4
हेरगा माय आरादना
1 ज्यी वातुन पासाण मी उपेर दिख्यो काय हेरगा माय एक बायणो उगड़ी रेनोह, एने मी पेल पावलीन गेत आवाज होमलेल ईतो, तो माहु केयो, “न्या उपेर आव; मी तुवाह ती वातु देखाडुह, जाह जी वातुन ओंगाण एणे जोरवरी हे।”
2 पुशो मी तुलेचबूखी चोखाला जीवा माय बोराय गीयो। एने मार ओंगाण हेरगा माय एक राजगादि मील रियेल देख्यो एने ती राजगादि पोर कुण तीबी बोह रियेल एतो।
3 जो ती राजगादि पोर बोह रियेल ईतो तो यशब एने माणिक्यन देगड़ान गेत देखातालो, एने राजगादिन कावदेन चोमेकतालान गेत एक मेग दनुष्य देखातालो।
4 ती राजगादिन कावदेन चोववीस राजगादि उंजु एत्यु, त्यु राजगादि पोर मी चोववीस डावाला माणहाह दोवल्या फाड़का पेरीन बोह रियेल एता, जा मुंडा पोर होनान मुकूट पिर रियेल एता।
5 त्यु राजगादि माय रेन विजेलनेन चोमेक एने वादलान गाजणो निकेलतालो, एने राजगादिन ओंगाण उजालो आपणार हात बोला पेटणे बाजरियेल एता, ता बोगवानान हात जीव हेते।
6 एने राजगादिन ओंगाण चोमेकताला सिसान गेत दोवल्यो देरीयो पोसरी रियेल ईतो,
राजगादिन विचीम एने चार चोमखीर चार जेनवेरे एता, तान ओंगाण पासाण डोलाच डोला एता।
7 पेल्लो जेनवेर सिहान गेत एतो; एने दुसरो जेनवेर बोयलान गेत एतो; तीसरा जेनवेरान मुय माणहान गेत एतो; चोवथो जेनवेर उड़ताला मोराग्यान गेत एतो।
8 ता चार बी जेनवेरान सोव सोव फाक एता, एने चार उगे एने माय डोलाच डोला एता। ता दिह ने रात ज्यो केणेन नाह थाकताला:
“चोखालो, चोखालो, चोखालो मालीक बोगवान, आखा रेन ताकेतवालो,
जो ईतो, एने जो हे, एने जो आवण्यो हे।”
9 जेवी ता जेनवेर तान जो राजगादि पोर बोह रियेल ईतो, एने जो कायेम वोर जीवतालो हे, बोड़ाय एने मान सम्मान एने दन्यवाद केरताला,
10 तेवी ता चोववीस डावाला माणहे जो राजगादि पोर बोह रियेल ईतो, तान ओंगाण पाया पोड़ीन तो कायेम जीवतालो रेणारान आरादना केरतेह, ता राजगादिन ओंगाण जान तान मुकूट ज्यो कितेन टाक देना:
11 “एय आमरा मालीक एने बोगवान! तुच बोड़ाय, मान पान, एने ताकेत ने बाराबोर हे;
काहाकाय तुच आखी वोस्तुह बाणायेल हे,
एने तारीच मोरजी माय, खेरीच आयेल एती,
एने ती एवी जीवताली हे।”