Nongan ratuluwiy iye ara para yihu Kristen hayah yihu pakatali lohongai ndrisiyon tahu, paratesah, yihu ndramat hayah ara huiki hu huya pwan pe huiki nopwaran iyatahu. Nongan ratuluwiy ara, ara para kipwokeyani lohongai ndrisiyon tahu, pwen pe ipwai iyatahu iya mbulen namandran Ngindrai kinmbusiy iyau kili Krsitus Yesu. Kristus opu ngara kipwaingani worou kiya kultuwayi Ngindrai ndrokonan.

Nongan ratuluwiy aro, ara iwong iya melit matihin. 1) Yesu ara yiy noru Ngindrai ndrokonan. Iro mwonen Yesu iro kol pwan, yiy ikuni nopwaran pe ngandran namandran, pe iya kultuw ara ko Ngindrai imbusi Yesu irayah ndramat imu para sopwat hu ndramat masih (2.10). Pwen pe Yesu ara yiy iramwaitini hu propet para koluw pe hu angelou pe yiy iramwaitini Mose yi. 2) Ndrindrai mbukenan kintakinima Yesu para kiro pris kinto-kinto. Pe yiy iramwaitini hu pris para Yuta i. 3) Yesu ara yiy pris ihohin kinto-kinto iyatahu pris masih, pe yiy ilahiy para kisopwat hu ndramat mepo hupwotisingi lohongahu iyatan. Hu kultuw para katotohun kiya nongan para pwahanou ta Mose kipwai pwen kinna aliy, pe yihu rayah tehe nimnim hiyan mepo Yesu kinmbusiy pwen iho kei tondrih.

Nongan ratuluwiy iye ara iwong iyata hu ndramat para yihu kapwokeyani hu, pwen pe yiy nongan soyon para lohongai ndrisiyon ta hu ndramira Yisrayel para koluw (sapta 11). Pe yiy ipa konan nopwaran soyon iya kili hu, hapeko yihu kapwotisingi lohongai ndrisiyon tahu kipoo yihu kamat. Yihu kanimnim kiya kili Yesu pe koho ndruwa kultuwayin, pe yihu karapiyani hu nopwaran pe ngandran mepo yihu ngara kawiriy.