7
Anishirr 144,000 ba nggo a ki ba angba wa nggo
1 Inggi yi i kre nggo, ingga hi abitu ba Abachi ba ane̱ a kri na ankla ane̱ kago ingbingbru yi. A so chirr unddunddu une̱ ku ingbingbru ku na han ku ni go na ábì tuku na amasirr, tuku ni inkinkurr.
2 Ingga kye unitu a Abachi unuma a so gru zhi na anza ambre, na hru angba a ittu a Abachi ni so tsitsirr wa. Na hantu nu ukorr unkpi na abitu ane̱ ba, nggo Abachi à nu ba ukyekye di a bu na imimi yi tuku amasirr ankpinkpi ka kaki ndanda nggo.
3 Unitu wa à da di, “Si na imimi yi tuku amasirr ka, ka inkinkurr yi ki ndanda hen. Duma, di inta yo ku amirr iko ba Abachi ba angba na achichi bari.”
4 Ingga i wo ikri i abangga ba nggo a yo ba angba wa. A si anishirr ukrɨ ayirryirr ni so ne̱ na ne̱ (144,000). A ddu ba zhi na aki ka Israila ka kago.
5 Anishirr nu uga ku Yahuda, ukrɨ uwurr nu uha (12,000) nggo a kpa angba wa,
anishirr nu uga ku Rube, ukrɨ uwurr nu uha (12,000),
anishirr nu uga ku Gadi, ukrɨ uwurr nu uha (12,000),
6 anishirr nu uga ku Asherr, ukrɨ uwurr nu uha (12,000),
anishirr nu uga ku Nafitali, ukrɨ uwurr nu uha (12,000),
anishirr nu uga ku Manase, ukrɨ uwurr nu uha (12,000),
7 anishirr nu uga ku Simiyo, ukrɨ uwurr nu uha (12,000),
anishirr nu uga ku Levi, ukrɨ uwurr nu uha (12,000),
anishirr nu uga ku Isaka, ukrɨ uwurr nu uha (12,000),
8 anishirr nu uga ku Zebulu, ukrɨ uwurr nu uha (12,000),
anishirr nu uga ku Isuhu, ukrɨ uwurr nu uha (12,000),
tuku anishirr nu uga ku Benyami, ukrɨ uwurr nu uha (12,000).
Akpa anishirr nggo a surr inkinkru ikikla
9 Inggi yi i vu sarr, ingga hi akpa anishirr nggo a mri ibre. A zhi ni ingbingbru inggi tuku igbu, iga na ane, ni irrirri ingbingbru yi kago. Aba a kri ku imburr i ittu yi tuku Uvuvurr Inkru wa ni ichi. A surr inkinkru ikikla, na hru ahiharr iri na ango ambarr.
10 A bwu ukorr kakami da di,
“Ikpa ittungo i zhi na Abachi amunta wa ku,
nggo à so ni imburr ittu yi,
tuku Uvuvurr Inkru wa!”
11 Abitu ba Abachi ba wemi a kri kago imburr i ittu yi na akikre anishirr ba tuku aninkindirr atsitsirr ane̱ ba. Aba a kuhre brebre na age̱ ka imburr ka na gbyarr ku Abachi asa.
12 Na so da di,
“Du yi si meme yo!
Igbyarr asa ni inkpinkpye,
tuku ihi, inyarr, inkpinkpye,
ittu tuku ukyekye
wemi a si aba Abachi ase na ase.
Du yi si meme yo!”
13 Ukukre uyirr wa à zhi ingga di, “Anishirr bi surr iki ikikla angga ba, a sa abata ngga, na zhi nu momonggo?”
14 Ingga i ka sa ku di, “Ankpye, ùwà hi.”
Uwa ddu ingga di, “Abangga a sa anishirr ba nggo a firr ssuzzu ni iha inkpi yi, na ngla inkinkru imbarr yi ki ikikla na ayiyi a Uvuvurr Inkru wa.
15 A si ima yo i du ba,
“a kri na age̱ ka imburr ittu i Abachi yi
na so di na ku undu na azhi tuku ibittu nu Uki Unkpi ku Ibarr umaku.
Uni so ni imburr ittu wa à ta ttu imba sharri.
16 Iyo ì si ta ki ba zizo hen;
uhre ù si ta ki ba zizo hen.
Azhi à si ta tu ba hen,
issu ì si ta tu ba hen.
17 Nu nggo Uvuvurr Inkru wa, nggo à si na atsutsu ka imburr ittu yi, a ta di ka ba ki aminta ama.
Na ta so ka ba kuma na ankla ka amasirr wa nggo a si di gbu hen, aba a ta so wa na so tsitsirr.
Abachi à ta hɨ àshishi pempe glo ba na ashishi.”