4
ABEL WIRLARNA MARLKARRI CAIN-JU (4:1-16)
1 Adam-pa Eve yanapulu palaja Yitinja. Palaja Eve-lu pujamu kanya. Karra marna, “Partany yinyanyi Ngarrkalu.” Yini paliny Cain.
2 Palaja wariny kanya. Yini paliny Abel. Wirtu jarrinyapulu. Pirirrijirri jarrinyapulu. Abel-ju kalkurnakinyijaninyi kukurnjarirrangu. Cain-ju karlinyikinyi jungka. Mayirrangu wirrirnikinyijaninyi jungkanga, turlpanyikinyiyi, ngarnipirnikinyijaninyi.
3 Karrpungu warajanga Cain-ju kanya mayi, Ngarrkanga yinyali.
4 Palinymilalu marrkalu kanya kukurnjari, marlkarri jirni, kutarrangu ngalypa Ngarrkanga yinyali. Ngarrka ngarlu pikaly jirni Abel-ju.
5 Munu pikaly jirnima Cain-ju. Palajalu Cain kuli jarrinyikinyi. Ngumpa wariny jarrinyi.
6 Ngarrkalu wurrarnalu, “Nganija nyuntu kuli jarrinyijin? Nganija ngumpa wariny jarrinyijin? Munu yunturi jarranpili.
7 Yinku jinaman, pikaly jarriman. Kurlu jirnikinyin. Yirrkulu nyuntulu jilamanparninyi ngalypa jinaku. Palajalu pikaly jinaluminyin. Munujalu, jiti kurlujartiny jinaluman.”
8 Ngarrkaku Cain-ju munu pinakarrimalu. Yunturi jarrinyikinyi. Palajalu wurrarnalu marrkaku, “Yankuli jalakarti ngurnungu.” Jalakarti yanapulu. Palaja Cain-ju wirlarna marlkarri marrka palinymili.
9 Palajalu Ngarrkalu japirr marna, “Wanyja marrka nyuntumili?” Murrkangunyamarninyju mitu marna, “Munumparla ngaju. Munurla tuku jinakarni.”
10 Wurrarnili Ngarrkalu, “Nyuntu mitu karrinyan. Nyuntulu wirlarnan marlkarri. Jungkanga palinymili pijirri waninyi. Nyuntulu yija kurlu jinan.
11 Puntaju ngajulu kurlu jilamarnantalu. Jungka kurlu wantulamanga.
12 Mayirrangupa munu turlpulupiyingu. Kaja ngakalamarnanta. Wirntijartiny yankun-yankuluman warinykartirrangu.”
13 Cain-ju wurrarnalu, “Kararr nganimarta jinajinpa.
14 Yankun-yankulumarna warinykartirrangu. Ngurnipali warinyjupa marlkarri wirlalanyili.”
15 Ngarrkalu wurrarnili, “Warinyju wirlalantili, ngajulu yijalu wirlalamarnanga.”
16 Palajalu Cain yana ngunarri. Kakarrakurnu waninyikinyi kaja Yitinja. Ngurnungu warrarn yini marnayi “Parra Yaninyikinyi.”
CAIN-MILI NYIRRIRNIKARTIJARRANGU (4:17-24)
17 Nyupa Cain-mili partany kanya, yini Yinuku. Tawun yarni marna Cain-ju, nyaparu jirni pala tawun partanyku palinymilaku, yini marna pala tawun Yinuku pukun.
18 Enoch japartu jarrinyi partany pirirriku, yini Irad. Irad japartu jarrinyi partany pirirriku, yini Methushael. Methushael japartu jarrinyi partany pirirriku, yini Lamech.
19 Pala Lamech kujarra mirtawajirri kalkurnapulinyi, Adah-pa Zillah.
20 Adah-lu partany pirirri kanya, Jabal. Walangkarr nyarra Jabal kuwiyirrangu kalkunakatarrangu, mayamajirri, yana-yanikinyiyi tent-arrangujartiny warinyja warinykarti, warruly kanganyaku janamilaku kuwiyiku.
21 Markamarniny palinymili yini Tubal. Walangkarr nyarra Tubal musical instruments yarni manakatarrangu, harp-pa flute-pa nganin-nganin.
22 Zillah-lu partany pirirri kanya, yini Tubal-Cain. Palinyju yarni marnikinyi yarni manapintirrangu bronze-japa iron-ja. Zillah-lu partany mirtawa kanya pukun, yini Naamah.
23 Lamech wurrarnapuluku mirtawakujirri palinymilaku,
“Adah-pa Zillah, pinakarrajipulu ngajuku!
Wangalangulu ngaju wirlanaja, paliny wirlarnarna marlkarri.
24 Ngarrkalu wurrarna nganurtulu Cain marlkarri wirlalkuliny, paliny Ngarrkalu wirlalkuliny seven times. Nganurtulu ngaju marlkarri wirlanaja, paliny warinyju wirlalkuliny seventy-seven times!”
SETH-PA ENOSH (4:25-26)
25 Abel marlkarri waninyaja, Eve-lungarra wariny partany kanya. Karra marna, “Abel wirlarna marlkarri Cain-ju. Ngarrkalu puntaju yinyanyi pujamu wariny.” Yini marna “Seth”.
26 Seth japartu jarrinyi Enosh-ku. Palajaja marrngurrangulu kamarnikinyiyi Ngarrkakupa ngarluja nyurra marnikinyiyi paliny.