18
Yapan ipa Sarah andre kikuni mbunah hamou kamai
1 Lang sih ndrokolo lang pe paramwandrai ara ngandrahan iya, Yapan iyarayah iya kili Aparaham. Aparaham iyempwan pohomara kamai tan iro pakeh kili hu kei namandran ata Mamre.
2 Aparaham iyempwan pe payan pakitandras pwi, inime hu ndramat matimou huro tine. Pwen ihimbuh iya pe iyarapuhunani hu, pe itukuruhu pe payan iya iho ndrita pwan.
3 Pwen pe ipwai ipa, “Yapane, kapa apwes sato, hiyan para kusopwat wawu.
4 Wawu keyen iye pe yo kuyapwai kiyata hamou para kipo hape ndran kisa. Pe wawu kasungani ndrika wawu kihipwen, pwen wawu kayangoh kaya pahandra kei iye.
5 Akamin; pe yo kuyapo hape anandrinai kisa pe wawu kainiy pe andre kipwokeyani wawu para wawu kayau. Wawu sa kol to pe yo upwes para kusopwat wawu.”
Pwen hupwai iyatan hupa, “Hiyan, apo. Yowu rawuloh iya lohongai tam.”
6 Aparaham ileheleh iya kamai tan, pe ipwai iyata Sarah ipa, “Kileh, aya wiri palawa sahat namandran mepo anrahiy pe kinna wawan masih, ara awiriy kisa, asulyaniy, pe atun tiken ndrina nohun.”
7 Pe yiy ingap iya kili hu mbulmwakau tan pe ipirani hamou noru mbulmwakau mepo sangin imuh. Pe iwiriy iya kili ndramat hamou para poya mbulyan pe imbusiy leheleh pe iya mwan. Imayis ihipwen, pwen iwiriy pe iyaikiy iya kili Aparaham.
8 Pwen Aparaham iwiri sis, pe susu mbulmwakau pe noru mbulmwakau ariya pe yiy mbukenan iykiy iya kili hu matimou pe huyan. Huro namnam pe yiy ara iro tine pahandra kei hakou ngilse hu.
9 Pwen hu sikei yiy hupa, “Nambuyum Sarah aleheh?”
Aparaham ipwai iyatahu ipa, “Yiy iyera kamai.”
10 Hamou tahu ipwai iyatan ipa, “Walah songui pe luwoh kihipwen, pe kumui kusa, pwen andre noru Sarah hamou kamai kiro.”
Sarah iro pohomara kamai ndruwa ndramat mepo iro wong ara, pe ihilingi nongan masih ndramat ara iropwai.
11 Aparaham pe Sarah ara hilu kanna parangoloh pwen pe hilu kanlahiy para kakun mbunah pwi, pe Sarah ara kinhipwen sapiya walah tan.
12 Pwen Sarah ihisani yiy mbukenan pe ipa, “Mahapo kunna pihi parangoloh masih, pe nomwule pwen. Pe namandran ato kinna parangoloh pwen i. Pe andre kumatin kuyapolo kamai to pe yolu kapwes pe kapo mbunah tapeh?”
13 Pwen Yapan isike Aparaham ipa, “Paratapeh Sarah ihai pe ipa, ‘Yo andre kukun mbunah tapeh, mepo yo kunna pihi parangoloh pwen?’
14 Sehe melit pwokeyan mepo kinlahiy para Yapan kimbusi pwi yeh? Tehe kunpwai, walah songui pe luwoh kihipwen, pe pakusa, pwen andre noru Sarah hamou kamai kinsarayah pwen kiro.”
15 Sarah ihilingi nongna Yapan pe inoh. Pwen pe ipwasoyou ipa, “Pwi yoh, yo kunhai pwi!”
Pwen Yapan ipwai iyatan ipa, “Pwi; wou ahai ndrokonan.”
Yapan nakipwalngani kol Sotom
16 Pwen hu ndramat matimou huyau huya ngondron pe marahu iya kol namandran Sotom, pe Aparaham irikai iya surahu pe iyaiki hu huya sai.
17 Pwen Yapan iwong iya lohongan ipa, “Yo andre kunkohoni handra lohongai kili Aparaham pwi, para sehe lohongai nakumbusiy.
18 Ndraye Aparaham hu andre karayah soyon pe pwokeyahu iya, pe andre kutoholi kol pwan masih kiyau kili Aparaham.
19 Yo kunpohowe yiy para kiwong pwokeyan kiya kili norun hu masih, pe ndrayen hu para hu kahalingi yo pe kambusi melit masih hiyan pe kimwonen. Kapa hu kambusi lohongai masih tehe kunpwai, yo andre kumbusi memelit masih tehe kunpwatisingiy kinna tan.”
20 Pwen Yapan ipwai iya kili Aparaham ipa, “Yo kunhilong nongan soyon tehe kol malkol Sotom pe Komorah ara kultuw tahu mwomwan pe namandran masih.
21 Yo andre kuyapwan pe andre kuya nime kultuwayihu tehe kunhilong ara ndrokonan ndre pwi, pe andre kupahasaniy.”
22 Pwen hilu ndramat malmou hilyau hilya pwen te Sotom, pe Yapan o irondron sura Aparaham.
23 Pwen Aparaham iya pakeh kili Yapan pe isike yiy ipa, “Apwai ndrokonan —- andre apwasili hu ndramat hiyan kiyapolo hu ndramat mwomwan?
24 Pe kapa hu ndramat hiyan tora kol ara hu mayimingui, andre apwasili hu topwei, ndre konan, hu koro? —- paratesah, hu ndramat hiyan ara mayimingui hu toraliy.
25 Ndrokonan upahasaniy tehe wou anlahiy para arayi hu ndramat hiyan kiyasura hu ndramat mwomwan pwi. Ara tehen tapeh! Wou anlahiy para ambusi kultuw tora kiyawule kili hu ndramat hiyan pe mwomwan kene pwi. Andre kintayah tehen tora pwi. Ndramat namandran para tamwaniye para kol pwan masih ara andre kimbus lohongai masih kimwonen pe kihisoule, ndre?”
26 Pwen Yapan ipwai iyata Aparaham ipa, “Kapa kunime hu ndramat hiyan tora kol Sotom koho mayimingui andre kunmbusi hapesah kinna tahu masikene pwi.”
27 Pwen Aparaham ipwai paiwe iya kili yiy ipa, “O Yapan, ndrinam mbuna kilokuh kiya nongan masih kunwong kinnaliy, koyum kisikirani yo. Yo ndramat mwaihei o tehe kohu pwan pe palam, pe kunlahiy para kuwong kiya handra lohongai pwi.
28 Kapa hu ndramat hiyan mayimingui pukene pe hu koho haangui pe yimou, andre arayi hu topwei kiyasura hu ndramat mwomwan?”
Pwen yiy isomwiy ipa, “Andre yo kuntamate kol Sotom pwi, kapa kunime hu haangui pe yimou o.”
29 Aparaham iwong paiwe ipa, “Kapa anime yihu mahaangui o?”
Pwen ipwai ipa, “Andre kunmbusi hapesah pwi kapa yihu mahaangui o.”
30 Pwen Aparaham iwong paiwe ipa, “Yapan, ndrinam mbuna kilokuh to. Yo nakuwong paiwe kisa kili wou. Andre ambusi tapeh kapa yihu matingui o?”
Pwen ipwai ipa, “Andre kunmbusiy pwi kapa kunime hu matingui hu toraliy.”
31 Aparaham iwong imui paiwe iya kili Yapan ipa, “Ndrinam mbuna kilokuh to para uwong soyon. Kapa anime yihu malungui o?”
Pwen ipwai ipa, “Iya hiyan atahu malungui, andre kuntamate topwe hu pwi.”
32 Iyamulan ipa, “O Yapan, ndrinam mbuna kilokuh to. Yo nakuwong porosih iye ko pe nongno nakihipwen. Kapa anime hu masongui o, andre ambusi tapeh?”
Pwen ipwai ipa, “Andre kuntamate topwe hu pwi iya hiyan atahu masongui o.”
33 Yapan iwong iya kili Aparaham ihipwen, iyamulan iyau pe Aparaham imui iya kamai tan.