40
Ange gi tagi o taahili. Se Psalm nii David
1 Au ne golomagi ogu lodo ga tali ai Tagi Maolunga;
gai ia ne hagabaa mai ga hagallongo dagu dangi.
2 Ia ne dada age au i lo te geelonga hagamanavasaa,
go de mommee iai bela pigi;
gai ia ne hai au gi duu i honga dahi hadu makaga,
ma de hai luoogu vae gi tuu i honga de mommee makaga.
3 Ia ne hai au gi daahili i dahi daahili hoou,
se daahili e tuhi ai taadeu Maadua.
Dangada soa e maatagu naa i delaadeu gidee,
gai gilaadeu e hagadonusia naa Tagi Maolunga.
4 E manuuia tangada e hagadonusia Tagi Maolunga,
gai e dee ssala dono bale i daho de gau lodo maolunga,
go gilaadeu e daudali ange i denga ngadi diinonga.
5 Tagi Maolunga dogu Maadua, gu lagolago au hegau hagalele mouli ne hai,
go au mee gu hagadabena mai gi gimaadeu;
e deai ange donu e bei oo dagodo!
Gai ga daalaa naa donu e au dagodo o au hegau,
gai au e dee maua donu i de tala gi odi.
6 Koe e dee lodo i sigidaumaha ma mee ngadi gaavange,
gai koe gu hhuge luoogu dalinga.
Koe tee hai au gi haia ssigidaumaha dudu ma ssigidaumaha o haisala.
7 Gai au ne hagadaba, “Tilo, au gu humai e hai oo lodo,
bei de hai gu sisi ai laa ogu dagodo i lo te beebaa mulo.
8 Dogu Maadua, au e lodo e daudali i dau hagatau;
au hainga gu daakodo i ogu lodo.”
9 Au ne tala de longo danuaa o doo heohi ange gi de hagabuulinga soa;
au e dee hagapuni donu dogu ngudu,
Tagi Maolunga, koe e iloo donu mee nei!
10 Au tee daohi donu huu doo heohi i ogu lodo,
gai au ne tala dagodo o doo hai hegau i de muna abodonu aama dau hagaola;
au tee hagammuni donu dagodo o doo abodonu ma doo heohi i doo hagabuulinga soa.
11 Tagi Maolunga, koe gi dee gaavee gee doo lodo aloha i de au,
gai doo abodonu ma doo heohi go dogu buibui i masavaa alodahi.
12 I hiidinga hai ngadaa lagolago gu duuli au;
ogu baubau gu aahe mai donu gi de au, au gu dee maua i de galo ange e tilo.
Ogu baubau gu lagolago ange i ngaangaaulu o dogu biho;
gai au gu deai sagu tali.
13 Tagi Maolunga, koe gi malangilangi i de hagaola mai au;
Tagi Maolunga, koe gi hagamoolau balea mai au.
14 Haia gi dookaa ma de ssenga ange
gilaadeu e saalaa de hai e daa ai au gi magau.
Haia gi aahe dua ma de dookaa
dangada alodahi e llodo e hai mai de baubau gi de au.
15 Gai haia gi dookaa ma de ssenga ange
gilaadeu e hai mai gi de au, “Gu vakaa loo! Gu vakaa loo!”
16 Aagai haia dangada alodahi e saalaa goe
gi malangilangi ma de llodo danuaa i de goe;
gai dangada e llodo i dau hagaola
gi hagataba i masavaa alodahi, “Hagaamua ina Tagi Maolunga!”
17 Gai ogu dagodo, au se dangada hagaau aloha ma de duasala;
gai de Ia Aamua gi manadua mai au.
Go koe dogu bale aama dogu Ia Hagaola;
dogu Maadua, koe gi dee hagammule mai!