3
Yesu nga nkolongwa kupeta Musa
1 Makalongo bango, mabandu ba Nnoongo mamikilondite mulukemo lu kumbengu, munhwachila muno Yesu ndundame na nkung'i Nkolongwa jwa imani jitulenga kukano ito.
2 Jwenio akiba juna kuaminika ku Nnoongo ojwampambula andi Musa pakiba juna kuaminika pababegelela bandu boa abakemigwa nyumba ja Nnoongo.
3 Nambu Yesu apaligwa ichima ngolongwa muno kupeta Musa gambu nchengi jwa nyumba kupata ichima muno kupeta nyumba jene.
4 Kila nyumba jichengigwe na mundu, nambu Nnoongo nga nchengi jwa ilebe yoa.
5 Musa jwombe akiba mpakachi juna kuaminika muliengo lyakwe lyoa lyenie, liengo lyakwe likiba kuchalakicha gaga agapakulonge Nnoongo kingobu chikiika.
6 Nambu Kilisto jwombe nga ojwaaminika andi Mwana juna kinala mu nyumba ja Nnoongo. Tubeni twenga nga nyumba jakwe anda tujendeke kube ndii mu lihyobalelo litulokelokela.
Kakelabuya bina kujundupa myojo
7 Andi Uhuke jwa Chwapi palenga Mumajandiko Gachwapi,
“Lele anda nnyoininge lilobe lya Nnoongo,
8 makajundupa myojoje andi akahokabinu kingobu chache chabankana Nnoongo,
lichoba libannondoya kupongoti.
9 Nnoongo alenga kwenio akahokabinu ngabannondoya,
iganukube ngibibona itendwa yango kwa yaka makomi ncheche!
10 Kwa magambu genia ngambe nililaka ku bandu benia nganenga,
‘Machoba goa bakengama ndela yabe,
bimanyije ngu ndela yango.’
11 Nganjimwa, nganapila,
‘Bijingije ngu paali pango pukupomolela!’ ”
12 Makalongo, mmaganga maha akabeje mundu jwajoa kati jinu jwabi na mwojo mmaja na jwangaamini na mikikibekaje kutali na Nnoongo jwabi mmomi.
13 Nambu pannyendeke kujoa lilobe lende, “Lele,” likachomigwa Mumajandiko, nnimbiane mwojo kila machoba kupala mundu jwajoa akakotokaje kuagabala magambu gu koloigwa nu kutenda mabaja.
14 Magambu twe tuboa tubi pamwe mukulondana na Kilisto ojwatukola anda ibi tuilekiteje minhalo eituiamina kalakala.
15 Nkombakela pagalenga Majandiko Gachwapi,
“Lele anda nnyoaninge lilobe lyakwe,
makabeganga nimitauje andi kingobu chache chabanganaga.”
16 Bene abilijoa lilobe lya Nnoongo ngabankana? Bo, boaje abalongoliigwa na Musa pabakuboka ku Misili?
17 Nnoongo bachimwa beneke ku yaaka makomi ncheche? Bo, babaje abatei mabaja ngabagwe nu kuwe kupongoti?
18 Nnoongo apalapila, “Bijingije paali pango pu kupomalela,” balenga beneke? Bo, babaje abakana kunnyoa?
19 Tulola kutenda baotwije kujingi kwenio magambu gwangaamini gwabe.