25
पवित्र पाल दय्केत बीहःगु देछा
1 परमप्रभुं मोशायात धयादिल,
2 “जिगु निंतिं देछा हयेमाः धकाः इस्राएलीतय्त धा, जिगु निंतिं दुनुगलं निसें बीगु मनदुपिं मनूतय्सं बीहःगु देछा छं का।
3 इमिगु पाखें कायेगु देछा थथे दु -
लुँ, वहः, कँय्,
4 वँचुगु, प्याजीगु, ह्याउँगु का व सुति कापः, च्वलेचिया सँ,
5 ह्याउँगु रंग छिनातःगु फैचायागु छेंगू, डल्फिनया छेंगू, खयःसिँ,
6 पाल्चाया निंतिं जैतूनया चिकं, अभिषेक याइगु चिकं व नस्वाःगु गुंगू दय्केत मसला।
7 अले एपोद व छाती-पाताय् घाकेत थीथी मूवंगु थी।
8 “जि इमिगु दथुइ च्वनेत इमिसं जिगु निंतिं छगू पवित्र पाल दय्केमाः।
9 जिं छन्त क्यनेत्यनागु नमूनाकथं छं नापलायेगु पाल व उकियागु फुक्कं ज्वलं दय्कि।
बाचा चिनादीगु सनू
३७:१-९
10 “छं खयःसिँयागु १.१ मि. हाकः, ६६ से.मि. ब्या व ६६ से.मि. तःजाःगु छगः सनू दय्केमाः।
11 उकियागु दुने व पिने भिंगु लुं भुनाब्यु। अले उकिया प्यखेरं लुँया बाला दय्कि।
12 उकिया निंतिं लुँयागु प्यचाः चाः दय्काः उकियात सनूया प्यंगू ख्वःलय् तया ब्यु। थ्व छखे निचाः व मेखे निचाः तया ब्यु।
13 अले खयःसिँयागु निपु न्वः दय्कि अले उकियात लुं हिना ब्यु।
14 सनू कुबित न्वःत निखें दुगु चालय् ति।
15 न्वःत अनं लिकाये मते।
16 अले जिं छन्त बीत्यनागु बाचाया पौतय्त सनूइ तयाब्यु।
17 “अले भिंगु लुँयागु १.१ मि. हाकः, ६६ से.मि. ब्या दुगु छगू कृपा-आसन दय्कि।
18 मुगलं दायाः लुँया निम्ह करूब दय्कि।
19 करूबतय्त कृपा-आसनया निखें सिथय् तयाब्यु। करूबतय्त व कृपा-आसनयात छधी हे लुं दय्कि।
20 उपिं करूबतय्सं थःथःगु पपु च्वय्पाखे चकंका च्वंगु व कृपा-आसनयात थःगु पपूं त्वपुया तःगु जुइमाः। इमिगु ख्वाः चुलिंचू कृपा-आसनपाखे स्वय्कातःगु जुइमाः।
21 जिं छन्त बीत्यनागु बाचाया पौ सनूया दुने ति। अले कृपा-आसनयात सनूया द्यःने तयाब्यु।
22 अन जिं छनापं नापलाये। कृपा-आसन च्वय् निम्ह करूबतय्गु दथुं इस्राएलीतय्गु निंतिं फुक्कं उजं जिं छन्त बी।
छायेहःगु मरि तयातःगु तेबिल
23 “छं खयःसिँयागु ८८ से.मि. हाकः, ४४ से.मि. ब्या व ६६ से.मि. तःजाःगु छगू तेबिल दय्कि।
24 उकियात भिंगु लुं भुनाब्यु, अले उकिया प्यखेरं लुँया बाला दय्कि।
25 उकिया प्यखेरं ८ से.मि. ब्याः दुगु बाला नं दय्कि। अले प्यखेरं सिधालय् लुँयागु मेगु बाला दय्कि।
26 तेबिलया निंतिं लुँयागु प्यचाः चाः दय्काः चाःतय्त प्यंगू तुति च्वय् प्यखें कुन्चाय् तया ब्यु।
27 तेबिल ल्ह्वनिगु न्वःत कताकेत चाः बाला लिक्कसं दयेमाः।
28 थ्व न्वःत खयःसिँयागु दय्कि, अले लुं भुनाब्यु। व हे न्वलं जक तेबिल क्वबुइगु यायेमाः।
29 उकियागु पाःचागु थल, आम्खुरा व त्वँसा बलि प्वंकेगु करुवा व ख्वल्चा भिंगु लुँयागु जुइमाः।
30 तेबिलय् जिगु न्ह्यःने न्ह्याबलें देछाःगु मरि तयेगु या।
लुँयागु त्वाःदेवा
३७:१७-२४
31 “छं भिंगु लुँयागु छगू त्वाःदेवा मुगलं दायाः दय्कि। उकियागु लिधंसा, चु, स्वांथें च्वंगु ख्वल्चा, चुलि व स्वांफ्वः फुक्कं भिंगु लुँयागु छगू हे कुचां दय्कि।
32 उकियागु खुपु कचा पिने पाखे पिहां वःगु जुइमाः। स्वपु कचा त्वाःदेवाया छखे पाखे अले स्वपु कचा मेखे पाखे।
33 छगू कचाय् मर्स्या बरांयागु स्वांफ्वः थें च्वंगु स्वंगः ख्वल्चा व नापं मुखू वया च्वंगु स्वां व स्वांफ्वः दयेमाः। अले मेगु पाखे नं व थें हे स्वपु कचात पिहां वया च्वनेमाः। थुकथं अन खुपु कचा दयेमाः।
34 त्वाःदेवाया चुइ मर्स्या बरांया स्वांफ्वः थें च्वंगु प्यंगः ख्वल्चा, मुखू वया च्वंगु स्वां व स्वांफ्वः नापं दयेमाः।
35 चूं पिहां वःगु स्वज्व कचात मध्य न्हापांगु ज्वः काचाया दथुइ छगूगु ग्वः, निगूगु ज्वःया दथुइ निगूगु ग्वः, स्वंगूगु ज्वःया दथुइ स्वंगूगु ग्वः दय्कि।
36 त्वाःदेवा, उकियागु मुखू व कचात मुगलं दाया तःगु भिंगु लुँयागु छगू हे कुचायागु जुइमाः।
37 “उकि न्हय्पा पाल्चा दय्कि। उपिं पाल्चाय् त्वाःदेवाया न्ह्यःनेपाखे जः बीत मत च्याका ब्यु।
38 त्वाःदेवायात माःगु चिम्ता व किस्ति नं भिंगु लुँयागु जुइमाः।
39 स्विन्यागू किलोग्राम भिंगु लुं त्वाःदेवा व उकियात माःमाःगु ज्वलं दय्कि।
40 जिं छन्त गुँच्वकाय् क्यनागु नमूनाकथं थ्व फुक्कं बांलाक दय्कि।”