40
Yosep ipohowe nondriya nihinih
1 Iya ndrangan niwen hape, pe ndramat ngara kiro nimnim kiya ndrunu wain ta Kenon para Yisip pe ndramat mepo ngara kiro nimnim kiya ndrina nohun ta kenon, ara hilu mbusi melit handra mwomwan, pe kenon welen ara imai ta hilu.
2 Pe yiy ara ndrinan ilokuh ta hilu ndramat namandran ara —- hamou ngara kiro mu para yukiya wain ta kenon, pe hamou ngara kiro mu para mbusiya ndrina nohun ta kenon.
3 Pwen pe huiki hilu iya nondriya kou. Kou ara, ara ita nondriya seu ta pohon tahu makundrayen mepo ngara hu koro nimnim kiya seu ta kenon. Kou ara ko, ara Yosep iro aliy yi.
4 Pe namandran tahu makundrayen ipwai iyata Yosep para maran kiro ta hilu ndramat ara. Pe yihu ro nondriya kou ara ndrangan niwen hape.
5 Iro nondriya ping sih, hilu ndramat mepo hilro nimnim iya wain pe ndrina nohun ara hilu malmou kene hilu nihinih. Pe nihinih ta hamou ara handra pe ta hamou ara handra.
6 Pwen Yosep isa kili hilu mandroulang pe inime saiyani hilu tehe hilu lomwa.
7 Pe isike hilu ipa, “Walu hisah, mara walu isuwas yesah?”
8 Pe hilu somwi hilpa, “Ehe, yolu malmou kene ara yolu nihinih, pe kinlahi hamou ndramat iripo iye kitiyani ndroyi nihinih tolu pwi.”
Pwen Yosep ipwai iyata hilu ipa, “Ngindrai opu ngara kipwaingani ndroyi nihinih. Kiya, walu katiyani nihinih ta walu kisa kili yo.”
9 Pwen pe ndramat ngara kiro nimnim kiya wain ta kenon ara itiyani nihinih tan ipa, “Yo ara unihinih pe unime mwisi wain hakou mandrandran iyapolo yowin isa iho mbulmoro.
10 Pe wain ara ndrandran matindra, pe kaimbuwen husarayah, pe indrou pwi iyki nonowen pe hupwai pe sangin ipep iho aliy.
11 Pwen umbultuwe pweniu ta kenon; pe uwiri mbuwa wain pe upisa ndrunun iyaliy pe uikiy iya kili yiy.”
12 Yosep ipa, “Ndroyi nihinih tam ara ipa toro: ndrandran matindra ara iranonoyani lang maroyoh.
13 Andre kiho nondriya lang maroyoh, kenon ara andre kiwiri wou aya mawen nondriya kou pe kiyki wou amui aya mbulyam koluw aro aliy. Pe wou andre aroyuk pweniu para wain kiya nima kenon tehe koluw ngara aro mbusiy.
14 Hapeko alohongani yo, kapa melit masih kisarayah hiyan kisa kili wou; pe koyum kisikirani yo, pe apwai kiyata kenon para kisa wiri yo kuya mawen nondriya kou aro.
15 Mamu kinna hu ndramat huluwi tarahani yo uro pwan tahu Hipuru pe usa uropo kol iye; pe yo kunmbusi handra kultuw mwomwan pwi, hapeko huiki yo ko mwaihei usa nondriya kou aro.”
16 Pwen ndramat imu tahu para timwa ndrina nohun ihilingi ndroyi nihinih ta ndramat para mbulya wain ara mwayih iya. Pwen pe ipa, “Yo unihinih i. Pe yo ara unimei tehe ukuni keyeh matihat iro poyo ara ipep iya ndrina nohun.
17 Keyeh sahat iro ndritan masih ara ipep iya ndrina nohun handra-handra mepo kenon ngara kinamiliy. Hapeko hu norukan husa pe huroiniy.”
18 Pwen Yosep ipa, “Ndroyi nihinih tam ara ipa toro: Keyeh matihat ariya iranonoyani lang maroyoh.
19 Kiho nondriya lang maroyoh kenon andre kiwiri wou asa mawen, pe yihu andre kandrusuwam! Pwen yihu andre kandruyani nombuwem kiho ndrungak mandra pahut, pe hu norukan andre kasa pe kainiy.”
20 Pwen lang maroyoh ara, irahihini lang para Kenon para Yisip kipwesani lengen mepo tinan imwalahiy iyatan. Pwen pe ipo yon sih iyatahu ndramat para poya mbulyan. Pe ndramat para mbulya ndrina nohun pe ndramat para mbulya wain ara huwiri hilu sa ngawan iro mbulmara hu ndramat namandran masih para poya mbulya kenon.
21 Pe kenon iwiri ndramat para mbulya wain tan ara imui iya mbulen tan mamu iro aliy.
22 Hapeko iwiri ndramat para timwa ndrina nohun ara pe huwasi yiy iho ndrungak mandra pahut. Pwen tehen ara ko, ndroyi nihinih ta hilu kinsarayah imwonen tehe Yosep kintiyaniy kinnata hilu.
23 Hapeko ndramat para mbulya wain ara kinlohongani Yosep pwi, pe koyun ara irut tan masih.