Yatjayaku Tjukurrpa
1
1 Yuwa, ngayulu-rna Yatjayanya Yayimitjaku katja. Nyangka Mama Kuurrtu-rni nintitjunu tjukurrpa ngaanya yarnangu pirninyatjarra nyarra-ya Tjurutjamala puru ngurra nyarra Tjuutala nyinapayi, palunyatjarra. Tjiinya-rni rawalu nintitjuranytja, puurrpa pirninya-ya nyinarra-wanarayinnyangka. Tjukurrpa kutjupatjarra-rni nintitjunu Tjayanya puurrpa nyinarranyangka, palunyalu tjukurrpa kutjupa Tjawutjamanya puurrpa nyinarranyangka, puru tjukurrpa kutjupa Yayitjanya puurrpa nyinarranyangka, puru Yitjikayinya puurrpa nyinarranyangka. Tjiinya-ya ngurra Tjuutaku puurrpa pirni nyinarra-wanarayinnyangka-rni tjukurrpa nintitjuranytja.
Yarnangu Pirnilu-ya Palyamunu Palyaranytja
2 Mama Kuurrtu ngaapirinypa watjarnu,
“Parna yilkari, kulila-rnipula.
Ngayulu-rna tjilku pirninya kanyirayirnu purlkarnu.
Nyangka-rniya kulintjamaalpa tungun-tungunarringu.
3 Tjiinya puluka pirni-yanku puurrpa tjarntuku ninti nyinarra.
Nyangka-yanku tungkilu nintilu kulilpayi palunyaku mirrka tjunkula wantirranyangka.
Nyangka-tjuya ngayuku katja yurntalpirti tjiinya Yitjurayilku tjamupirti
ngayuku-ya ngurrpa tirtu nyinarra.”
Palunyapirinypa Mama Kuurrtu watjarnu.
4 Yuwa Yitjurayilku tjamupirti, nyuntunya-yan palyamunu nyinapayi.
Nyuntulu-yan Mama Kuurrku wangka wantirralpi kutjupa-kutjupa palyara.
Nyuntulu-yan palyamunu pirni palyara,
nyarra kutjulpirtu-ya mama ngunytjulutarrartu palyamunu palyaranytja, palunyapirinypa.
Mama Kuurrnga walykumunu mularrpa nyinapayinya-yan wantingu,
tjiinya nyuntuku-tjanampanku tjamu Yitjurayiltu pupakatirra marninypungkupayinya-yan wantirralpi yungarra nyinarra.
5 Nyaaku-yan Mama Kuurrta tirtu tungun-tungunarringkula?
Tjiinya-tjinguru-yan mukurringkula Mama Kuurrtu-tjananyanta tirtu pungkulatjaku.
Palunyalanguru-yan kata pikatjarrapirinypa nyinarra,
purtupakalpa.
6 Tjiinya-yan mara, kata, yamirri, tjarlpa kutjarranya puru tjinatarrartu pikatjarrapirinypa nyinarra.
Pika yawarra purlarrtjarra-yan nyinarra.
Nyangka-tjananyanta kutjupalu mirritjinta nyirtira wantirranytjamunu.
Puru-tjananyanta karrpira wantirranytjamunu.
7 Nyuntuku ngurra lipiwana naaru-naaru ngarala.
Yiwarla pirninya malikilu-ya tilirnu tjarrpatjunu.
Nyangka yurirlpakutju ngarala.
Kurungkartu-tjananyanta maliki pirnilu-ya ngurra yangatjuralpi kurrara kanyira.
8 Nyangka Tjurutjamanya ngurra kutjurringu ngarala.
Tjiinyakurlu-ya yanyan-yanyanpa pirnilu yangatjura kanyinma, palunyapirinypa.
9 Tjinguru-lan mirrirringama,
yarnangu Tjurutjamanyamartatji pirninya-lan.
Ngarna Mama Kuurrtu-lanya marnkurr-marnkurrpa kanyira
wanka nyinarratjaku.
Tjinguru-lan pirninyartu mirrirringama,
nyarra-ya Tjatamala Kumarala kutjulpirtu mirrirringu
Mama Kuurrtu ngurra-tjanampa tilirnu tjarrpatjunkunyangka, palunyapirinypa.
Mama Kuurrku Wangka Kulira Wangarnarralu Palyaratjaku
10 Puurrpa pirni, kulila-ya, ngaa Tjurutjamala-yan nyinarra. Nyuntulu-yan palyamunu nyinarra, nyarra-ya yarnangu pirninya palyamunu nyinarranytja Tjatamala Kumarala, palunyapirinypa. Kulila-ya tjiinya Mama Kuurrtu-tjananyanta watjaranyangka.
11 Tjiinya-tjananyanta ngaapirinypa watjara, “Nyuntulu-tjuyan tjiipu pulukatarrartu katirra pungkula tilira tjunkula nintilpayi. Tjinguru-yan kurntarringama palyamunu palyaranytjatjanulu. Palunyalu-tjuyan palya kuka katirra nintinma. Ngaanya-yan palyamunu palyaranytjatjanulu watarrkulu kuka katirra nintira. Wiya, kaarr-kaarrarringu-rna.
12 Tjinguru-yan kulira ngayulu-rna watjarnu kuka-yan watatjalu katirra nintiratjaku ngayuku tjurrtjungka. Wiya, watjantjamunurtu-rna. Tjinguru-yan kulira kurntarringkula kuka katirra nintinma.
13-14 Ngaanya-yan ngayuku wangka kulira wantirranytjalu kuka katirra ngayuku nintira. Wiya, wanti-ya. Tjiinya-yan kunpu-kunpu katirra nintira. Puru-yan kunpu-kunpu parnti walykumunu pulparrunya ngayuku tilira tjunkula. Palyamunu pirninya-yan palyaranytjatjanu pitjala tjirntu miirl-miirlta lurrtjurringkupayi. Palunyalu-yan turlku purlkanya kanyilpayi kirnara ma-ngarrinyangka kutjupayaratarratu. Wiya, walykurringkula-rna palunyapirinypa-yan palyaranyangka. Wanti-ya. Kaarr-kaarrarringu-rna. Tjiinyakurlu kutjupalu luurrpa purlkanya katirrayila talypurriwa, palunyapirinypa.”
15 Nyangka Mama Kuurrtu tirtu watjaranytja, “Wiya, kulilkitjamunu-rna tjapiranyangka-yan. Tjiinyamarntu-yan yarnangu pirninya pungkula mirrirntaranytja.
16 Palyamunu-ya wanti. Tjiinya-tjananyarnanta nyakula walykurringkula palyamunu-yan palyaranyangka. Wanti-ya.
17 Palunyalu tjukarurrurringkulalpi nyina. Tjiinya kutjupalu kutjupanya kunpu-kunpu payiranyangka marrkula. Nyangka kutjupalu minyma parnaltji puru tjilku wangulyara pungkulanyangka waarrpungkula paalytjura kanyinma.”
18 Nyangka Mama Kuurrtu tirtu watjara-wanarayintja,
“Pitja-ya, nyangka-la wangkarra kulinma.
Tjiinya-yan palyamunu palyaranytjatjanu kirtirringu nyinarra.
Nyangka-tjananyarnanta parltjilku walykumunulku.
Nyangka-yan walykumunurriku nyinama.
19 Yuwa, tjinguru-yan ngayuku wangka wangarnarralu kulira palyalku.
Palunyangka mirrka walykumunu ngurra ngaangka
paka-pakalku ngarama.
Nyangka-yan yurrara ngalkuma.
20 Wiya-tjinguru-yan tungun-tunguntu ngayuku wangka kulilku wantiku.
Palunyangka warrmarla pirnilu-tjananyanta pitjaku pungku wiyalku.
Yuwa, ngayulu-rna Mama Kuurrtu tjukurrpa ngaanya watjarnu wantingu.”