21
हिब्रू दासत
व्यवस्था १५:१२-१८
1 अले परमप्रभुं मोशायात धयादिल, “छं इस्राएलीतय्त स्यने माःगु नियम थ्व हे खः।
2 “छिमिसं हिब्रू दास न्यात धाःसा वं खुदँ तक जक छिमिगु सेवा याइ। न्हय्गूगु दँय् वयात छुं मकासे त्वःता ब्यु।
3 व ब्याहा मजुवं याकःचा वःगु खःसा व याकःचा हे वनी। व वःबलय् हे वया कलाः दुगु खःसा वया कलाः नं वनापं वनी।
4 “वया मालिकं वयात ब्याहा यानाब्यूगु जुसा, अले वया पाखें मचा नं दत धाःसा वया कलाः व वया मस्त मालिकं हे तयेदइ। दास थः याकःचा जक वने खनी।
5 दासं, ‘जितः जिमि मालिक, जिमि कलाः व मस्तया माया वं, जि इमित त्वःता वनेमास्तिमवः’ धकाः धाल धाःसा,
6 मालिकं वयात न्यायकर्तायाथाय् हयेमाः। अले वयात लुखाय् हयाः वयागु न्हाय्पं नतूचां प्वाः खनाबीमाः। अले व मसितले वया दास जुइ।
7 “सुनानं थः म्ह्याय्यात दासी जुइत म्यूगु दुसा व मिसामचा दास थें मुक्त जुयाः वनेदइमखु।
8 सुनानं वयात थः कलाः यायेत न्यानाकयाः लिपा न्याम्हय्सिनं वयात मयय्कल धाःसा वं व मिसायात दां कयाः वया बौम्हय्सित हे लित बीमा। अय्नं मालिकं वलिसे बिश्वास घातयागुलिं वं वयात मेपिं विदेशी मनूतय्गु ल्हातिइ मियाछ्वयेगु अधिकार दइमखु।
9 मालिकं वयात थः काय्यागु निंतिं ल्यःगु खःसा वयात म्ह्याय् थें याना तये माः।
10 “मालिकं थःम्हं हे ब्याहा यानाः लिथु हल धाःसा वं वयात नयेगु, पुनेगु व न्हापा थें तुं अधिकार बियातये माः।
11 छुं जुयाः वं थ्व स्वतां पूमवंकल धाःसा व दासी थः मालिकयात छुं हे मपुसे मुक्त जुइ।
घाःपाः याइपिन्त सजाँय बीगु
12 “सुनानं सुयातं दायाः स्यात धाःसा वयात नं स्याना छ्वये माः।
13 छुं जुयाः सुनां नं स्याये धकाः स्याःगु मखुसे आकाझाकां जक जूगु खःसा वयात बिस्युं वनेत जिं थाय् क्यनाबी।
14 सुनानं स्याये धकाः हे स्याःगु खःसा व शरण कायेत जिगु वेदीं वःगु जूसां वयात अनं सालाः स्याना छ्वये माः।
15 “सुनानं थः मांबौयात दाल धाःसा वयात स्याना छ्वये माः।
16 “सुनानं सुयातं जबर्जस्ती यंकाः मिल धाःसा वा थःनापं तयातल धाःसा वयात स्याना छ्वये माः।
17 “सुनानं थः मांबौयात सराः बिल धाःसा वयात स्याना छ्वये माः।
18 “सुनानं सुयातं थवंथवय् ल्वानाः मसीसां लासाय् ग्वारातुलेमायेक ल्वहँतं कय्काः वा ल्हातं दाल धाःसा
19 अले व मनू दनाः कथिं चुयाः न्यासि जुइफत धाःसा दाःम्ह मनूयात सजाँय जुइमखु। अय्नं घाःपाः जूम्ह मनूयात वं ज्या याये मफुतले वयात ज्याला पुले माः, अले मलंतले वयात वासः याये माः।
20 “सुनानं थः दास व दासीयात कथिं दाःबलय् व सित धाःसा वयात सजाँय बीमाः।
21 अय्नं छन्हुनिन्हुं हे दास वा दासी दनाजुल धाःसा वयात सजाँय लाइमखु। छाय्धाःसा व वयागु सम्पत्ति खः।
22 “सुनानं ल्वापु जुयाः प्वाथय् दुम्ह मिसायात दायाः वया मचा क्वहांवल अय्नं वयात छुं मजू धाःसा, दाःम्ह मनूयात व मिसाया भाःतं धाःकथं अदालतं क्वःछ्यूगु ध्यबा पुइके माः।
23 छुं जुयाः व मिसायात घाःपाः जुल धाःसा ज्यानया पलेसा ज्यान,
24 मिखाया पलेसा मिखा, वाया पलेसा वा, ल्हाःया पलेसा ल्हाः, तुतिया पलेसा तुति,
25 मिं पुइकूगुया पलेसा मिं पुकेगु, घाःया पलेसा घाः, दुघाःया पलेसा दुघाः।
26 “सुनानं थः दास वा दासीयात मिखाय् दायाः मिखां मखन धाःसा वं वयागु मिखाया पलेसा वयात त्वःताछ्वये माः।
27 सुनानं थः दास वा दासीयात दायाः वा त्वःथुलाबिल धाःसा वयागु वाया पलेसा वयात त्वःताछ्वये माः।
पशुया थुवालं याये माःगु ज्या
28 “द्वहंनं मिसा मिजं सुयातं न्यकुलिं च्वयाः स्यात धाःसा द्वहंयात ल्वहँतं कय्काः स्यायेमाः। अले वयागु ला नयेमज्यू। द्वहंया थुवाःयात धाःसा द्वपं लाइमखु।
29 अय्नं द्वहं न्हापांनिसें च्वयेयःम्ह, वया थुवाःयात थुकियागु सुचं बियाः नं वं द्वहंयात चिनामतः, अले व द्वहंनं मिसा वा मिजं सुयातं नं स्यात धाःसा द्वहंयात ल्वहँतं कय्काः स्यायेमाः, अले द्वहं थुवाःयात नं स्यायेमाः।
30 अय्नं व मनूयात बं पुलाः थःगु ज्यान बचय् यायेत धाल धाःसा वं धाक्व बं पुलाः थःगु ज्यान बचय् याये फु।
31 “द्वहंनं सुं मिसामचा वा मिजंमचायात च्वयाः स्यात धाःसां अथे हे यायेमाः।
32 द्वहंनं सुयां दास वा दासीयात च्वयाः स्यात धाःसा द्वहं थुवालं दास वा दासीया थुवाःयात वहःया स्विगु शेकेल बं पुलेमाः। द्वहंयात धाःसा ल्वहँतं कय्काः स्यायेमाः।
33 “सुनानं गाः म्हुयाः मल्हाःकूसे तयातल, अले व गालय् सुयां द्वहं वा गधा कुतुंवन धाःसा
34 गाःम्हुइकूम्हंय्सिनं सीम्ह पशुया पलेसा पुलेमाः। वं द्वहं वा गधाया थुवाःयात बं पुलेमाः। सीम्ह पशु जक वयागु हे जुइ।
35 “सुयां द्वहंनं मेम्हय्सिया द्वहंयात च्वयाः स्यात धाःसा स्याःम्ह द्वहंयात मियाः इमिसं ध्यबा बच्छि बच्छि यानाः इनाः कायेमाः। अले सीम्ह द्वहंया ला नं इनाः कायेमाः।
36 अय्नं द्वहं थुवालं द्वहंयात च्वयेयःम्ह धकाः सीकसीकं चिनामतसे तयातल धाःसा वं द्वहंया पलेसा द्वहं हे पुलेमाः। सीम्ह द्वहं वयागु हे जुइ।”