19
Sakiyus ndramat para poya takis
1 Yesu iya nondriya kol ngawan Yeriko, para pakiya yau tusuye.
2 Pe ndramat hamou iro kol ara, ara ngalan Sakiyus. Yiy ara ndramat hamou ihohin iyata hu ndramat para poya takis, pe mameltan soyon iya.
3 Yiy inamiliy para kinime Yesu ara hiyeh, hapeko yiy, ara mulai sahin opu, pe kinlahiy para kinime Yesu pwi, paratesah, hu ndramat soyon iya, ara huro tandrapndrap.
4 Pwen pe ingap iya mu pe ingas kei sikamor hakou, pe iye parasangan para kinime Yesu, paratesah, Yesu andre kisayau sai ara.
5 Iro mwonen Yesu isarayah iro hape ara, maran itandras iya paingan pe inime Sakiyus, pe ipwai iya kili yiy, ipa, “Ahaleh o, asa pwan. Mahapo ko andre kuya kuro suwem.”
6 Pwen Sakiyus ihimbuh o, pe ituh isa pwan. Pwen irawulohani Yesu iyapolo pwesai.
7 Yihu ndramat masih hunimei, pe huro panguluwani Yesu, huro pa, “Yiy kinna kintora suwe ndramat hamou mepo pakut tan mwomwan.”
8 Hapeko Sakiyus itine pe ipwai iya kili Yapan, ipa, “Yapan! Animei na! Yo mahapo andre kutaingani hu memelit to haroh mwaniye kiya kili hu ndramat mepo menmenahu pwi, pe kapa kunpwasike hamou pe kunpahanowe hu meltan, ara andre kupo soiwin kiya maporohaasap.”
9 Pwen pe Yesu ipwai iya kili yiy, ipa, “Lang nepo, sopwat ta Ngindrai ara kinsarayah kinsa seu iye, paratesah, ndramat aripo, ara yiy noru Apraham hamou i.
10 Noru Ndramat isa, ara tunan iye: para kiten pe kisopwat hu ndramat mepo husongsin.”
Nongan pwandritiye tahu ndramat masongui para poya mbulen
11 Hu ndramat huroholong Yesu manau, pe itiyani nongan pwandritiye sahin, paratesah, yiy iropo iya pakeh Yerusalem, pe hu ndramat ara, huro pa ndre kindrou pwi ko, kolo King Ngindrai nakisarayah.
12 Pe Yesu ipa toro: “Ndramat hamou mangalan, ara iyau iya kol hakol namandran masih hira mwanan, para hu karakiniman pe kirayah king. Pwen kiyamulan, andre kimui kisa kolon paiwe.
13 Pwen pe iyoh hu ndramat para poya mbulyan masongui husa kili yiy, pe iyki sombule pat tasongui-tasongui iya kili hamou-hamou tahu. Pe ipa, ‘Akawiri singayai iye pe akapo mbulen kiya aliy, kipoo kumui kusa.’
14 Hapeko yihu ndramat para kolon imwonen, ara humwisnani yiy. Pwen hupwanos hu ndramat hayah para sapiya nongan huro ndruwan huya, pe huya pa, ‘Yowu mbuwali yowu para ndramat aro kirayah king towu.’
15 Hapeko yiy ara irayah king manau, pwen pe imui iya kolon i. Pe ipwanos nongan iya kili hu ndramat mepo kiniyki singayai kinna kili hu ara, para nakinimei hiyeh tahu ndrokonan kinpo sura singayai kinyau aliy.
16 Pwen ndramat hamou imu isa, pe ipa, ‘Yapane, yo uwiri sombule pat masongui, pwen kunpo suran pe kintayah tehe masongui yi.’
17 Pe king ipwai iya kili yiy, ipa, ‘Ndramat para poya mbulyo, anmbusiy hiyan masih! Wou ara anpwokarani melit mendreheh, pwen pe hu kol namandran masongui, ara andre aro nimnim kiya tahu.’
18 Pe hamou i iro mulan isa, pe ipa, ‘Yapane, yo uwiri sombule pat masongui, pe kunpo suran pe kintayah tehe mayimbut i.’
19 Pwen king ipwai iya kili yiy, ipa, ‘Wou andre aro nimnim kiya hu kol namandran hape mayimikol.’
20 Pwen pe ndramat hamou i para poya mbulyan isa, pe ipa, ‘Yapane, singayai tam iye; kunkulaniy kinna koyau hasai pe iripo mwonen.
21 Paratesah, yo unoh tam; wou ara ndramat hamou ngandrahan. Pe ngara aniyi tesah mepo anhohas pwi, pe ngara arihi tesah mepo anhopiye pwi.’
22 Pe king ipwai iya kili yiy, ipa, ‘Wou ndramiro hamou mepo kultuwayim pwassin! Yo andre kuiki wou kiya nongan ara kiho ndruwa nongnam opu! Wou anpahasaniy pwen tehe yo ara ndramat hamou ngandrahan; pe ngara kuniyi tesah mepo kunho has pwi, pe ngara kurihi tesah mepo kunho piye pwi.
23 Pwen pe paratapeh pe wou aniyki sombule pat to kinna yumwa singayai pwi? Pwen kapa kumui, andre kusa pe kuwiri suran kiyapolon i.’
24 Pwen pe king ipwai iya kili hu ndramat mepo huro tine ngilsen ara, ipa, ‘Akawiri sombule pat masongui ara kisa mawen kili yiy, pe akaikiy kiya kili yiy mepo atan malungui.’
25 Hapeko yihu pwai, hupa, ‘Yapan, yiy ara, atan malungui pwen!’
26 Pwen king isomwi hu, ipa, ‘Yo upwai ndrokonan isa kili wawu, tehe yihu masih mepo mamenmenahu, ara andre Ngindrai kipo sura menmenahu; hapeko yiy mepo menmenan pwi, konan hape sohoyan kimin, ara andre kawiriy topwei kiya mawen kili yiy.
27 Hapeko yihu hiyeh hu kanmwisnani yo, pe mbuwalihu para yo kurayah tehe king tahu, ara akawiri hu kasa mbulmoro pe akatingundru hu!’ ”
28 Yesu itiyani nongan pwandritiye ara ihipwen, pwen irikai iye mu iya paingan Yerusalem.
Yesu iya nondriya Yerusalem tehe king
29 Iro mwonen Yesu iropo isa pakeh kol malkol Petpake pe Petaniy, isa parangondron sih mepo hupohowei Ngondron para hu Holip. Pwen ipwandrisa ndramiran malmou, pe ipwai iya kili hilu ipa,
30 “Alkaya kol mendreheh yoho mu kili walu. Pe kiro mwonen walu nakaya nondriyan, ara andre walu kanime noru tongkiy hamou hu kanwasiy pwen ita, mepo ndramat hamou kinihis aliy mapu. Pwen alkatali yiy pe kawiriy kisa iye.
31 Pe kapa hamou kisok walu, kipa, ‘Paratesah pe walu tora tali tongkiy ara?’ Pwen alkapwai kiya kili yiy, alkapa, ‘Yapan inamiliy.’ ”
32 Pe hilu ndramat malmou mepo ipwandrisa hilu hilto mu ara, ara hilya nimei tehe sehe melit kinpwai kinnata kili hilu, ara iro mwonen tehe kinpwai.
33 Pwen hiluro tali malkeye tongkiy, pe ndramira tongkiy isok hilu, ipa, “Paratesah pe walu tora tali tongkiy ara?”
34 Pe hilsomwi yiy, hilpa, “Yapan inamiliy.”
35 Pwen hilu luwi tongkiy isa kili Yesu, pe hupwalani koiwe hu iya ndrita tongkiy ara, pe huiki Yesu impwan ndritan.
36 Pe iropo iya, pe hu ndramat hupwalani hu koyau tahu huya ndrita sai.
37 Pe isa pakeh kol hape mepo sai para Ngondron para hu Holip ilai iya pwan, pe hu ndramiran soyo-soyon iya huhuri ngala Ngindrai iyapolo pwesai namandran, paratesah, hulohongani hu ndraikiya pwoke masih mepo hu kannimei pwen.
38 Pe huwayeh hupa toro:
“Lomwes ita kili King mepo isa iya ngala Yapan!
Ndriya wayis ita kol paingan yang, pe Yapan ma ngannganan, iyera paingan masih!”
39 Pwen yihu Parisiy hayah huro mwalinga hu ndramat soyon iya ara, ara hupwai iya kili Yesu, hupa, “Ndramat para Hinonou, apomate ndramiram hu para hu kahun o!”
40 Pe Yesu isomwi hu, ipa, “Upwai isa kili wawu tehe, kapa hu kahun o, pwen andre hu pat kawayeh.”
41 Pwen Yesu iropo iya pakeh Yerusalem, pe inime kol namandran iya ara, pe irangsiy.
42 Pe ipa, “Lang nepo, kapa wawu kapahasani tesah ilahiy para kiyki ndriya wayis kisa kili wawu—hapeko mahapo ara kinkohon mbulmara wawu.
43 Lang itapo isa andre hu mepo hu ngara kamwisnani wawu, ara hu ndram tahu andre hu kambultani pwan pe karahakowa kou namandran para kol tawawu, pe andre hu karakayani wawu kiro sese wawu haroh-haroh.
44 Pe andre yihu kasoyau kiyata wawu kaya pwan, wawu kiyapolo noru wawu hu koro nondriya kowa kol. Pe yihu andre kantali pat sih kiro ndrita sih pwi, paratesah, wawu kanyirowe lenge Ngindrai kinsa kili wawu pwi.”
Yesu irasses hu ndramat huropo pehei nondriya yumwa totohun namandran huya mawen
45 Pwen Yesu isong iya nondriya yumwa totohun namandran pe iro rasses hu ndramat mepo huropo pehei iya aliy.
46 Pe ipwai iya kili hu, ipa, “Pwayan kinpwai pwen, kinpa, ‘Suwe, ara yumwa totohun.’ Hapeko wawu kanmbusiy kintayah ndrohona kokohon tahu ndramat para pahana.”
47 Pe lang masih ngara kiro hinuwani nongan kiro yumwa totohun namandran. Hapeko hu pris huhohin ta hu pris masih, pe hu ndramat para hinuwani nongan para pwahanou, pe yihu pohon tahu, ara huro hinonou para pakatingundru Yesu.
48 Yihu pakambusiy, hapeko hukah sai ndrit, paratesah, yihu ndramat masih ara huro pwahatini tisingi hu nongnan.