Ⅴ
-Lagɔꞌɔ dɩkmayreetɩꞌa nʋnʋkpli
Ⅰ A -gblee, a-a ꞌmo-o -Lagɔꞌɔ dɩkmayreetɩꞌa dɩ a, a -za ꞌɔ kpli ꞌꞌsɛlɩ ꞌle aꞌba -pɔlʋ ꞌke ꞌɔ nɛꞌɛ ka -nɩ.
Ⅱ ꞌKa-a ɛ -nɩꞌe ꞌmʋꞌa dɩ a, ꞌle aꞌba nʋnʋkpli ꞌwee ꞌmʋ a -kma a -bonyunyuꞌa dɩ -ka *Zezii *Kliisɩ -kmaꞌa -aꞌba dɩ ꞌle ɔ ꞌyeꞌa ꞌɔ ꞌꞌbhuo ꞌꞌyitiꞌꞌtayi ɔ ꞌyeꞌa ꞌmɛ -aꞌba dɩ! ꞌƆ ꞌmɛmɛɛ ꞌmnɛ kɔɔꞌɔ-ɔ ꞌsraganmi ʋn-ʋ ꞌꞌnyɩꞌa -Lagɔ -ɛ nʋ ꞌɔ ꞌtʋ.
Ⅲ A ꞌꞌduꞌo ꞌtɔ-ɔ Zeziiꞌa nyʋꞌa dɩ a, ꞌꞌbhɩlɛɛɛ ꞌꞌbhlɛcɛ-e ꞌya -kaabolɩ -lrɩɩ -ke satɛbhleɛɛ, nyɔꞌɔ ꞌꞌwaan nɩ nyɔ wɔn ꞌle aꞌba ꞌnynɩgbo -leꞌꞌa!
Ⅳ -Vlɛvlɛwlu-e ꞌꞌnyinyniwlu seꞌa wɔnmʋyika -nɩ nyʋ-ʋ po nɩꞌa ꞌꞌzrɔ ꞌmʋ -ke bhebhewlu seꞌa ꞌle -loku ꞌmʋ ti-nmɔ, nyɔꞌɔ ꞌwɔɔn nɩ amʋ wɔn ꞌꞌyi ꞌbɔ -le -lrɛɛ! Lɛ-ɛ -nmɔꞌɔ ꞌꞌyrili a ꞌka nʋ a, ꞌɩnnɛ ꞌmo-o, -zɩgɩ -Lagɔ nʋꞌa amʋ ꞌꞌlruli, a po ɔ ꞌsɛɛ ꞌya dɩ!
Ⅴ ꞌƖn-ɩ ꞌtmʋʋꞌo amʋ-ɛ ꞌle a ꞌke ɩ yibo, nyɔ-ɔ ꞌꞌbhɩlɛɛɛ ziꞌa a, ꞌle -ɔ kpʋnꞌa ꞌya -kaabolɩ -lrɩɩ ti, ꞌle -ɔ kpʋnꞌa satɛꞌɛ ꞌꞌkpa ti, nyʋ -Lagɔ -ke Zezii Kliisɩ -kɔꞌɔ ɔ, ꞌle ꞌwa ꞌꞌklumʋ, ꞌɔ nyɔtu -see ꞌle ꞌbɩ ꞌye yi, ꞌle, -zɛgɛ ʋn-ʋ nʋ ꞌʋ ꞌꞌlruli, ʋn -see ɛ ꞌye yi -lrɛɛ. A -gblee, ɔ-bɔ satɛbhleyi ꞌmnɔꞌɔ nyɔtuꞌa -pɔlʋ ꞌkpʋn-o -kaabolɩ ti, ɛ ꞌye -Lagɔ ꞌmʋ-zi. Ɩ-ɩ ꞌꞌluo-o -Lagɔꞌɔ ꞌbɩ ꞌmʋ ꞌle ꞌɔ -pɔlʋ ꞌzɔ.
Ⅵ Nyʋꞌa bhebhewlu seꞌa lɛ ꞌmʋꞌbhle, ꞌya ꞌꞌmaa amʋ dɩ ꞌꞌyrili -le! ꞌYa ꞌꞌnyinynidɩtuꞌa dɩ, nyʋ-ʋ -seeꞌa tiꞌbɔ ʋn ꞌke -Lagɔ ꞌbho ꞌꞌdu a, ꞌɔ ꞌcɛkʋta -nɩ ꞌnʋ ꞌꞌkpi, ꞌle ɔ ꞌke ʋ dɩ -kpʋn.
Ⅶ ꞌƐ dɩ aꞌba -ke -klaabonyʋꞌa zizi ꞌmʋ -le!
Ⅷ -Tanyɩ ꞌkɩ a, -klaabokplisasʋɩ a-a nʋꞌo ꞌle -kuyre ꞌmʋ. ꞌTraamʋ ꞌtɔ ɔ, a -ke -aꞌba -Kɔyi Zezii ꞌꞌsisriꞌe-e ꞌꞌyiꞌa dɩ, a -nɩꞌe ꞌbho zɔ ꞌꞌyi ꞌle aꞌba tinɩɛ ꞌsrɛɛꞌɛ ꞌꞌyi. Nyʋ-ʋ -nɩꞌa ꞌbho zɔ ꞌꞌyi, -ka ʋn -nɩꞌa a, a-beeꞌa nʋnʋkpli -nɩ -kaa!
Ⅸ -Ɛkedɩmaa, nyɔ-ɔ -nɩꞌa ꞌle kplilre ꞌli, ꞌɔ ꞌlimʋ -nmɔꞌɔ-ɔ wɔn ꞌle ɔ ꞌsrɛɛꞌɛ ꞌꞌyi ꞌle ɔ -nɩꞌe ꞌle -ziadɩ ꞌmʋ.
Ⅹ A po ꞌle ꞌkpɩ -lrɛɛ, lɩ-ɩ nʋꞌa -aꞌba -Kɔyi ꞌtʋ, ꞌle a ꞌke ɩ yibo!
Ⅺ Nyʋ-ʋ -nɩꞌa ꞌle kplisʋa ꞌli, ꞌwa bhebhelbhʋ ʋn-ʋ nʋꞌa, aꞌba -ke ꞌwa bhete ꞌɛ sʋ gbo -le! A po ꞌwa nʋnʋdɩ ꞌbho ꞌꞌpiemʋ ti ꞌle ɩ ꞌke ꞌbho zɔ ꞌꞌyi ꞌda.
Ⅻ (A -gblee, lɩ ʋn-ʋ nʋꞌa ꞌle ꞌꞌzizekwla ꞌmʋ, ɩ se ꞌꞌyigbeyi ti-nmɔ, ɩ ꞌbhle-e dɩn ꞌmʋ.)
ⅩⅢ-ⅩⅣ A ꞌye li-ɔ, ꞌle ꞌwa nʋnʋdɩ ꞌmnɩ ꞌke ꞌꞌpiemʋ ꞌkpa a, -ka ɩ -nɩꞌa ꞌmʋ -ziaka, ʋn ꞌbhɛɛꞌo ʋn ꞌke ꞌna ꞌmʋtiꞌwɔn ꞌle ʋn ꞌke tinɩɛlre ꞌye. -Ɛkedɩmaa, ɩ se ꞌtɔ ꞌꞌzizekwla ꞌmʋ -nɩ. ꞌƖnnɛ ꞌbhleꞌe ꞌnynɩꞌa dɩ a, nyʋꞌa bhlewlu nʋꞌo na:
Nyʋ-ʋ ꞌmɛꞌɛ ꞌbho -Lagɔꞌɔ ꞌꞌyigbeyi, -ɩnmɔ ꞌmʋ nɩꞌa ꞌle ꞌwa ꞌꞌklumʋ, -sɔ ꞌꞌnynɔɔ ꞌmʋ ꞌle Zezii Kliisɩ ꞌke ꞌle -aꞌa -pɔlʋ gbo zɔ -ya!
ⅩⅤ ꞌƖnnɛ ꞌbhleꞌe ꞌnynɩꞌa dɩ a ꞌꞌdu aꞌba ꞌꞌbhiꞌa dɩ gba ꞌmʋ aꞌba -nanabhʋꞌa -nɩ badiibadii nyʋ-ʋ seꞌa -naagɩ ꞌbhleꞌa ka -le! Abʋ ꞌꞌdu -naagɩbhlemʋ!
ⅩⅥ A -gblee, -nɔɔ -ke ꞌꞌyi -a -nɩꞌa -laa, nyʋ-ʋ ꞌnʋ-o ꞌꞌnyinynilɩꞌa -dadudu. ꞌƐ dɩ a -mu -zɩgɩꞌa nʋnʋaꞌa ꞌꞌlru. Aꞌba ꞌbhɔ ꞌya nʋnʋdɩ -le!
ⅩⅦ ꞌKa-a ɛ -nɩꞌe ꞌmʋꞌa dɩ a, nyʋ-ʋꞌa ꞌcrɛꞌɛ -aꞌba -Kɔyiꞌa ꞌgwlʋdɩ ꞌmʋti, aꞌba -nɩ ꞌwa ka -le! A po ꞌle ꞌkpɩ, lɩ ɔ ꞌbɔꞌɔ ti a ꞌke nʋ a, ꞌle a ꞌke ɩ ꞌmʋtiꞌwɔn!
ⅩⅧ A -gblee, nyɔ nmɔ -ziꞌa bla, kpli ɔ-ɔ nɩꞌa ti a, a-bee -mnʋʋꞌa -nɩ nɛ ti -le! Lɩꞌa wɔnnyniyiꞌa kpli moꞌo. *-Lagɔꞌɔ Lisaazuzuꞌa -jijri yi amʋ ꞌꞌkpi ꞌle ɔ ꞌke amʋ ꞌmʋ ꞌꞌyi!
ⅩⅨ -Bho a ꞌgbʋʋ ꞌꞌlru ꞌle a ꞌke -Lagɔ bʋbɔ, a -zɔ ɔ -wɛɛ li ꞌle a ꞌke ꞌya ꞌlʋ ɔ -bodɩ bhle! Ɩ -ke ꞌlʋɩ -lrɩɩ -Lagɔꞌɔ Lisaazuzu-u poꞌa amʋ wɔn ꞌmʋ, a ꞌbhɛɛ -nɩ nɩ -aꞌba -Kɔyi Zezii Kliisɩꞌa ꞌnynɩ ꞌꞌyi ꞌle aꞌba -pɔlʋ ꞌwee ti!
ⅩⅩ A po -aꞌba -tɩta -Lagɔ ꞌsɛɛ ꞌꞌkɔmʋ ꞌle lɩ ꞌwee ꞌmʋ, ꞌle -aꞌba -Kɔyi Zezii Kliisɩ ꞌmnɔꞌɔ ꞌnynɩ ꞌmʋ!
Nyimiɛ -ke ꞌɔ ꞌnynɔꞌɔ kpli ʋn ꞌka ti-nɩ
ⅩⅪ A -gblee, a-bʋ -yʋ ꞌꞌduꞌa ꞌbho *Zezii *Kliisɩ, a ꞌyʋyɔɔ -nɩ kwa ꞌle a ꞌke ꞌbho ꞌꞌdudu!
ⅩⅫ ꞌLe ꞌnynʋkpakpɩ -bodɩ a, ʋn ꞌyɔɔ -nɩ ꞌwa nyimiɛ kwa ʋn ꞌke ɔ ꞌbho ꞌꞌdu! ꞌNynʋkpakpɩ-ɩ naꞌa ꞌbho -aꞌba -Kɔyi Zezii Kliisɩꞌa -jeyi, kpli ʋn ꞌka ti-nɩ ꞌle ʋn ꞌke ɔ ꞌtʋ nʋ, ꞌɩnnɩ moꞌo.
ⅩⅩⅢ -Ɛkedɩmaa, -ka Zezii Kliisɩ ꞌꞌduꞌa -klagba ꞌbho ꞌɔ -glɩgbawɔnyi, -ka -lue ꞌmnɔ ꞌka-a nyukpasu -mnɔɔ ꞌꞌduꞌo ꞌɔ ꞌnynɔꞌɔ -klagba. Zezii Kliisɩ -mnɔɔ ɔ, ɔ -se ꞌɔ -glɩgbaꞌa -klagbaꞌa ꞌꞌsɛ -ko. Ɔ ꞌnʋ-o ꞌɔ -glɩgba ꞌmnɛꞌɛ *ꞌpʋʋnyi -lrɛɛ.
ⅩⅩⅣ ꞌKa-a ɛ -nɩꞌe ꞌmʋꞌa dɩ a, -ka ꞌɔ -glɩgba ꞌmnɛ-ɛ ꞌyɔɔ -nɩ ꞌnɔ kwa ꞌle ɛ-ɛ ꞌꞌdu ꞌɔ ꞌbho, -ka -lue ꞌmnɔ ꞌka-a ꞌnynʋkpakpɩ ꞌke ꞌwa nyimiɛ kwaꞌyɔɔ -nɩ -lue -lue ꞌle ʋn ꞌke ɔ ꞌbho ꞌꞌdu ꞌle lɛꞌꞌo lɛ ꞌmʋ.
ⅩⅩⅤ ꞌLe nyukpasi -bodɩ a, -ka Zezii Kliisɩ -kmaꞌa ꞌɔ -glɩgbaꞌa dɩ ꞌle ɔ ꞌye ꞌɛ dɩ ꞌꞌdu ꞌle ɔ ꞌyeꞌa ꞌmɛ ɛ, ꞌka-a nyɔꞌꞌo nyɔ ꞌke ꞌɔ ꞌnynɔꞌɔ dɩ -kma.
ⅩⅩⅥ Zezii Kliisɩ ꞌmnɔ ꞌnʋ-o -kaa, ꞌle ꞌɔ -glɩgba ꞌmnɛ ꞌke -Lagɔꞌɔ ꞌꞌyiglɛlɛ ꞌꞌdu. ꞌƆ ꞌꞌdɩzɩgɩ-ɩ zaꞌa ꞌɔ ꞌmɛmɛɛ ꞌmnɛꞌɛ ꞌꞌdɩ, -ka ɔ nʋ ꞌɛ ɛ, ꞌɩnnɛ nʋ ɛꞌo ꞌle ɛ ꞌye *liꞌsaa ꞌbho -Lagɔꞌɔ ꞌꞌyigbeyi ꞌle ꞌɛ nyʋꞌa *batizeeɛ ꞌꞌduꞌo ꞌɛ lɛtuꞌa ꞌmʋyibolɛ.
ⅩⅩⅦ A -gblee, ɔ ꞌnʋ-o -kaa, ꞌle ɛ -kaa ꞌꞌtɩ liꞌbhle ꞌbho ꞌɔ ꞌꞌyigbeyi ꞌle ꞌɔ ꞌnynɩꞌa ꞌꞌyibhɛnynɩ ꞌke ɛ ꞌꞌkpi -nɩ ꞌle ɛ ꞌke ꞌꞌyrili-nmɔ ꞌle ɛ -kaa ꞌbɩ liꞌbhle ꞌbho -Lagɔꞌɔ ꞌꞌyigbeyi.
ⅩⅩⅧ ꞌKa-a ꞌɛ lɛtu ꞌke ꞌnynɔbhlemʋ -bodɩ -nɩ -lrɛɛ. -Ka ʋn -kmaꞌa ꞌwa ꞌꞌbhiꞌa dɩ, nyɔꞌꞌo nyɔ -kma -kaa ꞌɔ ꞌnynɔꞌɔ dɩ! Nyɔꞌꞌo nyɔ-ɔ -kmaꞌa ꞌɔ ꞌnynɔꞌɔ dɩ, ɔ -kmaꞌa-a ꞌɔ ꞌꞌbhuoꞌa dɩ -ziaka.
ⅩⅩⅨ A -gblee, nyɔꞌɔ ꞌnyɛ ꞌɔ ꞌꞌbhuo ꞌmʋ! -Ka Zezii Kliisɩ ꞌꞌduꞌa ꞌɔ -glɩgba ꞌꞌyrili ꞌle ɔ -kmaꞌa ꞌɛ dɩ a, ꞌka-a nyunyɔ-ɔ nʋꞌo ꞌɔ kuꞌa dɩ.
ⅩⅩⅩ Zezii Kliisɩ ꞌmnɔ-ɔ ꞌzi-e -aꞌba dɩ, -ɛkedɩmaa, -a -nɩ ꞌwee ꞌꞌdu-o ꞌɔ -glɩgbawɔnyiꞌa nyʋ.
ⅩⅩⅪ ꞌƐ dɩ -Lagɔꞌɔ wlu nʋꞌo: Nyukpasu ꞌke ꞌɔ -tɩta -ke ꞌɔ ꞌlotʋ ꞌꞌyiꞌwlʋ ꞌle ɔ -ke ꞌɔ ꞌnynɔ ꞌke ꞌwa ꞌꞌbhiꞌa da pa ꞌle ʋn -nɩ ꞌsɔn ꞌke nyɔ -lue ꞌtɩn ꞌꞌdu.
ⅩⅩⅫ A ꞌye li-ɔ, ꞌɛ lɛtu -tɛꞌɛ ꞌmʋ-ɛ. -Tanyɩ ꞌkɩ a, nyʋꞌa ꞌwɩn ɩ ꞌmʋti. ꞌTraamʋ ꞌtɔ ɔ, ꞌɛ -ziadɩ ꞌkpa-a ꞌꞌpiemʋ. ꞌƖn-ɩ ꞌlɛ-ɛ ꞌna Zezii Kliisɩ -ke ꞌɔ -glɩgbaꞌa dɩ.
ⅩⅩⅩⅢ ꞌKa-a aꞌba dɩ -nɩꞌo -lrɛɛ. ꞌƐ dɩ aꞌba nyɔꞌꞌo nyɔ -kma ꞌɔ ꞌnynɔꞌɔ dɩ -ka ꞌɔ ꞌꞌbhuo, ꞌle ꞌnynʋkpakpɩ -mnʋʋ ꞌke ꞌbho ꞌwa nyimiɛ ꞌꞌdu -lue -lue -lrɛɛ!