7
इस्राएल ने एक लाख चोवरेचाड़ीस एजार माणहे
1 ज्यान पासाण मी चार हेरोगदुताह देरतीन चार उगे उबरियेल दिख्यो, ता देरतीन चार उगीन वाराह रूक रियेल एता काय देरती, देरीया एने काल्ला बी जाड़ा पोर वारो नाय चाली।
2 पुशो मी दुसरा एक हेरोगदुताह उगेवणे रेन उपेर आवतालो दिख्यो, ता फाय जीवताला बोगवानान सिक्को ईतो। एने जा चार हेरोगदुता फाय देरतीह एने देरीयाह नुकसान केरनेन आदिकार आपेल ईतो। मोठेस आयड़ीन केयो,
3 “आमरा बोगवान ने जा पावोर हेते, तान निंडाला पोर साप लागाड़ नाय देव, ताह वोर देरतीह, देरीयाह एने जाड़ाह नुकसान मा किरहे।”
4 एने जा पोर बोगवानान साप लागाड़नेन आवो तान गेणती मी होमल्यो, इस्राएली माणहान आखा गेराणा माय एक लाख चोवरेचाड़ीस एजार माणहे एता।
5 एकेक गेराणान बारा एजार माणहा पोर साप लागाड़नेन आवो, यहुदा, रूबेन, गाद,
6 आशेर, नप्ताली, मनशी,
7 शमोन, लेवी, इस्साकार,
8 जबुलून, युसूफ, बिन्यामीन।
एक मोटली माणहान गेरदी
9 ज्यान पासाण माहु एक गेणाय नाय ओहली माणहान मोटली गेरदी देखानी, ज्या माणहे एकेक देस, गेराणो, जाती एने आलेग आलेग बाषा बोलने वाला एता, ता माणहे राजगादि एने मेंड्रान ओंगाण दोवल्या फाड़का पेरीन आथा माय खजुर ने डालख्यु लेन उबरियेल एता।
10 एने ता माणहे मोठेस आयड़ीन केताला:
“राजगादि पोर बोह रियेल आमरा बोगवान, एने मेंड्रान उगे रेन सुटकारो हे!”
11 तेवी राजगादिन एने डावाला माणहान, एने चार जेनवेरान कावदेन आखा हेरोगदुत उबरियेल एता। ता राजगादिन ओंगाण उबड़ा पोड़ीन बोगवानान आरादना केऱ्या,
12 एने केया, “आमेन! स्तुती, बोड़ाय, इकेल, दन्यवाद, मान सम्मान, ताकेत एने सेक्ती कायेम आमरा बोगवानान हे! आमेन!”
13 ज्यान पासाण डावाला माणहा माय रेन एक माहु फुशो, “ज्या दोवल्या फाड़का पेरनारे माणहे कुण हेते, एने का रेन आयेल हेते?”
14 मी ताह जापाप आप्यो, “एय मालीक, ज्यो ते तुस जाणेह।”
तो माहु केयो, “ज्या ता माणहे हेते, जा मोटली तेकलीत माय रेन निकलीन आयेल हेते, एने ज्या सोतान फाड़काह मेंड्रान लुय केरीन दोवीन दोवल्या किरेल हेते।
15 केरीन ज्या बोगवानान राजगादिन ओंगाण हेते, एने बोगवानान मोंदिर माय रात दिह तान सेवा चाकरी केरतेह। तो जो राजगादि पोर बोह रिनोह, तो खुद तान राखवाली केरी।
16 ता पोशा केदी बुखल्या एने तीहल्या नाय रेती; एने नाह ते दिह एने नाह दोप ताह हेलगाड़ सेकी।
17 काहाकाय मेंड्रो जो राजगादिन विची माय हे, तो तान गोवाल बोणी, एने ताह जीवाय आपणार पाण्यान जिरा हिऱ्यो ली जाया केरी। एने बोगवान तान डोलान आखा आहवाह नुस देय।”