14
Miki Juan yej tabautiza̱rowa
1 Gobernador Herodes yej manda̱rowa̱ya Galilea, kikaguiꞌ yej kichijtinemi Jesús,
2 iwá̱n kijlij itekipanowa̱nimej:
—Ino̱nwaꞌ Juan yej tabautiza̱rowa̱ya, yéj nokta ojpa‑isaꞌ sej ka̱n miktoya. Inó̱n iga wel kichi̱wa milagro yej ayí̱ꞌ mo‑ita.
3-4 Íkyaya Juan kijlij Herodes:
—Aye̱kti iga tikuiꞌ iga mosiwa̱ꞌ Herodías, yej isiwa̱ꞌ katka mokni̱n Felipe.
Kua̱ꞌ inó̱n kikáꞌ, Herodes tatekimáꞌ iga makilpi̱ka̱n Juan iga makipre̱sojwi̱ka̱n.
5 Herodes kimikti̱jnekiá Juan, eꞌ kimajmawilia̱ya la gente, iga momatiá iga Juan katka profeta.
6 Eꞌ kua̱ꞌ iyilwi Herodes iga icu̱mpleaños, isiwa̱piltzi̱n Herodías mijto̱tij iyi̱xtaj yej ompa onoyaj, iwá̱n Herodes kipoxye̱ꞌitaꞌ,
7 kinojma‑ijlij nokta iga yawi kimakati te̱san kitajtanis inó̱n takotzi̱n.
8 Iwá̱n inó̱n takotzi̱n, kitajtan kensan iye̱ꞌ kijlij, ijkí̱n kijlij Herodes:
—Nikneki xine̱maka ipan se̱ plato itzontekon Juan yej tabautiza̱rowa.
9 Herodes mokno̱matiꞌ iga inó̱n kikáꞌ; eꞌ como kíjtoja iwá̱n kikakikej yej ompa takuajtoyaj iga yawi kimakati te̱san kitajtanis inó̱n takotzi̱n, inó̱n iga tatekimáꞌ iga makimakaka̱n yej kitajtan.
10 Iwá̱n Herodes tati̱tan iga makikechtekitij Juan ka̱n pre̱sojtitoꞌ.
11 Iwá̱n kiwajligakej itzontekon Juan ipan se̱ pla̱tojwé̱j, iwá̱n kimajkui̱ltíjkeja inó̱n takotzi̱n iwá̱n kimakato iye̱ꞌ.
12 Iwá̱n idisci̱polojmej Juan asikej ka̱n miktoꞌ Juan iwá̱n kito̱kátoja, iwá̱n yajkij kimati̱lti̱toj Jesús.
Jesús kitamaka este cinco mil tajta̱gaꞌ
13 Kua̱ꞌ Jesús kimatiꞌ iga kimiktíjkeja Juan, ki̱saꞌ ompa, tejkaj ipan se̱ á̱ka̱l iga yajki ka̱n ayagaj onoꞌ. Eꞌ momátiꞌsan, iwá̱n ki̱salo̱ꞌ ipan a̱ltepe̱mej, iwá̱n kitokatiajkij, ikxinejnentiájkijpa.
14 Kua̱ꞌ Jesús témoja ipan á̱ka̱l, kitaꞌ iga poxsan mialo̱ꞌ, iwá̱n kikne̱lij nochi ino̱mej iwá̱n kachitialtij nochi yej we̱titoyaj.
15 Iwá̱n kua̱ꞌ némiya tayowati, idisci̱polojmej kitechojkej Jesús, iwá̱n kijlijkej:
—Tió̱taꞌya, nigaj ayá̱ꞌ cha̱ntitolo̱ꞌ. Xikijli ini̱mej gente iga maya̱ka̱n ipan a̱ltepe̱tzitzi̱n, iwá̱n ompiga makikowaka̱n te̱ kikua̱skej.
16 Jesús kijtoj:
—Amo mayajya̱ka̱n; amejeme̱n xiktamakaka̱n.
17 Disci̱polojmej kijtojkej:
—Anikpiáj te̱ má̱j, petz se̱ ma̱noj pa̱n iwá̱n o̱me to̱poj.
18 Iwá̱n Jesús kijtoj:
—Nijpa xine̱wajliguili̱ka̱n.
19 Jesús tatekimáꞌ iga mamota̱lilo ipan sakatzitzi̱n. Kikuiꞌ inó̱n se̱ ma̱noj pa̱n iwá̱n inó̱n o̱me to̱poj, ajkotacháꞌ iga kimáꞌ gracias Dios iwá̱n kita̱tajkoloj pa̱n, iwá̱n kimajmáꞌ idisci̱polojmej iga makimajmakaka̱n la gente.
20 Takuajkej inochimej este ijixwikej, iwá̱n kua̱ꞌ disci̱polojmej kinechkojkej tákual yej ayꞌ kikuajkej, te̱miꞌ doce chikiwiꞌ.
21 Yej takuajkej ken cinco mil tajta̱gaꞌ iyókawaꞌ in siwa̱tkej iwá̱n ko̱kone̱ꞌ.
Jesús nejnemi iyi̱xko a̱ꞌti
22 Kua̱ꞌ támiꞌya takuajkej, Jesús kitekimáꞌ idisci̱polojmej iga matejkawíka̱nya ipan á̱ka̱l iga maa̱pano̱ka̱n achto yejeme̱n, mie̱j Jesús tanawatijtiká̱wigoꞌ.
23 Kua̱ꞌ yájkija, Jesús tejkaj ipan tepe̱ꞌ ise̱lti iga tajto̱to wa̱n Dios. Ompa onoya ise̱lti te kua̱ꞌ tayowatiꞌ,
24 iwá̱n á̱ka̱l ya̱yay tajko laguna. Iwá̱n maréja̱l paré̱j mowi̱tekiá ipan á̱ka̱l iga ki̱xna̱ntiá̱yapa ejekaꞌ.
25 Kua̱ꞌ tane̱stíwi̱ꞌya, Jesús yajki ka̱n nemi yawij idisci̱polojmej ipan á̱ka̱l, Jesús nejnentia̱ya iyi̱xko a̱ꞌti.
26 Iwá̱n kua̱ꞌ disci̱polojmej kitakej iga nejnentiwi̱ꞌ ipan a̱ꞌti, poxsan momajtijkej, iwá̱n mo̱ka̱tzajtzikej:
—¡Taꞌ xikitaka̱n, se̱ á̱nimaj!
27 Eꞌ Jesús nimaní̱n kijtoj:
—¡Tamelá̱ xonoka̱n! ¡Nej niJesús, amo ximajmawika̱n!
28 Iwá̱n Pedro kijtoj:
—NoTe̱ko siga melá̱ꞌ iga tej, xikijto iga maninejnentiapa iyi̱xko a̱ꞌti este ka̱n tej tonoꞌ.
29 Jesús kijtoj:
—Xinejnémiwaꞌ.
Iwá̱n Pedro temoj ipan á̱ka̱l, iwá̱n a̱nejnentia̱ya iyi̱xko a̱ꞌti iga ya̱ya ka̱n onoꞌ Jesús.
30 Eꞌ kua̱ꞌ kimachi̱lij ejekaꞌ yej pox tajpalej, momajtij iwá̱n pe̱waꞌ iga mi̱sawiá iwá̱n tzajtziꞌ:
—¡NoTe̱ko xine̱ma̱nawi!
31 Iwá̱n nimaní̱n Jesús kima̱tila̱n Pedro, iwá̱n kijlij:
—¡Mataj tej nema̱n timoconfia̱rowa nopan! ¿Te iga ayá̱ꞌ timomelaꞌconfia̱roj ipan nej?
32 Kua̱ꞌ iyo̱mextimej tejkájkeja ipan á̱ka̱l, pachiwiꞌ in ejekaꞌ.
33 Iwá̱n yej onoyaj ipan á̱ka̱l motankua̱ketzkej iyi̱xtaj Jesús iwá̱n kijtojkej:
—Mataj melá̱ꞌ, tej iPiltzi̱n Dios.
Jesús kachitialtiá yej kokolisyojkej yej icha̱mej Genesaret
34 A̱panojkej iwá̱n asikej ipan ta̱jli de Genesaret.
35 Kua̱ꞌ yej ompa cha̱ntitokej ki̱xmatikej iga Jesús, kipojkej no̱ya̱n ipan inó̱n ta̱jli, wa̱n kiwijwi̱gakej ite̱noj Jesús nochi yej we̱titokej.
36 Iwá̱n yej we̱titokej kitejtekiꞌijlikej Jesús iga mamote̱maka iga makichijchimili̱ka̱n malej ite̱mpan itzótzol, iwá̱n nochi yej kichijchimilijkej, achitiakej.