37
Se Psalm nii David
1 Aude manavasaa oo lodo i hiidinga o dangada e haia de baubau
aabe gi lodo gaiaa ange gi gilaadeu e haia mee dee heohi;
2 go hiidinga gilaadeu e bei denga helii e moolau laa de mmae,
ma denga manu ssomo vaaligiligi e moolau laa de maakau.
3 Koe gi hagadonusia Tagi Maolunga ma de hai tanuaa;
gai koe ga noho baba i honga de henua ga gaimee ai.
4 Koe gi malangilangi i Tagi Maolunga,
gai ia ga gaavadu gi de goe oo mee e lodo ai.
5 Hagatuu ina ange oo dagodo gi Tagi Maolunga;
hagadonusia hogi ia, gai ia ga hagahai hegau mee nei.
6 Ia e hai naa gi sula mai doo heohi bei de maalama o taiao,
gai doo heohi gi bei de mmahi o de laa i de madohi lua o de laangi.
7 Noho ma gi dee muu, golomagina oo lodo daalia ange ai Tagi Maolunga;
aude manavasaa i de hagadaga age o dangada i alaadeu mee e hai,
aabe go tangada e sula ana hagatau baubau.
8 Koe gi dee lili, gai dilia de bole;
Koe gi dee manavasaa, go hiidinga e hano ga duu ange gi de baubau.
9 De gau baubau e llilo naa donu,
aagai gilaadeu e tali hagalodolodo ange gi Tagi Maolunga e henua naa i de henua.
10 De gau baubau e moolau naa donu de llilo ga dee maaleva;
gai ga saalaa naa donu e goe gilaadeu i olaadeu mommee,
gai koe e dee gidee gilaadeu.
11 Aagai gilaadeu e daudonu e henua naa i de henua,
ma de malangilangi i de nnoho paba.
12 De gau baubau e noho e hai baasi ange gi tangada heohi,
ma de hagalloa ange olaadeu malaungudu gi de ia;
13 aagai de Ia Aamua e gadagada naa i tangada baubau,
i hiidinga ia e iloo bolo e dae mai naa donu dono laangi.
14 De gau baubau e unusi de gadilaasa ma de dada alaadeu mee hholu,
e daa ai tangada hagaau aloha ma de duasala,
ma de daa gilaadeu e heohi olaadeu dagodo.
15 Alaadeu gadilaasa e velo naa donu huu gilaadeu,
gai alaadeu mee hholu e hadihadi naa.
16 Momo goloa o tangada heohi e danuaa ange
i de lava o de gau baubau soa;
17 ssauaa o tangada baubau e odi naa,
aagai Tagi Maolunga e bale ange gilaadeu e heohi.
18 Tagi Maolunga e iloo laangi o olaadeu e dee haisala,
gai delaadeu boolonga e dagodo ga hano ai.
19 Gilaadeu e dee dookaa i masavaa hai ngadaa,
gai gilaadeu e boobosu i de masavaa o de onge.
20 Aagai de gau baubau e maakau donu;
hagadaumee o Tagi Maolunga e bei de mahamaha o de mommee iai helii,
gai e moolau donu de llilo bei de useahi.
21 Tangada baubau e kave mee a dangada, aagai e dee sui ange,
aagai tangada heohi e abodonu ma de ngadi gaavange mee.
22 Gilaadeu a Tagi Maolunga e hagamanuuia e henua naa i de henua,
aagai gilaadeu aana e hagamalaia e gaavee gee naa donu.
23 Tagi Maolunga e hagatau de haiava o tangada,
gai ia e bale ange dangada oona e malangilangi ai;
24 gai ga llave naa donu luoono vae, gai ia e dee baguu donu,
go hiidinga Tagi Maolunga e daohi dono lima.
25 I mua gai au se dama daane gai iainei au gu madumadua;
aagai au tigi gidee donu tangada heohi gi dilia,
aabe ana dama gi hulo gi dangidangi i denga gai.
26 Gai gilaadeu e abodonu ange gi dangada ma de ngadi gaavange mee;
gai olaadeu hagadiilinga e manuuia.
27 Huli gee i de baubau gai haia tanuaa;
gai koe ga maua i de noho i honga de henua ga hano ai.
28 Tagi Maolunga e lodo i de hagamodu muna heohi;
gai e dee tili donu ono dangada e hai hegau laa i de muna abodonu.
Ia e buibui gilaadeu ga hano ai,
aagai hagadiilinga o tangada baubau e llilo naa donu.
29 Tangada heohi e henua naa i de henua,
ma de noho ai ga hano ai.
30 Tangada heohi e tala ana muna i de iloo mee,
gai ia e tala dagodo o de hagamodu heohi.
31 Hainga a dono Maadua e doange i ono lodo;
gai ia e dee baguu naa donu.
32 Tangada baubau e mulidagi tangada heohi,
ma de ssala de hai e daa ai ia gi magau;
33 aagai Tagi Maolunga e dee dugu ange naa donu ia gi ssauaa o tangada baubau,
aabe e dugu ange gi hagabaubau ina ia i de masavaa e hagamodu ai ono muna.
34 Daalia ange Tagi Maolunga
ma de daudali i dono haiava.
Gai ia ga hagaamua goe, ga hai goe gi henua i de henua;
gai koe e gidee naa de maakau o de gau baubau.
35 Au ne gidee tangada baubau ma de hagamaatagu,
e somo danuaa bei manu lau kohu i dono henua donu.
36 Gai au ne ahe mai ange hogi ga gidee bolo ia gu dee maleva;
au ne ssala ia, gai au tee gidee ia.
37 Daumada ina tangada e dee haisala,
gai diiloo dagodo o tangada heohi;
tangada daudonu e soa naa ono hagadiilinga.
38 Aagai de gau baubau e odi naa donu i de maakau,
gai hagadiilinga o de gau baubau e maakau donu.
39 De hagaola o de gau heohi e humai i daho Tagi Maolunga;
gai go ia delaadeu mommee buibui makaga i de masavaa hai ngadaa.
40 Tagi Maolunga e bale ange ma de hagaola gilaadeu;
ia e hagaola mai gilaadeu i de gau baubau ma de hagamouli gilaadeu,
i hiidinga gilaadeu e hai ia go delaadeu buibui.