☰ Ebikolwa 16
16
Temuseewo geŋimba hu Pawulo ni Silaasi
1 Ngʼaŋo Pawulo ni Silaasi boola mu hibuga hyʼe Derube abonaho abafugiirira bayo ngʼahena atiina mu hibuga hyʼe Lisitura. Eyo yaaliyo omuloobera wa Yesu oyu balanganga baati Temuseewo. Nyina ya Temuseewo gaali muhaana Muyudaaya era nʼafugiirira Kurisito, aye semwana niiye gaali Muyonaani. 2 Abafugiirira Kurisito bosibosi mu Lisitura ni Yikoniyo balomanga biraŋi byerere hu Temuseewo. 3 Pawulo gendire ohutiina ni Temuseewo mu lugendo lulwe. Hino hyamuleetera ohumuhomola olwohuba Abayudaaya abaali mu hitundu ehyo bosibosi baali bamanyire ngʼolu semwana gaali Muyonaani.
4 Ngʼaŋo Temuseewo ni Pawulo ni Silaasi baagenda batiina hibuga hu hibuga ni balomera abafugiirira ebi bahwenda nʼabatangirisi abahulu mu Yerusaalemu basalaŋo abafugiirira Abatali Bayudaaya ohuŋamba. 5 Ebibbubbu byʼabafugiirira Kurisito nga biŋangala mu hufugiirira hwabyo era nga hiisi ludaalo omuŋendo gwʼabafugiirira gweyongerangaho.
Ohwolesewa ohu Pawulo gasuna
6 Pawulo nʼabahye baali bendire ohutiina ohulomera abaatu bomu twale lyʼAsiya Amaŋuliro Amalaŋi aye Omwoyo Omutukuvu gabagaana. Ehyaŋwamo nga batiina ni betoloola mu twale lyʼe Fulugiya nʼe Galatiya ni balomera abaatu Amaŋuliro Amalaŋi. 7 Ni boola hu salosalo nʼetwale lya Misiya nga bagesyaho ohutiina mu twale lyʼe Bbisiniya, aye Omwoyo wa Yesu sigabaganya hutiina. 8 Olwʼehyo babita hubita e Misiya beehirira batiina hu mwalo gwʼe Turoowa eyi nabeŋimbiraho. 9 Ni boola eyo mu wiire oweene obwo nga Pawulo goolesewa abona omusinde owomu twale lyʼe Makedoniya ni gemeereye era namwegalihira ati, “Nja e Makedoniya otuyeede.” 10 Ni wahya Pawulo ko nʼahenire ohusuna ohwolesewa, ni gatuŋayira hwasalaŋo aŋo ni naaŋo hutegehe hutiine e Makedoniya, ni huli nʼobuhahafu huuti Hatonda gaali atulanga huje hulomere abaatu abʼe Makedoniya Amaŋuliro Amalaŋi.
Ohucuuha hwa Lidiya
11 Ngʼaŋo husomoha ohuŋwa e Turoowa hutiina hu hizinga ehi balanga Samoturakiya era peyi hwaŋenyuha. Ni wahya nga nindi husomoha hwola hu mwalo gwʼe Niyapooli. 12 Ni hwaŋwayo nga hutiina mu hibuga hyʼe Filipi. Ehibuga hino njʼehyali ehihulu mu twale lyʼAbarooma eryʼe Makedoniya. Eyo hwamenyayo endaalo ejiŋera.
13 Oludaalo lwa Sabbaato ni lwola hwatula ehibuga nga hutiina hu lwabi eyi hwasuubira huuti huŋanga ohwagaanayo ehifo ehiraŋi hyʼohulomberamo. Ni hwola eyo hwagaanayo abahasi abaali ni bahumbeene nga hwihala hutandiha ohubalomera ehibono hya Hatonda. 14 Mu bahasi abo abaali ni batutegeeye amatwi mwalimo oyu balanganga baati Lidiya. Lidiya gaali musubuuzi wʼengoye ejʼerangi lya namasyoma nʼaŋwera mu hibuga Siyatira. Omuhasi oyo gaali Muyonaani aye ni gacuuha gengira ediini yʼAbayudaaya. Hatonda Musengwa ngʼagegula omwoyo gugwe afugiirira obuhwenda obu Pawulo gabuulira. 15 Niiye nʼabomu mago gage ni bahena ohubatiziwa, ngʼatusunga ohutiina ewuwe nʼaloma ati, “Ni muba ni mukahasa ohuba omuutu afugiirira Musengwa, muganye muuje mumenyeho ewange.” Nga huganya hutiina humenyaho ni naye.
Pawulo ni Silaasi mu komera e Filipi
16 Lulala ni hwali ni hutiina mu hifo ehi baatu beeyo bahumbaanirangamo ohusaba nga hwaganana nʼomuhaana owaali omwidu womulala hu baatu bohwo. Omuhaana oyo gaaliho omusambwa ogwamuleeteranga ohulagula ebyabanga ni bija hubaŋo. Musengwawe gamusunirangamo hibbala olwʼohulagula ohu galagulanga abaatu nʼabalomera ebinahabeŋo. 17 NgʼOmuhaana oyo alonderesa Pawulo ko ni neefe abaali ni naye nʼalomera ŋamugulu ati, “Abasinde bano baŋeeresa ba Hatonda owomwigulu ahira bosibosi obuŋangi. Bali hubalomera baati Hatonda oyo njʼanoŋola.” 18 Hino gahihola ohuhena endaalo ejiŋera. Ehyo hyaleetera Pawulo ehabyo ehyaŋwamo ngʼacuuha aheja eyiri omuhaana oyo ngʼaloma omusambwa ogwamuliho ati, “Kulagira mu siina lya Yesu Kurisito, muŋweho!” Ngʼaŋo ni naaŋo omusambwa gumuŋwaho.
19 Abeene muhaana oyo ni babona baati esuubi lyabwe eryʼohwingisa obuŋinda lihomire, nga baŋamba Pawulo ni Silaasi babadyedyesa babaŋira mu nabiŋwera mu moni jʼabobuŋangi. 20 Ni baboosa nga babemeha mu moni jʼabalamuzi babaŋaŋabira ni baloma baati, “Abaatu bano Bayudaaya ne basasamahise abaatu mu ehibuga muno 21 ni babaleegera esambo eji efe Abarooma hutaŋanga hufugiirira wayire ohugenderamo.”
22 Ngʼaŋo oguŋindi gwʼabaatu abaali aŋo gweŋimba hu bala abaali ni baŋaŋabira Pawulo ni Silaasi gubejulira. NgʼAbalamuzi balagira bambula Pawulo ni Silaasi babafaduula efaalu. 23 Ni bahena ohubafaduula nga babadanya mu komera bahena balagira omuhuumi wʼekomera ohubahuuma butiribiri. 24 Omuhuumi wʼekomera yeesi ni bamuŋa ehiragiro ehyo ngʼabata mu hisenge ehyomugati ngʼabasidiha amagulu nʼebijofu.
25 Mu wiire ŋagati Pawulo ni Silaasi ni baali ni basaba era ni bemba nʼenyembo ejʼohumujumirya, abasibe bahyawe baali baŋulirisa. 26 Ngʼaŋo ni naaŋo ŋabaaŋo ohuteetema hwʼehyalo ohwʼamaani ohwatengesya omusingi gwʼekomera. Ngʼejigi jʼekomera josijosi jiiguha nga nʼenjegere eji baali ni basidihiiye abasibe bosibosi jiboŋoloha.
27 Omuhuumi wʼekomera ni gasisimuha mwiro gaabona enjigi jʼekomera ni jiri njigule ngʼaŋeega ati abasibe beyibire. Ngʼasoŋolayo epiima yiye ni genda geeyite. 28 Aye Pawulo ngʼamuhayuhira ati, “Leha oteyita! Hwesihwesi hulimo!”
29 Ngʼaŋo omuhuumi wʼekomera atumisa baleete etaala. Ni bamuleetera etaala nga gengira mangu mu komera ahubba amafuha ohuupi ni Pawulo ni Silaasi nʼateetema huteetema olwʼobuti. 30 Ngʼaŋo atusa abasibe abo ebulafu ahena ababuusa ati, “Basengwa, kole hi ko nahanoŋoha?” 31 Ngʼaŋo bala bamuloma baati, “Fugiirira Yesu Musengwa oja hunoŋoha ewe omwene nʼabomu mago gago bosibosi.”
32 Ngʼaŋo Pawulo ni Silaasi balomera omuhuumi wʼekomera nʼabomu mago gage bosibosi ehibono hya Musengwa. 33 Owiire obwo ngʼomuhuumi wʼekomera aŋira Pawulo ni Silaasi aŋali amaaji abamitya amabbwa gʼebihubbe. Ni gahena ngʼaŋo ni naaŋo omuhuumi wʼekomera abatiziwa ko nʼabomu mago gage bosibosi. 34 Ni bahena ngʼomuhuumi wʼekomera aŋira Pawulo ni Silaasi ewuwe abaŋa ehigeni ni gejuuye esangaalo olwohuba niye omwene nʼabomu mago gage bosibosi baali bafugiiriiye Hatonda.
35 Owiire ni wahya ngʼabalamuzi batuma abasirikale eyiri omuhuumi wʼekomera bamulome baati, “Lehula abasinde abo.” 36 Ngʼaŋo omuhuumi wʼekomera aloma Pawulo ati, “Abalamuzi bandagiiye mbalehule, ewe ni Silaasi. Olwʼehyo mweyagamireyo engo era mwole bulaŋi.” 37 Aye nga Pawulo aloma aba balamuzi batuma ati, “Batuhubbire mu lwijuuye ni batehereeye hutuŋosesya ate nga ko huli Barooma. Ŋaahani olwo batulehula batye mu ngiso? Kadi! Hugeene. Muje mubalome abeene baaje batulehule.”
38 Nga bala batiina balomera abalamuzi ebi Pawulo gabaloma. Ni hyabagwa mu hutwi hiiti Pawulo ni Silaasi Barooma nga balebera ekoba. 39 Ngʼaŋo baja babebbwagira olwʼebi baali ni babaholire nga babaŋerehera babatusa ebulafu wʼekomera ni babegalihira batiine baŋwe mu hibuga ehyo. 40 Pawulo ni Silaasi ni baŋwa mu komera nga batiina ewa Lidiya. Ni boola nga babonana nʼabafugiirira nga babahubbirisa ohwegumya hu Yesu nga bahena basimbuha batiina.
☰