145
Se daahili tuhi nii David
1 Au e hagaamua goe, dogu Maadua de Hodooligi;
au e hagadegi doo ingoo ga hano ai e dee ngado mai.
2 Au e hagadegi goe i laangi alodahi,
ma de tuhi doo ingoo ga hano ai e dee ngado mai.
3 Tagi Maolunga e maolunga mmao, gai e heohi de hagalaumalie dono tuhi;
dono maolunga e dee maua gi de tonu ange aagena.
4 Dahi atangada e tuhi ange naa au hegau gi dahi atangada ange,
gilaadeu e tala naa dagodo o au hegau sauaa.
5 Gilaadeu e pasa naa i dagodo o doo mahamaha mmao ma doo maolunga,
gai au e hagamaumau naa dagodo o au hegau hagalele mouli.
6 Gilaadeu e tala naa dagodo sauaa o au hegau hagamaatagu;
gai au e tala dagodo o doo maolunga.
7 Gilaadeu e hagadele naa dagodo o doo abodonu laumalie,
ma de daahili i de malangilangi i hiidinga doo heohi.
8 Tagi Maolunga e degi ma de lodo aloha,
gai e dee moolau de lili gai e honu i de abodonu.
9 Tagi Maolunga e abodonu ange gi dangada alodahi,
gai e lodo aloha ange gi mee alodahi aana ne hai.
10 Tagi Maolunga, mee alodahi aau ne hai
e hagaahe adu naa de abodonu gi de goe,
oo dangada dabu e tuhi naa goe.
11 Gilaadeu e tala naa dagodo de mahamaha o doo nohoanga hodooligi,
aama dagodo o doo sauaa,
12 gi iloo ai e dangada alodahi dagodo o au hegau sauaa
ma de mahamaha o doo nohoanga hodooligi.
13 Doo nohoanga hodooligi e dee ngado mai donu,
gai doo sauaa e dagi ai e dagodo i denga atangada alodahi.
[Tagi Maolunga e hai hegau i de mee abodonu i ana hagatoo donu alodahi,
ma de malangilangi i mee alodahi aana ne hai.]
14 Tagi Maolunga e bale ange gilaadeu alodahi e baakuu,
gai e hagadaangage age gilaadeu gu ino gi lalo.
15 Mee alodahi e tali adu goe,
gai go koe e gaavange alaadeu gai i de masavaa heohi.
16 Koe e hhola doo lima,
ga hai gi boobosu mee alodahi e mouli.
17 Tagi Maolunga e heohi ono haiava alodahi,
gai e abodonu i hegau alodahi aana e hai.
18 Tagi Maolunga e baa ange gi gilaadeu e hagahia ange ia;
go gilaadeu alodahi e hagahia ia i de muna abodonu.
19 Ia e gaavange naa gi gilaadeu e maatagu i de ia olaadeu mee e llodo ai;
ia e hagallongo alaadeu dangidangi ma de hagaola gilaadeu.
20 Tagi Maolunga e dagitilo gilaadeu alodahi e aaloha i de ia,
aagai e daa gi maakau de gau baubau alodahi.
21 Au e tala tuhi dagodo o Tagi Maolunga.
Alodahi e mouli gi hagadegi ina dono ingoo dabu ga hano ai e dee ngado mai.