30
De aahe mai gi de henua
1 Gai Tagi Maolunga ne hagaago ange ana muna gi Jeremiah, ga hai ange,
2 “E hagadaba Tagi Maolunga, de Maadua o Israel: Siia ange muna alodahi aagu gu tala adu gi de goe gi lo te beebaa.
3 E tae mai naa laangi, go Tagi Maolunga e hagadaba, aagu e hagaahe ange ai de manuuia o dogu huaadangada, go dangada o Israel ma Judah, ga hagaahe gilaadeu gi de henua aagu ne gaavange gi olaadeu dubuna gi henua ai,” go Tagi Maolunga e hagadaba.
4 Gai aanei muna a Tagi Maolunga ne tala i dagodo o Israel ma Judah:
5 “E hagadaba Tagi Maolunga:
Gimaadeu gu langona de hevaalogi o de hellumi,
ma de maatagu, e dee go de noho paba.
6 Siilia ma de tilo:
e aha, e maua e dahi daane i de haanau hanu dama?
Gai gu aha au gu gidee ai naa denga daane mmahi alodahi
e poo olaadeu dinae bei de hine gu dai haanau,
gai gilaadeu alodahi gu mada tea olaadeu mada?
7 E vakaa naa dangada i de laangi laa!
Gai e deai ange naa donu se laangi bei nei.
De laangi laa e hai naa ga se masavaa hai ngadaa ange gi Jacob,
aagai ia e ola mai ai naa donu.
8 De laangi laa,
go Tagi o denga hagabuulinga hebagi e hagadaba,
gai au e hhadi naa de laagau hagahai hegau i honga olaadeu eu,
ma de tala olaadeu mee noonoa;
de gau henua gee gu dee hagahai hegau gilaadeu.
9 Aagai gilaadeu e hai hegau ange naa gi Tagi Maolunga delaadeu Maadua,
ma delaadeu hodooligi go David,
go de ia aagu e gaamai e hai ai delaadeu hodooligi.
10 Jacob, dogu dangada hai hegau, aude madagu;
Israel, koe gi dee manavasaa,
go Tagi Maolunga e hagadaba.
Tilo, au e hagaola naa donu goe mai i denga mommee mmao,
aama oo hagadiilinga mai i henua olaadeu gu gaavee laa aagena.
Jacob e ahe ange naa ga nnoho paba ma de duadonu,
gai e deai ange naa donu se dangada e hagamadagu ina ia.
11 Gai au e noho naa donu madali goe ma de hagaola goe,
go Tagi Maolunga e hagadaba.
Gai ga hagallilo ina naa donu e au denga huaahenua alodahi,
aagu gu hai oo dangada gi mavaevae saele aagena,
aagai au e dee hai donu gi odi oo dangada i de llilo.
Au e haele naa goe i de heohi;
au e dee dugu naa donu huu goe,
gai e hagaduasala donu goe.
12 Gai e hagadaba Tagi Maolunga:
Doo maanuga e dee maua gi mahu,
gai doo mee lagohia e hagammae.
13 Gai e deai se dangada e dangidangi i oo hiidinga,
e deai hogi valaai e hai ai gi mahu doo maanuga,
gai koe e dee maua donu gi ieiangi.
14 Oo dau soa alodahi gu ngalo goe,
gilaadeu e dee anga adu donu gi de goe;
i hiidinga au gu hagalagohia goe bei de hagadaumee,
ma de hagaduasala goe bei tangada alasala e deai sono lodo aloha,
i hiidinga doo hagabaubau ina e laumalie mmao,
gai oo haisala e lagolago mmao.
15 Gu ahe gu dangi ai naa goe i doo lagohia,
gai e dee maua gi helui doo mmae?
Go hiidinga oo baubau nnui, ma oo haisala e lagolago,
aagu ne hai adu ai nei mee nei gi de goe.
16 Aagai dangada alodahi e oohaa goe e oha naa donu,
oo hagadaumee alodahi e noonoa naa ga gaavee gee.
Dangada ne gaiaadia oo mee e gaiaadia naa hogi alaadeu mee,
gilaadeu alodahi e haia gi de mahi oo goloa e haia gi de mahi naa hogi olaadeu goloa.
17 Aagai au e hagaieiangi naa goe,
ma de hai gi mmahu oo maanuga,
go Tagi Maolunga e hagadaba,
go hiidinga koe ne hagaingoo ange bolo se ia e kino ai dangada,
ma Zion e deai laa dangada e anga ange aagena.
18 E hagadaba Tagi Maolunga:
Tilo, au e hagaahe ange naa de manuuia o dangada o Jacob,
ma de lodo aloha ange gi ono mommee nnoho;
de aduhale e ahe ange naa ga hagaduu i honga dono duulanga,
gai de hale o de hodooligi e duu naa i dono mommee donu.
19 Gai gilaadeu e daahili naa ga hagaahe ange de abodonu,
gai leo o dangada e malangilangi ai e langona naa i kilaa.
Gai au e hai naa gi kii ange de soa gilaadeu,
gai taelodo o olaadeu dangada e dee kii mai naa donu.
Au e hai naa gi hagadubu ina gilaadeu,
gilaadeu e dee hagangadi mee ina naa donu.
20 Alaadeu dama e bei naa olaadeu dagodo madagidagi,
gai au e hai naa gilaadeu gi se huaahenua i mada luoogu mada;
gai au e hagaduasala dangada e vaivai haia gilaadeu.
21 Gai delaadeu dagi se dangada donu i olaadeu magavaa;
delaadeu dangada aamua e haanau naa i olaadeu magavaa.
Gai au e gaamai naa ia gi baa mai,
gai ia e humai naa ga hagabaa mai gi de au,
Gai goai naa donu e maua i de humai e hagabaa mai
noo au e dee dugu ange?
go Tagi Maolunga e hagadaba.
22 Gai goodou e hai ai naa go ogu dangada,
gai au go doodou Maadua.”
23 Tilo, de madangi a Tagi Maolunga gu dau mai,
gai e salulu mai naa i dono bole,
bei dagodo o ssio e hano iho laa
gi honga o de gau baubau.
24 Gai de lili mmahi o Tagi Maolunga e dee ahe naa donu
ga dae ai gi dana hagassula mee alodahi aana e lodo e hai.
Muli mai naa huu gai goodou gu tonu ange naa aagena.