12
परमप्रभुं अब्रामयात ल्ययादीगु
(१२:१-२०)
1 परमप्रभुं अब्रामयात धयादिल-- “छ थः बूगु दे, थःथिति व थः बौया छेँ त्वःताः जिं क्यनेत्यनागु देशय् हुँ।
2 जिं छंगु पाखें
तःधंगु जाति दय्के बी।
जिं छन्त आशिष बी।
जिं छन्त नांजाःम्ह मनू दय्के।
अले छंगु पाखें मेपिन्त आशिष बीके।
3 छन्त आशिष ब्यूपिन्त जिं नं आशिष बी।
छन्त सराः ब्यूपिन्त जिं नं सराः बी।
छ पाखें हे संसारय् च्वंपिं दक्व जातितय्सं आशिष काइ।”
4 परमप्रभुं हुँ धकाः धयादीगु थासय् अब्राम वन। लोत नं व नाप वन। अब्रामं हारान त्वःतूबलय् व न्हयेन्यादँय् (७५) क्यनाच्वंम्ह खः।
5 अब्राम थः कलाः साराई, थः किजाया काय् लोत व हारानय् थःयाके दुगु दक्व सम्पत्ति, दासदासीत ज्वनाः कनान पाखे वन।
6 अब्राम कनान जुयाः शकेमय् थ्यंकः वल। अन इपिं मोरे धाःगु थासय् सिमा क्वय् बाय् च्वन। अबलय् थ्व थाय् कनानीतय्गु खः।
7 अले परमप्रभुं अब्रामयाथाय् झायाः धयादिल-- “जिं थ्व देश छिमि सन्तानयात बी।” अले अब्रामं वयाथाय् झाःम्ह परमप्रभुया लागि अन छगू वेदी दय्कल।
8 अनंलि व छगू पहाड पाखे वनाः अन बाय् च्वन। थ्व पहाडया पच्छिम पाखे बेथेल व पुर्ब पाखे ऐ धयागु थाय् लाः। अन वं छगू वेदी दय्काः परमप्रभुयात प्रार्थना यात।
9 थुकथं व थाय् थासय् जुयाः नेगेव पाखे स्वयाः वनाच्वन।
अब्राम व साराई मिश्र देशय्
10 अबलय् अन तसकं अनिकाल जूगुलिं अब्राम छुं ईया लागि मिश्र देशय् च्वंवन।
11 मिश्र देशय् थ्यनिथे च्वंकाः वं थः कलाः साराईयात धाल-- “छ तसकं बांलाः।
12 मिश्र देशय् च्वंपिन्सं छन्त खन कि-- ‘थ्व ला वया कलाः खनि’ धकाः धाइ। अले इमिसं जितः स्याइ, छन्त धाःसा स्याइ मखु।
13 उकिं छं छ जिमि केहेँ खः धकाः धा। अले इमिसं छंगु लागि जितः बांलाक व्यवहार याइ, जितः नं स्याइ मखु।”
14 इपिं मिश्र देशय् थ्यंबलय् अन च्वंपिन्सं वयात तसकं बांलाःम्ह खन।
15 दरबारया मनूतय्सं वयात खनाः इमिसं फारोयाथाय् वनाः वयागु तारीफ यात। अले वयात दरबारय् यंकल।
16 फारों वयागु लागि अब्रामयात बांलाक व्यवहार यात। अब्रामयात सा, फै, गधा, उँट् व दासदासीत बिल।
17 परमप्रभुं अब्रामया कलाः साराईया कारणं फारो व वया परिवारयात ततःधंगु ल्वय् छ्वयाहल।
18 अले फारों अब्रामयात सःताः ब्वःबिल – “छं जितः छु यानागु? छं व थः कलाः खः धकाः छाय् मधयागु?
19 छं छाय् वयात छिमि केहेँ धकाः धयागु? उकिं जिं वयात थः कलाः यायेत थन हयागु खः। थ्व छिमि कलाः खः, थ्वयात ज्वनाः हुँ।”
20 फारों थः मनूतय्त उजं बिल। अले इमिसं अब्राम व वया कलाःयात इमिके दुगु फुक्कं बियाः अनं छ्वत।