5
Ange gi tagi o taahili; e hua madali denga flute. Se Psalm nii David
1 Tagi Maolunga, hagalaangona dagu dangidangi;
gai anga mai i dogu manava i lunga.
2 Dogu Hodooligi, gai go dogu Maadua,
hagalaangona dogu dangi adu i dau bale,
go hiidinga au e dalodalo adu gi de goe.
3 Tagi Maolunga, koe gi hagalangona dagu dangidangi i taiao,
au e hagadabena dagu sigidaumaha adu gi de goe i taiao
ma de noho ga tali ⌊doo basa mai⌋.
4 Koe se Maadua e dee malangilangi i de baubau;
de baubau e dee maua donu gi dagodo i oo daha.
5 Tangada basa hagamaolunga e dee maua i de duu i mada luoo mada;
koe e kino i gilaadeu alodahi e haia de baubau.
6 Koe e daa naa ga maakau gilaadeu e hadu muna;
Tagi Maolunga e kino i gilaadeu e daia dangada ga maakau,
aama gilaadeu e daahangadia dangada.
7 Aagai au e ulu naa i doo hale i hiidinga de laumalie doo abodonu,
au e huli ange naa gi doo temple dabu ga daumaha.
8 Tagi Maolunga, dagina ngau i doo heohi,
i hiidinga o ogu hagadaumee;
haia gi soe doo haiava i ogu mada i mua.
9 E deai se gilaadeu e maua i de tala de muna abodonu,
gilaadeu e maanadu donu huu de daa dangada.
Olaadeu holomanga e bei taanunga e mahuge laa;
gilaadeu e hagasegesege ange i alaadeu muna.
10 De Maadua, hagaduasala ina gilaadeu i olaadeu baubau;
alaadeu hagasaele gi daia donu huu gilaadeu gi maakau.
Hagaduasala ina gilaadeu i hiidinga olaadeu haisala lagolago,
go hiidinga gilaadeu e hai baasi adu gi de goe.
11 Aagai alodahi e buibui i oo daha gi malangilangi;
gilaadeu gi hevaalogi i de malangilangi.
Koe gi doohaa dau buibui i olaadeu elunga,
gi malangilangi ai gilaadeu e aaloha i doo ingoo.
12 Tagi Maolunga, koe e hagamanuuia tangada e heohi,
ma de buibui ia i doo abodonu bei de mee hungihungi.