Ⅶ
Etiɛnɩ ꞌtro-o -zebhle
Ⅰ -Ɩn ꞌye li-ɔ, nyʋ ꞌmnʋ ꞌꞌduuꞌa -kaa Etiɛnɩ dɩ ꞌꞌkpi, ꞌle *-Lagɔꞌɔ ꞌsragazayiklagba na: Etiɛnɩ, dɩ ʋn-ʋ zaꞌa -laa ꞌmʋ, ꞌka-a ɩ -nɩꞌe ꞌmʋ -ziakaꞌa?
Ⅱ ꞌLe ɔ na: ꞌAn -tɩta ꞌꞌwe -ke ꞌlotʋꞌa ꞌꞌnynuu-a, a po -lokui! -Nɔɔ -ke ti -aꞌba ꞌꞌna *Ablaamʋ -nɩꞌa -bhla ꞌle Mezopotamiibhlʋkpa ꞌꞌkpi, ɔ -seeꞌa -bhla Kalaagwlɔ ꞌmʋ -denamʋ mu ke, ꞌle -Lagɔ -ke ꞌnynɩ ꞌbhɛꞌɛ ꞌꞌyi ꞌye ɔ -bodɩ yi,
Ⅲ ꞌle ɔ na: Jra ꞌnɔɔ -aꞌa ꞌꞌbhlibhlʋkpa ꞌꞌkpi -ke -aꞌa -gluuwɔnyi. ꞌBhlʋkpa -ke ꞌꞌkpi ꞌɩn-ɩ ꞌyeꞌa -ɩnmʋ -kpa -nɩ mʋ, ꞌle -ɩn ꞌke ꞌle mu.
Ⅳ Ɔ ꞌlɛꞌɛ -kaa a, Ablaamʋ ꞌwlʋ-o ɛ-bɛ ꞌbhlʋkpa ꞌmnɛ ꞌꞌkpi, ɔ ꞌye ꞌle Kalaa mu, ɔ ꞌye -de. ꞌBho ꞌmnɔ, ꞌbho-o ꞌɔ -tɩta ꞌmɛ -nɩꞌo. Ɔ ꞌmɛꞌɛ ɛ, ꞌle -Lagɔ na: Ablaamʋ, -sɔ ꞌmʋ -ɩn ꞌke ꞌle ꞌbhlʋkpa -lrɛɛ ꞌꞌkpi mu. ꞌBhlʋkpa -ke ꞌꞌkpi ɔ ꞌbhɔɔꞌɔ gbɔ ꞌmʋ a, ꞌɩnnɛ a-bʋ *Izrayɛɛlɩkɔmʋ -deꞌe -laa ꞌꞌkpiti, ꞌtraamʋ.
Ⅴ A -gblee, ɔ nyniꞌa a, -Lagɔ -see ɔ ꞌbhlʋkpaꞌa -datoopeꞌa -lue komu ꞌꞌnyɩ ꞌle ɔ ꞌke ɛ ꞌꞌyi-glɛ. Ɔ -nɩꞌa -kaa ꞌbho, ꞌle -Lagɔ na: ꞌBhlʋkpa -nɛɛ, ꞌɩn-ɩ ꞌye -ɛ -ɩnmʋ ꞌꞌnyɩ -mʋ ꞌle -ɩn ꞌke ɛ -kɔ. -Bho ꞌwla a, ꞌle -aꞌa ꞌꞌnynuuꞌa ꞌꞌnynuu ꞌke ɛ ꞌꞌkpi -zi. Ɔ ꞌka -kaa ꞌlɛ, Ablaamʋ -see -bhla ꞌꞌyu ꞌwlʋ ke.
Ⅵ ꞌBho ꞌɛ ꞌꞌkpi a, -Lagɔ na: ꞌLe ꞌlaga ꞌmʋ -aꞌa ꞌꞌnynuuꞌa ꞌꞌnynuu-u ꞌye-e ꞌlɩkpʋ ꞌꞌdu -mʋ. ꞌLe ꞌmnɔ, ꞌle-e ʋn-ʋ ꞌye ʋ ꞌgeyiɛ ꞌmʋ -kpʋn mʋ, ꞌle ʋn ꞌke ʋ nyanɩ ꞌmʋ kla ꞌle zʋɩnꞌa ꞌꞌdu -lue ꞌli.
Ⅶ -Bho ʋn -nɩ -kaa ꞌgeyikpaankwla ꞌzɔ ɔ, nyʋ-ʋ klʋ ꞌʋ -kaa nyanɩ ꞌmʋ, ꞌɩnmɔ -Lagɔ-ɔ ꞌye -ʋ sʋ ꞌmʋ -kpa -mʋ. ꞌBho ꞌɛ lemʋ a, ꞌle ꞌɩn ꞌke ʋ ꞌgeyikpaankwla ꞌzɔ -za, ꞌle, ꞌbhlʋkpa ꞌɩn ꞌꞌnyɩꞌa -ɩnmʋ, ʋn ꞌke ꞌle ꞌɛ ꞌꞌkpi le yi, ꞌle ʋn ꞌke ꞌbho ꞌɩnmʋ bʋbɔ -nɩ. ꞌKa-a -Lagɔ ꞌlɛꞌo.
Ⅷ -Nɔɔ gbɛ ziꞌa a, ꞌle -Lagɔ ꞌye ɔ -kaa ꞌꞌyiꞌlɛ -lrɛɛ, ꞌle ɔ na: -Ybhɛybhɛtite ꞌɩn -ke -ɩn bhlaꞌa a, ꞌɛ ꞌmʋyibolɛ ꞌka-a: -Bho -ɩn ꞌwlʋ ꞌꞌyuꞌꞌo ꞌꞌyu, kpɔ ɔ *klɛ ꞌmʋ. ꞌƐ dɩ, Ablaamʋ ꞌwlʋꞌa *Izaakɩ, ꞌɔ ꞌwlʋʋwlʋʋwɩ -mɛɛtanzɔ ꞌle ɔ ꞌye ɔ klɛ ꞌmʋ kpa. Izaakɩ ꞌbhɛꞌɛ ꞌꞌyi a, ɔbɔ-ɔꞌɔ ꞌꞌyu ɔ ꞌwlʋꞌa, *Zakɔɔpʋ, ɔ ꞌkpɔ -ɔ klɛ ꞌmʋ. Zakɔɔpʋ -mnɔɔ ꞌwlʋ-o ꞌꞌyreetɩ -bue ꞌyɔ ꞌsɔn -ʋ ꞌma-a -aꞌba ꞌcɛꞌɛ -bue ꞌyɔ ꞌsɔnꞌɔ ꞌꞌna, ɔ ꞌkpʋ -ʋ klɛ ꞌmʋ -lrɛɛ.
Ⅸ ꞌꞌYreetɩ ꞌmnʋꞌa ꞌꞌklumʋꞌa -lue ʋn-ʋ ꞌlaꞌa *ꞌZɩzɛɛfʋ, ꞌɔ nʋnʋlɩ ɔ-ɔ nʋꞌa, ꞌya ꞌꞌmʋnynɩ ꞌɔ ꞌꞌbhuoꞌa ꞌlotʋꞌa ꞌꞌnynuu nʋꞌo. ꞌƐ dɩ ʋn ꞌꞌduꞌo, ʋn ꞌye ɔ ꞌmʋꞌnyɛ, ꞌle ʋn ꞌye ɔ ꞌpɛlʋ po, ꞌle ɔ ꞌye ꞌgeyikpaankwla ꞌzɔ mu ꞌle *Ezipʋtɩbhlʋkpaꞌa ꞌꞌkpi. Ɔ -nɩꞌa ꞌle a, -Lagɔ -sie ꞌnɔ-ɔ gbo.
Ⅹ Ɔ -zɔ ꞌɔ-ɔ ꞌkleyeɛɛ ꞌꞌkpi ꞌle ɔ ꞌye ɔ -naagɩ ꞌꞌnyɩ. ꞌƆ -naagɩ ꞌmnɛꞌɛ dɩ Ezipʋtɩbhlʋkpaꞌa -yowliklagba ꞌye ɔ -pɔlʋ ꞌꞌkpi tiꞌwla ꞌle ɔ ꞌye ꞌɔ ꞌꞌyikɔyi ꞌmʋ nʋ ꞌle ɔ ꞌye ɛ-bɛ ꞌbhlʋkpa ꞌmnɛ ꞌwee -kɔ. Lɛꞌꞌo lɛ-ɛ -nɩꞌa ꞌle ꞌɔ ꞌꞌbhlegbo ꞌZɩzɛɛfʋ ꞌpo -ɩ -jolʋ gbo -lrɛɛ.
Ⅺ -Nɔɔ gbɛ ziꞌa a, ꞌmʋ ꞌyi-e ꞌle Ezipʋtɩ -ke *Kanaabhlʋkpa ꞌmnɩ ꞌꞌkpi ti, ꞌkleyeɛɛ ꞌpa-a -gwlɔ. -Aꞌba ꞌꞌna ꞌꞌweꞌa ꞌye lɛ, ꞌwa li ɛ.
Ⅻ ꞌWa -tɩta Zakɔɔpʋ ꞌwɔn-ɔ ꞌbɔ na, ꞌle Ezipʋtɩ, ꞌle-e lililɩ -nɩꞌo ꞌle ɔ ꞌye ꞌle ꞌɔ ꞌꞌyreetɩ ꞌꞌyizalbholbhoa lbho.
ⅩⅢ ꞌƐ kpɛ ꞌsɔnnɛ ʋn -mu -nɩꞌa ꞌle a, ꞌZɩzɛɛfʋ -tɔꞌɔ-ɔ ꞌɔ ꞌꞌbhuo ʋ-bʋ ꞌɔ ꞌlotʋꞌa ꞌꞌnynuu ꞌꞌyi, ꞌle, -ka ʋn ꞌꞌduꞌa ꞌɔ nyʋ, Ezipʋtɩꞌa ꞌbhlʋkpayowliklagba ꞌye ɩ yibo.
ⅩⅣ-ⅩⅤ ꞌBho ꞌmnɔ, ꞌbho-o ꞌZɩzɛɛfʋ -lbho -nɩꞌe nyʋ, ʋn ꞌye ꞌɔ -tɩta Zakɔɔpʋ -ke ꞌɔ -gluuwɔnyiꞌa nyʋꞌa dɩ mu ꞌle ʋn ꞌye Ezipʋtɩ yi, ʋn ꞌye -de. Ʋ-bʋ nyʋ-ʋ yiꞌa a, ʋn bhete gbo ʋn -nɩꞌe-e nyʋꞌa -gwlɩ tan nyʋ -bue nyʋ -muu. ꞌLe ꞌbhlʋkpa ꞌmnɛ ꞌꞌkpi, ꞌle-e Zakɔɔpʋ ꞌmɛ -nɩꞌo. ꞌƆ ꞌꞌyreetɩ -ke ɔ muꞌa a, ꞌle-e ʋn ꞌmɛ -nɩꞌo -lrɛɛ.
ⅩⅥ Kanaabhlʋkpa ꞌꞌkpiꞌa -gwlɔ Sisɛmʋ, ꞌɛ ꞌcɛ ʋn-ʋ ꞌlaꞌa Amɔɔ, zoko Ablaamʋ deꞌa ꞌle ꞌɛ ꞌꞌyreetɩꞌa kwa ꞌmʋ, ꞌbho-o ɛ -nɩꞌo. ꞌLe ꞌmnɔ, ꞌle-e ʋn -ke nyʋ-ʋ ꞌmɛꞌɛ ꞌꞌku muꞌo, ʋn ꞌye ʋ ꞌle tinmaze.
ⅩⅦ Wlu -Lagɔ ꞌꞌduꞌa Ablaamʋ wɔn ꞌmʋti, -nɔɔ -ke ti ꞌɛ ꞌꞌyriꞌa ꞌbɩ ꞌka ꞌwlʋ -nɩ, ɛ ꞌꞌkɔɔꞌɔ gbo a, ꞌɔ ꞌꞌnynuuꞌa ꞌꞌnynuu -nɩꞌa ꞌle Ezipʋtɩ, ʋn gbʋgbaꞌa-a ꞌꞌkpi ti ꞌlaalo ꞌle ʋn-ʋ dieꞌe ꞌꞌyi.
ⅩⅧ Zʋɩnꞌa -dadudu ziꞌa a, ꞌbhlʋkpayowli ꞌꞌwe popoꞌo ꞌbɩ ꞌmʋ-ɛ. -Yɔ ꞌbhɔɔꞌɔ gbɔ ꞌmʋ -ɔ ꞌkpaꞌa ꞌbho a, ɔ se ꞌZɩzɛɛfʋ yibo, ꞌɩnnɔ -kɔꞌɔ Ezipʋtɩbhlʋkpa.
ⅩⅨ ꞌBhlʋkpayowli ꞌmnɔ, ꞌɩnnɔ klaꞌa -a-bʋ Izrayɛɛlɩkɔmʋꞌa ꞌꞌna ꞌꞌwe nyanɩ ꞌmʋ ꞌle ɔ-ɔ ꞌꞌdu ꞌʋ ꞌkle ꞌle ɔ-ɔ kpʋn ꞌʋ -glaka, ꞌle, ꞌwa ꞌꞌyreetɩnyukpasi ʋn ꞌbhleꞌa ꞌꞌkpi, ʋn-ʋ po ꞌʋ ti ꞌle ʋn-ʋ ꞌmɛꞌo.
ⅩⅩ ꞌBho ꞌɛ -nɔɔ ꞌmnɛ ti, ꞌbho-o ʋn ꞌwlʋ -nɩꞌe *Moyiizɩ. Ɔ -nmɔꞌɔ-ɔ ꞌꞌyrili tenyɩ ꞌle ꞌɔ -tɩtaꞌa -budu ꞌli, ꞌcʋɩ tan ti ʋn ꞌꞌnyɩ -nɩ ꞌnɔ ꞌꞌzizekwla ꞌmʋ nyɩtɩɛ.
ⅩⅪ Ʋn -gbʋꞌa ꞌꞌyu ya, ɔ seꞌa ꞌtɔ ꞌꞌzizeka -nɩ a, ʋn ꞌpo -ɔ ti ꞌle ꞌbhlʋkpayowliꞌa ꞌꞌyunynaakpʋ ꞌye ɔ ꞌmʋꞌꞌluo, ʋn ꞌye ɔ ꞌwa ꞌꞌyu ꞌmʋ nʋ ꞌle ʋn-ʋ ꞌꞌgipo nɔꞌo.
ⅩⅫ ꞌKa-a ɛ -nɩꞌe ꞌmʋꞌa dɩ a, ɔ ꞌcɩanꞌa Ezipʋtɩkɔmʋꞌa lɩꞌa -dadudu, ɔ-ɔ maꞌa wɔnti ꞌle ꞌɔ wlu-e ꞌɔ kpli -ke wɔnkuɛ -naꞌo.
ⅩⅩⅢ ꞌƆ ꞌwlʋwlʋzʋɩn nyniꞌa -gwlɩ ꞌsɔn, ꞌɔ -pɔlʋ ꞌkpa-a ꞌɔ ꞌlotʋꞌa ꞌꞌnynuu Izrayɛɛlɩkɔmʋ ꞌꞌyi ꞌle ɔ ꞌye ꞌle ꞌwa ꞌꞌklumʋ mu.
ⅩⅩⅣ Ɔ -ka mu a, Ezipʋtɩkɔyi -lue-e ꞌlbha-a Izrayɛɛlɩyi ꞌle Moyiizɩ ꞌye ꞌɔ ꞌlotʋꞌa ꞌꞌyu gboꞌwlʋ, ɔ ꞌye Ezipʋtɩyi ꞌlbha ɔ ꞌye ꞌmɛ.
ⅩⅩⅤ (A -gblee, Moyiizɩ -mnɔɔ na ꞌkɩ, ɔ nʋꞌa -kaa a, -ka -Lagɔ ꞌye ꞌɔ ꞌmʋ -zi -nɩ mʋ ꞌle ɔ ꞌke ꞌɔ ꞌlotʋꞌa ꞌꞌnynuuꞌa ꞌꞌkpiticɛyi ꞌꞌdu ɔ ꞌke ʋ ꞌgeyikpaankwla ꞌzɔ -za, ʋn-ʋ ꞌye-e ꞌna ꞌmʋtiꞌwɔn -mʋ. Ɩ -nɩꞌa -kaa ꞌmʋ a, ʋn -see ɩ ꞌmʋtiꞌwɔn.)
ⅩⅩⅥ Zɔ zɩꞌa a, Moyiizɩ -ka le-e yi, ɔ dideꞌe-e Izrayɛɛlɩkɔmʋ ꞌsɔn ꞌꞌlru, ʋn-ʋ vɔ-ɔꞌo, ꞌle ɔ ꞌye ʋ ꞌꞌyizɩza, ɔ ꞌye ʋ ꞌgate ꞌle ɔ ꞌbɔꞌɔ ti ʋn ꞌke -ybhɛ, ꞌle ɔ na: A-bee -mnʋʋ ꞌꞌduꞌa ꞌlotʋꞌa ꞌꞌnynuu ꞌle, koo a-a nynaꞌa ꞌle aꞌba ꞌꞌsɛ-ɛ vɔꞌɔ?
ⅩⅩⅦ ꞌBho ʋn -nɩ ꞌsɔnꞌɔ ꞌꞌklumʋ, -yɔ ziꞌa ꞌɔ -bonyunyɔ lɛ ꞌꞌyi ꞌꞌgbavlaꞌa-a wlu, ɔ na: -Sɔ ꞌmʋ wɔnyi ke! Yɔɔ -ke ꞌꞌbhuo ꞌꞌduꞌo ꞌbho -ɩnmʋ -amʋ ꞌꞌkpi ꞌle -a tuꞌo -aꞌba -zigleꞌa?
ⅩⅩⅧ -Ka -ɩn ꞌlbhaꞌa Ezipʋtɩyi -glaape ɔ ꞌyeꞌa ꞌmɛ, ꞌka-a -ɩn ꞌbɔꞌɔ ti -ɩn ꞌke ꞌɩnmʋ ꞌlbhaꞌa?
ⅩⅩⅨ Moyiizɩ ꞌwɩn ꞌɩ ꞌbɔ ɔ, ɔ ple-oꞌo, ꞌꞌsesibhlʋkpa ʋn-ʋ ꞌlaꞌa Madiyaa, ɔ ꞌye ꞌle ꞌɛ ꞌꞌkpi mu, ɔ ꞌye ꞌle -de. ꞌLe-e ɔ -kpa -nɩꞌe ꞌnynɔ ꞌle ʋn ꞌye ꞌꞌyreetɩnyukpasi ꞌsɔn ꞌwlʋ.
ⅩⅩⅩ A -gblee, zʋɩnꞌa -gwlɩ ꞌsɔn ziꞌa a, zɔ -lue ꞌzɔ, ꞌle ꞌꞌmusa ꞌꞌkpi ꞌbho *Sinayitrɩ ꞌꞌtroli -Lagɔ gboꞌa -dalbhoyi -lue ꞌyi-e Moyiizɩ -bodɩ. ꞌLe -gamnɩgɩ ꞌmʋ, ꞌle-e nɛgbʋgbʋ -nɩꞌo, ꞌle -dalbhoyi -nɩꞌe ꞌle ɛ ꞌmʋ.
ⅩⅩⅪ -Gamnɩgɩ ꞌmnɩ wan-oꞌo, ꞌya sin. Ɔ ꞌye ꞌɛ li a, ꞌɩnnɛ -ma ꞌnɔ wɔnti. ꞌƐ dɩ ɔ-ɔ nyniꞌe ꞌbho ti ɔ ꞌke ɛ ꞌꞌyrili-gwɛ. Ɔ -nɩꞌa ꞌbho tinyninamʋ a, ɔ ꞌwɔn-ɔ -aꞌba -Kɔyi -Lagɔꞌɔ wlu ꞌbɔ,
ⅩⅩⅫ Ɔ na: ꞌƖnmɔ -Lagɔ -nɩ ꞌka a, ꞌɩnmɔ moꞌo -bhla. ꞌƖnmɔ -aꞌa ꞌꞌna ꞌꞌwe Ablaamʋ-e Izaakɩ -ke Zakɔɔpʋ bʋbɔꞌɔ ɔ, ꞌɩnmɔ ꞌmoꞌo. Moyiizɩ ꞌwɩn ꞌɩ ꞌbɔ ɔ, -sɩanyɩ ꞌlbhɔ -ɔꞌo ꞌle ɔ-ɔ tɩtrɛꞌɛ li, ɔ ꞌye ꞌꞌyitiꞌꞌjri ꞌle ɔ -kaa ꞌle -gbʋ.
ⅩⅩⅩⅢ ꞌLe -Lagɔ ꞌye ꞌbho wlu -lrɛɛ kɔ, ɔ na: -Za -aꞌa -bhopɩmʋpalɩ bhʋ ꞌmʋ. ꞌBhlʋkpa -ɩn -nynaꞌa ꞌꞌkpi ti, ꞌɩn -nɩꞌe-e ꞌbhoꞌa dɩ ɛ cɛꞌɛ kpɔ.
ⅩⅩⅩⅣ ꞌAn nyʋꞌa ngazedɩ ʋn-ʋ nʋꞌa ꞌle Ezipʋtɩ, ꞌɩn ꞌye -ɛ li -ziaka ꞌle ꞌɩn-ɩ ꞌwɔnꞌɔ ꞌwa -kplekplewlu ꞌbɔ. ꞌƐ dɩ ꞌɩn ꞌdreꞌo ꞌɩn ꞌke ʋ zetie. ꞌKa-a ɛ -nɩꞌe ꞌmʋꞌa dɩ a, yi ꞌɩn ꞌke ꞌle -ɩnmʋ Ezipʋtɩ ꞌmnɔ lbho!
ⅩⅩⅩⅤ Etiɛnɩ ꞌkpa-a ꞌɔ wlu nya, ɔ na: Ɔ-bɔ Moyiizɩ -lue ꞌmnɔ Izrayɛɛlɩkɔmʋ -see ꞌka ꞌybha ʋn ꞌyeꞌa na: Yɔɔ -ke ꞌꞌbhuo ꞌꞌduꞌo ꞌbho -ɩnmʋ -amʋ ꞌꞌkpi ꞌle -a tuꞌo -aꞌba -zigleꞌa?, ɔbɔ ꞌmnɔ, ꞌɩnnɔ -Lagɔ lbhoꞌo ꞌle ɔ ꞌke ꞌwa -klagba ꞌꞌdu ꞌle ɔ ꞌke ʋ zetie ꞌle ꞌgeyikpaankwla ꞌzɔ, ꞌle -Lagɔ gboꞌa -dalbhoyi ɔ ꞌyeꞌa ꞌbho -gamnɩgɩ ꞌmʋ li ꞌke ɔ -kpa.
ⅩⅩⅩⅥ Moyiizɩ ꞌmnɔ, ꞌɩnnɔ nʋꞌo *ꞌꞌyritikpʋnwɔnkulɩ, -ɔ -zaꞌa Izrayɛɛlɩkɔmʋ ꞌgeyikpaankwla ꞌzɔ ꞌle ɔ -ke ʋn ꞌye Ezipʋtɩbhlʋkpa ꞌꞌkpi ꞌwlʋ. ꞌLe ꞌTɔnnizana kɔ ɔ -nʋ -nɩ nɩꞌo, ꞌle ꞌꞌmusa ꞌꞌkpi ɔ ꞌye ɩ ꞌle zʋɩnꞌa -gwlɩ ꞌsɔn ti -nʋ -nɩ.
ⅩⅩⅩⅦ Ɔbɔ ꞌmnɔ, ꞌɩnnɔ nʋꞌo Izrayɛɛlɩkɔmʋ -bodɩ: -Ka ꞌɩn -nɩꞌa a, -Lagɔ-ɔ ꞌye-e amʋ ꞌɔ wluꞌa ꞌmʋtizayi -lue -ya -mʋ. ꞌLe aꞌba ꞌꞌklumʋ ɔ-ɔ ꞌye ꞌwlʋ mʋ.
ⅩⅩⅩⅧ Ɔ-bɔ Moyiizɩ -lue ꞌmnɔ, ɔ -ke -aꞌba ꞌꞌna ꞌꞌwe Izrayɛɛlɩkɔmʋ maꞌa kpan -lue ꞌle ꞌꞌmusa ꞌꞌkpi, ꞌɩnnɔ -nɩꞌe ꞌbho ꞌle ʋn -ke -Lagɔ gboꞌa -dalbhoyiꞌa ꞌnynɩmʋ, ꞌle ɔ -ke ɔ-ɔ wluꞌo ꞌle Sinayiꞌa trɩ ꞌꞌkpi, ꞌle, -Lagɔꞌɔ ꞌꞌdɩzɩgɩ-ɩ ꞌyeꞌa ꞌbho -nɩ mʋ ꞌꞌkɔmʋkɔmʋ, ɔ-ɔ yɩ ɩ ʋꞌo, ꞌle ʋn ꞌke ɩ ꞌwa ꞌꞌnynuuꞌa ꞌꞌnynuu -bodɩ ꞌmʋ-za ꞌꞌkɔmʋkɔmʋ, ꞌle ɩ ꞌke -amʋ ꞌꞌkpi bhla.
ⅩⅩⅩⅨ A -gblee, -aꞌba ꞌꞌna ꞌꞌwe -see tiꞌbɔ ʋn ꞌke ɔ ꞌbho ꞌꞌdu. ꞌƐ dɩ ʋn -jri-ɛꞌɛ gbɔ ꞌle ʋn ꞌbɔꞌɔ ti ʋn ꞌke ꞌle Ezipʋtɩ le mu.
ⅩⅬ Ʋn na Moyiizɩꞌa vɛnyɩ *Alɔɔ -bodɩ: Kɔkui ʋn ꞌka ꞌbhle ꞌle ʋn ꞌka ꞌle -aꞌba -dɔnʋꞌa nya -kɔ, mɩ ɩ -aꞌba dɩ. Ɔ-bɔ Moyiizɩ ꞌmnɔ, -ɔ -zaꞌa -amʋ ꞌgeyikpaankwla ꞌzɔ ꞌle -a ꞌyeꞌa Ezipʋtɩ ꞌwlʋ, lɛ ɔ -zɛꞌɛ ꞌmʋ, -a se ɛ yibo.
ⅩⅬⅠ Ʋn ꞌlɛꞌɛ -kaa a, ꞌbho -nɔɔ ꞌmnɛ ꞌli, ꞌbho-o ʋn -ma -nɩꞌe kɔku -ke -bhliiyu gʋgɔꞌɔ ꞌle ʋn ꞌye ɛ bʋbɔ, lbhʋ ꞌwa -kʋtɩ nʋꞌa, ʋn ꞌye ꞌɛ ꞌbʋbʋa li.
ⅩⅬⅡ Ʋn nʋꞌa -kaa a, -Lagɔ -zʋ ꞌʋ-ʋ ꞌꞌyigba li, ɔ ꞌye ʋ ꞌꞌyitiꞌꞌtayi ꞌle ʋn-ʋ bʋbɔꞌɔ ꞌyrʋ-e, ꞌcʋ -ke ꞌcʋdrɩ. A -gblee, ɛ-bɛ wlu ꞌmnɛꞌɛ ꞌꞌyitigʋgɔwlu -Lagɔꞌɔ wluꞌa ꞌmʋtizayi Amɔsɩ ꞌcnɩꞌe ꞌle -Lagɔꞌɔ ꞌꞌbɔgʋ ꞌli see:
-Lagɔ na: Izrayɛɛlɩkɔmʋ-a, ꞌle ꞌꞌmusa ꞌꞌkpi zʋɩnꞌa -gwlɩ ꞌsɔn ti, ꞌɩnmɔ a-a ꞌlbhaaꞌa ꞌꞌnalɩ ꞌmʋ, a ꞌye ꞌɩnmʋ gba ꞌꞌyri ꞌꞌdu ꞌle a ꞌye ꞌɩnmʋ bʋbɔꞌɔ?
ⅩⅬⅢ Kɔku ꞌma-a *Mʋlɔkɩꞌa koko, ꞌɩnnɛ a ꞌbhleꞌo ꞌle a -ke ɛ -naꞌo, ꞌle a ꞌbhleꞌe ꞌcʋdrɩɛkɔku ꞌma-a Wlefaa -lrɛɛ. Ɩ-bɩ kɔkui a maꞌa, a-a bʋbɔꞌɔ, ꞌɩnnɩ ꞌka-a! ꞌYa dɩ ꞌɩn-ɩ ꞌye amʋ kwa gbo -za mʋ ꞌle aꞌba jɛkamʋ ꞌke amʋ nya kpa ꞌle ꞌgeyikpaankwla ꞌzɔ ꞌle a ꞌke *Babilɔɔnʋgwlɔ gbo-tɛ.
ꞌKa-a -Lagɔ ꞌlɛꞌo.
ⅩⅬⅣ ꞌBho ꞌɛ ꞌꞌkpi a, Etɩɛnɩ na: *ꞌꞌYriɛgbedeti -ke ꞌli -Lagɔ -ke nyunyu-u wlu nɩꞌa ꞌle -klugba ꞌɔ gba ꞌcnɩ-ɛꞌɛ ꞌꞌyri deꞌa ti, ɛbɛ ꞌmnɛ, ꞌɩnnɛ -aꞌba ꞌꞌna ꞌꞌwe ꞌbhleꞌo ꞌle ꞌꞌmusa ꞌꞌkpi. A -gblee, ɛ-bɛ ꞌꞌyriɛgbedeti ꞌmnɛ, -ka ɔ -tɔ ꞌnɛ Moyiizɩ ꞌtɩn, ꞌka-a ɔ nʋ ɛꞌo.
ⅩⅬⅤ -Nɔɔ gbɛ ziꞌa a, ꞌꞌyriɛgbedeti ꞌmnɛ -nɩꞌe ꞌbho-ɛ ꞌꞌkɔmʋkɔmʋ ꞌle -aꞌba ꞌꞌna ꞌꞌwe ꞌye ꞌbɩ ꞌmʋ popo ꞌle ɛ-ɛ ple ꞌʋ ꞌꞌyiti ꞌle ʋn ꞌye ɛ ꞌbhle, ʋn -ke ɛ ꞌye Kanaa mu. -Nɔɔ -ke ti *Zozue -kɔ ꞌnʋ, ꞌbho-o -Lagɔ -nu -nɩꞌe ꞌwa jɛkamʋ -nɩꞌa ꞌwa nya ti ꞌle ʋn ꞌye ꞌbhlʋkpa ꞌmnɛ ꞌꞌkpi-zi, ʋn ꞌye -de. Ɛ-bɛ ꞌꞌyriɛgbedeti ꞌmnɛ, ꞌbho-o ʋn -ke ɛ -nɩꞌo kplokplo ꞌle ɛ ꞌye *Daviidɩꞌa ꞌwa -kɔkɔnɔɔ ꞌꞌkpi bhla.
ⅩⅬⅥ Daviidɩ ꞌmnɔ, -Lagɔꞌɔ ꞌꞌnitiwʋnnasʋ -nɩ ꞌnɔ-ɔ ꞌꞌkpi, ꞌle ɔ na: ꞌAn -Kɔyi -Lagɔ, -ɩnmɔ -aꞌba ꞌꞌna Zakɔɔpʋ bʋbɔꞌɔ, ꞌꞌnyɩ ꞌɩnmʋ ꞌꞌyiflɔɛ ꞌmʋ ꞌɩn ꞌke -aꞌa -dena lɛ nʋ.
ⅩⅬⅦ Ɔ ꞌlɛꞌɛ -kaa a, -Lagɔ -see ɛ ꞌwɔɔn. Ɛ-bɛ -dena ꞌmnɛ, ꞌɔ ꞌꞌyu *Salomɔɔ nʋꞌo ɛ lɛ.
ⅩⅬⅧ A-bee -mnʋʋ, -bho a popo ꞌgwlʋti ꞌle, -Lagɔklagba-a -nɩꞌa ꞌle yaku ꞌli, ꞌɩnnɔ ꞌke ꞌle nyunyuꞌa popobudu ꞌli ti-deꞌa? ꞌKla ꞌmnɔꞌɔ dɩ -Lagɔꞌɔ wluꞌa ꞌmʋtizayi *Ezayii -zɩ ꞌɩ ꞌmʋ see, ɔ na:
ⅩⅬⅨ -Aꞌba -Kɔyi -Lagɔ na: ꞌLe yaku ꞌli ꞌmo-o ꞌan -dena ꞌle ꞌbhlʋkpa ꞌꞌduꞌo ꞌan -kɔkɔlɛ -lrɛɛ. -Dena yɛɛ a ꞌke ꞌɩnmʋ ꞌꞌnyɩꞌa? ꞌLe ꞌɛ doo ꞌɩn ꞌke ti-deꞌa?
Ⅼ Lɩ -nɩɩ ꞌwee, ꞌɩn ꞌꞌbhuo-o -see ɩ ti-ya?
-Lagɔ ꞌlɛꞌɛ -kaa.
ⅬⅠ Etiɛnɩ ꞌkɔ-ɔ ꞌbho wlu -lrɛɛ: A-bʋ -lokumʋkunyʋ-a! A-bʋ ꞌma-a -pɔlʋꞌa ꞌꞌyikmumʋ ꞌle -ɔ -ke -lokui ꞌꞌsuꞌa a, aꞌba ꞌꞌdu ꞌbho *-Lagɔꞌɔ Lisaazuzuꞌa wlu, ꞌle a -ke aꞌba ꞌꞌna ꞌꞌwe-e plɛꞌɛ kpli ꞌmʋ.
ⅬⅡ -Lagɔꞌɔ wluꞌa ꞌmʋtizamʋ -nɩꞌa -bɛnyɩ, ꞌwa ꞌꞌklumʋꞌa -yɔ aꞌba ꞌꞌna ꞌꞌwe -see nyanɩ ꞌmʋ klaꞌa? *-Lagɔꞌɔ ꞌBhozayi -ɔ ꞌma-a ꞌꞌYisrɛɛyi, -Lagɔꞌɔ wlukpamʋ -zaꞌa ꞌɔ yiyiaꞌa ꞌꞌkpidɩ ꞌmʋ see, ꞌɩnnʋ aꞌba ꞌꞌna ꞌꞌwe ꞌlbhaꞌo. ꞌLe ꞌtraamʋ ꞌtɔ ɔ, ɔbɔ ꞌmnɔ ꞌyi-e ꞌnɔɔ ꞌkmʋ ꞌmʋ. ꞌƖnnɔ abʋ-aꞌa ꞌꞌbhi poꞌo ꞌsrɛ li ꞌle a ꞌye ɔ ꞌlbha ɔ ꞌye ꞌmɛ.
ⅬⅢ ꞌBho ꞌɛ ꞌꞌkpi a, a-bʋ -Lagɔ ꞌꞌnyɩꞌa ɔ gboꞌa -dalbhomʋ ꞌɔ gbaꞌa -klugba ꞌle ʋn ꞌye ꞌɛ Moyiizɩ ꞌꞌnyɩ, ɔ ꞌye ꞌɛ amʋ -ya, gba ꞌmnɛ, aꞌba ꞌꞌbhi -see ɛ ꞌbho ꞌꞌdu!
Etiɛnɩꞌa ꞌmɛmɛɛ
ⅬⅣ Etiɛnɩ poꞌa wlu ꞌmnɛ ti a, ꞌɛ wlutu ꞌkpʋn-o ʋ-bʋ *ꞌZuifʋꞌa -zigletumʋ ꞌmnʋ ꞌgwlʋ. ꞌƐ dɩ ʋn -po ꞌnɔ ꞌcɛ kwa tenyɩ.
ⅬⅤ Ɔbɔ ꞌꞌyi-e *-Lagɔꞌɔ Lisaazuzu ꞌmʋ ꞌle ɔ-ɔ popoꞌo ꞌle yaku ꞌli. Ɔ -nɩ ꞌle ꞌyranamʋ, ꞌle yaku ꞌye wɔn kati, ɔ ꞌye -Lagɔꞌɔ ꞌnynɩꞌa ꞌꞌyibhɛɛɛꞌɛ -vlavlɩ liꞌye, ꞌle *Zezii -ke ɔ -kɔꞌɔ lɩ ꞌwee, ɔ ꞌye ɔ liꞌye -lrɛɛ. Ɔ -nynaꞌa-a ꞌbho ꞌɔ ꞌꞌtroli ti.
ⅬⅥ Ɔ-ɔ ꞌye ꞌɩ -kaa li a, ɔ na: A -gblee, ꞌɩn-ɩ ꞌye-e yaku li, ɛ katiꞌe-e wɔn, ꞌle Zezii -ke -Lagɔ -kɔꞌɔ lɩ ꞌwee, -ɔ ꞌꞌduuꞌa ꞌɔ ꞌꞌbhuo *Nyunyɔꞌɔ ꞌꞌYu ꞌnynɩ, ꞌɩnnɔ -nynaꞌa ꞌbho ꞌɔ ꞌꞌtroli ti.
ⅬⅦ Nyʋ ꞌmnʋ ꞌwɔnꞌɔ wlu ꞌmnɛ ꞌbɔ ɔ, -ka ʋn -dieꞌa ꞌmʋ, ʋn ꞌꞌsu-o -lokui ꞌꞌyi ꞌle ʋn-ʋ ꞌꞌwʋwɔꞌɔ ꞌmʋti, ꞌle ʋn -kɛɛ ɛ ꞌbʋꞌwɔn, ꞌle ʋn ꞌye ɔ ꞌꞌlru ꞌꞌyi,
ⅬⅧ ꞌle ʋn -ke ɔ ꞌye ꞌꞌgbe ꞌda ꞌle ʋn ꞌke ɔ -digbi ꞌmʋ ꞌlbha ɔ ꞌke ꞌmɛ. Nyʋ ʋn poꞌa ꞌsrʋ ʋn ꞌke ɔ -antanyɩdigbi ꞌꞌyi ꞌꞌvuto, ʋn ꞌwlaꞌa ꞌwa yayibanɩklɩgbɩ ti, ꞌbhʋabhʋadraa -lue ʋn-ʋ ꞌlaꞌa ꞌSɔlʋ, ꞌɩnnɔ ʋn ꞌꞌnyɩ ꞌɩ -jeyi ꞌle ɔ-ɔ fuo ꞌnɩ li,
ⅬⅨ ꞌle ʋn ꞌye Etiɛnɩꞌa -digbiyilbhɛɛɛ wɔnꞌꞌdu. Ʋn -nɩ ꞌnɔ ɩ ꞌꞌyilbhaanamʋ, ꞌle ɔ-ɔ poꞌo -kaa Zezii wɔn gbo, na: ꞌAn -Kɔyi, ꞌan -zuzu ꞌye ꞌbɩ ꞌbho -ɩn gbo!
ⅬⅩ ꞌLe ɔ ꞌye ꞌkolri glu po, ɔ ꞌye ꞌꞌwɔ: ꞌAn -Kɔyi, ꞌꞌnyinynidɩ ʋn-ʋ nʋꞌa ꞌɩnmʋ ꞌꞌlruli, ꞌbhɔ ꞌya dɩ, -aꞌa kpʋ ʋ ɩ ꞌꞌyi -le! Ɔ poꞌa wlu ꞌmnɛ ti a, ꞌɔ -fɩfɛ -cɛꞌɛ ꞌbho-ɛ.