14
एका दिहरा पोर दोस मा लागाड़ो
1 जा बोरहाम कोमजोर हेते ताह आहने किरो, पुण तान व्यक्तिगत विचारा पोर बोलचाल केरने नाह।
2 एगदान बुरहो ओहलो रीथे काय, ताह कोहलो बी खाणो चालेह; पुण जो बोरहाम कोमजोर हे तो फोक्तो बाजी पालोस खाथे।
3 खाणार नाय खाणाराह नेचो जाणे, एने नाह खाणार खाणारा पोर दोस लागाड़े; काहाकाय बोगवान ताह आहने केर लियेल हे।
4 तु कुण हे जो दिहरान सेवका पोर दोस लागाड़ेह? तान स्थिर रेणे नाहते पोड़ जाणे तान मालीकान सावाल हे; पुण तो मोजबुत केराय जाय, काहाकाय मालीक ताह स्थिर मेल सिकेह।
5 एगदो माणुह एगदो दिह दिहरा दिह्याह रेन जादा सोमेजतेह, एने एगदो आखा दिह्याह एक हारको मानेह। एकेक माणुह तास ने मोनाम निश्चय केर लेय।
6 जो एगदा दिह्याह खाज मानेह, तो मालीकान केरता मानेह। जो कुण आखो काय खाथे, तो मालीकान केरता खाथे, काहाकाय तो बोगवानान दन्यवाद किरेह, एने जो नाह खात, तो मालीकान केरता नाह खात एने बोगवानान दन्यवाद किरेह।
7 काहाकाय आपणी माय रेन कुण सोतान केरता जीवेत नाह एने कुण सोतान केरता मुरेत नाह।
8 केदी आपु जीवताला हेते, ताहार बोगवानान केरता जीवताला हेते; एने केदी मोरतेह, ताहार बोगवानान केरता मोरतेह; केरीन आपु जीवे नाहते मोरी, आपु मालीकास ने हेते।
9 काहाकाय मसी ज्यास ने केरता मोरनो एने जीव बी उठनो काय तो मुरेलान एने जीवतालान दुयून मालीक रेय।
10 तु तारा बायाख पोर काहा दोस लागाड़ेह? नाहते तु पोशो काहा तारा बायाख नेचो जाणेह? आपु आखान आखा बोगवानान नियाव गादिन सामने उब रेहु।
11 काहाकाय लिखेल हे, “मालीक किथे, मार जीवणान सुगोण काय एकेक जाण गुटण्या मार सामने टेकेवती, एने एकेक जिब बोगवानान बोड़ाय केरी।”
12 तानकेरता आपणे माय रेन एकेक जाण बोगवानाह तान तान ईसाब आपी।
13 केरीन ओंगाण आपु एका दिहरा पोर दोस नाय लागाड़े, पुण तुमू ज्य ठाण लिवो काय कुण आपणा बायाख ने सामने एड़चेन नाहते ठोकेर खाणेन कारेण नाय बोणी।
14 माहु मालुम हे एने मालीक यीशु माय माहु बुरहो ईयेल हे काय काल्लो खाणो सोता माय एठो नाह, पुण जो ताह एठो सोमजेह तानकेरता एठो हे।
15 केदी तारो बाहख तारा खाणान वोजेसे नाराज ईथे, ओवतो ताहार तु मोंगान रिती पोर नाह चालेत; जान केरता मसी मोरनो, ताह तु तारा खाणान द्वारा दुख मा पोचाड़ी।
16 केरीन जाह तुमू हाजो सोमेजतेह ताह कुणीह तुमरी केरता जो हाजो हे तान चिहटा नाय एणे जुवे।
17 काहाकाय बोगवानान राज खाणे पिणे नाह, पुण देरमी पोण मेल एने ती खुसी हे जी चोखाला जीवा केरीन ईथे।
18 जो कुण इहकेरीन मसीन सेवा किरेह, तो बोगवान स्वीकारेह एने माणहाह पुटेह।
19 तानकेरता आपु त्यु वातु माय कायेम लागेल रिज्यो जा माय मेल एने एका दिहरान उन्नती एय।
20 खाणान केरता बोगवानान कामाह मा बिगाड़े। आख्यु चिज चोख्यु ते हेत्यु, पुण ता माणहान केरता खाराब हे जाह तान खाणा केरीन ठोकेर लागेह।
21 हाजो ते ज्य हे काय तु माह नाय खाय एने अंगुरान रूह नाय पिय, नाह उंजु ओहलो काम केरी जाकेरीन तारा बोरहावाला बायाख ठोकेर लागी।
22 तारो जो बुरहो एय, ताह बोगवानान सामने तारास मोनाम मेल। तुवाह जो काय पुटेह तान बाराम जो सोताह दोस नाह लागाड़ेत तो बोरकेतवालो हे।
23 पुण जा माणहे सेंका केरीन खाथे ताहार ता दोसी ठेराथे, काहाकाय तान खाणो बोरहा केरीन नाह; एने जो काय बोरहा केरीन नाह, तो पाप हे।