105
Nopa huejhueyi tlamantli tlen Toteco quinchihuili israelitame
1 Xijtlascamatica TOTECO ipampa nochi nopa huejhueyi tlamantli tlen yajaya quichihua.
Xitepohuilica ipan nochi tlaltepactli tlen yajaya quichijtoc.
2 ¡Xijhuicatica!
Quena, xijhuicatica tiohuicatl.
Xitecamahuica tlacame tlen nopa huejhueyi chicahualnescayotl tlen yajaya quichijtoc.
3 ¡Ximopaquilismacaca ipan Toteco!
¡Quena, xipaquica nochi imojuanti tlen inquihueyichihuaj TOTECO!
4 Xijtemoca TOTECO huan ichicahualis.
Quena, nochipa xijtemoca para inquiixmatise más.
5 Xiquilnamiquica nopa chicahualnescayotl tlen yajaya quichijqui imopampa imojuanti.
Xiquilnamiquica itlamachtil huan tlen yajaya quiijtojtoc.
6 Iniixhuihua Abraham tlen itlatequipanojca Toteco,
huan imojuanti iniconehua Jacob tlen Toteco quitlapejpeni,
xiquilnamiquica.
7 Yajaya TOTECO huan yajaya toDios.
Tlen yajaya tlanahuatijtoc para mochihuas, ya nopa monextía ipan nochi tlaltepactli.
8 Yajaya ax quema quiilcahuas nopa tlajtolsencahuali tlen quichijqui,
yonque tlacajtiyase tlacame huan ininconehua huan mil hueltas tlacatise ininteipa ixhuihua,
yajaya ax quiilcahuas.
9 Noja eltoc nopa tlajtolsencahuali tlen quichijqui ica Abraham huan Isaac.
10 Teipa quiompahuij nopa tlajtolsencahuali ica Jacob para ma pano ica nochi israelitame,
huan elis para inijuanti para nochipa.
11 Huan Toteco quiijto:
“Na nimechmacas nopa tlali Canaán para elis imoaxca para nochipa.”
12 Quinilhui ya ni quema inijuanti noja aya eliyayaj miyac,
huan san itztoyaj queja paxalohuani ipan tlali Canaán.
13 Teipa san panotinenque tlen se tlali hasta sejcoyoc,
huan tlen se tlanahuatilistli hasta seyoc tlanahuatilistli.
14 Pero ipan nochi nopa tlamantli Toteco ax quincahuili ma quinajsi se tlamantli tlen ax cuali.
Huan tlanahuatiani tlen quichijque campeca para quinchihuilise tlen fiero,
Toteco quintlatzacuilti.
15 Toteco Dios quinilhui:
“Amo xiquincuatotonica notlacajhua tlen niquintlapejpenijtoc,
niyon ax tleno xiquinchihuilica notiocamanalojcahua.”
16 Toteco quititlanqui se hueyi mayantli ipan tlali Canaán,
huan quinquixtili nochi tlamantli tlacualistli tlen ica mopanoltiyayaj.
17 Pero teipa Toteco quititlanqui se tlacatl ma quintlayacancuiliti para ma quinmanahuiti itlacajhua tlen nopa mayantli.
Quena, elqui José tlen quinamacatoyaj para ma tlatequipanoti san tlapic ipan tlali Egipto.
18 Huan nepa ipan tlatzactli quimetzcocojque quema quimetzilpijque ica tepos mecatl,
huan quiilpilijque se tepostli ipan iquechtla.
19 Nopano itztoya José hasta ajsic nopa tonali tlen TOTECO quiixtlalijtoya.
Quena, Toteco quiyejyeco José para quiitas intla cuali elqui ipan iyolo.
20 Huajca Faraón tlen eliyaya hueyi tlanahuatijquetl, tlanahuati ma quiquixtica.
Huan quicajqui ma yahui malacantoc.
21 Teipa nopa tlanahuatijquetl quitlali ma quinyacana nochi itlatequipanojcahua,
huan ma quimocuitlahui nochi tlen quipixtoya.
22 Mocajqui ipan ya ima para quintlatzacuiltis itlatequipanojcahua tlen más hueyi,
huan para ma quintlalnamicti tlen huehuentzitzi.
23 Teipa Israel ajsico ipan tlali Egipto,
huan itztoya nopano ihuaya iconehua ipan tlali Cam.
24 Huan Toteco tlahuel quinmiyaquili iixhuihua Jacob,
huan quipixque más chicahualistli,
huan ax queja inincualancaitacahua tlen quinnahuatiyayaj.
25 Teipa Toteco quinyolpatlac nopa egiptome,
huan quinchijqui ma quincocolica nopa israelitame.
Quena, quincocolijque huan quinchijque ma tlatequipanoca san tlapic.
26 Pero teipa Toteco quititlanqui itlatequipanojca, Moisés,
huan Aarón tlen yajaya quintlapejpenijtoya.
27 Huan inijuanti quichijque huejhueyi tlanescayotl huan chicahualnescayotl ipan tlali Egipto.
28 Quena, Toteco quititlanqui tzintlayohuilotl ipan nochi nopa tlali,
pampa ax quichihuilijque cuenta itlanahuatil para ma quincahuaca itlacajhua ma yaca majcajtoque.
29 Teipa quicuepqui estli nochi atl tlen oncayaya ipan nopa tlali.
Huan nopa michime mijque.
30 Teipa quintitlanqui tlahuel miyac tamasolime ipan nochi nopa tlali,
huan calajque hasta ipan nopa cuarto campa cochqui nopa tlanahuatijquetl.
31 Teipa quema Moisés camatqui,
hualajque miyac sayolime.
Huan atime quitlapachocoj nopa tlali.
32 Nojquiya ax quintitlanili atl pero quintitlanili huejhueyi tesihuitl.
Huan tlapetlaniyaya campa hueli ipan nochi nopa tlali.
33 Huan nopa tesihuitl quinenpolo nochi xocomeca mili, huan higuera cuatini,
huan quitlami pojpostejqui nopa huejhueyi cuatini.
34 Teipa Toteco camatqui huan ajsicoj tlahuel miyac chapolime,
hasta axaca hueliyaya quinpohua.
35 Huan quicuajque nochi tlamantli xihuitl tlen oncayaya ipan nopa tlali,
huan nojquiya quitlamicuajque nochi tlamantli pixquistli.
36 Teipa quinmicti nopa coneme tlen achtohui tlacatque ipan sesen familia tlen tlali Egipto.
Quinmicti yonque nopa tetatme tlahuel paquiyayaj huan motlepanitayayaj ipampa nopa iniachtohui ejca cone.
37 Huan Toteco quinquixti itlacajhua ica temachili,
huan quihuicaque miyac oro huan plata.
Huan ipan nopa tonali ax mococo niyon se itlaca Toteco.
38 Huajca nopa egiptome nelía pajque quema quisque nopa israelitame,
pampa nochi inijuanti tlahuel quinimacasiyayaj.
39 Toteco quipatlajqui inintzontipa se mixtli para quinecahuilis huan ax quintlatis tonati.
Huan ica tlayohua quitlaliyaya se tlilelemectli inintzontipa para ma quintlahuili.
40 Quitlajtlanijque ma quinmaca nacatl para quicuase,
huan quintitlanili solime.
Nojquiya quinmacac nopa tlacualistli tlen itoca “maná” tlen huetzqui tlen elhuicac para ica ma ixhuica.
41 Toteco quitlapo se tetl huan quisqui atl hasta mochijqui queja se atemitl,
tlen motlalo ipan nopa huactoc tlali campa ax tleno eliyaya.
42 Pampa yajaya quiilnamijqui tlen ica mocajtoya itlatequipanojca Abraham.
43 Huajca ica miyac paquilistli Toteco Dios quinquixti itlacajhua tlen quintlapejpenijtoc ipan tlali Egipto.
44 Huan quinmacac itlacajhua nopa tlaltini tlen elque iniaxca tlacame tlen ax israelitame.
Huan moaxcatijque ica nochi nopa pixquistli tlen nopano oncayaya.
Quicuajque cuatlactli tlen sequinoc quitoctoyaj.
45 Nochi ya ni quichijqui para ma quichijtinemica tlen quinilhuijtoya huan ma quintoquilijtinemica itlanahuatilhua.
¡Paquilistli!