51
Ange gi tagi o taahili. Se Psalm nii David, i de masavaa o de pelaabisi go Nathan ne humai ai gi ono daha, i dua dono dagodo haisala madali Bathsheba
1 De Maadua, degi mai gi de au gi bei dagodo o doo abodonu;
sooloa gi deai ogu haisala, bei de laumalie o doo lodo aloha.
2 Sooloa gi odi ogu baubau alodahi,
ma de hagagilimalali au mai i ogu haisala.
3 Gai au e iloo donu dagodo o ogu haisala,
ogu haisala e daakodo i ogu mada i mua i masavaa alodahi.
4 Au e hai baasi adu donu gi de goe, i dogu haisala,
ma de hai de baubau i mada luoo mada,
deenei ai, koe e heohi donu i doo masavaa e basa ai,
gai e heohi donu dau hagamodu muna.
5 Ni muna abodonu, au se dangada baubau mai i dogu haanau,
gai au ne haisala mai donu i de masavaa
oogu ne hagadili ai i daho dogu dinana.
6 Ni muna abodonu, koe e lodo gi dagodo de mee abodonu i de lodo;
gai koe agoagona mai ogu lodo i de heiangi abodonu.
7 Hagagilimalali ina au i de hyssop, gi gilimalali ai au;
hakaugau ina mai au, gi tea ange ai au i denga snow.
8 Haia gi malangilangi au ma de lodo danuaa;
koe gu hadihadi ogu ivi, haia gi ahe ange au gi malangilangi.
9 Hagamuunia luoo mada i ogu haisala,
gai sooloa ogu baubau alodahi.
10 De Maadua, hagagilimalali ina ogu lodo,
gai hagahoou ina de hagasaalunga heohi i ogu lodo.
11 Koe gi dee aaua gee au i mada luoo mada,
aabe gi gaavee gee doo Hagasaalunga Dabu mai i ogu daha.
12 Haia gi ahe ange au gi malangilangi i dau hagaola,
gai gaamai gi de au de lodo e daudali adu.
13 Gai au ga agoago ange ai de gau haisala oo haiava,
gai gilaadeu e aahe mai naa gi de goe.
14 De Maadua, hagaola ina mai au i de magau;
de Maadua go koe dogu hagaola,
gai au e daahili naa ga tuhi dagodo o doo heohi.
15 Dogu Ia Aamua, huugea dogu ngudu,
gai au ga tuhi ai goe.
16 Au e maua i de gaamai dahi sigidaumaha gi de goe,
gai e dee deenei doo mee lodo danuaa ai;
koe e dee malangilangi i sigidaumaha dudu.
17 Gai denga sigidaumaha o de Maadua e lodo ai go de daemaha de lodo i baubau;
de Maadua, koe e dee hagangadi mee de lodo
e daemaha i baubau aama de dahuli de lodo.
18 Koe gi malangilangi i de hai ange tanuaa gi Zion;
hagaduulia age de buibui o Jerusalem;
19 gai gi malangilangi ai goe i denga sigidaumaha heohi,
ma denga sigidaumaha dudu, aama sigidaumaha e dudu alodahi,
gai ssigidaumaha o denga kaau e hai naa i honga dau mommee o ssigidaumaha.