จดหมายจากเปาโลเขียนเถิงหมู่ปี้น้องผู้เจื้อในเมือง
เธสะโลนิก๋า
ฉบับตี้สอง
จดหมายฉบับนี้เขียนโดยเปาโล ต้านเขียนหลังจากตี้ส่งจดหมายฉบับแรกไปเถิงผู้เจื้อในเมืองเธสะโลนิก๋าบ่เมินเต้าใด จดหมายฉบับนี้เขียนขึ้นประมาณปี๋ ค.ศ. 50-51 ต๋อนตี้เปาโลยังอยู่ตี้เมืองโครินธ์
เปาโลได้ยินข่าวว่ามีสิ่งตี้ผู้เจื้อเข้าใจ๋ผิดเกี่ยวกับเรื่องก๋านมาเป๋นเตื้อตี้สองของพระเยซูคริสต์ ต้านอาจจะได้ยินข่าวนี้จากทิโมธีตี้ปิ๊กมาจากเมืองโครินธ์หลังจากตี้ไปแอ่วหาเมืองเธสะโลนิก๋า เปาโลเลยเขียนจดหมายเถิงหมู่ผู้เจื้อในเธสะโลนิก๋าแหมเตื้อเปื้ออธิบายเถิงสิ่งตี้หมู่เขาเข้าใจ๋ผิด
เปาโลบอกเถิงเรื่องวันตี้พระเยซูคริสต์จะปิ๊กมายังมาบ่เถิงเตื้อ ต้านบอกเถิงสิ่งตี้จะต้องเกิดขึ้นก่อนพระเยซูคริสต์จะปิ๊กมาเป๋นเตื้อตี้สอง บ่มีใผฮู้ได้ว่าพระเยซูคริสต์จะปิ๊กมาเมื่อใด ย้อนจาอั้นผู้เจื้อควรจะเยียะก๋านอย่างซื่อสัตย์ เปื้อจะเลี้ยงดูตั๋วเก่าได้ บ่ควรถ้ารอพระเยซูคริสต์ปิ๊กมาโดยอยู่บ่ดาย แต่ควรจะเยียะต๋ามแบบอย่างของเปาโลตี้เยียะก๋านเปื้อจะผ่อกอยตั๋วเก่าแม้แต่ต๋อนตี้บอกข่าวดีตวย
1
กำตั๊กตวาย
1 จดหมายฉบับนี้จากข้าพเจ้าเปาโล กับสิลวานัสตึงทิโมธี
เถิง ปี้น้องในคริสตจักรเมืองเธสะโลนิก๋า เซิ่งเป๋นของพระเจ้าพระบิดาของเฮาตึงพระเยซูคริสต์องค์พระผู้เป๋นเจ้า
2 ขอหื้อต้านตังหลายได้ฮับพระคุณตึงสันติสุขจากพระเจ้าพระบิดากับพระเยซูคริสต์องค์พระผู้เป๋นเจ้าตวยเต๊อะ
ก๋านตัดสินในวันตี้พระเยซูปิ๊กมา
3 ปี้น้องผู้เจื้อตังหลาย เป๋นก๋านสมควรอยู่แล้ว ตี้หมู่เฮาต้องขอบพระคุณพระเจ้าสำหรับหมู่ต้านอยู่ตลอด ย้อนว่าความเจื้อของต้านจ๋ำเริญขึ้นติกๆ ขอบคุณพระเจ้าตี้ความฮักของต้านตี้มีต่อกั๋นก็จ๋ำเริญนักขึ้นติกๆ ตวย
4 หมู่เฮาอวดต้านตังหลายหื้อคริสตจักรหลายตี้หลายแห่งฟังว่า หมู่ต้านอดทนกับเจื้อวางใจ๋พระเจ้าต้ามก๋างก๋านโดนค่ำ กับความตุ๊กยากตี้หมู่ต้านทนอยู่นั้น
5 สิ่งหมู่นี้แสดงเถิงก๋านตัดสินอันยุติธรรมของพระเจ้า ย้อนโดยความตุ๊กตี้หมู่ต้านได้อดทน พระเจ้าก็จะนับต้านตังหลายว่า สมควรตี้จะเข้าอยู่ในแผ่นดินของพระเจ้า ตี้หมู่ต้านก่ำลังฮับความตุ๊กยากเปื้ออาณาจักรนั้น
6 พระเจ้าจะเยียะต๋ามความยุติธรรม ก็คือคนหมู่นั้นตี้ได้เยียะหื้อหมู่ต้านมีความตุ๊ก พระเจ้าก็จะเยียะหื้อหมู่เขาฮับความตุ๊กเหมือนกั๋น
7 พระเจ้าจะหื้อต้านตังหลายตี้เดือดฮ้อนอยู่บ่าเดี่ยวนี้ ป๊นตุ๊กกับหมู่เฮาตวย นี่จะเกิดขึ้นในวันตี้พระเยซูองค์พระผู้เป๋นเจ้าปิ๊กมาจากสวรรค์ด้วยเปล๋วไฟฮ้อนขนาด พร้อมกับหมู่ทูตสวรรค์ของพระองค์ตี้มีฤทธิ์อำนาจตวย
8 พระเจ้าจะลงโต้ษคนตี้บ่ฮู้จักพระองค์ ตึงตี้บ่ยอมเจื้อฟังข่าวดีของพระเยซูองค์พระผู้เป๋นเจ้าของเฮา
9 คนหมู่นั้นจะฉิบหายตลอดไป จะถูกแยกออกหื้อป๊นจากองค์พระผู้เป๋นเจ้ากับอำนาจอันยิ่งใหญ่ของพระองค์
10 นี่จะเกิดขึ้นในวันตี้พระเยซูจะปิ๊กมาฮับเกียรติตึงความอัศจ๋รรย์ใจ๋จากหมู่ผู้บริสุทธิ์ตังหลาย หมู่ต้านก็จะอยู่ในหมู่นั้นตวย ย้อนว่าได้เจื้อเรื่องเกี่ยวกับพระองค์ตี้หมู่เฮาได้บอกหื้อหมู่ต้านฟัง
11 หมู่เฮาก็หมั่นอธิษฐานเผื่อต้านตังหลายบ่ขาด เฮาขอพระเจ้าจ้วยต้านใจ๊จีวิตหื้อเปิงกับจีวิตตี้พระองค์ฮ้องเฮามาติดต๋าม กับจ้วยหื้อต้านตังหลายโดยอำนาจของพระองค์ หื้อเยียะก๋านดีกู้สิ่งตี้ใค่เยียะ ตึงเยียะก๋านงานตี้เกิดจากความเจื้อของต้านหื้อได้
12 แล้วจื้อของพระเยซูคริสต์ของเฮาจะได้ฮับเกียรติ ย้อนสิ่งตี้พระองค์เยียะในจีวิตของต้าน ตึงต้านก็จะได้ฮับเกียรติตวย โดยพระคุณของพระเจ้ากับพระเยซูคริสต์องค์พระผู้เป๋นเจ้าของเฮา