Ⅴ
*Zezii ꞌmo-o *-Lagɔꞌɔ ꞌsragazamʋ ꞌꞌweꞌa -klagba
Ⅰ A -gblee, ꞌlotʋꞌa ꞌꞌnynuu-a, nyɔ-ɔ ꞌma-a *-Lagɔꞌɔ ꞌsragazayiklagba, -Lagɔꞌɔ ꞌꞌbhuo-o zɔ ꞌɔ ꞌbho ꞌle ꞌɔ -bonyunyuꞌa ꞌꞌklumʋ. Kɩn, -Lagɔ-ɔ cɛ ꞌnɔ-ɔ kpɔ, ꞌle ꞌɔ nyɔtu ꞌke nyunyu ꞌmnʋꞌa ꞌnynɩmʋ -nɩ, ꞌle ɔ ꞌke *ꞌsraga -za ʋn -nɩ ꞌweeꞌa ꞌꞌnyinynidɩꞌa dɩ.
Ⅱ Nyunyɔ ɔbɔ-ɔꞌɔ ꞌꞌbhuo ꞌꞌduꞌo -lrɛɛꞌɛ dɩ, lɩ-ɩ seꞌa ꞌꞌyiꞌsrɛɛ ꞌbho -Lagɔꞌɔ ꞌꞌyigbeyi, -bho nyʋ -lrʋʋ -see dɩ gble ꞌle ʋn ꞌke ɩ nʋ, ɔ ꞌbhɛɛꞌo ɔ ꞌke ꞌwa ꞌꞌkpidɩ ꞌmʋtiꞌwɔn ꞌle ɔ ꞌke ʋ -kpa. -Ɛkedɩmaa, tidɩnlɩ-ɩ ꞌbhla-a ꞌwa klɛ ꞌꞌkpi ꞌle ɩ-ɩ po ꞌʋ ꞌꞌnyinynidɩ wɔn.
Ⅲ ꞌƖnnɛ ꞌbhleꞌe ꞌnynɩꞌa dɩ, nyʋ -lrʋʋ-ʋ nʋꞌa ꞌꞌnyinynidɩ, ꞌɔ -zaꞌa ꞌwa ꞌꞌsɛꞌɛ ꞌsraga. Ɩ ꞌꞌsri -ɔ ꞌꞌyi -lrɛɛ ꞌle ɔ ꞌke ꞌɔ ꞌꞌbhuoꞌa nɛ -za, ꞌle ɔ-ɔ zɛ ɛꞌo.
Ⅳ ꞌBho ꞌɛ lemʋ, -bho nyɔ ꞌybha ɔ ꞌke -Lagɔꞌɔ ꞌsragazayiklagba ꞌꞌdu, ɔ se ꞌbhɛɛ ꞌle ɔ ꞌke ꞌɔ ꞌꞌbhuo ꞌɛ lbhʋtu ꞌꞌnyɩ. -Lagɔ zɔ ꞌɔ ꞌle ꞌɔ -bonyunyuꞌa ꞌꞌklumʋ ꞌle ɔ-ɔ cɛ ꞌnɔ kpɔ ꞌɔ lbhʋ ꞌmnɛꞌɛ dɩ. ꞌƖnnɛ ꞌbhleꞌe ꞌnynɩꞌa dɩ, -aꞌba ꞌꞌna *Alɔɔ -nɩꞌa ti -bɛnyɩ, ɔ ꞌye ɔ ꞌbho -za ꞌle ꞌɔ -bonyunyuꞌa ꞌꞌklumʋ ꞌle ɔ ꞌye ꞌɔ ꞌsragazayiklagba ꞌꞌdu.
Ⅴ -Ka -lue ꞌmnɔ, ꞌka-a *Zezii *Kliisɩꞌa dɩ -nɩꞌe ꞌmʋ -lrɛɛ. Ɔ -see ꞌɔ ꞌꞌbhuo -Lagɔꞌɔ ꞌsragazayiklagbaꞌa lbhʋ ꞌꞌnyɩ. -Lagɔꞌɔ ꞌꞌbhuo-o -zɔ ꞌɔ ꞌbho ꞌle ɔ ꞌye ɔ ꞌtmʋʋ ꞌle ɔ na:
-Ɩnmɔ ꞌmo-o ꞌan ꞌꞌyu. -Zɩannamʋ, ꞌɩn-ɩ tɔ ꞌnɛ-ɛ nyʋ ꞌꞌyi, ꞌle ʋn ꞌke ɩ yibo.
Ⅵ ꞌƆ ꞌꞌbɔgʋꞌa ꞌfɔtɔ -lrɛɛ gbo, ꞌle ꞌɔ ꞌꞌkpidɩ -lrɩɩ ꞌye ꞌle ꞌcnɩ-ɛ na:
-Aꞌba -Kɔyi -Lagɔ na: -Ɩnmɔ ꞌmo-o ꞌan ꞌsragazayi ꞌle -ɩn ꞌke ɛ ꞌꞌdu ꞌꞌkɔgwlɛka. -Ka ꞌan ꞌsragazayi *Mɛkisedɛkɩ -nɩꞌa a, ꞌka-a -ɩn -nɩꞌo.
Ⅶ A -gblee, ꞌlotʋꞌa ꞌꞌnynuu-a, -da Zezii -nɩꞌa ꞌnɔɔ ꞌkmʋ ꞌmʋ, ɔ -see ꞌɔ ꞌꞌbhuo ꞌꞌyiꞌbhɛɛ. Ɔ ꞌwɔn-oꞌo ɔ ꞌke ꞌbho -Lagɔ ꞌꞌdu ꞌꞌkɔmʋ ꞌle ɛ ꞌke ꞌɔ ꞌmɛmɛɛꞌɛ ꞌꞌbhuo ꞌꞌkpi bhla. -Ka ɔ ꞌbhɛɛꞌɛ ɔ ꞌke ɔ ꞌmɛmɛɛꞌɛ wɔn ꞌmʋ -za, ɔ yibo nɩ-oꞌo. ꞌƐ dɩ, ɔ ꞌka ꞌmɛ ɛ, ɔ bhade ꞌnɔ li tenyɩ ꞌle ɔ ꞌke ɔ ꞌmɛmɛɛꞌɛ wɔn ꞌmʋ -za ꞌle ɔ-ɔ ꞌꞌviꞌo ꞌgagwloka. Ɛ -nɩꞌa -kaa ꞌmʋ a, ɔ ꞌwɔn-oꞌo ɔ ꞌye ɔ ꞌbho ꞌꞌdu ꞌle ɔ ꞌye ꞌmɛ. Ɔ ꞌꞌdu -ɔ ꞌbhoꞌa dɩ, ɔ nʋꞌa -kaa a, ɔ kpʋnꞌo ꞌɔ bhadewlu. Ɔ -see ɔ ꞌmɛmɛɛꞌɛ wɔn ꞌmʋ sie ꞌle ɔ ꞌye ɔ glu -za ꞌle ɔ ꞌye ti-nɩ -lrɛɛ.
Ⅷ Ɔ-ɔ ꞌmo-o -Lagɔꞌɔ ꞌꞌyu -ziaka. Ɛ -nɩꞌa -kaa ꞌmʋ a, lɛ-ɛ ꞌma-a ꞌkleyeɛɛ, ɔ ꞌye -ɛ wɔn, ꞌle, -ka ɔ ꞌꞌdu ꞌɔ ꞌbho ꞌle lɩ ꞌwee ꞌmʋ, nyʋ ꞌke ɩ yibo.
Ⅸ A -gblee, ɔ ꞌꞌdu ꞌɔ -kaa ꞌbho ꞌle lɩ ꞌwee ꞌmʋ, ꞌle, -ka ɔ ꞌbɔꞌɔ ti ɔ ꞌke -nɩ, ɔ -nɩꞌe ꞌtɔ -kaaꞌa dɩ, ɔ ꞌꞌduꞌo *nyʋꞌa ꞌpʋʋnyizɛgɛ. ꞌƖnnɛ ꞌbhleꞌe ꞌnynɩꞌa dɩ, nyɔꞌꞌo nyɔ-ɔ ꞌwɔɔn ꞌnɔ ꞌle -ɔ ꞌꞌdu ꞌɔ ꞌbho, ɔ-ɔ ꞌpʋʋn nɔꞌo ꞌle ɔ-ɔ ꞌꞌnyɩ ꞌɔ ꞌꞌkɔgwlɛtinɩɛ.
Ⅹ A ꞌye li-ɔ, ɔ-ɔ ꞌbɔ-ɔ -Lagɔꞌɔ ꞌgwlʋdɩ ti ꞌle ɔ-ɔ nʋ ꞌɛ kamʋ -Lagɔ nʋ ꞌɔ ꞌɔ ꞌsragazayiklagba ꞌmʋ. -Ka ꞌɔ ꞌsragazayi Mɛkisedɛkɩ -nɩꞌa a, ꞌka-a ɔ -nɩꞌo.
A ku ꞌtɔ ꞌꞌyriti ꞌbho -Lagɔjeyi
Ⅺ A -gblee, ꞌlotʋꞌa ꞌꞌnynuu-a, ꞌɩn ꞌbhle ꞌko-o ꞌtraamʋ dɩꞌa -dadudu ꞌɩn ꞌke ꞌkɩ gbɔzɩza ꞌle ꞌɩn ꞌke amʋ ꞌtmʋʋ ꞌbho *Mɛkisedɛkɩ ꞌmnɔꞌɔ ꞌꞌkpi. Ɛ -nɩꞌa -kaa ꞌmʋ a, ꞌɛ lɛtu -kmuꞌo-o ꞌꞌyi, -ɛkedɩmaa, aꞌba -lokui -kmuꞌo-o ꞌꞌyi.
Ⅻ A-bʋ ꞌke ꞌka ꞌtɔ nyʋ -Lagɔwlu -tɔ, abʋ ꞌmnʋ, -bho nyɔ yi ꞌbho -Lagɔjeyi -lreeka, lɩ ɔ-ɔ ꞌcɩanꞌa ꞌle -Lagɔwlu ꞌmnɛ ꞌli, a-bʋ se ɩ -bhla yibo -ka -zɛgɛka! A -gblee, lililɛ -kmuꞌa ꞌꞌyi, nyunyuzɩgɩ-ɩ liꞌa, -ka ꞌꞌyulre seꞌa ꞌbhɛɛ, ɔ ꞌke ɛ li ꞌle ꞌnyanyaꞌa ꞌꞌsɛ ꞌyeꞌa ꞌɔ lɛ ꞌꞌdu, ꞌka-a aꞌba dɩ -nɩꞌe ꞌmʋ ꞌbho -Lagɔjeyi.
ⅩⅢ Ʋ-bʋ ꞌꞌyreetɩ ꞌmnʋ, ꞌɩnnʋ nʋꞌo nyɩtaniꞌa ꞌꞌsɛ ꞌwa lililɛ ꞌmʋ. Ʋbʋ ꞌmnʋ -lrɛɛ, -ka nyɔ-ɔ zɩzaꞌa ꞌꞌnyinynilɛ -ke ꞌꞌyrilinmɔlɛꞌɛ -gbaa li, ꞌɩnnʋ se -kaa yibo.
ⅩⅣ Ɛ -nɩꞌa -kaa ꞌmʋ, -bho ꞌꞌyu ku ꞌtɔ ꞌꞌyriti, lililɛ -kmuꞌa ꞌꞌyi nyunyuzɩgɩ-ɩ liꞌa, ꞌɩnnɛ nyɔ-ɔ ꞌꞌnyɩ ɔꞌo. ꞌKa-a ɛ -nɩꞌe -lrɛɛ ꞌbho -Lagɔjeyi. Nyɔ-ɔ kuꞌa ꞌꞌyriti ꞌbho ꞌɛ ꞌꞌyi, -ɔ yiboꞌa ꞌꞌyisrɛɛlɛ -ke lɛ-ɛ seꞌa ꞌꞌyiꞌsrɛɛ, ɔ-ɔ ꞌmo-o nyɔ-ɔ ꞌka -Lagɔꞌɔ wlu ꞌmʋtiꞌwɔn -ka -zɛgɛka. ꞌKa-a ɛ -nɩꞌe ꞌmʋꞌa dɩ, nyɔ ꞌbhɛɛꞌo ɔ ꞌke ɛ ꞌɔ nyɔtu -tɔ.