28
Yesu itine paiwe
Iyamulan para lang Sapat, pe lang iro mbungahiy, para lang iho mu para sandre sih, pwen Mariya para Maktala pe Mariya hamou i, ara hilya para kaya nime ngat.
Pe indrou pwi ko, nunuw namandran iya irayah, paratesah, angelou hamou ta Yapan iyau kol paingan yang isa pwan, pe iya ngat pe itiriyani pat iya mawen, pe impwan ndritan. Pe kaipisan tehe kamit, pe koiwen ara pallen iya tehe koh. Pe hu ndramat para memere, ara hunoh turuwehu iyatan, pe hulelen pe mwensehu, ara hurayah tehe hu ndramat kanmat.
Pe angelou ipwai iya kili hilu pihin malmou ara, ipa, “Walu mbuna alkanoh, paratesah, tono tehe walu tora ten Yesu mepo hu kantapaingi yiy kinna kei tondrih. Yiy kinto iye pwi, yiy kintine, imwonen tehe kinpwai. Walu kasa nime nokun mepo iyen aliy. Kiya, walu kaleheleh pe kaya pwai kaya kili ndramiran hu toro: ‘Yiy kintali kimat pe kintine paiwe, pe andre kiro mu kili wawu kiya Kaliliy. Pe wawu andre kaya nime yiy kaya aliy.’ Kiya, yo kunese ndrainga walu ara.”
Pwen pe hilu pihin malmou ara, ara hilu himbuh o, hilyau hilya mawen ngat. Pe hilu noh, hapeko pwesai namandran iwiri hilu, pe hilu ngap para hilkaya tiyaniy kiya kili ndramira Yesu hu. Pe indrou pwi ko, Yesu ipohonani hilu, pe ipa, “Mandroulang!” Pwen hilya kili yiy pe hilu mbultuwe ngondrokan, pe hilhiri ngalan. 10 Pwen Yesu ipwai iya kili hilu, ipa, “Walu mbuna alkanoh. Walu kaya pwai kaya kili nali hu para hu kaya Kaliliy, pe andre hu kaya nime yo kaya aliy.”
Tiyeya hu ndram para memerani ngat
11 Hilu pihin malmou, ara hilro tokai manau hilya, pe hu ndram hayah para memere, ara huya nondriya kol namandran, pe huya tiyaniy iya kili hu pris huhohin ta hu pris masih, iya hu melit masih mepo hu kantayah. 12 Pwen hu pris huhohin ta hu pris masih, ara huya rawure huyapolo hu yapane kol, pe humburi lohongai, pe huiki singayai namandran iya, iyata hu ndram. 13 Pe hupwai iya kili hu, hupa, “Wawu katiyaniy, akapa toro: ‘Ndramiran hu, ara husa pinge ping pe hupahanowe yiy kinnau, iro mwonen yowu ro matin.’ 14 Pe kapa titiye iye kiyarayah kiya ndrainga pohon para kapman, pwen andre yowu karamwanye lohongan, pe wawu andre kanwiri nopwaran pwi.” 15 Pwen pe hu ndram huwiri singayai ara, pe humbusi tesah mepo hu pris huhohin ta hu pris masih pe hu Parisiy, hu kanpomwanye kinnata hu kinna aliy. Pe titiye aro, kinsilihi hu Yutah masih, ita ipoo isa matnen lang mahapo yi.
Yesu iwong iya mbulen namandran masih para kambusiy
16 Pwen hu ndramiran songui pe hamou, ara huya Kaliliy, pe huya ngondron mepo Yesu kinpwai para hu kaya aliy. 17 Pe iro mwonen hunime yiy, ara huhuri ngalan, hapeko hu hayah tahu, ara lohongahu ihindrundru. 18 Pwen Yesu isa kili hu, pe ipa, “Pwoke nopwaran masih ita kol paingan yang pe iripo kol pwan, ara Ngindrai kiniykiy topwei kinsa kili yo. 19 Pwen ndroiyin aro ko, akaya pe akahanuwani hu ndraye ndramat masih kene para hu karayah ndramiro. Pe akasumuluwani hu kiya ngala Tomo, pe Norun, pe Mwoiwan Haiyan. 20 Pe akahanuwani hu para hu koho ndruwa nongan masih kene, mepo kunpwandrandrahaniy kinsa kili wawu. Pe ndrokonan masih, yo, ara urupo sura wawu lang masih, kipoo kiya matne lang kiyahapwen.”