49
Yakop iyki lomwes iya kili norun hu
1 Pwen Yakop iyoh norun hu husa kili yiy, pe ipwai iyatahu ipa, “Akasa pakeh kili yo, pe nakutitiye ndrainga wawu kiya sehe melit andre kisarayah kili wawu kiyamulan.
2 Wawu kasa pakeh pe wawu kahalingiy; noru Yakop hu kamai.
Akahalingi tama wawu.
3 Rupen wou ara noru ndrohan,
Uiki wou ara tandrohonga manoru wihou to; pe arakinima pwoke ato.
Ngalam ara pwokeyan iya pe iyera hin kili nalim hu.
4 Pakut tam ara tehe non irah pwokeyan iya pe kinlahi hamou para kisingoriy pwi,
hapeko wou andre anto yokum tehe ndrohan pwi yoh.
Paratesah, amatin iyasura nambuyu tamam, pe aiki masirai isa kili yo.
Kultuw anmbusi ara mwomwan masih.
5 Simeyon pe Lepi ara hilu nali hilu.
Semela hilu ara semela pahun, hilu wiriy pe hilu pongengei iyataya hu ndramat.
6 Yo kunpwes para hilu mburi lohonga hilu pwi,
pe kunlahiy para kuya sura hilu para hilu tawulani lohonga hilu iyawule pwi;
Paratesah, ndrina hilu ngara kilokuh, pe ngara hilu katingundru hu ndramat.
Pe ngara hilu katumbuwe ndrika hu mbulmwakau kiya lohongai ta hilu ko.
7 Ndrina lokuh ta hilu ara andre kipwalngani hilu.
Pe takokowai ta hilu ara andre kiyki ndriyang o kimui kiya kili hilu.
Andre kurasumbuwani ndraye hilu kaya mawen kili Yakop,
pe andre hu kamasumbuwe kiya nondriya Yisrayel.
8 Yutah, nalim hu ara andre hu kasomwani wou,
pe andre nimam kindrek koyu hu ndramat mepo humwisinani wou
Noru tamam hu kamai ara andre hu katukuruhu kisatam.
9 Yutah ara kaipisam tehe hamou noru layon
Ngara kira hu yohou pe kiyan pe ngara kimui kisa pe sangin kipwoke
Ngara kiwayis pe ngara kimemere,
pe hamou ndramat kinoho tandroindroi kiya mbulmaram pwi.
10 Nes mepo irakinima pwoke ta kenon ara, ara kinlahi para kiya mawen kili Yutah pwi,
pe yiy andre kiro kenon lang masih.
Pe andre kiro kipo kiya manne mbukena nes ara kisa.
Pe hu ndramat para kol masih andre koro hilingi yiy opu.
11 Hu ndrandra wain tan ara soyon iya.
Pwen pe pakiwasi tongki tan ara ngara kiwasiy kiya ndrandra wain mepo hiyan masih.
Pe yiy andre kirihi hu mbuwa wain tan, pe kipisai,
pe andre kisungani koyau tan kiyaliy.
12 Peke maran malwoh ara ilam tehe pekemara mbusiy, pe iramwaitini wain.
Pe yahan ara palen iya, iramwaitini sus.
13 Pe Sepulun ara andre kiye pakeh poho leng,
pe pohomara ndras kayou tan ara, andre hu ndroi namandran hu kasa pe hu kohoraipit aliy.
Pe ndringa pwanen ara andre kiya pwen te kol Siton.
14 Yissakar ara yiy pwokeyan iya tehe hamou tongki,
ngara kiye matin mwalinga ndrop malhat.
15 Pe inime pwanen para ngohongoh
ara hiyan iya,
pwen andre kiwayani yiy kiya mbulen namandran pe nopwaran.
Pe kamulan andre kirayah ndramat para hu karandrokomat anan.
16 Tan ara ndramat para tamwaniye kiro mwalinga hu ndramat,
tehe wum para tamwaniye tahu Yisrayel.
17 Pe Tan ara tehe hamou mwat para ngilse sai,
tehe hamou yawi para pwaki sai mendreheh.
Ngara kitani ngondro ndrika hu hos.
Pe andre ndramira hos ara andre kipwang te ndruwan.
18 Yapan, yo urupo longe para wou asopwat yo.
19 Kat ara andre hu ndramat para pahana hu karayiy,
hapeko andre kipopahun kimui kiya kili hu paiwe, pe andre hu kawop kili yiy.
20 Aser ara anandrinai tam andre kirayah mwayih iya,
Pe andre apo anandrinai handra-handra hiyan tehe ana hu kenon.
21 Naptali kaipisan ara tehe hamou meme puyap pihin pe andre kiro rakohoyou kiya lohongai tan o.
Pe ngara kikun norun hu ara lahaya huya.
22 Yosep ara irayah hiyan iya
tehe hakou kei hira ndran ndrikou sih.
Mbuwan ara ngara kirayah soyon iya.
Pe ndrandran ara husinot iya niwen, iyah, pe iroh iramburuhi kou.
23 Pe hu ndramat para pahun iya tapwiwe ara hupopahun iya kili yiy,
pe humbusi mwomwan iya kili yiy.
24 Hapeko kei tapwiwe ta Yosep ara niman kinhitan aliy pwi,
pe ipwotisingiy iro nokun o,
paratesah, pwoke namandran ta Ngindrai ta Yakop ara iro pe iyki pwoke iyatan.
Ngindrai ara tehe Ndramat para pwokere yiy,
pe tehe sih Pat para lohowan.
25 Paratesah, Ngindrai ata tamam ara yiy pwokeyan iya pe ngara kisopwat wou.
Pe yiy opu ngara kitoholi wou
pe kiyki lomwes para paingan,
pe lomwes para mbulu pwan,
pe lomwes para hu kakun hu mbunah kaya soyon iya.
26 Lomwes ta tamam ara mambuniyan iya, tehe pahayi,
pe iramwaitini lomwes para piyang pe yanigiy para koluw.
Yosep, melit masih aro andre hu kasarayah koro kili wou,
pe wou ara ansarayah yapane nalim hu masih.
27 Pe Penyamin ara kaipisan tehe mwiy hamou puyap mundruwan soyon para yangiy.
Ndroulang masih ngara kiyan hu yohou mepo ngara kitingundrun,
Pe ipiyah ngara kitaingani hu yohou nepo iyapo.”
28 Aro ara hu poho pwaimwa wum hawum-hawum tahu Yisrayel songui pe lumou. Pe aro ara nongan mepo tamahu itoholi hu iyaliy, pe iyki lomwes tahu iwene kaipisa norun hu hamou-hamou imwonen.
Yakop imat pe huroni yiy
29 Pwen Yakop itoholi norun hu ihipwen pe ipwai iyatahu ipa, “Yo ara pakeh nakumat kuyasura tumbu hu. Pe akaroni yo kuya ngat nepo kansowaniy pwen ita pwan ta Eporon mamu, yiy ndramira Hit.
30 Ngat ara, iro pwan hape mepo Aparaham kinsowaniy pwen iyapolo ngat para tonton iro kili Eporon. Pe pwan ariya ara ngalan Makpelah, ita ngilse Mamre nondriya kol Kanaan.
31 Ngat ara hu kantoni Aparaham pe nambuyun Sarah italiy, iyasura Yisak hilu Repekah. Pe Leyah ara uroni yiy italiy yi.
32 Pwan nepo ngat italiy ara kansowaniy pwen iro kili hamou ndramira Hit.”
33 Pwen Yakop itiyani ndrainga norun hu ihipwen, pe isoli ndrikan iya yokun, pe imat iya pairi tumbun hu.