61
सुरक्षाया निंतिं प्रार्थना
दाऊदया भजन, लय् तइम्हय्सिगु निंतिं – तार बाजं थानाः हालेगु
1 हे परमेश्वर!
जिगु ख्वःसः न्यनादिसँ।
जिगु प्रार्थना न्यनादिसँ।
2 जि नुगः मछिन कि
पृथ्वीया ताताःपाःगु थासं
जिं छितः ग्वाहालिया निंतिं
बिन्ति याये।
जितः सदां सुरक्षित जुइगु
ल्वहंधिकय् यंकादिसँ।
3 छाय्धाःसा छि
जिगु शरण कायेगु थाय् खः।
अले बल्लाःगु किल्ला नं खः।
जिमि शत्रुत अन थ्यंके
फइ मखु।
4 छिगु थासय् जितः सदांया निंतिं
च्वने बियादिसँ।
छिगु पपूया किचलय् जितः
सुरक्षित यानाः तयादिसँ।
सेला
5 हे परमेश्वर,
छिं जिगु भाकल न्यनादीगु दु।
छिं जितः छिगु भय काइपिन्त दइगु
भिंगु खँ बियादीगु दु।
6 जुजुयागु आयु ताहाकः
यानादिसँ,
व पुस्तां पुस्ता तक
म्वानाच्वनेमा।
7 हे परमेश्वर,
छिगु न्ह्यःने वं न्ह्याबलें
राज्य यानाच्वनेमा।
छिगु सदां दयाच्वनीगु माया
व विश्वासं
वयात सुरक्षा बियादिसँ।
8 थुकथं जिं न्ह्याबलें
थःगु भाकल पूवंकाः
छिगु नांयात तःधंकाच्वने।