4
मखुगु खँ कनिपिं खनाः होश या
1 लिपा लिपा मनूतय्सं विश्वास यायेगु त्वःताः मखुगु खँ न्यनाः शैतानं धाःथें याना जुइ धकाः पवित्र आत्मां बांलाक थुइका ब्यूगु दु।
2 धर्मयागु ख्वाःपालं पुयाः मखुगु खँ ल्हाना जुइपिन्सं थथे याना जुइ। थुमिगु मतिइ मिइ छुयातःगु नालुं पुकातये धुंकल।
3 थुमिसं ब्याहा याये मज्यू, गुलिं गुलिं नसा नये मज्यू धकाः मनूतय्त स्यना जुइ। विश्वास याइपिं व सत्ययात थूपिन्सं सुभाय् बियाः न्ह्यागुं नये ज्यू, छाय्धाःसा थ्व फुक्कं परमेश्वरं हे दय्कादीगु खः।
4 वय्कलं दय्कादीगु मभिंगु छुं नं मदु। उकिं वय्कःयात सुभाय् बियाः न्ह्यागुं नये ज्यू।
5 छाय्धाःसा वय्कःयागु वचन व प्रार्थनां फुक्कं शुद्ध जुइ।
येशू ख्रीष्टया भिंम्ह च्यः
6 फुक्क दाजुकिजापिन्त थ्व खँ थुइका बिल धाःसा छ येशू ख्रीष्टया भिंम्ह च्यः जुइ। अले थुकिं हे विश्वासयागु वचन व छं मानय् यानाच्वंगु खँय् छ गुलि तक बल्लाना च्वंगु दु धकाः सी दइ।
7 म्वाः मदुगु मनय् वःथें बाखं कना जुइपिं पाखें तापाक हे च्वँ। बरु परमेश्वरयात यय्क जक जुया च्वँ।
8 म्हयागु ज्याखँ यानाः म्हो हे जक ज्यालगय् जुइ। आत्मायागु ज्याखँ धाःसा आः व लिपा तकं ज्यालगय् जुयाच्वनी।
9 थ्व खँ धात्थेंगु व विश्वास याये बहःगु खः।
10 अय्जूगुलिं हे झीसं म्वाःम्ह परमेश्वरयाके आशा यानाः थथे दुःखकष्ट सियाः ज्या यानाच्वनागु खः। फुक्क मनूतय्त मुक्ति बीम्ह, अप्वः यानाः वय्कःयात विश्वास याःपिन्त मुक्ति बीम्ह थ्व हे परमेश्वर खः।
11 थ्व हे खँ छं स्यनेकने या।
12 सुनानं छंगु ल्याय्म्हसूयात हेबाय्चबाय् याये मफयेमा, बरु छं खं, चालचलनं, मायां, विश्वासं व शुद्ध जुयाः इमि न्ह्यःने नमुना जुयाः क्यँ।
13 जि मवतले मनूतय्त धर्मशास्त्रं ब्वनेगु, स्यनेगु व न्वायेगु याना च्वँ।
14 थकालिपिन्सं छन्त छेनय् ल्हाः तयाः न्हापां हे क्वःछिनातःगु वरदानयात सितिं छ्वये मते।
15 दुनुगलंनिसें छं थ्व ज्या बांलाक याना च्वँ। अले छंगु ज्या मेपिन्सं नं खनि।
16 थःगु खँय् व थःम्हं स्यनागु खँय् बांलाक बिचाः या। थथे याःसा छन्त नं छंगु खँ न्यंपिन्त नं मुक्ति दइ।