28
1 Yisak iyoh Yakop pe iyki lomwes iya kili yiy, pe ipwatisingiy iyatan ipa, “Wou mbunayesou kiya kili hamou pihi Kanaan; konan!
2 Mahapoko aya Pattan Aram, aya wum ta tama tinam, Petuwel. Aro kili salim, Lapan, pe awiri norun hamou pihin kiya nambuyum.
3 Ngindrai Pwokeyan Masih andre kitoholi yesou tam, pe norum hu ara andre kasarayah soyon iya, pe wou andre asarayah tumbu hu yau soyon.
4 Ngindrai andre kihingini lomwes ta Aparaham kisa kili wou pe ndrayem hu kamulan. Pe pwan mamu nepo Ngindrai kiniykiy kinna ta Aparaham, mahapo asa amiraliy, ara andre awiriy kiya pwenem.”
5 Pwen Yisak ipwandrisa Yakop iyau iya Pattan Aram, iya kili Lapan noru Petuwel, yiy ndramira Aram. Pe Lapan ara wayi Repekah, tina Yakop pe Esau.
Esau iwiri pihin hamou paiwe yi
6 Napwai Esau kinpahasaniy pwen tehe Yisak kiniyki lomwes kinna ta Yakop, pe kinpwandrisa yiy kinna Pattan Aram para kiya yesou. Itandrohonga iyki lomwes iya kili yiy, ipwatisingiy iyatan ipa, “Mbunayesou kiya kili hu pihi Kanaan.”
7 Pe Yakop ihilingi nongna taman pe tinan, pe kinyau kinna kol Pattan Aram.
8 Napwai Esau kinpahsaniy pwen tehe taman Yisak ara kinoho namili hu pihi Kanaan ara pwi yoh.
9 Pwen Esau iya kili hu yowe Yismayel NdraAparaham pe iya wiri Mahalat SuYismayel, pisu Nepayot, iya nambuyun. Pe iwiriy iya paiwa hilu pihi mu ita kili yiy.
Yakop inihinih
10 Yakop itali kol Peersepa pe iyau para kiya kol Haran.
11 Yiy irotokai ipo iyarayah iya kol hakol, pe yiy iro aliy para kimatin, paratesah, paramwandrai ara kinipiyah pwen. Pwen pe iwiri pat sih pe iyki iye pwan iya waingan pe iye matin aliy.
12 Yiy imatin pe inihiyani kannen sih, sahin iro pwan, pe sahin ara iya paingan yang, pe hu angelou ta Ngindrai ara soyon iya huro ngas ya paingan, pe hurotuh sapwan.
13 Pwen yiy inime Yapan iho tine pakeh pe ipa, “Yo ara Yapan, Ngindrai ta tumbum Aparaham pe Ngindrai ta tamam Yisak. Pwan nepo ayera matin aliy ara andre yo kuikiy kisa tam pe ndrayem hu.
14 Ndrayem hu ara andre kasarayah soyon iya tehe kohu pwan, pe andre yihu kamasumbuwe kaya rai, kup, hai, pe tolau. Hu ndramat para kol pwan masih andre hu kawiri lomwes ara kiyau kili wou pe ndrayem hu.
15 Hape aleheh nayaliy ara uta sura wou, pe uta pwokarani wou, pe andre yo kuwiri wou amui asa pwan iye yi. Pe andre kuntali wou pwi kipo kumbusi melit masih tehe upwai satam.”
16 Yakop isa poyoi pe ipa, “Ndrokonan tehe Yapan ara iripo kol iye, pe yo ara ukowu!”
17 Yiy inoh pe ipa, “Kol iye tehen tapeh ndrokonan; andre ndrohonoku numwa Ngindrai! Ndrokonan! Hape aro ara andre ndrohonoku karam para yang.”
18 Yakop itine mandroulang pe iwiri pat iye waingan ara pe isondritiyaniy iro tine para kiho rikai pe lohongan kiro aliy. Pwen pe itilingi ndraikei para holip iya ndritan para kipwaingani pat ara tehe ata Ngindrai.
19 Koluw hupohowe kol ara “Lus,” pe lang ara Yakop ipaiwani ngala kol ara iya “Petel.”
20 Pe Yakop irapaniu iya kili Ngindrai toro: “Kapa Ngindrai kiro sura yo, pe kipwokarani yo para tokuyo uropo mbusiy, pe kapa kihingini yo anandrino pe koiwe,
21 pe kapa yo kuro hiyan o pe kumui kuyarayah kuya kol ta tomo, pwen andre Yapan kisarayah Ngindrai to.
22 Kol mepo usondritiyani pat ita tine aliy ara para kulohonganiy tehe aro ara numwa Ngindrai. Pe melit masih nahang yo ara andre kuiki sih kiyau mwele melit masongui ara kimui kisa kili wou.”