2
Hu ndramat lohongai waison iro kili hu, ara husa nime Yesu
1 Pe Mariya imwalahiy ta Yesu iro kol ngawan Petlehem, ita nondriya kol namandran hape Yutiya. Pe iro mwonen Herot iro king, hu ndramat hayah lohongai waison iro kili hu, ara huyau te kup, pe husa Yerusalem.
2 Pwen husok, hupa, “King tahu Yutah mepo tinan kinmwalahiy kinnatan ara, ita aleheh? Yowu nime piriy tan iho kup, pe yowu sa, ara para kayatohun kiya kili yiy.”
3 Pe iro mwonen king Herot ihilong nongan aro, pwen lohongan ara ikairut, iyapolo yihu para Yerusalem masih i.
4 Pwen iyoh hu pris huhohin ta hu pris masih, iyapolo hu namandran para hinuwani nongan para pwahanou, ara husa harong. Pe isok hu para hape aleheh tina Kristus andre kimwalahiy tan.
5 Pwen husomwi yiy, hupa, “Yiy ita Petlehem nondriya kol namandran hape Yutiya. Poropet kintatuluwiy pwen kinna, ara ipa toro:
6 ‘Wawu ndramira Petlehem, tora pwan para Yutah,
wawu, mbuna akapa ndre ngala wawu pwi ita mwalinga hu kol para Yutah,
paratesah, andre pohon hamou kiyau kili wawu,
pe yiy andre kipwokarani ndramiro hu para Yisrayel.’ ”
7 Pwen Herot iyoh hu ndramat lohongahu waison para kup ara, kokohon opu, para pakipahas kiya piriy ara isarayah sehe lang ndrokonan.
8 Pwen ipwandrisa hu huya Petlehem pe ipwai iya kili hu, ipa, “Akaya pe akayatele nokulani mbunah ara. Pe kapa akankahi yiy pwen, pwen akasanese ndraingo. Pwen pe yo, ara andre kuya tohun kiya kili yiy i.”
9 Yihu hilingi nongna king ihipwen, pwen huyau. Pe piriy mepo hu kannimei ingas te kup, ara iye mu tahu ipoo iya kuw iho hape aleheh mepo mbunah ara, iro aliy.
10 Pe iro mwonen hunime piriy, ara hupwes namandran iya.
11 Pwen husarayah husa seu, pe hunime mbunah iyapolo tinan Mariya, pe hutukuruhu iya pwan, pe hutohun iya kili yiy. Pe hurehe hu ndropwahu pe huiki hu yukyuk tehe kolt, pe paura para kambusi kosumwan ngonohon layin kaliy, pe ndraikei mangonohon layin.
12 Pwen Ngindrai ipwandrandrahani hu iho nondriya nihinih, para mbuna hu kamui kaya kili Herot. Pwen pe humui huyayau sai hasai yi, pe huya kolo hu.
Yosep hu huwop huya Yisip
13 Hu ndramat lohongai waison iro kili hu ara hu kannau, pwen angelou hamou ta Yapan iyarayah iya kili Yosep iho nondriya nihinih, pe ipa, “Atine, awiri mbunah kiyapolo tinan pe akawop kaya Yisip. Ayen ara, kipoo kuwong kisa kili wou, paratesah, Herot, ara andre kiten mbunah ara, para kitingundrun.”
14 Pwen pe iho makohuping opu, Yosep ihilak o, iwiri mbunah iyasura tinan, pe huyau huya Yisip.
15 Pe iya iro manau aliy ipoo Herot imat. Melit aro, irayah mannan tehe Yapan kinpwai pwen iyau kili poropet toro: “Yo uyoh noru kamai isa mawen Yisip.”
16 Pwen Herot isayirowei tehe yihu ndramat lohongahu waison ara, ara hu kanpakarawani yiy. Pwen ndrinan ilokuh, pe ipwandrandrahani hu ndramat para katingundru hu mbunah kamai para nondriya kol ngawan Petlehem, mepo hayou tahu iho pahandra hayou maluwoh. Ndroiyi lohongai para Herot isok hu ndramat lohongahu waison iya sehe lang ndrokonan hunime piriy, ara para pakitingundru hu mbunah mepo tinahu imwalahiy tahu iho nondriya lang ara.
17 Pwen sehe melit mepo Ngindrai kinpwai pwen kinna kili poropet Yeremayah, ara kintayah mannan toro:
18 “Ngasa ndriyang irayah, iyasura payandriyang namandran iya ita nondriya kol ngawan Ramah.
Rahel itarang turut iyata norun hu,
pe mbuwalin para karambumbuni yiy,
paratesah, norun hu konto pwi.”
Yosep hu humui husa Nasaret
19 Pe Herot imat ihipwen, angelou ta Yapan iyarayah iya kili Yosep iho nondriya nihinih iro Yisip.
20 Pe ipwai, ipa, “Atine, awiri mbunah kiyapolo tinan, pe akamui akaya pwene hu Yisrayel. Paratesah, hu mepo hu pakatingundru mbunah ara, ara hu kanmat.”
21 Pwen pe itine, iwiri mbunah iyapolo tinan pe humui huya kol namandran iya Yisrayel.
22 Hapeko Yosep, ara kinhilong tehe Arkelawus, ara iwiri ndrohonoku taman Herot pe iro king iro kol Yutiya. Pwen pe inoh para kiya aliy. Hapeko angelou ipwandrandrahani yiy iho nondriya nihinih, pe iya kol namandran hape Kaliliy.
23 Pe iya pe ikuw iye kol ngawan Nasaret. Pwen pe sehe melit mepo hu poropet kanpwai, ara kintayah mannan toro: “Andre hu kapohowe yiy ndramira Nasaret.”