Ⅲ
*Zezii ꞌmo-o -klagba ꞌbho -aꞌba ꞌꞌna *Moyiizɩꞌa damʋ
Ⅰ ꞌKa-a ɛ -nɩꞌe ꞌmʋꞌa dɩ, ꞌan ꞌlotʋꞌa ꞌꞌnynuu-a, ꞌle -Lagɔ ꞌye amʋ ꞌbho -za, a ꞌke ꞌɔ nyʋ ꞌꞌdu. *Zezii ɔ lbhoꞌa ꞌnɔɔ -amʋ gbo ɔ ꞌke -amʋ ꞌɔ ꞌꞌdɩzɩgɩ -ya, -ɔ ꞌꞌsiꞌa ꞌbho -ɔ ꞌꞌduꞌa ꞌɔ ꞌsragazayiklagba, a ꞌꞌdu ɔ ꞌꞌyrili! Lɩ -a deꞌa ꞌꞌgwli, -a zaꞌa nyʋ -bodɩ ꞌmʋ, ɔ-bɔ Zezii -ke ꞌꞌkpidɩ ɩ-ɩ zaꞌa ꞌmʋ, ꞌɔ nymɔ ꞌwla-a ti ꞌle ɔ ꞌye ꞌmɛ. -Aꞌba *ꞌsraga ɔ -zaꞌa -kaa, ꞌɩnnɛ zetieꞌe -amʋ ꞌle -aꞌba ꞌꞌnyinynidɩ ꞌmʋ ꞌle -a -ke -Lagɔ ꞌye -ybhɛ.
Ⅱ A -gblee, -bɛnyɩ a, -Lagɔ ꞌꞌnyɩ-e ꞌɔ -glɩgba -aꞌba ꞌꞌna *Moyiizɩ, ɔ ꞌke ɛ -jolʋ gbo po ꞌle ɔ ꞌye lbhʋ ꞌmnɛ nʋ -ka -zɛgɛka. Lbhʋ -ke dɩ ɔ-bɔ -Lagɔ lbhoꞌa ꞌnɔɔ ꞌkmʋ ꞌmʋ Zezii *Kliisɩ, -ka -lue ꞌmnɔ, ꞌka-a ɔ nʋ ɛꞌo.
Ⅲ Ɛ -nɩꞌa -kaa ꞌmʋ a, ꞌbho Moyiizɩꞌa damʋ, Zezii Kliisɩ ꞌmo-o -klagba. ꞌƐ dɩ -a ꞌke ꞌɔ ꞌnynɩ ꞌꞌyiꞌbhɛɛ. -Ɛkedɩmaa, nyɔ-ɔ poꞌa ꞌꞌyrilinmɔbudu, ꞌɔ ꞌnynɩ-ɩ muꞌo tenyɩ, ɛ ꞌye -budu ꞌmnɛꞌɛ ꞌꞌbhuo -zi. ꞌKa-a ɛ -nɩꞌe ꞌmʋꞌa dɩ, -aꞌba -Kɔyi Zezii Kliisɩ ꞌma-a -Lagɔꞌɔ nyʋꞌa ꞌbhleyi, ɔ ꞌꞌduꞌo -klagba ꞌbho Moyiizɩ -ke -Lagɔꞌɔ nyʋ -lrʋʋꞌa damʋ.
Ⅳ A -gblee, -Lagɔꞌɔ -glɩgba ꞌɩn-ɩ poꞌo -budu ꞌꞌyi. -Aꞌba klɛ yiboꞌo-o na, ꞌnɔɔ ꞌbhlʋkpa ꞌꞌkpi, -buduꞌꞌo -budu ꞌbhle-e poyi. -Ka -lue ꞌmnɔ ꞌka-a lɩ ꞌweeꞌa tiyayi ꞌꞌduꞌo -Lagɔ ꞌle ɔ -kɔ nɩꞌo.
Ⅴ-Ⅵ A ꞌye li-ɔ, Zezii Kliisɩ ꞌmo-o ꞌɔ ꞌꞌyuꞌa ꞌdɛ -lue. ꞌƖnnɔ ꞌmo-o ꞌɔ tiyalɩ ꞌmnɩꞌa -kɔyi -lrɛɛ. ꞌƐ dɩ Zezii Kliisɩ ꞌꞌduꞌo -klagba ꞌbho Moyiizɩꞌa damʋ. -Lagɔꞌɔ lbhʋ Moyiizɩ nʋꞌa -ka -zɛgɛka ꞌle ɔ ꞌye ꞌɛ ꞌꞌyigwɛ, ɔ-ɔ ꞌmo-o ꞌɛ nʋyi. Ɔ -se ꞌɛ -kɔyi -ko. ꞌLe, dɩ-ɩ ꞌyeꞌa -zi mʋ ꞌwla, ɔ-ɔ ꞌtmʋʋ ꞌnɩ nyʋ. Ɛ -nɩꞌa -kaa ꞌmʋ, -yɔ ꞌma-a -Lagɔꞌɔ ꞌꞌyu Zezii Kliisɩ a, ɔ-ɔ ꞌmo-o -Lagɔꞌɔ -glɩgbaꞌa -kɔyi. Ɛ-bɛ -glɩgba ꞌmnɛ, -a-bʋ ꞌmo-o ꞌɛ wɔnyiꞌa nyʋ. ꞌKa-a ɛ -nɩꞌe ꞌmʋꞌa dɩ, -bho -a de ɔ ꞌꞌgwli ꞌꞌkɔmʋkɔmʋ, ꞌle, -aꞌba ꞌꞌkɔgwlɛtinɩɛzɛgɛ-ɛ ꞌka -amʋ ꞌmʋ ꞌꞌyi ꞌle ɛ ꞌka tiꞌpɩple ꞌle yaku ꞌli, -ka -a -de ꞌnɛ -pɔlʋ ꞌꞌyi, -bho -a kpʋn ɛ -kaa ti ꞌꞌkɔmʋ -lrɛɛ -aꞌba -pɔlʋꞌa klɛ ti, ꞌꞌlemnɩɩ, -a ꞌꞌdu-o ꞌɔ nyʋ -ziaka.
Aꞌba -kmu -pɔlʋ ꞌꞌyi -le!
Ⅶ ꞌAn ꞌlotʋꞌa ꞌꞌnynuu-a, ꞌka-a ɛ -nɩꞌe ꞌmʋꞌa dɩ a, -ka *-Lagɔꞌɔ Lisaazuzu ꞌlɛꞌɛ, a nʋ -kaa! Ɔ na:
-Bho a ꞌwɔn -zɩanꞌa ꞌꞌbhuo -Lagɔꞌɔ wlu ꞌbɔ ɔ,
Ⅷ-Ⅸ aꞌba -kmu -pɔlʋ ꞌꞌyi -le! A ꞌwɔɔn nɛ! -Da aꞌba ꞌꞌna ꞌꞌwe seꞌa -dena ꞌbhle -bɛnyɩ ꞌle ʋn-ʋ ꞌyeyeꞌa ti ꞌle ꞌꞌmusa ꞌꞌkpi ꞌle zʋɩnꞌa -gwlɩ ꞌsɔn ꞌli, kpli ʋn nʋꞌa a, aꞌba nʋ ɩ -le! -Lagɔ na: Ɩ-bɩ zʋɩn ꞌmnɩ ꞌli, ʋn-ʋ ꞌnaa-a ꞌan wlu ꞌꞌyi zɔꞌꞌo zɔ. Kplizɩgɩ ꞌɩn nʋ ꞌʋ ꞌꞌlruli, ʋn ꞌye -ɩ li. Ɛ -nɩꞌa -kaa ꞌmʋ a, ʋn na ꞌɩn -tɔ nʋ ꞌan wɔnkuɛ ꞌꞌyi, ꞌle, -bho ꞌɩn -ke ʋn -na -ziaka, ʋn ꞌke ɩ yibo.
Ⅹ ꞌKa-a ʋn nʋꞌo kplokplo ꞌle ʋn ꞌye ꞌɩnmʋ ꞌcɛ ꞌgwlʋ li -ya. ꞌƐ dɩ ꞌɩn nʋꞌo na: -Ka ʋn-ʋ popoꞌa ꞌgwlʋti, ꞌka se ꞌꞌyrili-nmɔ. -Jolʋ ꞌɩn-ɩ tɔ ꞌnʋ ʋn ꞌke bhlu ꞌle ꞌwa tinɩɛ ꞌmʋ, ꞌwa ꞌye ɛ.
Ⅺ ꞌWa lɛ -flaꞌa ꞌɩnmʋ ꞌmʋꞌa dɩ ꞌɩn poꞌo ꞌcɛ, ꞌɩn ꞌye -zrɛ ꞌle ꞌɩn na: ꞌBhlʋkpa ꞌɩn-ɩ ꞌꞌnyɩꞌa ꞌan nyʋ, ꞌnɔɔ ꞌꞌyiflɔɛzɛgɛ -nɩꞌa, ʋn -see ꞌle ꞌɛ ꞌꞌkpi tiꞌꞌsi yi.
Ⅻ ꞌAn ꞌlotʋꞌa ꞌꞌnynuu-a, a ꞌꞌdu aꞌba ꞌꞌbhi ꞌꞌyrili ꞌle nyɔ -kaa ꞌle aꞌba ꞌꞌklumʋ ꞌwlʋ, ɔ -kaa ꞌɔ -pɔlʋꞌa ꞌꞌyikmuɛꞌɛ dɩ ꞌꞌdu, -Lagɔ ꞌbhleꞌa tinɩɛ, ɔ -kɔɔ ɔ ꞌꞌkpi-tbhɛ ꞌle ꞌɔ ꞌꞌnyinynidɩ ꞌmnɩ ꞌmʋ.
ⅩⅢ Zɔ -ke ꞌli -a -nɩꞌa -zɩan, -Lagɔ ꞌbɔ-ɔ ti ɔ ꞌke -amʋ ꞌtmʋʋ. ꞌKa-a ɛ -nɩꞌe ꞌmʋꞌa dɩ, zɔꞌꞌo zɔ ꞌli, a popo ꞌkpɩ ꞌꞌyi ꞌle a ꞌke ꞌɔ wlu -lokuipo, ꞌle ꞌꞌnyinynidɩꞌa tiyayi *Sataan -kaa amʋ ꞌꞌyrabha ꞌmʋ ꞌlbha ꞌle ɔ -kaa amʋ ꞌꞌnyinynidɩ wɔnpo ꞌbho -Lagɔꞌɔ ꞌꞌyigbeyi ꞌle a -kaa ꞌɔ wlu ꞌmʋcɛ ꞌle aꞌba -pɔlʋ -kaa ꞌꞌkpleku!
ⅩⅣ A -gblee, -da -a ꞌkpa -nɩꞌa ꞌbho -Lagɔjeyi -lreeka, -ka -a deꞌa *Zezii *Kliisɩ ꞌꞌgwli -aꞌba -pɔlʋꞌa klɛ ti, -bho -a de ɔ -kaa ꞌꞌgwli ꞌꞌkɔmʋ, ꞌꞌlemnɩɩ ꞌɔ nyʋ -a ꞌꞌduꞌo -ziaka.
ⅩⅤ A ꞌye li-ɔ, ꞌɩn na ꞌtraamʋ, ɩ ꞌcnɩ-ɛꞌɛ-ɛ ꞌle -Lagɔꞌɔ ꞌꞌbɔgʋ ꞌli, na:
-Zɩanꞌa ꞌꞌbhuo, -bho nyɔ ꞌwɔn -Lagɔꞌɔ wlu ꞌbɔ ɔ, ɔ ꞌwɔɔn nɛ! ꞌƆ -kmu ꞌɔ -pɔlʋ ꞌꞌyi -le! -Ka aꞌba ꞌꞌna ꞌꞌwe ꞌwɔnꞌɔ ꞌɔ wlu ꞌbɔ -bɛnyɩ ꞌle ʋn -see ꞌɛ ꞌbho ꞌꞌdu, aꞌba nʋ -kaa -le!
ⅩⅥ ꞌƖn na, nyʋ yʋʋ ꞌwɔnꞌɔ -Lagɔꞌɔ wlu ꞌbɔ, -ʋ -see ɛ ꞌbho ꞌꞌduꞌa? Nyʋ *Moyiizɩ -zaꞌa ꞌgeyikpaankwla ꞌzɔ ꞌle *Ezipʋtɩbhlʋkpa ꞌꞌkpi, ꞌɩnnʋ moꞌo.
ⅩⅦ Nyʋ yʋʋ ɔ -poꞌo ꞌcɛ kwa ꞌle zʋɩnꞌa -gwlɩ ꞌsɔn ꞌliꞌa? Ʋ-bʋ Moyiizɩꞌa nyʋ-ʋ nʋꞌa ꞌꞌnyinynidɩ, -ɛ -ke ꞌꞌlru ꞌꞌyi -Lagɔ ꞌkpʋ ꞌʋ ꞌle ꞌꞌmusa ꞌꞌkpi, ʋn ꞌyeꞌa tiꞌyeye zʋɩnꞌa -gwlɩ ꞌsɔn ꞌli, ꞌle ʋn ꞌyeꞌa ꞌle ꞌmɛ -nɩ ꞌwee, ꞌɩnnʋ moꞌo.
ⅩⅧ Nyʋ yʋʋ -ke dɩ ɔ -zrɛꞌo ꞌle ɔ ꞌye: ꞌBhlʋkpa ꞌɩn-ɩ ꞌꞌnyɩꞌa ꞌan nyʋ, ꞌnɔɔ ꞌꞌyiflɔɛzɛgɛ -nɩꞌa, ʋn -see ꞌle ꞌɛ ꞌꞌkpi tiꞌꞌsi yi, nʋꞌa? Ʋ-bʋ nyʋ-ʋ -seeꞌa ꞌbho ꞌɔ wlu ꞌꞌdu, ꞌɩnnʋ moꞌo.
ⅩⅨ A -gblee, ꞌlotʋꞌa ꞌꞌnynuu-a, ꞌbhlʋkpa -Lagɔꞌɔ ꞌꞌnyɩꞌa ꞌɔ nyʋ, ꞌnɔɔ ꞌꞌyiflɔɛzɛgɛ -nɩꞌa, ʋn -see ɔ ꞌꞌgwlide ꞌle ʋn -see ꞌɔ wlu ꞌbho ꞌꞌdu -lrɛɛꞌɛ dɩ ʋn -see ꞌle ꞌɛ ꞌꞌkpi tiꞌꞌsi.