ⅩⅩ
ꞌPɔlʋ ꞌꞌwe ꞌmu-o Masedʋanɩ -ke *Glɛkɩbhlʋkpa -lrɛɛ ꞌꞌkpi
Ⅰ -Gblee, nyʋ ꞌmnʋꞌa yokoyoko cɛꞌɛ, ꞌPɔlʋ ꞌgbʋʋꞌo-o *Zeziiꞌa -namʋ ꞌꞌlru, ɔ ꞌye ʋ ꞌkpa ꞌꞌyi po ꞌle ɔ ꞌye ʋ wlu po, *Glɛkɩbhlʋkpaꞌa yayi -bhoga, Masedʋanɩ, ɔ ꞌye ꞌle ꞌɛ ꞌꞌkpi mu.
Ⅱ Ɔ-ɔ ꞌple-e ꞌbhlʋkpa ꞌmnɛꞌɛ -gwlɛ gwlɛ ꞌꞌyiti, ꞌle, Zeziiꞌa -namʋ -nɩ ꞌnɩ ꞌmʋ, ɔ-ɔ zʋ ꞌʋ wluꞌa -dadudu -bodɩ ꞌmʋ ꞌle ɔ-ɔ po ꞌʋ ꞌkpa ꞌꞌyi, ꞌle ɔ ꞌye zi, ꞌle ɔ ꞌye ꞌle ꞌɛ ꞌzɔtibhoga Akayibhlʋkpa ꞌꞌkpi mu.
Ⅲ Ɔ nyniꞌa ꞌle a, ɔ ꞌnʋ-o ꞌle ꞌcʋɩ tan. Ɛ ziꞌa -kaa a, ɔ -sɔꞌɔ ꞌmʋ-ɛ ɔ ꞌke batoo ꞌli ꞌkpa ɔ ꞌke Siliibhlʋkpa ꞌꞌkpi mu ꞌle ɔ ꞌye ꞌbʋꞌwɔn na *ꞌZuifʋ ꞌꞌdu-o ꞌɔ ꞌꞌdɩ ʋn ꞌke ɔ ꞌlbha. Ɔ ꞌwɩn ꞌɩ ꞌbɔ ɔ, ɔ na: ꞌꞌLemnɩɩ, ꞌbhlʋgbɔjolʋ -ɛ -zi -nɩꞌa Masedʋanɩ, ꞌɩnnɛ ꞌɩn-ɩ ꞌye -bhlu mʋ ꞌɩn ꞌke Silii mu. ꞌLe ɔ ꞌye ꞌꞌyitiꞌꞌbhiti ɔ ꞌye ꞌle le -mu -nɩ.
Ⅳ Ɔ -nɩꞌa munamʋ, nyʋ -mɛɛsɔn ꞌkpɔ -ɔ -jeyi. ꞌWa ꞌnynɩ ꞌka-a: Sopatɛɛ -ɔ ꞌma-a Beleekɔyi, Pilusɩꞌa ꞌꞌyu-e, Alisɩtakɩ -ke Sekudusɩ ꞌma-a Tesalonikɩkɔmʋ-e, Dɛlɩbʋkɔyi Gayusɩ -ke Timotee, ʋn -ke Aziibhlʋkpa ꞌꞌkpiꞌa nyʋ ꞌsɔn Tisikɩ -ke Trofimʋ.
Ⅴ ꞌLe Masedʋanɩ, ʋn ꞌnyni-e Filiipʋgwlɔ ꞌmʋ. ꞌBho-o ꞌPɔlʋ -yɛꞌɛ ꞌɩnmɔ Luukɩ ꞌle ꞌɔ -jeyikpamʋ ꞌmnʋ ꞌye -amʋ ꞌbho sie ꞌle ʋn ꞌye Trʋasɩgwlɔ ꞌmʋ mu. ꞌBho-o ʋn-ʋ fuo nɩꞌe -amʋ.
Ⅵ Ɛ-bɛ zʋn ꞌmnɛ ꞌliꞌa *gɔ -ke ti, *ꞌꞌflɔɔ seꞌa ꞌꞌbuubuulɛ gboꞌbhle, ꞌle, ꞌZuifʋ-ʋ li ꞌɛ ɛ, ɛ ziꞌa a, ꞌle -a ꞌye Filiipʋ -sɔ ꞌle -a ꞌye batoo ꞌli ꞌkpa. -A -nɩꞌa munamʋ, -a ꞌnʋ-o ꞌbho ꞌꞌni ꞌꞌyigbeyi ꞌwɩ -muu ꞌle -a ꞌye -jeyikpamʋ ꞌmnʋ ꞌꞌkpi bhla ꞌbho Trʋasɩ. ꞌBho-o -a ziꞌe ꞌwɩ -mɛɛsɔn.
ꞌPɔlʋ dedeꞌe-e *Zeziiꞌa -namʋ -nɩꞌa Trʋasɩ ꞌꞌyi. Ɔ muꞌa a, ɔ -see ꞌtɔ yi ꞌbho le.
Ⅶ ꞌBho ꞌmnɔ ɔ, *ꞌZuifʋꞌa lifɔzɔ ziꞌa a, ꞌɛ ꞌꞌjiazɔ ɔ, -a-bʋ ꞌZeziiꞌa nyʋ ꞌgbʋʋꞌo-o ꞌꞌlru -a ꞌke -dalue -li -nɩ, ꞌle ꞌPɔlʋ-ʋ zaꞌa -Lagɔwlu ꞌmʋ. -Bho zɔ zɩ, ɔ-ɔ ꞌye-e -mu -mʋꞌa dɩ a, ɔ -nɩꞌe -Lagɔwlu ꞌmʋzanamʋ ꞌle dodo ꞌye ꞌmʋ-cɛ.
Ⅷ -Gblee, -a -nɩꞌe-e ꞌle yayibuduꞌa tannɛ ꞌꞌyi, ꞌle, ꞌɛ ꞌꞌyu -ke ꞌli -a -nɩꞌa, ꞌꞌnapɩꞌa -dadudu-u wanꞌa ꞌle.
Ⅸ -Ɩn ꞌye li-ɔ, nyukpasudraa -lue ʋn-ʋ ꞌlaꞌa Etikusɩ, -da ꞌPɔlʋ -nɩꞌa -kaa ꞌꞌyititɛdɩ ꞌmnɩ ꞌmʋzanamʋ, ꞌbho-o ɔ -de -nɩꞌe ꞌbho -buduyu ꞌmnɛꞌɛ -fɛnʋwɔn ꞌꞌyi ti ꞌle ɔ-ɔ zekeꞌo. ꞌꞌNynɔɔ zi ꞌɔ ɔ, ꞌɩnnɔ ꞌwlʋꞌo ꞌle yayibudu ꞌmnɛ ꞌꞌyi, ɔ ꞌye ꞌzɔ ꞌkpa. Ʋn ꞌꞌluo ꞌnɔ ꞌꞌyi, ʋn -gbʋ ꞌnɔ ya, ɔ ꞌmɛ-oꞌo.
Ⅹ ꞌPɔlʋ nʋꞌa -kaa, ɔ ꞌwlʋ-o ꞌle yayibudu ꞌmnɛ ꞌli -lrɛɛ, ɔ ꞌye ꞌdre, ɔ ꞌye ɔ ꞌꞌkpi ꞌꞌyitijri, ɔ ꞌye ɔ ꞌbho ꞌbhlʋkpa ꞌꞌyitiꞌꞌpli, ꞌle ɔ na: Aꞌba ꞌꞌzru -le! Ɔ -sɔꞌɔ-ɔ ꞌmɛnynɔɔ ꞌmʋ, ɔ -nɩꞌe-e ti -lrɛɛ.
Ⅺ Ɛ ziꞌa -kaa a, ꞌPɔlʋ -ke ʋn ꞌya-a ꞌle -budu ꞌmnɛ ꞌli le ꞌle ɔ -ke ʋn ꞌye -dalue -li -nɩ. Ʋn gwɛꞌɛ ꞌꞌyi a, ɔ ꞌkpa-a ꞌbho dɩꞌa ꞌmʋzanamʋ le. Ɔ -nɩ ꞌnɛ ꞌꞌkpi ꞌle zɔ ꞌye ꞌꞌyritiꞌwla. -Drumayrʋvlaan ꞌwlʋꞌa ꞌꞌyiglu a, ꞌle ɔ ꞌye mu.
Ⅻ Ɔ muꞌa a, nyʋ ꞌwee cɩcɛꞌɛ-ɛ ꞌꞌyi ꞌle nyukpasudraa -mnɔɔꞌɔ nmi -nmɔꞌɔ ꞌꞌyrili, ꞌle ʋn ꞌye ɔ ꞌmʋꞌꞌluo, ʋn ꞌye ɔ -jeyi kpa. ꞌƐ dɩ ꞌbʋbʋa-a ꞌlbhaꞌa ꞌwa ꞌwee tenyɩ.
ꞌPɔlʋ ꞌꞌwe ꞌmu-o Milee
ⅩⅢ Ɩ ziꞌa -kaa a, -a -ke ꞌPɔlʋ sʋsɔꞌɔ-ɔ li, -abʋ ꞌye batoo ꞌli ꞌkpa, ɛ -ke -a ꞌye -gwlɔ -lue ʋn-ʋ ꞌlaꞌa Asɔsɩ mu, ꞌle ꞌPɔlʋ ꞌye ꞌkɩka ꞌꞌyi -zi -nɩ. ꞌBho ꞌmnɔ, ꞌbho-o -a -ke ɔ ꞌke ꞌꞌyiꞌgbʋʋ ꞌle ɔ ꞌke ꞌle ꞌɛ ꞌlimʋ ꞌkpa. -Abʋ ꞌzi -ɔ ꞌꞌyi, -a ꞌye -jeyi ꞌkpa ꞌle ɔbɔ ꞌye gbɔ ꞌmʋ ꞌbhɔɔ. ꞌKa-a -a -ke ɔ bhagaꞌo. ꞌƆ ꞌꞌbhuo ꞌbɔ-ɔ ti ɔ ꞌke ꞌbhlʋgbɔjolʋ bhlu.
ⅩⅣ Ɔ bhlaꞌa -amʋ ꞌꞌkpi a, batoo -ke ꞌli -a -nɩꞌa, ɔ ꞌye ꞌle ꞌkpa, ꞌle -a -ke ɔ ꞌye -gwlɔ -lue ʋn-ʋ ꞌlaꞌa Mitilɛnɩ mu.
ⅩⅤ -A nyniꞌa a, -a ꞌzi-e ꞌbho li, -a ꞌnʋ-o ꞌwɩ -lue -jeyi, ꞌle, likpe -lue ʋn-ʋ ꞌlaꞌa Kiɔsɩ, -a ꞌye ꞌɛ wɔnli nyni. Zɔ -lrɛɛ -yɛ kɔꞌɔ ꞌbho, ꞌbho-o -a -nyni -nɩꞌe likpe -lrɛɛ ʋn-ʋ ꞌlaꞌa Samɔsɩ, ꞌwɩ -lrɛɛꞌɛ zɔ ꞌle -a ꞌye -gwlɔ -lue ʋn-ʋ ꞌlaꞌa Milee nyni. -Gblee, ɛ -ke Efɛɛzɩ se gbotɩtɛ.
ⅩⅥ Ɛ -nɩꞌa -kaa ꞌmʋ a, ꞌPɔlʋ na ɔ -see tiꞌbɔ ɔ ꞌke ꞌbho Efɛɛzɩ ti-nyna -nɩ ꞌle -nɔɔ -kɔɔ ɔ ꞌle Aziibhlʋkpa ꞌꞌkpi li-zi -nɩ. Ɔ-ɔ ꞌꞌtɩtra-a li, -bho *Patɩkɔtɩꞌa gɔꞌɔ zɔ -ka nyni ꞌle ɔ ꞌke Zelizalɛɛmʋ nyni -cueyi.
ꞌBho Milee ꞌPɔlʋ ꞌgbʋʋꞌo-o Efɛɛzɩꞌa *Zeziiꞌa -glɩgbawɔnyiꞌa nyʋꞌa ꞌꞌlrutidemʋ ꞌꞌlru ꞌle ɔ ꞌye ʋ wlu po.
ⅩⅦ ꞌƖnnɛ ꞌbhleꞌe ꞌnynɩꞌa dɩ a, ꞌPɔlʋ poꞌo Efɛɛzɩ wlu, ꞌbhoꞌa *Zeziiꞌa -glɩgbawɔnyiꞌa nyʋꞌa ꞌꞌlrutidemʋ ꞌke ɔ ꞌbho Milee -yɛ,
ⅩⅧ ꞌle ʋn ꞌye ꞌbho mu. Ʋn nyniꞌa a, ɔ na:
ꞌLotʋꞌa ꞌꞌnynuu-a, ɛ ꞌnyaaꞌa zɔ -ke ꞌli ꞌɩn -yi -nɩꞌa ꞌle Aziibhlʋkpa ꞌꞌkpi ꞌle ɛ ꞌye ꞌɩn -ke aꞌba ꞌꞌyrilisʋsɔnɔɔ ꞌꞌkpi bhla, -ka ꞌan kpli ꞌnɩnɩꞌa ꞌmʋti aꞌba ꞌꞌklumʋ, a yiboꞌo-o ꞌna.
ⅩⅨ -Ka ꞌɩn ꞌwlaꞌa ꞌan -pɔlʋ ti, ꞌle ꞌɩn-ɩ nʋꞌa -aꞌba -Kɔyi -Lagɔꞌɔ lbhʋ aꞌba ꞌꞌklumʋ, ꞌle ꞌɩn -seeꞌa ꞌan ꞌꞌbhuo ꞌꞌyiꞌbhɛɛ, -da ꞌɩn ꞌye -nɩꞌa nyʋꞌa ꞌꞌnyinynikpli ʋn-ʋ nʋꞌa li, -ka ꞌwa nʋnʋkpli-i yaꞌa ꞌɩnmʋ ꞌꞌmi ꞌꞌyri, a yiboꞌo-o ꞌna. -Ka *ꞌZuifʋ-ʋ paꞌa ꞌɩnmʋ fɛ ꞌzɔ ꞌle ꞌɩn ꞌyeꞌa ꞌkle ꞌye, a yiboꞌo-o ꞌna -lrɛɛ.
ⅩⅩ ꞌYa ꞌwee -nɩꞌa -kaa ꞌmʋ a, lɛ-ɛ ꞌka amʋ -bodɩ ꞌꞌyrili-nmɔ, -ka ꞌɩn wɩ ꞌɩ amʋ ꞌꞌyiti ꞌle ꞌɩn -seeꞌa ꞌbho ꞌɛ -lue ꞌtɩn sie, a yibo nɛ-oꞌo. ꞌƖn pleꞌa amʋ ꞌꞌyiti ꞌle aꞌba ꞌꞌbhlegbo -lue -lue ꞌle aꞌba ꞌꞌlrugbʋʋnamʋ, ꞌka-a ꞌɩn-ɩ nʋꞌo ꞌꞌkɔmʋkɔmʋ, ꞌle ꞌɩn-ɩ tɔꞌɔ amʋ Zeziiꞌa ꞌꞌdɩzɩgɩ,
ⅩⅪ ꞌle, -ka ꞌɩn waꞌa ꞌZuifʋ -ke nyʋ-ʋ -seꞌa-a ꞌZuifʋ ꞌꞌyiti, na: A yibo aꞌba ꞌꞌnyinynidɩ ꞌꞌyi ꞌle a ꞌke ꞌle -Lagɔ gbo ꞌꞌbhiti ꞌle a ꞌke -aꞌba -Kɔyi Zezii ꞌꞌgwlide, ꞌya ꞌwee, a yibo nɩꞌo.
ⅩⅫ ꞌTraamʋ ꞌtɔ ɔ, ꞌɩn-ɩ ꞌmu-o Zelizalɛɛmʋ. ꞌBho-o *-Lagɔꞌɔ Lisaazuzu-u tɔꞌɔ ꞌɩnmʋ, ꞌle-e ꞌɩn ꞌke mu. Lɛ-ɛ ꞌka ꞌɩnmʋ ꞌle ꞌꞌkpi -bhla -nɩ, ꞌɩn se ɛ yibo.
ⅩⅩⅢ Lɛ -lue ꞌtɩn ꞌɩn yiboꞌa a, ꞌɩnnɛ ꞌmo-o, -Lagɔꞌɔ Lisaazuzu-u tɔ ꞌnɛ ꞌɩnmʋ -da ꞌꞌgɩɩ, ꞌle gwlɔꞌꞌo gwlɔ ꞌli na nyʋ-ʋ ꞌye-e ꞌɩnmʋ nyanɩ ꞌmʋ -kla -mʋ ꞌle ʋn ꞌke ꞌɩnmʋ -jie ꞌmʋ po.
ⅩⅩⅣ ꞌƖnmɔ ꞌPɔlʋ -mnɔɔ, ꞌꞌdɩ ꞌmnɩꞌa ꞌlbha ꞌɩnmʋ -sɩanyɩ ꞌꞌyi. -Bho ʋn ꞌlbha ꞌɩnmʋ o, -bho ʋn -see ꞌɩnmʋ ꞌlbha o, ꞌmna -see ꞌya dɩ zi. Lɛ ꞌmna-a ꞌbɔꞌɔ ti, ꞌɩnnɛ ꞌmo-o, lbhʋ ꞌan -Kɔyi Zezii sieꞌa ꞌɩnmʋ li, ꞌɩn ꞌke ɛ nʋ ꞌle ꞌɩn ꞌke ɛ ꞌꞌyigwɛ. Lbhʋ ꞌmnɛ ꞌmo-o, ꞌɩn ꞌke -Lagɔꞌɔ ꞌꞌdɩzɩgɩ nyunyu ꞌꞌyitiwa, -ka ꞌɔ ꞌlimʋ -nmɔꞌɔ wɔn ʋ -bodɩ.
ⅩⅩⅤ A -gblee, ꞌɩn ꞌple-e amʋ ꞌꞌyiti -lue -lue ꞌle ꞌɩn ꞌye amʋ -Lagɔꞌɔ nyʋꞌa -kɔkɔɔꞌɔ ꞌꞌkpidɩ ꞌmʋ-za. ꞌTraamʋ ꞌtɔ ɔ, ꞌɩn-ɩ ꞌtmʋʋꞌo amʋ-ɛ, aꞌba ꞌꞌklumʋꞌa nyɔ -lue ꞌtɩn -see ꞌtɔ ꞌɩnmʋ ꞌye yi ꞌbho le.
ⅩⅩⅥ ꞌKla-a ɛ -nɩꞌe ꞌmʋꞌa dɩ a, ꞌɩn-ɩ wɩ ꞌɩ amʋ ꞌꞌyiti -zɩan, -bho aꞌba ꞌꞌklumʋꞌa nyɔ se ꞌpʋn ꞌbho -Lagɔꞌɔ ꞌꞌyigbeyi, ɛ -se ꞌan ꞌꞌlruyidɩ -ko.
ⅩⅩⅦ A -gblee, ꞌɩn -tɔꞌɔ-ɔ amʋ -Lagɔꞌɔ ꞌgwlʋdɩ ꞌwee, ꞌɩn -see ꞌbho ꞌɛ -lue ꞌtɩn sie.
ⅩⅩⅧ ꞌBho ꞌɛ lemʋ a, a ꞌꞌdu aꞌba ꞌꞌbhi ꞌꞌyrili! -Lagɔꞌɔ -glɩgbawɔnyiꞌa nyʋ ꞌɔ Lisaazuzu deꞌa amʋ ꞌꞌlruti, a ꞌꞌdu ʋ ꞌꞌyrili -lrɛɛ! ꞌƆ ꞌꞌyu Zeziiꞌa ꞌmɛmɛɛ ꞌmʋ ɔ zetie -nɩ ꞌnʋ ꞌle ꞌwa ꞌꞌnyinynidɩ ꞌmʋ.
ⅩⅩⅨ A ꞌye li-ɔ, -bho ꞌɩn mu, ꞌɩn yiboꞌo-o na, a-bʋ ꞌma-a Zeziiꞌa nyʋ, nyʋtɔlʋ-ʋ ꞌye-e ꞌle aꞌba ꞌꞌklumʋ -yi -mʋ ʋn ꞌke aꞌba ꞌꞌgwlideɛ -denɩ ꞌmʋ -za. -Ka ji-i liꞌa ꞌbhlabhlɩ, ꞌka-a ʋn-ʋ ꞌye -nɩ mʋ.
ⅩⅩⅩ ꞌLe aꞌba ꞌꞌbhiꞌa ꞌꞌklumʋꞌa nyʋ-ʋ ꞌye ꞌmʋ-sɔ mʋ, ʋn -see amʋ -ziadɩ -tɔ yi ꞌle ʋn ꞌke *Zeziiꞌa -namʋꞌa ꞌꞌgwlideɛ -denɩ ꞌmʋ -za -lrɛɛ ꞌle ʋn -ke ʋn ꞌke -na.
ⅩⅩⅪ ꞌƐ dɩ, a ꞌꞌdu aꞌba ꞌꞌbhi ꞌꞌyrili! -Zʋɩn tan ti ꞌɩn -bhla -nɩꞌe amʋ -jiɛ kwa ꞌmʋ ti, nyʋ-ʋ -nɩꞌa ꞌɩnmʋ ꞌkleyeɛɛ ꞌꞌkpi -yanamʋ, ꞌka-a ꞌɩn ꞌbhleꞌe ꞌꞌvivia wɔnyi aꞌba dɩ ꞌle ꞌɩn-ɩ wɩ ꞌɩ amʋ ꞌꞌyiti -lue -lue ꞌbho Zeziiꞌa -jeyiꞌa -nanaa -nɛɛꞌɛ ꞌꞌkpi, a popo nɩ ꞌgwlʋti!
ⅩⅩⅫ ꞌLotʋꞌa ꞌꞌnynuu-a, ꞌtraamʋ ꞌtɔ ɔ ꞌɩn-ɩ ꞌde-e amʋ ꞌle -aꞌba -Kɔyi -Lagɔꞌɔ kwa ꞌmʋ ti, ꞌle, ꞌɔ wlu-u -tɔꞌɔ, -ka ꞌɔ ꞌlimʋ -nmɔꞌɔ wɔn ɔ, ɛ ꞌke amʋ ꞌkpa ꞌꞌyi po. Ɛ ꞌbhɛɛꞌo ɛ ꞌke amʋ -kpa ꞌle a ꞌke Zezii ꞌꞌgwlide ꞌꞌkɔmʋkɔmʋ, ꞌle, ꞌbho ꞌɛ ꞌꞌkpi ꞌtɔ ɔ, nyʋ ꞌwee ꞌma-a -Lagɔꞌɔ nyʋ, -zɛgɛ ɔ-ɔ ꞌye ꞌʋ ꞌꞌlruli-nʋ mʋ a, -bho ꞌɛ -nɔɔ nyni, ɔ ꞌke ɛ amʋ ꞌꞌlrulinʋ.
ⅩⅩⅩⅢ A -gblee, ꞌɩnmɔ -yɔɔ, ꞌɩn -see nyɔꞌɔ mɔni -ke -banɩ ꞌybha.
ⅩⅩⅩⅣ Aꞌba ꞌꞌbhi yiboꞌo-o, -da ꞌɩn -ke nyʋ -ke ꞌɩn-ɩ nʋꞌa -Lagɔꞌɔ lbhʋ -bɔꞌɔ lɛ ꞌmʋ, ꞌɩn ꞌꞌbhuo-o nʋꞌo lbhʋ ꞌle ꞌɩn-ɩ ꞌye ɛꞌo.
ⅩⅩⅩⅤ ꞌƖn ꞌnʋ-o -kaa ꞌle a ꞌke ꞌɩnmʋ ꞌꞌsɛlɩ-za, ꞌle, -ka a ꞌka nʋ a, nyʋ-ʋ seꞌa lɛ ꞌbhle -ke nyʋ-ʋ ꞌma-a ꞌꞌgwizimʋ, a ꞌke ʋ -kpa, a ꞌke ꞌna yibo. A popo -aꞌba -Kɔyi Zeziiꞌa ꞌꞌbhuoꞌa wlu ꞌgwlʋti, ɔ na: Nyɔ-ɔ ꞌꞌnyɩꞌa nyɔ, ꞌɔ ꞌꞌkpiꞌa ꞌjina ꞌbhɛ-ɛ ꞌꞌyi ꞌle ɛ ꞌye nyɔ -yɔ ꞌye ꞌɛ ꞌmʋ-zi.
ⅩⅩⅩⅥ ꞌPɔlʋ poꞌa wlu ꞌmnɛ ti, ɔ -ke ꞌwa ꞌwee ꞌpo-o ꞌkolri glu, ʋn ꞌye *-Lagɔ wɔn gbo po.
ⅩⅩⅩⅦ Ʋn gwɛꞌɛ ꞌꞌyi a, -ka ʋn -dieꞌa ꞌmʋ ꞌwee, ʋn -ke ɔ-ɔ ꞌꞌdudu-o ꞌꞌgwli, ꞌle ʋn-ʋ ꞌꞌviꞌo, ʋn -ke ɔ-ɔ popoꞌo wlu.
ⅩⅩⅩⅧ -Gblee, ꞌgwlʋ -nyni ꞌnʋ-ʋ li, -ɛkedɩmaa, ɔ na ʋn -see ɔ ꞌtɔ ꞌye yi ꞌbho le. Ʋn nʋꞌa -kaa, ʋn ꞌkpɔ -ɔ -jeyi ɔ ꞌke batoo ꞌli ꞌkpa.