14
Hu pohon humburi nongan para katingundru Yesus kimat
1 Lang malwoh iho ndron para kirahihini mbultere tahu Yisrayel para Pasopa kiyapolo lang para hu kalohongani Yon Para Ndrina Nohun Mepo Yis Aliy Pwi. Pe hu namandran tahu pris pe hu ndramat para hinuwani nongan para pwahanou ara, huramburi nongan para hu kakorip kokohe para kambultuwe Yesus pe katingundrun kimat.
2 Hapeko hupa, “Mbuna tukambus hapesah kiro nondriya lang para mbultere, paratesah, kapa tukambusiy, matisan hu ndramat karambumbuwat.”
Pihin hamou itilingi ndraikei iya paya Yesus
3 Pwen Yesus iya iro suwe Simon iro kol Petani. Simon ara yiy ndramat hamou mepo mwamwa lepara iro kili yiy mamu. Pwen humpwan hurakaiyani keyau, pe pihin hamou isa isap pwisi ndraikei sih, ndraikei ngonohon layin iro nondriyan mepo kenen ara namandran iya. Ndraikei ara ngalan nart. Pwen itumbuwe mara pwisi ndraikei ara, pe itilingi ndraikei iya paya Yesus.
4 Pe hu ndramat tiken huro ara, hunimei pe ndrinahu ara ilokuh. Pe huro pwanguluwaniy mwalinga hu hupa, “Tehen tappeh pe itilingi ndraikei mangonohon layin ara mwaihei opu?
5 Kapa yiy kinpwalngani ndraikei mangonohon layin ara pwi, pwen hiyan para tukawiriy kiya pehei, pe andre yihu kasowaniy kiya sombulepat silwa matingat (300). Pwen sombulepat ara, ara iya hiyan para tukateinganiy kiya tahu ndramat mepo menmena hu pwi.” Pwen pe hupomatte pihin ara iya mwomwan.
6 Hapeko Yesus ipwai iya tahu ipa, “Akatali yiy kiro. Paratesah wawu pomatte yiy? Yiy ara imbusi kultuw hiyan isa kili yo.
7 Hu ndramat menmena hu pwi ara andre hu koro sura wawu lang masih. Pe ita weleso ta wawu ko, sehe lang apakasopwat hu, akasopwat. Hapeko yo ara kunlahiy kunto sura wawu lang masih pwi.
8 Pihin ara imbusi sehe melit ilahiy para kimbusiy. Yiy itilingi ndraikei mangonohon ara isa mondro para kirahihini tonton to.
9 Yo upwai ndrokonan isa ta wawu, hape aleheh nondriya kol pwan masih mepo hukaya pe hu kapohowe nongan hiyan kiyaliy, pwen andre hu katiyani sehe melit pihin iye imbusiy i, pe andre hu kalohongani yiy.”
Yutas irandrangan para kiyki Yesus kiya nima hu pohon tahu pris
10 Pwen Yutas NdraYiskariyot, yiy hamou tahu songui pe lumou ara, ara iya kili hu namandran tahu pris pe iya mburi lohongai para yiy kiratuni Yesus kiya nimahu.
11 Pe huhilingi nongna Yutas pe hupwes namandran iya; pe hurandrangan para hu kasowani yiy kiya sombulepat. Pwen yiy ara iro ten sehe sai hiyan para kiratuni Yesus kiya nimahu.
Yesus inamnam iyasura ndramiran hu
12 Pwen lang sih imu iya lenge Yon Para Ndrina Nohun Mepo Yis Aliy Pwi ara isarayah. Lang ara ngara hu katingundru noru sipsip para Pasopa. Pwen hu ndramira Yesus husike yiy hupa, “Hape aleheh welem iso para yowu kaya ponokulaniy para aya pe ayan Pasopa kaliy?”
13 Pwen ipwandrisa hilu ndramiran malmou pe ipa, “Walu kaya nondriya kol namandran pe ndramat hamou mepo ikuni kohoyenga ndran ara andre kipuhunani walu; pwen walu koho ndruwan.
14 Pwen sehe seu ndramat ara nakisong kaliy, pwen walu kasok ndramira seu ara, alkapa, ‘Ndramat Para Hinonou ipwai ipa, “Ndrohonoku mbultere ara ita hapeleheh, mepo andre yo kuyan Pasopa kiyapolo hu ndramiro?’ ”
15 Pwen andre yiy kipwaingani nondriya seu sahin, hongan namandran, ita paingan. Hu kanmwaniyani melit masih tehe keyau pe ndroho pwanpwan pwen, ita mweimwei para mbulya Pasopa.”
16 Pwen hilu ndramiran hilya nondriya kol namandran pe hilu nime memelit masih ara kinmwonen tehe Yesus ipwai. Pwen pe hilu ramwaniyani mbulen para Pasopa.
17 Pwen ipiyah, Yesus iyapolo hu ndramiran songui pe lumou huya seu ara.
18 Pwen huya hurakaiyani keyau pe humi namnam, pe Yesus ipwai iya kili hu ipa, “Yo upwai ndrokonan sata wawu, hamou ta wawu, hamou hiyeh mepo impo namnam sura yo mahapo, ara andre kiratuni yo kiya nima hu ndramat para mwisinani yo.”
19 Yihu ndramiran ara huhilingi nongan aro pe ndriyahu ara ipworu. Pe hamou-hamou tahu husok yiy, hupa, “Andre yo, ndre?”
20 Pwen pe ipa, “Yiy ara hamou tawawu songui pe lumou mepo iripo taimani ndrina nohun iya nondriya pwelekei polo yo.
21 Noru Ndramat ara andre kiho ndruwa sehe nongan hu kanratuluwiy pwen. Hapeko sehe ndramat mepo nakiratuni Noru Ndramat kiya nima hu ndram, ara hiyan masih kapa tinan kinmwalahiy kinna tan koluw pwi.”
Yesus iyki ndrina nohun pe wain iya kili ndramiran hu
22 Iro mwonen huro namnam, pe Yesus iwiri ndrina nohun, itoholiy pe iramburingiy. Pwen iykiy iya kili hu pe ipwai ipa, “Iye ara nombuwe; akawiriy.”
23 Pwen iwiri pweniu wain sih, itoholiy, pe iyki iya kili hu. Pe hu masih ara huyin yaliy.
24 Pwen Yesus ipwai iya kili hu ipa, “Iye ara ndreye para tapaniu, mepo urupo tilingiy para kusopwat hu ndramat soyon.
25 Upwai ndrokonan isa kili wawu, yo andre kunyin ndrunu maskei wain aro paiwe pwi, kipoo kiya lang para kuyin wain howen kiro mwonen yo kuya nondriya kolo King Ngindrai.”
26 Pwen hupowaliy sahin ihipwen, pe huyau huya Ngondron Holip.
Yesus ipwai tehe Petrus andre kipwai tehe ikowu tan
27 Pe Yesus ipwai iya tahu ipa, “Wawu masih andre katali yo topwei. Paratappeh Nongna Ngindrai ipwai ipa,
‘Andre kutingundru ndramat para pokere hu sipsip,
pe andre hu sipsip ara hu kamasumbuwe topwei.’
28 Hapeko kamulan kutine, andre kuro mu kili wawu kuya Kaliliy.”
29 Pwen Petrus ipwai iya tan ipa, “Konan, kapa hu masih kakose pe katali wou, hapeko yo ara pwi.”
30 Pwen Yesus ipwai iya tan ipa, “Upwai ndrokonan satam, mepo kiping tutut kinrang maporolusap mapu hapeko andre apa akowu to maporotisap.”
31 Hapeko Petrus irakekei pwokeyan ipa, “Konan kapa kumat kasura wou, hapeko yo andre kunpiyani wou pwi yoh!” Pwen hu ndramira Yesus masih, hupwai iyawule tehen aliy.
Yesus iya totohun iya Piyang Ketsemani
32 Pwen husarayah huya piyang ngalan Ketsemani pe Yesus ipwai iya kili ndramiran hu ipa, “Akamine, kipoo kutotohun kihipwen.”
33 Pwen iwiri Petrus, Yakopus, pe Yohanes huya sura yiy. Pwen ihingorowe nopwaran mwomwan namandran iya, pe ndriyan ipworu iyaliy.
34 Pwen Yesus ipwai iya tahu ipa, “Hingorowo ara ipworu masih tehe pakeh nakumat. Wawu koro iye pe akoro hinehes.”
35 Pwen iya hangoh hapeko mendreheh, pe itumbuwe ngundrun pe itukuruhu iya ndrita pwan. Iro totohun pe isikei kapa hape meresai kihou para kihindrisani lang para nopwaran ara.
36 Pe iro totohun ipa, “O, Tomo! Alahiy para ambusi melit masih. Pwen pe awiri pweniu iye kiya mawen kili yo. Hapeko mbuna kisarayah kiya namiliwo; pwi yoh. Kirayah namiliwam.”
37 Pwen imui iya kili hu ndramiran matimou pe inime huro matin. Pwen ipwai iya kili Petrus ipa, “Simon, wawu tora matin, ndre? Wawu lahiy para koro poyoi kiho nondriya paramwandrai sih o?
38 Wawu koro hinehes pe katotohun. Matisan nopwaran kirayah kili wawu pe akayos. Namiliwai ita mwoiwa wawu, hapeko nombuwe wawu ara imbuyei.”
39 Pwen iya mawen paiwe yi, pe iya totohun. Pe iro ndruwa totohun tan para mamu ko.
40 Pwen imui isa kili hu paiwe, pe inimei tehe huro matin ndron, paratesah, mara hu imwanunun. Pe hu kanpahasani sehe nongan para hu kapwai kiya kili yiy pwi.
41 Pwen imui maporotoyoh, pe ipwai iya kili hu ipa, “Wawu tora matin manau, pe tora ngoh, ndre? Hiyan; pwen ara. Lengen kinsarayah. Akanimei, mahapo hu toraiki Noru Ndramat kiya nima hu ndramat para kultuw mwomwan.
42 Kiya, akatine pe tukayau! Akanimei! Ndramat hiyeh nakiratuni yo kiya nima hu ndram ara kinsa iripo.”
Yutas iyki Yesus iya nima hu ndram
43 Yesus iro wong manau o, indrou pwi ko Yutas, hamou tahu songui pe lumou, ara isa rayah. Yiy iyapolo hu ndramat soyon iya husa iyasura semen pe kei. Hu namandran tahu pris pe hu ndramat para hinuwani pwahanou pe hu yapane kol ara hupwandrisa hu.
44 Pwen ndramat mepo nakiyki yiy kiya nima hu ndram ara kinpwaingani kaipisan pwen kinna kili hu, pe kinpwai kinna tahu tehe toro: “Hiyeh mepo nakurahunghung kiya kili yiy, ara yiy ara ko. Akambultuwe tahatini yiy, mara wawu kiro tan, pe akaluwani yiy kiya.”
45 Indrou pwi ko, Yutas isarayah pe iya mwonen iya kili Yesus pe ipwai ipa, “Ndramat Para Hinonou.” Pwen irahunghung iya kili yiy.
46 Pwen humbultuwe Yesus pe huwasi tahatini yiy.
47 Pwen ndramira Yesus hamou iro tine ngilsen ara iwiri semen, pe isahi ndrainga ndramat hamou para pwandrendres ta pris ihohin.
48 Pwen Yesus isomwi hu pe ipwai iya tahu ipa, “Wawu pa ndre yo ndramat para pahana pe wawu sa yapolo semen pe parakei para kambultuwe yo, ndre?
49 Lang sih tehe sih ngara kuro sura wawu pe ngara kuhunuwani wawu kuro nondriya kalsuwa numwa totohun namandran, hapeko wawu kansa mbultuwe tahatini yo pwi. Hapeko pwayan kinipwai ita nongna Ngindrai, ara andre kisarayah manaan.”
50 Pwen o, hu ndramira Yesus masih ara hutali yiy pe huwop topwei.
Wihou hamou iwop
51 Tandrohonga lang ara, wihou hamou iye ndruwa Yesus, ara isumwa yiy iya koyau hamou pallen. Hu makundrayen hu mbultuwe yiy,
52 hapeko itali koyau tan, pe iwop mwaheh o iyau.
Huiki Yesus iya mbulmara hu pohon tahu pris
53 Pwen huluwani Yesus iya seu kili pris ihohin iya tahu pris masih. Pe hu namandran tahu pris, hu yapane kol, pe hu ndramat para hinuwani nongan para pwahanou ara hu masih humbultere hu huro aliy.
54 Pwen pe Petrus iho ndruwa Yesus, hapeko iho ndron mwanan hape. Pe irikai ipoo iya nondriya kou para kalsuwa pris ihohin tahu pris masih. Pwen irompwan sura hu makundrayen pe iro ling mwan.
55 Hu namandran tahu pris iyasura hu pohon tahu pris huten hu ndramat tiken para hu katiyani kultuw mwomwan ta Yesus para kipwokeyani lohongai para hu katingundru Yesus kimat. Hapeko hukah ndrit.
56 Pe hitun tahu ara hurasusut nongan, hapeko titiye tahu ara kinna wule handra ko pwi.
57 Pe hayah tahu ara hurasusut nongan pwasoyou para kapwasimiri yiy kaliy. Pe hupwai toro:
58 “Yowu hilingi yiy ipa, ‘Andre kutumbuwe numwa totohun namandran mepo hu ndramat hu kanpwiliy iya nimahu; pwen, nondriya lang maroyoh o, andre kupwili hawum paiwe yi, hapeko andre kunpwiliy kiya nimo pwi.’ ”
59 Hapeko nondriya titiye tahu aro imasumbuwe pe kinna wule handra ko pwi.
60 Pwen pris ihohin ara itine iro mbulmarahu pe isok Yesus ipa, “Wou andre asomwi sahin nongan hu tora tasuhuhuri wou iyaliy ndre pwi?”
61 Hapeko Yesus imun o iro, pe kinsomwi hu kinna sahin nongan pwi.
Pwen pris ihohin isok yiy paiwe ipa, “Wou ara Kristus, Noru Ngindrai Haiyan, ndre pwi?”
62 Pe Yesus isomwi yiy ipa, “Yo ara; yo kopu. Pwen kamulan andre wawu kanime Noru Ndramat kimpwan iya pwen te nima Ngindrai mot, mepo yiy pwokeyan masih. Pe andre kanime yiy kisa kiyapolo kokom para yang.”
63 Pwen pris ihohin ara, indrohomwiri koiwen pe ipwai ipa, “Mbuna katen hu ndramat tiken paiwe para katiyani kultuw tan pwi.
64 Wawu kanhilingiy tehe yiy kinpwasimiri ngala Ngindrai. Pwen wawu lohonganiy tappeh?”
Pwen hu masih hupwai tisingiy tehe Yesus irakultuw mwomwan, pwen pe andre katingundrun kimat.
65 Pwen hu tiken tahu ara husokombunihi yiy. Pe husumwa maran iya koyau pe hutti yiy iya nimahu pe hupwai iya tan hupa, “Apa wou poropet? Apwai!” Pwen hu makundrayen tiken ara huwiri yiy pe huhusili yiy.
Petrus ipwai tehe yiy ikowu ta Yesus
66 Petrus iro ndron kalsiu pwan nondriya kou, pe pihin hamou para pwandrendres ta pris ihohin ara irikai isa
67 Pwen maran iya pe inime Petrus iro ling mwan. Pe ituluwani yiy, pe ipwai iya tan ipa,
“Wou ara, aro sura Yesus para Nasaret i.”
68 Hapeko Petrus ipa pwi iya nongnan ipa, “Yo ukowu pe kunpahasani sehe nongan ata wong iyaliy pwi.” Pwen iyau iya poho mara kou imwonen, pe tutut irang.
69 Pwen pihin para pwandrendres ara inime yiy paiwe yi, pe ipwai iya kili yihu hiyeh huro tine ngilsen ipa, “Yiy ita ara hamou tahu.”
70 Hapeko ipa pwi paiwe yi.
Iyamulan hape, yihu hiyeh huro tine ngilsen hupwai iya kili Petrus hupa, “Ndrokonan, wou ara hamou tahu, paratesah, wou ara ndramira Kaliliy.”
71 Pwen Petrus irandrangan pe ipa, “Upwai ndrokonan, ndramat mepo wawu tora wong iya tan, ara ukowu tan. Urandrangan tehe kapa kupwasoyou pwen Ngindrai kiten ano.”
72 Pwen indrou pwi pe tutut irang paiwe yi, pe Petrus ilohongani nongna Yesus kinpwai mamu kinna tan ipa, “Tutut kinrang maporolusap mapu, hapeko andre apa akowu to maporotisap.” Pwen Petrus ilohonganiy pe irang turut.