2
क्वत्यलीपिं नायःतय्त धिक्कार
1 लासाय् ग्वारतुलाः मेपिन्त स्यंकेगु
व मभिंगु ज्या यायेगु ग्वसाः ग्वइपिं मनूतय्त धिक्कार दु।
सुथ जुइवं इमिसं व ज्या याइ,
छाय्धाःसा इमिके अथे यायेगु शक्ति दु।
2 इमिसं मनूतय्गु
छेँबुँ लोभ यानाः लाका काइ।
इमिसं मनूतय्गु
छेँ व सर्बय ठगय् यानाः काइ।
3 अथे जुयाः परमप्रभुं थथे धयादी,
“स्व, थ्व प्रजाया निंतिं जिं तच्वःगु विपत्ति छ्वया हयेत्यनागु दु,
छिपिं उकिं म्वाये फइ मखु।
छिपि फुँइ क्यनाः छ्यं धस्वाकाः थुखे उखे जुइ नं फइ मखु।
छाय्धाःसा व छगू विपत्तियागु ई जुइ।
4 उगु दिनय् मनूतय्सं छिमित हेस्याइ
अले छिमित लाय्बुयाः थ्व बिलापया म्ये हाली,
‘जिपिं भज्यंक नाश जुल,
जिमि मनूतय्गु सम्पत्ति इनाब्यूगु दु,
वय्कलं थ्व जिपाखें लाकाकयादी।
वय्कलं जिमिगु बुँ जिमित ध्वं लाइपिन्त इनाबियादी।’ ”
5 अथे जुयाः परमप्रभुया सभाय् चिट्ठा तयाः
जमिन इनाबीम्ह छिमि सुं दइ मखु।
फताहा अगमवक्तात
6 इमि अगमवक्तातय्सं धाइ, “अगमवाणी याये मते,
थ्व खँयात कयाः अगमवाणी याये मते।
जिमिगु बेइज्जत जुइ मखु।”
7 हे याकूबया घराना,
थथे धायेमाःगु खः ला?
“परमप्रभुया आत्मा तंचायादीगु दु ला?
वय्कलं थज्याःगु ज्या यानादी ला?”
“तप्यंगु लँपुइ जुइपिन्त छु जिगु वचनं भिं मयाइ ला?
8 नकतिनि जक जि मनूत
शत्रुत थें दंगु दु।
छुं वास्ता मयासें न्ह्यःनं वनीपिंपाखें
छिमिसं लडाइँनं लिहांवःपिं मनूतय्सं थें
मू वंगु वसः लाका यंकीगु।
9 छिमिसं जि प्रजाया कलाःपिन्त
इमिगु सुखया छेँनं पित छ्वइगु।
इमि मस्तय्गु लागि जिं बियातयागु
आशिष नं छिमिसं लाकाकाइगु।
10 दँ, वना हे छ्व,
थ्व थाय् छिमिगु आराम कायेगु थाय् मखु,
छाय्धाःसा थ्व देश अशुद्ध जूगु दु,
छुं उपाय मदय्क थ्व नाश जूगु दु।
11 सुं मखुगु खँ ल्हाइम्ह व ध्वंलाइम्ह मनुखं
‘जिं छंगु लागि यक्व दाखमद्य व अय्लाःया लागि अगमवाणी याये’
धकाः धाल धाःसा अज्याःम्ह अगमवक्तायात हे थुपिं मनूतय्सं यय्की।
उद्धारया बचं
12 “हे याकूब, धात्थें हे
जिं छिपिं फुक्कसित मुंके।
इस्राएलयापिं ल्यंदुपिन्त जिं धात्थें हे मुंके।
जिं इमित फैगालय् फैतय्त थें छथाय् हे मुंके।
व थासय् ग्वाः ग्वाः मनूत दइ।
13 लँ दय्कादीम्ह इमिगु न्ह्यःने झाइ।
इपिं ध्वाखा स्यंकाः पिने पिहांवनी।
इमि जुजु इमिगु न्ह्यः न्ह्यः वनी।
परमप्रभु इमिगु न्ह्यःने न्ह्यःने दइ।”