14
Teai vai, de onge, ma de gadilaasa
1 Gai Tagi Maolunga ne hagaago ange gi Jeremiah dagodo o tee pala de langi:
2 “Judah e hinangalosaa;
ono aduhale gu baageaa;
ono dangada gu nnoho i honga de gelegele ma e tangi ai,
gai gu kona de tangi o dangada i Jerusalem.
3 De gau aamua gu hai olaadeu dangada hai hegau gi hulo gi asu vai;
gilaadeu ne hulo gi de vai i lo te baba,
aagai teai alaadeu vai ne gide.
Gilaadeu ne aahe mai ma alaadeu ngadi manu vai;
gilaadeu gu dookaa ma de ssenga ange,
gilaadeu gu haoli olaadeu biho.
4 De gelegele gu mmasa ma de mahangahanga,
i hiidinga tee pala de langi i honga de henua;
de gau hai veelenga gu manavasaa
ma de haoli olaadeu biho.
5 Tia hahine lodo henua gu tili hogi dana dama,
go hiidinga gu deai alaadeu helii e gai.
6 Denga donkey lodo henua gu tuu i honga duuduu malaelae,
ma e manamanava bodo ai bei denga jackal.
Olaadeu ganomada gu daalea i de ssala
gai gu deai donu mommee iai helii.”
7 Tagi Maolunga, omaadeu baubau gu hagahaisala gimaadeu,
aagai koe balea mai i hiidinga o doo ingoo.
Gu kona mmao tee modu demaadeu aahe dua;
gimaadeu gu haisala adu donu gi de goe.
8 Go koe de tali hagalodolodo a Israel,
gai go dono Ia Hagaola i de masavaa hai ngadaa.
Gai gu aha goe gu bei ai naa dagodo o dahi dangada henua gee i honga de henua,
ma tangada e humai laa donu huu e noho i dahi boo?
9 Gu aha goe gu bei ai naa dahi dangada gu lele laa ono mouli,
bei taane hebagi gu deai ono mahi e hagaola ai dahi?
Tagi Maolunga, koe e noho i omaadeu daha,
gai gimaadeu gu kave doo ingoo;
koe gi dee dilia gimaadeu!
10 E hagadaba Tagi Maolunga i dagodo o de huaadangada nei:
“Gilaadeu e llodo mmao e hulo gee mai i ogu daha;
gilaadeu e dee llodo donu e nnoho donu huu
Deelaa ai, Tagi Maolunga e dee malangilangi donu i gilaadeu;
ia e dee ngalo naa hogi olaadeu baubau
gai ia e hagaduasala gilaadeu i hiidinga olaadeu haisala.”
11 Tagi Maolunga ne hai mai gi de au, “Aude dalodalo donu gi duadonu ai de huaadangada nei.
12 Gai ga hagahiikai naa donu gilaadeu, aagai au e dee hagallongo donu alaadeu dalodalo. Gai e dee galemu naa donu delaadeu hai denga sigidaumaha dudu ma sigidaumaha o grain, aagai au e dee malangilangi donu i mee nei. Aagai au e daa gilaadeu gi maakau i de gadilaasa, ma de onge aama de mee hagamaakau.”
13 Gai au ne hai ange, “De Ia Aamua go Iahweh, tilo, denga pelaabisi e hai ange gi dangada, ‘Goodou e dee gidee naa donu de gadilaasa ma de onge, aagai Tagi Maolunga e hai naa donu goodou gi nnoho paba i de mommee nei.’ ”
14 Gai Tagi Maolunga ne hai mai gi de au, “Denga pelaabisi e pasa pelaabisi naa i dogu ingoo, ni daane hadu muna. Gai e dee go au donu ne haia gilaadeu gi loadu, au tee hili hogi gilaadeu, aabe gu basa ange gi gilaadeu. Gilaadeu e tala adu gi goodou hanu midi hhadu, ma de tala mee e loomai e deai haigamaiana, gai e daahanga donu huu gilaadeu.
15 Deenei ai, e hagadaba Tagi Maolunga i dagodo o denga pelaabisi e hadu muna i dono ingoo: E dee go au donu ne haia gilaadeu gi loadu, aagai gilaadeu e hagataba, ‘E deai naa donu se gadilaasa be se onge e dae mai gi de henua nei.’ Denga pelaabisi naa e maakau naa i de gadilaasa ma de onge.
16 Gai angaanga o denga pelaabisi naa e daakodo saele naa, i honga denga haiava o Jerusalem, i hiidinga o de onge ma de gadilaasa. E deai naa donu se dangada e danumia gilaadeu, ma olaadeu bodu aama alaadeu dama. Gai au e hagaduasala naa gilaadeu gi bei dagodo o alaadeu baubau.
17 Daalaa ange muna nei gi gilaadeu:
‘Luoogu mada gu dee tuu donu de honu malingilingi
i denga loimada i de laangi ma de boo;
go hiidinga tamaa hine — go ogu dangada —
gu hagailia gai dono maanuga e kona.
18 Noo au e hano gi tua de aduhale,
gai au e gidee dangada gu daia i de gadilaasa.
Gai noo au e hano gi lo te aduhale,
gai au e gidee dangada e mmagi i hiidinga o de onge.
Gai de pelaabisi ma tangada haimeedabu
e hagadaga saele ma e hai alaau hegau i honga de henua,
gai gilaau e dee iloo donu alaau mee e hai.’ ”
19 E aha, koe gu tili naa donu Judah?
Koe gu kino naa donu i Zion?
Gu aha goe gu hagailiili ai naa gimaadeu
gai omaadeu maanuga gu dee maua gi mmahu?
Gimaadeu e ssala de nnoho paba,
aagai teai donu se danuaa amaadeu e gidee.
Gimaadeu e tali dahi masavaa o de hagaieiangi,
aagai go de mee hagamaatagu donu huu ne humai.
20 Tagi Maolunga, gimaadeu e tala adu donu omaadeu baubau,
ma baubau o omaadeu dubuna madagidagi,
go hiidinga gimaadeu gu haisala adu donu gi de goe.
21 Koe gi dee kino i gimaadeu, i hiidinga doo ingoo;
koe gi dee hagangadi mee ina doo nohoanga mahamaha.
Manadua dau hagatoo donu hagaheloongoi mai gi gimaadeu
gai koe gi dee oohaa ina.
22 Gu hanu laa ngadi diinonga i magavaa diinonga o denga huaahenua
e maua i de hai gi pala de langi?
E aha, e maua e de langi i de hai gi pala iho de langi?
E deai, gai go Iahweh demaadeu Maadua e haia mee nei.
Deenei ai, go koe demaadeu tali hagalodolodo,
gai go koe e haia mee nei alodahi.