4
Nongan pwandritiye ta ndramat hamou para piyeya peke wit
1 Pwen Yesu iro hinuwani hu ndramat paiwe ngilse ndran makaiye. Pe hu ndramat soyo-soyon iya, ara husa rawure hu husa kili yiy. Pwen pe ihis iya nondriya ndroi hakou iho pit, pe impwan aliy. Pe hu ndramat masih, ara huro poholeng pwaki ndran makaiye.
2 Pe Yesu ihinuwani hu iya melit soyon iya hu nongan pwandritiye. Pwen ipwai iya kili hu iya nondriya nongan para hinonou tan, ipa,
3 <<Wawu kahalingiy! Ndramat hamou para mbulya piyang iya piye peke wit tan.
4 Pe iro mwonen iro piye hu peke wit, tiken para aliy, ara hulon huro sai, pe hu norukan para husa pe huiniy.
5 Pe tiken i hulon huro ndrita pwan sosolou, mepo pwan soyon kinto aliy pwi. Pe indrou pwi ko husahambunet, paratesah, pwan kinna hangoh mbulun pwi.
6 Hapeko iro mwonen mwandrai ingas, ara ngandraha mwandrai itimwi hu peke wit ara pe huwayiu, paratesah, ngondrohu ara kansin kanna pwan pwi, pe humang.
7 Pe hu peke wit tiken, ara hulon huya mwalinga hu malkei maporon; pe hu malkei maporon, ara huraimwani hu pe hu kanippwai pwi.
8 Hapeko tiken tahu mepo hulon huro pwan hiyan, ara hulek pe hu mandra pe huppwai. Hu huppwai pe sangihu hurayah tehe mapeke tingui, pe hayah mapeke anongui, pe hayah mapeke sangat.>>
9 Pwen Yesu ipwai iya kili hu, ipa, <<Hiyeh mandraingan, ara kihilingi nongan iye.>>
10 Pe iyamulan hape, Yesu opu iro mwoimwoi pe ndramiran hu huya pe hurahakowan, iyapolo hu ndramat hayah i, pe husike yiy iya hu nongan pwandritiye ara.
11 Pe ipwai iya kili hu, ipa, <<Lohongai kokohon para kolo King Ngindrai mepo ngara kiro mu kiya aliy, ara kaniykiy kinsa kili wawu. Hapeko hu ndramat hutora ngawan, melit masih mepo urupo pwai, ara itapo iya kili hu iya hu nongan pwandritiye ko.
12 Pwen pe,
andre hu koro ten, hapeko andre hu kankahiy pwi;
pe andre hu koro hilingiy, hapeko andre hu kanpahasaniy pwi.
Kapa pwi, matisan hu karapaiwani hu pe Ngindrai kitali mwomwan tahu.>>
13 Pwen Yesu isike hu, ipa, <<Lohonga wawu kinileu kinna nongan pwandritiye iye pwi, ndre? Pwen andre lohonga wawu kileu kiya ndroiyi nongan masih ita nongan pwandritiye tehen tapeh i?
14 Ndramat para piyeya peke wit, ara ihasi nongna Ngindrai.
15 Hu peke wit mepo hulon huro sai, ara tehe ndramat hayah mepo huhulong nongna Ngindrai, pe indrou pwi Sinai isa pe iwiri nongan mepo Ngindrai kiniykiy kinhan iro ndriyahu iya mawen.
16 Pe hu peke wit tiken hulon huro ndrita pwan sosolou, ara tehe ndramat hayah mepo huhulong nongan, pe indrou pwi ko huwiriy pe hupwes.
17 Hapeko ngondrohu, ara kinsin pwi, pe hu konto ndrangan niwen pwi. Pe tunan nongna Ngindrai opu, pwen kiro mwonen nopwaran kisa, ara indrou pwi ko, andre hu kayos kaya mawen.
18 Pwen hu peke wit tiken hulon huya mwalinga hu malkei maporon, ara tehe hu ndramat hayah huhulong nongna Ngindrai,
19 hapeko hunimanga hu melit handra-handra para kol pwan, pe singayai ipakarawani hu pe lohongahu imeu iya aliy, pe hunamili melit handra-handra. Pwen pe melit masih tehen tora, ara iraimwani nongna Ngindrai pe kinippwai pwi.
20 Hapeko hu peke wit hulon iya pwan hiyan ara tehe hu ndramat mepo huhilingi nongan pe hupwotisingi nongan ara, pwen huppwai. Hayah, ara huppwai pe sangihu hurayah tehe mapeke tingui, pe hayah hurayah tehe mapeke anongui, pe hayah, ara hurayah tehe mapeke sangat.>>
Paisui sih iro tine iya kakan sih
21 Pwen Yesu ipwai iya kili hu, ipa, <<Iya hiyan para ndramat hamou kiwiri paisui kisa pe kikulani ngana mwan kiya pahandra pwelekei, ndre kiya pahandra sousou? Ara pwi yoh! Hiyan para kiykiy kiro ndrita kakan.
22 Paratesah, melit masih ita kohon, ara andre kamulan kirayah ngawan, pe melit hundrutuhiy, ara andre kamulan kisa yelan ngawan.
23 Kapa hiyeh mandraingan, ara kihilingi nongan iye.>>
24 Pwen pe ipwai iya kili hu paiwe, ipa, <<Mara wawu kiro melit masih wawu topo hilingiy. Sehe ndrohongan mepo wawu nakaikiy kiya kili hamou, ndrohongan tehen tora ko, ara andre kimui kisa kili wawu kihisoule ko yi—pe andre kiho hin hape.
25 Hiyeh mepo mamenmenan, ara andre Ngindrai kipo sura menmenan. Hapeko yiy mepo menmenan pwi, konan hape sohoyan kimin, ara andre kawiriy topwei kiya mawen kili yiy.>>
Nongan pwandritiye para peke wit ilek
26 Pwen ipa, <<Kultuwayi kolo king ta Ngindrai mepo ngara kiro mu kiya aliy, ara pwen tehe ndramat hamou ipiye hu peke wit, pe hulon huya ndrita pwan.
27 Ping iro matin pe lang itine pe ipo mbulyan, hapeko hu peke wit huro lek pe huro mandra, ara ndramat ara ikowu tehen tapeh iro rayah.
28 Pwan mbukenan, ara ihingini hu peke wit pe hulek, pwen iyamulan huppwai. Yowihu husarayah, pe huiki nonowehu, pwen iyamulan huiki sangihu.
29 Pwen iro mwonen hu sangi wit human, indrou pwi ko, ndramat ara, iwiri semen tapuiwe pe isondritiy, paratesah, lang para rihiyan kinsarayah pwen.>>
Nongan pwandritiye para peke mastet
30 Pwen Yesu iwong paiwe, ipa, <<Yorou andre kapwandrohonge kolo King Ngindrai mepo ngara kiro mu kiya aliy, ara kiya tesah? Sehe nongan pwandritiye andre tukatiyaniy para kiyinganiy?
31 Ara tehe peke mbuwa mastet sih. Peke mbuwa mastet ara mendreheh masih iya kili hu peke mbuwakei masih mepo ngara kayuk.
32 Pe kiro mwonen tukahas peke mastet, ara andre kimandra kiya namandran kili hu kei masih para piyang. Ndrandran, ara namandran, pe ilahi hu norukan hu kaya pe kapuli yumwahu koho lohowan para aliy.>>
33 Yesu ngara kiwong kiya nongan pwandritiye soyon iya tehen tora ko, mepo ilahi lohongahu kileu kiya aliy.
34 Nongan masih iro wong iya kili hu, ara iya nongan pwandritiye ko; kinho wong ngawan pwi. Hapeko iro mwonen yiy pe ndramiran hu mbukenan o hu koro, ara ngara kitiyani melit masih kileu kiya kili hu.
Yesu ipomate nohai namandran imaito
35 Pe piyahon para lang ara, ara ipwai iya kili ndramiran hu, ipa, <<Tukayau kaya singondriti ndran makaiye pe tukaya haroh.>>
36 Ndramiran hu huhis huya ndroi mepo Yesu iro aliy, pe hutali hu ndramat soyon huro ndron pe huyau. Pe hu ndroi hayah, ara huya surahu yi.
37 Pwen nohai namandran ingas pe nowei iro talon iya nondriya ndroi, pe ndroi, ara pakisomun.
38 Pe Yesu iye kuwi ndroi pe iyki payan iye ndrita wayung pe kinmatin turut. Pwen ndramiran hu huhungini yiy pe hupa, <<Ndramat Para Hinonou, pakeh worou nakayuh ara; alohongani worou ndre pwi?>>
39 Pwen itine pe ipomate nohai, pe ipwai iya kili nowei iro talon, ipa, <<Mosun! Awayis!>> Iwong ihipwen pe nohai imaito pe ndras imat.
40 Pe ipwai iya kili ndramiran hu, ipa, <<Paratapeh pe wawu noh? Lohongai ndrisiyon tawawu ara pwi ndron, ndre?>>
41 Pwen hunoh mimiri hu, pe hamou iro sok hamou, ipa, <<Aripo sehe ndramat? Nohai pe nowei kene, ara hilu hilingi nongnan i!>>