19
इफिसुस हेयरा माय पौलुस
1 जेवी अपुल्लोस कुरिंथीयो माय ईतो, तेवी पौलुस मायवाला आखा देसा माय फिरीन इफिसुस माय आवो। एने ताहरी ताह थोड़ाक विश्वासी सापेड़ना
2 तेवी पौलुस ताह फुशो, “तुमूह बुरहो केरने बुखेत चोखालो जीव जुड़ेल एतो काय?”
ता पौलुसाह जापाप आप्या, “आमु ते चोखाला जीवान बाराम होमल्या बी नाह।”
3 पौलुस ताह केयो, “ओवता तुमू कुणीन बपतीस्मा लेदाला?”
एने ता जापाप आप्या, “योहानान बपतीस्मा।”
4 पौलुस ताह केयो, “योहान ता माणहाह बपतीस्मा आपेल जा माणहे तान पापा माय रेन फिरेल एता; एने इहकेरीन केयो काय जो मार पासाण आवण्यो हे, यीशु पोर बुरहो किरो।”
5 ज्यो होमलीन ता मालीक यीशु मसीन नावा माय बपतीस्मा लेदा।
6 एने जेवी पौलुस ता पोर आथ मेल्यो, ते ता माय चोखालो जीव आवो; एने ता बात बातीन बाषा बोलने एने जाणाव केरने बाज गीया।
7 एने ता कोम से कोम आखा बारा एदमी एता।
8 पौलुस यहुदि बोक्ती केरन्या गेरा माय जाईन तीन मोयना वोर बिगेर बियेल बोगवानान राज ने बाराम बोलचाल किरते, एने ताह सोमजाड़ते रिनो।
9 पुण थोड़ाक माणहे वातड़ा बोणीन तान वातु पोर बुरहो नाह केऱ्या, एने माणहान सामने जाईन यीशुन नावान बेजेती बी केऱ्या। केरीन पौलुस ताह सोड़ दिनो, एने चेलाह आंगे केर लिदो एने तो दाड़ीन तुरत्रुसान साला माय जाईन बोलचाल केऱ्या केरतालो।
10 दुय वोरह्या वोर इहीचकेरीन ईती रेनो, ता माय आसीया एद्दी माय रेणारे आखा यहुदि, एने बिगेर यहुदि सोब माणहे मालीकान वचन होमेल लेदा।
केवान सोरा
11 एने बोगवान पौलुसान आथा केरीन बोंगलाय ओहला चोमेत्कारान काम देखाड़तालो।
12 एने न्या वोर काय जेवी पौलुस रूमाल नाह ते फाड़को तान सेरीर पोर रेन दुखाऱ्या माणहा पोर टाकतालो, तेवी तान बेमारी हुदरी जाताली, एने बुतड़ा बी निकेल जाताला।
13 पुण थोड़ाक यहुदि जा बुतड़ाह निकालनारे न्या ता फिरताला, ता मालीक यीशुन नाव वापेर केरनेन केरता कोसीत केरने बाज गीया। एने ता बुतड़ाह केताला, “आमु तुवाह पौलुस जा यीशुन पारचार किरेह, ता यीशुन नावा माय उकुम आपतेह काय ता माय रेन निकेल जा।”
14 एने केवा नावान एक यहुदि मुखी चाकर्यान हात सोरा एता, जा ओहलो केरताला।
15 पुण बुतड़ो ताह केयो, “मी यीशुह जाणथो एने पौलुसाह बी ओलेखथु; पुण तुमू कुण हेते?”
16 जा माणहान सेरीर माय बुतड़ो एतो, ताह कोंडीन जाफाट्यो एने ता गायला एय गीया। एने ता नांगान बोंगा एन गेरा माय रेन निकलीन नाठा।
17 एने ज्यी वात इफिसुस वाला यहुदि एने बिगेर यहुदि आखा माणहाह ज्यो मालुम पोड़नो; तेवी ता जुलूम बिय गीया, एने मालीक यीशुन नावान बोड़ाय केऱ्या।
18 एने जा बुरहो किरेल एता, ता तान बाकता कामे जा ता किरेल एता, ता मान्या।
19 एने जादु केरनाराम रेन जुलूम जाणे आवीन जान तान पोती टुलो केरीन आखान सामने हेलगाड़ देना, एने तान ईसाब केरताला ते तान किमोत कोमीत कोमी पाचाह एजार चांदीन सिक्कान बाराबोर निकेलनो।
20 इहकेरीन मालीकान वचन एने ताकेतीन काम पोसेरते एने मोजबुत ईती गीयो।
इफिसुस माय देंगो
21 एने जेवी ज्यु वातु एय गीयो, तेवी पौलुस मकादुनिया एने आखाया लागतोस यरूशलेम माय जाव ज्यो विचार तान मोनाम केरीन केयो, “ताहरी जाणेन बाद माहु रोम हेयराह बी देखणेन जोरेवरी हे।”
22 तानकेरता सेवा केरनाराम रेन तीमुथीयुस, इरास्तुस, न्या दुय जाणाह मकादुनिया माय मोकलीन तो सोता थोड़ाक दिह आसीया रेय गीयो।
23 इफिसुस माय ती टेम मालीक यीशुन बाराम जुलूम देंगो ईनो।
24 ता दिमेत्रयुस नावान एक होनार ईतो, एने तो अरतीमीस देवीन केरता चांदीन मोंदिर बाणाया केरतालो, एने जुलूम कामाव लावतालो।
25 एने तो ओहला केरनारा कारागीराह टोलवीन केयो, “एय बाहख, दोन्दा माय आपुह पोयशा जुड़तेह ज्यो तुमूह मालुम हे।
26 एने तुमू देखतेह एने होमेलतेह काय आथा केरीन बाणायेल ज्यो बोगवान नाय मीले, ज्यो पौलुस इफिसुस माय ओलोच नाह, पुण आखा आसीयान माणहाह इहकेरीन किन जुलूम माणहाह सोमजाड़ेल एने मानाड़ लियेल हे।
27 ता माय आपणा दोन्दान बदनाम एणेन दुको हे, ज्यो ओलोच नाह। पुण ज्यी मोटली अरतीमीस देवीन पुजा आखो आसीया, एने आखी दुनियान माणहे केरतेह, तीन मान सम्मान कोम एय जाय!”
28 ज्यो होमलीन माणहान गेरदी खीजवाय गियी, एने आयड़ी आयड़ीन केणे बाज गीया, “इफिसुस ने अरतीमीस देवी मोठी हे।”
29 ओलाच माय आखा हेयराम देंगो एय गीयो। एने पौलुसान हाती गयुस एने अरीस्तर्खुस, जा मकादुनिया माय रेन आयेल एता, ताह देऱ्या एने एकठास दोवड़ावीन सोंग केरन्या गेरा माय ली गीया।
30 जेवी पौलुस ता माय जाणेन होदतालो, पुण विश्वासी ताह जाणे नाह देना।
31 आसीयान जा आदिकारी एता, एने ता माय रेन थोड़ाक तान हाती एता, ता ज्यो केय मोकल्या काय सोंग केरन्या गेरा माय जाईन दोकाम मा पुड़ेह।
32 तेवी थोड़ाक माणहे आयेड़ने बाज गीया, एने थोड़ाक कायच केरताला एने ओहली मोटली गेरबेड़ एणे बाजरियेल एती, एने ताहरी आपु काहा टोलवानाह ज्यो जुलूम माणहाह मालुम नाह पोड़नो।
33 ओवता आलेकजांडराह यहुदि माणहे गेरदी माय रेन बाहेर काड्या। तेवी आलेकजांडर आथा केरीन ईसारो केरीन सोतान बाराम माणहाह सोमजाड्यो।
34 जेवी ताह मालुम पोड़नो काय तो यहुदि हे, तेवी ता आखान आखा दुय गेंटा वोर इहकेरीन केयीन आयेड़तेच रेना: “इफिसुस ने अरतीमीस देवी मोठी हे!”
35 तेवी हेयरान मोंत्री माणहाह ठावका केरीन केयो, “एय इफिसुस वाला माणहे! काय दुनिया माय ओहलो एगदो माणुह हे जो नाह जाणेत काय इफिसुस ने हेयरान मोटली देवी अरतीमीस ने, एने जुगाम रेन पोड़नार चोखाला देगड़ान राखवाल केरनार हे।
36 जेवी ज्यु वातु नाकारता नाह आवीत। तानकेरीन हाजो हे काय तुमू आखा ठावका रिवो, एने बिगेर सोच सोमजीन काय मा किरो।
37 काहाकाय जा माणहाह तुमू लाव रेनाह ता नाह मोंदिरीह लुटणारे हेते, एने नाह आमरी देवीन बाराम खाराब केतेह।
38 तानकेरता दिमेत्रयुस एने तान हाती कारागीरा हेऱ्यी काह शिकायत एय ते कोरटो उगाड़लोच हे, एने नियाव केरनारे आदिकारी हेतेच; तान ओंगाण किवो।
39 पुण एगदा कायदान वातीन बाराम काह फुसणे होदतेती, ते पोंचाम फेसलो एय सिकेह।
40 काहाकाय आज ज्या देंगान काय कारेण हे, ज्यो जापाप आपुह आपता ओवड़ी ओहलो नाह सोतो। एने जी ईयेल हे, ती वाती पोर रेन आपुह बिय हे।”
41 इहकेरीन केयीन पोंचाह बोंद केर दिनो।