Amaŋuliro Amalaŋi agaŋamba hu Yesu Kurisito ngʼolu
Luka
gagaŋandiiha
Enyanjula
Amaŋuliro Amalaŋi aga Yesu Kurisito ngʼolu Luka gagaŋandiiha ganyonyola hu bulamu wa Yesu Kurisito. Luka gaali musaŋu omutendehe. Luka gaŋandiiha ebituufu ebiŋamba hu bulamu wa Yesu, hu byaliŋo nʼengeri eyi byaliŋo, ko ababisoma basobole ohutegeera ehituufu (1:1-3). Aye Luka oyo sigaali Muyudaaya (Kol 4:10-14) era gaŋandiiha mu engeri eyi Abatali Bayudaaya baŋanga ohutegeera. Hino hibonehera mu engeri eyi anyonyolamo esambo jʼAbayudaaya (1:8). Baagaŋandiiha Amaŋuliro ago oluvanyuma lwʼohufa hwa Yesu.
Luka sigaŋandiiha hu bulamu wa Yesu hyoŋene, aye gaŋandiiha nohu biitu ebi bahwenda ba Yesu baahola. Era ebiitu ebyo biri mu Bikolwa byʼAbahwenda ba Yesu. Ŋaŋuma amanyire ehiseera nʼehifo ehituufu ehi Luka gaŋandiihiramo Amaŋuliro gano, aye abahugu mu byʼEbbayibbuli abahira obungi baŋeega baati gagaŋandiiha mu mwaha ogwʼesanvu oluvanyuma lwʼohusaaliwa hwa Yesu Kurisito.
Luka njʼahira ohuloma mu wijuufu hu husaaliwa hwa Yowaane Omubatiza. Era ahubbirisa abaatu ohusoniŋa abahyawe (3:3; 11:4; 17:3-4; 23:34; 24:47) nʼohusaba (3:21; 5:16; 6:12; 11:1-12; 22:32).
Ebiri mu hitabo hino mu buupi
1. Ohwanjula Amaŋuliro Amalaŋi (1:1-4)
2. Ohusaaliwa hwa Yesu nʼengeri eyi getegeheramo obuŋeeresa (1:5–4:13)
3. Ebyamaliholiho ebi Yesu gaahola nʼebiitu ebi gaasomesa (4:14–21:38)
4. Ohufa nʼohulamuha hwa Yesu (22–24)
1
1 Owʼeŋono Tefiiro, abaatu bangi baŋandiihire hu biitu ebi Yesu atiinire nʼahola mu fe.
2 Baŋandiihire ni batambisa ebibono byʼabo ababyeboneraho nʼemoni jaawe ohuŋwera erala oludaayi ngʼolu gatandiha obuŋeeresa buwe era basasaania nʼehibono ehyo mu baatu.
3 Olwʼehyo, oluvanyuma lwʼohwendulirisa mu wiijufu hu hiisi hiitu ehibayeŋo keesi kuŋadiihira ewʼeŋono Tefiiro ebibono ebiroose obulaŋi ebyolereeye mu fe,
4 ko weesi ofaanie ehituufu ehiŋamba hu bibono ebi bahusomesa.
Ohusaaliwa hwa Yowaane Omubatiza
5 Mu himanga ehi habaha Herode gaali nʼaŋuga Buyudaaya, ŋaaliŋo omusengi wa Hatonda oyu balanganga baati Zakaliya owomu hibbubbu hyʼabasengi ehi balanganga baati Abbija. Omuhasi wuwe gaali njʼElizabbeesi yeesi owaali nʼaŋwa mu lulyo lwʼabasengi ba Hatonda, owomu lusaga lwʼAlooni.
6 Abaatu bano bombi baholanga biruŋamu mu moni ja Hatonda Musengwa era ni badembuhira amagambi nʼebiragiro bibye byosibyosi.
7 Aye baali baŋuma mwana olwohuba Elizabbeesi gaali mugumba, nindi bombi ni basahuluŋire.
8 Lulala ehibinja ehi Zakaliya gaŋeerehesangamo ngʼomusengi mu moni ja Hatonda ni hyali hu luŋalo,
9 abahye bamwangala ni bahubba ahalulu ngʼolu ekola yaawe yaali, aje adunyise obubbaani mu Yekaalu ya Hatonda Musengwa.
10 Ehimanga ehyʼohudunyisa obubbaani ni hyola, abaatu bosibosi baali bahumbeene ebulafu wa Yekaalu ni basaba.
11 Ngʼaŋo mu himanga ehyene ehyo Zakaliya abona malayika wa Hatonda Musengwa ni gemereeye hu lubega lwʼomuhono omulungi ogwʼehituuti ohubadunyihisanga obubbaani.
12 Zakaliya ni gamubona gesinduha bugali weene, nga nʼobuti wumuŋamba.
13 Aye malayika oyo ngʼamuloma ati, “Zakaliya, otatya olwohuba Hatonda aŋuliiye ohusaba huhwo. Era omuhasi wuwo Elizabbeesi aja huhusaalira omwana omuseere, olimuguliha esiina oti Yowaane.
14 Omwana oyo, aligira waaba nʼesangaalo nʼohusaŋalya era abaatu balisangaala olwʼohusaaliwa huhwe,
15 olwohuba anaahabe mwegingihiriri mu moni ja Hatonda Musengwa. Era saagesangaho ohunywa omwenge gwomu mizabbibbu wayire ehiitu hyosihyosi ehimeesa. Omwoyo Omutukuvu anahamumaamire ohuŋwera erala mu hida hya nyina.
16 Era aligira Abayisirayiri bangi bebbwaga baagobola eyiri Hatonda Musengwa yaawe.
17 Aliba nʼamaani gʼOmwoyo Omutukuvu hyʼEriya era njʼalyeheerera ohuuja ohweyulira Musengwa engira. Alifaŋania abaana nʼabasaawe, era aligobosa abaatu abajeemera Hatonda mu ngira eyʼobugwalaafu, nʼabategeha olwʼohuuja hwa Musengwa.”
18 Ngʼaŋo Zakaliya abuusa malayika oyo ati, “Hiina ehihahasa hiiti ehi oloma hinaholerere? Ese nʼomuhasi wange hwesahuluŋiiye.”
19 Ngʼaŋo Malayika amugobolamo ati, “Ese, ndiise Gabbudyeri, aba mu moni ja Hatonda ni muŋeeresa. Hatonda gaatumire ohuhulomera amaŋuliro gano amalaŋi.
20 Aye olwʼohubuusabuusa ebi kulomera, sooja hugobolayo huloma ohwola olu Hatonda anahabyoherese ehiseera hyʼabo ni hyolire.”
21 Mu hiseera ehyo, abaatu baali ebulafu ni bahuumiriiye Zakaliya era ni bebuusa ehimwolireho.
22 Zakaliya ni gatula, gaali saahiŋanga huloma aye nʼagesya hugesya nʼengalo. Ngʼabaatu bahifaania baati gaali asunire ohwolesewa.
23 Olugobo lulwe olwʼohuŋeeresa mu Yekaalu ni lwaŋwaho, nga gagamayo ewuwe.
24 Ŋabitaŋo ehiseera ngʼElizabbeesi omuhasi wuwe aba hida, ngʼahena emyesi etaanu nʼatebonesa mu baatu.
25 Ngʼaŋo aloma ati, “Hatonda Musengwa gapambiiye ehisa mu hiseera hino gaatusaho eduho eryʼobugumba.”
Malayika aloma hu husaaliwa hwa Yesu
26 Elizabbeesi nʼali hida ehyʼemyesi mukaaga, Hatonda gatuma Malayika Gabbudyeri mu hibuga ehi balanga baati Nazaleesi mu twale lyʼe Galilaaya,
27 eyiri omuhaana ataŋenyuhangaho nʼomusinde oyu balanga baati Malyamu owaali nʼaja hufumbirwa omusinde oyu balanganga baati Yosefu era gaali aŋwa mu lulyo lwa habaha Dawudi.
28 Malayika oyo ngʼamuloma ati, “Oli otye ewe omuhoda wa Hatonda? Oli nʼekabi era Hatonda Musengwa ali ni neewe!”
29 Ebibono ebyo byeŋunjisa Malyamu bugali weene, ni gebuusa ehi bitegeesa.
30 Ngʼaŋo Malayika amuloma ati, “Malyamu, otatya olwohuba osunire obuhoda eyiri Hatonda.
31 Oliba hida wasaala omwana museere, olimuguliha esiina oti nje Yesu.
32 Omwana oyo, aliba nʼobuŋangi era balimulanga Mwana wa Hatonda oyo Owaŋamugulu Bugali. Hatonda Musengwa alimuŋa obuŋugi hyʼowa Dawudi sehulu wuwe.
33 Aliŋuga Yisirayiri emirembe nʼemirembe era obuŋugi buwe sibuliŋwaŋo.”
34 Nga Malyamu abuusa malayika oyo ati, “Naahabe tye hida, ese otaŋenyuhangaho nʼomusinde?”
35 Nga Malayika amugobolamo ati, “Omwoyo Omutukuvu anahahumaamire ngʼamaani ga Hatonda Owaŋamugulu Bugali gahuujaho, ngʼoba hida. Olwʼehyo omwana oyu olisaala aliba mwawufu era aliba Mwana wa Hatonda.
36 Nʼomulebe wuwo Elizabbeesi oyu babaaye ni balanga omugumba, yeesi aja husaala omwana mu busahulu buwe era guno aŋira omwesi gwa mukaaga nʼali hida.
37 Olwohuba ŋaŋuma ehihaya Hatonda.”
38 Nga Malyamu aloma ati, “Ese ndi muŋeeresa wa Hatonda Musengwa. Hahibe hiityo hu ese ngʼolu olomire.” Ngʼaŋo Malayika aŋwaŋo getiinira.
Malyamu ahyalira mugandaawe Elizabbeesi
39 Mu hiseera ehyene ehyo, Malyamu genyoheramo gaŋamba olugendo gatiina mu hibuga mu twale lyʼe Buyudaaya mu ehyalo hyʼesozi eyi Zakaliya gamenyanga.
40 Ni goola gengira mu nyumba ya Zakaliya ngʼaheesa Elizabbeesi.
41 Wangewe, Elizabbeesi ni gaŋulira Malyamu nʼamuheesa, ngʼomwana asamba mu hida. NgʼOmwoyo Omutukuvu amaamira Elizabbeesi.
42 Ngʼaŋo Elizabbeesi olwʼesangaalo aloma nʼejanjaasi eryaŋamugulu ati, “Hatonda ahuŋaaye ekabi ohuhira abahasi bosibosi era nʼomwana oyu oja ohusaala yeesi ali nʼekabi.
43 Ko ndiise ani, ewe oja huba nyina ya Musengwa ohuupa eŋono lino eryʼamaani ohucaalira?
44 Olu puliiye ejanjaasi liryo ni bukeesa, omwana asambire mu hida olwʼesangaalo.
45 Oli nʼekabi olwʼohufugiirira oti ebi Hatonda Musengwa gaaloma bija hwolerera.”
Malyamu ajumirya Hatonda nʼolwembo
46 Ngʼaŋo Malyamu aloma ati,
“Mu mwoyo gwange njumirya Hatonda Musengwa.
47 Nʼobulamu wange busangaafu olwa
Musengwa Omunoŋosi wange,
48 olwohuba gapambiiye ehisa
ese omuŋeeresa wuwe aŋumaho naŋaali.
Ohuŋwa ŋaahani abaatu aba hiisi mulembe,
bananangenga wʼekabi,
49 olwohuba Hatonda omwene buŋangi era omwawufu
gakoleeye ebihulu.
50 Ohuŋwa mu hiisi mulembe ogubaluhaŋo
ehisa hihye hiba eyiri abo abamutya.
51 Alagire obuŋangi wuwe owʼamaani mu byamaliholiho ebi ahola,
ni goŋania abeŋeegaho baati njʼabahihenaho.
52 Aŋanuuye abaŋugi hu buŋugi
aye genyosa abeŋomeha gabaŋa obubbala.
53 Geguhise abayala nʼebiraŋi,
aye abo aberanga abaŋinda gabagamirisaho engalo ni jirereeja.
54 Ayedire Yisirayiri abaatu babe abamuŋeeresa
abahebuliiye gaba nʼohusasira,
55 eyiri Yibbulayimu nʼolusaaye lulwe emirembe nʼemirembe,
ngʼolu gahisuubisa abasehulu beefe.”
56 Nga Malyamu amenya nʼElizabbeesi emyesi ngʼedatu, nga ko gaagama engo.
Ohusaaliwa hwa Yowaane Omubatiza
57 Endaalo ejʼohusaala ni joola, ngʼElizabbeesi asaala omwana omuseere.
58 Abaliranwa nʼabalebe babe ni baŋulira ngʼolu Hatonda Musengwa amuŋambiye ehisa gamuŋa omwana, nga boosi basangaala.
59 Omwana ni gaŋesa endaalo munaana, nga batiina ohumuhomola. Baali baja humuguliha esiina lya semwana baati nje Zakaliya.
60 Aye nyina ngʼaloma ati, “Bbe, humugulihe huuti nje Yowaane.”
61 Nga bamuloma baati, “Mu lulyo lulwo muŋumamo muutu kadi mulala oyu baguliha esiina eryo!”
62 Ngʼaŋo beeyedesa obubonero ohubuusa semwana yʼomwana esiina eri genda bamugulihe.
63 Zakaliya ngʼasunga ehipande ehyʼohuŋandiihaho, ngʼaŋandiiha ati, “Esiina lyʼomwana nje Yowaane.” Bosibosi nga beŋunja.
64 Aŋo ni naaŋo nga Zakaliya geguha omunwa era nʼolulimi lulwe nga luboŋoloha, ngʼatandiha ohuloma nʼajumirya Hatonda.
65 Hino hyaleetera abaliranwa babe bosibosi ohweŋunja. Era ngʼebibono bino bihwana hu ŋingi jʼe Buyudaaya josijosi.
66 Bosibosi ababiŋulira, bebuusanga abeene nʼabeene baati, “Omwana ono anaahabe muutu wa ngeri hi?” Baaloma baatyo olwohuba Hatonda Musengwa gaali ni naye.
Olwembo lwa Zakaliya
67 Ngʼaŋo Omwoyo Omutukuvu amaamira Zakaliya semwana ya Yowaane ngʼaŋa obunaabbi nʼaloma ati,
68 “Hujumirye Hatonda Musengwa wa Bayisirayiri,
olwohuba ahyaliiye abaatu babe era abanunuuye.
69 Atuŋaaye Omunoŋosi owʼamaani
ohuŋwa mu lulyo lwa Dawudi omuŋeeresa wa Hatonda, atunoŋole
70 ngʼolu gasuubisa ahale nahale
nʼabita mu banaabbi babe abagwalaafu,
71 atunoŋole ohuŋwa eyiri abasigu beefe,
nomu muhono gwabo bosibosi abatatwenda.
72 Ngʼolu gasuubisa ohuŋambira abasehulu beefe ehisa
era gahebulira endagaano yiye eyʼenjabulo
73 mu hirayiro ehi galayirira sehulu yeefe Yibbulayimu,
ati alitununula ohuŋwa mu ngalo jʼabasigu beefe
74 ko humuŋeerese ni huŋuma hutya,
75 mu bugwalaafu era ni hwolereeye mu moni jije obulamu weefe bosibosi.
76 Ne ewe mwana wase, balihulanga naabbi wa Hatonda oyo Owaŋamugulu Obugali.
Hiri hiityo olwohuba olitangiramo ohutiina ohweyulira Musengwa engira,
77 nʼohuleetera abaatu babe ohufaania engira eyʼobunoŋosi,
Hatonda nʼabasoniŋa ebibi byawe,
78 olwʼehisasabirisi hihye ehingi,
ehiriiha ohuŋwa mwigulu hyʼenjase eyʼeryuba ni liŋwayo,
79 ohwaduhira abali mu hiirema hyʼebibi nʼehisisigo hyʼolumbe,
nʼohutuluŋamya mu ngira ereeta emiyaaya.”
80 NgʼOmwana ahula mu hirangi nomu bulamu wuwe owʼomwoyo era gamenyanga mu lulafu ohwola olu gatandiha ohulomera Abayisirayiri ehibono hya Hatonda.