꞌꞌtroli, ꞌle ɔ-ɔ ꞌye amʋ ꞌmʋ-nɩ mʋ.
ⅩⅧ ꞌƖn -see amʋ ꞌꞌkuenynuu ꞌmʋ sie. ꞌƖn-ɩ ꞌye-e amʋ -bodɩ le -yi -mʋ.
ⅩⅨ ꞌLe ꞌwɩ gbɩ ꞌli, nyʋ-ʋ -seeꞌa ꞌɩnmʋ ꞌꞌgwlide, ʋn -see ꞌɩnmʋ ꞌye yi ꞌꞌkɔmʋ. Aꞌba ꞌꞌsɛ-ɛ ꞌye ꞌɩnmʋ ꞌye mʋ ꞌle a ꞌke ꞌɩnmʋ yibo, -ɛkedɩmaa, tinɩɛzɛgɛ-ɛ seꞌa ꞌꞌtiinamʋ ꞌbhle, -ka ꞌɩn ꞌye ꞌɛ ɛ, ꞌka-a a -nɩꞌo -lrɛɛ.
ⅩⅩ -Bho ꞌɛ -nɔɔ nyni, -ka ꞌɩn -ke ꞌan -tɩta -Lagɔ ꞌꞌsisriꞌa ꞌꞌyi, ꞌle ꞌɩn -ke a-bee -mnʋʋ-ʋ ꞌyeꞌa ꞌꞌyiꞌꞌsisri mʋ -lrɛɛ, ꞌbho-o a-a ꞌye ɩ ꞌmʋtiꞌwɔn -nɩ mʋ.
ⅩⅪ Dɩ ꞌɩn -zaꞌa amʋ -bodɩ ꞌmʋ, nyɔ-ɔ po ꞌɩ -lokui, -ɔ ꞌꞌdu ꞌɩ ꞌbho, ꞌɔ nyɔtu -kmaꞌa ꞌan dɩ. ꞌAn -tɩta -Lagɔ-ɔ ꞌye-e ꞌɔ dɩ -kma -mʋ. ꞌƖn-ɩ ꞌye-e ꞌɔ dɩ -kma -mʋ, ꞌan ꞌꞌbhuo-o ꞌye -ɔ gbo -yi -mʋ ꞌle ɔ ꞌke ꞌɩnmʋ yibo.
ⅩⅫ A -gblee, *Zeziiꞌa -namʋꞌa -lue ʋn-ʋ ꞌlaꞌa Ziidɩ, (ꞌɩn -see Zidaa Isikaliyoo nʋ) ꞌle ɔ na: ꞌAn -Kɔyi, leedɩ -ɩn ꞌke -aꞌba ꞌꞌsɛ gbo yi ꞌle -ɩn ꞌke -amʋ -aꞌa ꞌꞌbhuo ꞌꞌyi-tɔ ꞌle -ɩn -see -kaa -aꞌba -bonyunyu -lrʋʋ -bodɩ -nʋ yiꞌa?
ⅩⅩⅢ ꞌLe ɔ na: Dɩ ꞌɩn-ɩ zaꞌa ꞌmʋ, nyɔ-ɔ ꞌye ꞌɩ ꞌbho ꞌꞌdu mʋ, ꞌɩnnɔ -kmaꞌa ꞌan dɩ. -Bho ɛ -nɩ -kaa ꞌmʋ a, ꞌan -tɩta -Lagɔ-ɔ ꞌye-e ꞌɔ dɩ -kma -mʋ, ꞌle ꞌɩn -ke ɔ ꞌke ɔ -bodɩ yi, -a ꞌke ɔ ꞌmʋ ti-de.
ⅩⅩⅣ Nyɔ-ɔꞌɔ poꞌa ꞌan wlu -lokui, ꞌɔ nyɔtu se ꞌan dɩ -kma. Dɩ ꞌɩn-ɩ zaꞌa amʋ -bodɩ ꞌmʋ, ꞌan -tɩta -Lagɔ lbhoꞌa ꞌɩnmʋ ꞌnɔɔ ꞌkmʋ ꞌmʋ, ꞌɔ wlu moꞌo. Ɛ -se ꞌan ꞌꞌbhuoꞌa nɛ -ko.
ⅩⅩⅤ -Bhladɩ ꞌɩn -ke a-a naꞌa a, ꞌɩn-ɩ ꞌzɩ -ɩ amʋ -bodɩ ꞌmʋ.
ⅩⅩⅥ A ꞌye li-ɔ, ꞌle ꞌan wɔnkuɛ ꞌmʋ, *Lisaazuzu ꞌan -tɩta -Lagɔ-ɔ ꞌyeꞌa amʋ -jeyi -po mʋ, -ɔ ꞌka aꞌba -kpayi ꞌꞌdu a, ꞌɩnnɔ ꞌye amʋ lɩ ꞌwee -tɔ mʋ, ꞌle, dɩ ꞌwee ꞌɩn -zaꞌa amʋ -bodɩ ꞌmʋ, ɔ ꞌke ɩ amʋ ꞌgwlʋtipopo.
ⅩⅩⅦ A -gblee, ꞌɩn-ɩ ꞌsie-e amʋ -pɔlʋꞌa bhlubhlua li. ꞌAn -pɔlʋꞌa bhlubhlua ꞌɩn-ɩ ꞌꞌnyɩꞌe amʋ. Nyʋ-ʋ seꞌa -Lagɔ yibo, -ka ꞌwa -pɔlʋꞌa bhlubhlua -nɩꞌa a, -yɛ ꞌɩn-ɩ ꞌꞌnyɩꞌa amʋ, ɛ -ke ɛ se ꞌꞌyitigʋgɔ. Nymɔ ꞌbhɔ amʋ ꞌgwlʋ ꞌꞌsidɩ! -Sɩanyɩ ꞌbhɔ amʋ ꞌlbhadɩ!
ⅩⅩⅧ Wlu ꞌɩn -zaꞌa amʋ -bodɩ ꞌmʋ ꞌtraamʋ, a ꞌwɔnꞌɔ ꞌbɔ, ꞌɩnnɛ ꞌka-a: ꞌƖn na, ꞌɩn-ɩ ꞌmu-o ꞌan -tɩta -Lagɔ gbo le, ꞌle ꞌɩn ꞌke amʋ -bodɩ le yi. A -gblee, ɔ ꞌbhɛ-ɛ ꞌꞌyi tenyɩ, ɔ ꞌye ꞌɩnmʋ -zi. ꞌƐ dɩ, -bho a ꞌwɔn ꞌbɔ na ꞌɩn-ɩ ꞌmu -ɔ gbo a, -bho a -kma ꞌkɩ ꞌan dɩ -ziaka, a-a li ꞌko-o ꞌbʋbʋa.
ⅩⅩⅨ ꞌYa -nɔɔ ꞌꞌsri ꞌle nya, ꞌle ꞌɩn-ɩ zɩ ꞌɩ amʋ -bodɩ ꞌmʋ, ꞌle, -bho ɛ nyni, a ꞌke ꞌan wlu -ziadɩ ꞌla.
ⅩⅩⅩ ꞌꞌNyinynidɩꞌa tiyayi -ɔ -poꞌa nyʋꞌa -dadudu -kpɛɛ ꞌmʋ, ɔ -nɩꞌe-e yinamʋꞌa dɩ, ꞌɩn -ke a -see ꞌtɔ -wlu yi tenyɩ. Ɔ se ꞌɩnmʋ wɔnyiꞌbhɛɛ.
ⅩⅩⅪ Ɛ -nɩꞌa -kaa ꞌmʋ a, ꞌan -tɩta -Lagɔꞌɔ wlu ꞌɩn-ɩ ꞌye ꞌwɔɔn mʋ, ꞌle, -ka ꞌɩn -kmaꞌa ꞌɔ dɩ, ʋ-bʋ nyʋ ꞌmnʋ ꞌke ɩ yibo. A -gblee, ɔ poꞌa wlu ꞌmnɛ ti a, ꞌle ɔ na ꞌɔ -namʋ -bodɩ: A -sɔ ꞌmʋ, -a ꞌke -laa ꞌꞌdie cɛ!