5
परमेश्वर थें जु
1 छिपिं परमेश्वरया यःपिं मस्त जूगुलिं वय्कः थें जुइत स्व।
2 ख्रीष्ट येशूं झीत माया यानादी थें छिमिसं नं थःथवय् माया यानाः च्वनेगु यायेमाः। ख्रीष्टं झीत माया यानाः नस्वाःगु देछा व बलिकथं थःत परमेश्वरयाथाय् छायादिल।
3 व्यभिचार यायेगु, मभिंगु मतिइ तया जुइगु व कर्पिनिगुली मिखा वंकाः जुइगु यानाः जुइ मज्यू।
4 बांमलाःगु खँ, म्वाःमदुगु खँ व घच्चाइपुगु खँ ल्हाना जुइ मते। बरु परमेश्वरयात सुभाय् बीगु याना च्वँ।
5 छिमिसं सि हे स्यू, व्यभिचार यानाजुइपिं, मभिंपिं व कर्पिनिगुली मिखा वंकाः जुइपिं मनूत परमेश्वर व ख्रीष्टयागु राज्यय् च्वने खनी मखु। कर्पिनिगुली मिखा वंकाः जुइगु ला मूर्ति पुजा यायेगु ति हे ग्यं।
6 छिमिसं सुयागुं बकंफुस्लु खँ न्यने मते। थुकिं छिमित स्यंकी। परमेश्वरयात विश्वास मयाइपिन्सं वय्कःयागु तं फयेमाली।
7 उकिं थज्याःपिं मनूत नाप बुला जुयाः जुइ मते।
8 न्हापा ला छिपिं नं खिउँथाय् जुयाच्वंपिं खः। आः छिपिं प्रभुया जलय् वये धुंकल। उकिं छिमिगु ज्याखँ नं थुकथं हे जुइमाः।
9 थथे प्रभुया जलय् च्वंपिन्सं भिंगु, परमेश्वरयात यःगु व खः खःगु जक याना जुइ।
10 छिमिसं प्रभुयात यःथें जक यानाजुइगु कुतः या।
11 खिउँथाय् जुयाच्वंपिनिगु ज्याखं तापाक हे च्वँ, बरु इमिसं यानाच्वंगु ज्या मभिं धकाः क्यनाब्यु।
12 थुमिसं दुनें दुनें याना जूगु ज्याखँ ला धायेत तकं मछा।
13 छुं नं खँयात जलय् हइबलय् वयागु धात्थेंगु ख्वाःपाः बांलाक खने दइ।
14 छाय्धाःसा जलय् वल कि जलं खइ। उकिं थथे नं च्वयातःगु दु –
“अय् न्ह्यःगुलु दँ,
सीपिं म्वाना वा।
अले ख्रीष्ट येशूं
छिमित जः बियादी।”
15 उकिं गथे यानाः जुइमाःगु खः बांलाक होश या। मूर्खत थें मखु, बुद्धि दुपिं थें जु।
16 इलं लाःबलय् हे छिमिसं भिंगु ज्याखँ याना जु, छाय्धाःसा ई तसकं मभिं।
17 उकिं मूर्ख जुइ मते, बरु प्रभुयात यःकथं ज्याखँ याना जु।
18 अय्लाः थ्वँ काय्का जुइ मते, छाय्धाःसा थुकिं मनूतय्त बांमलाःगु ज्या याकी, बरु पवित्र आत्मां जाया च्वँ।
19 थथःपिं मुनाः भजन, म्ये हालाः दुनुगलंनिसें परमेश्वरयात तःधंका च्वँ।
20 न्ह्याबलें न्ह्यागु ज्याखँय् नं छिमिसं झी प्रभु येशू ख्रीष्टया नामय् परमेश्वर बाःयात सुभाय् ब्यु।
निम्हतिपू
कल ३:१८,१९; १ पत्र ३:१-७
21 ख्रीष्टयात मानय् यानाच्वंपिं जुयाः छिमिसं छम्हं मेम्हय्सिगु खँ न्यनेगु या।
22 मिसातय्सं प्रभुयागु खँ न्यं थें थः भाःतयागु खँ न्यनेमाः।
23 गथे मण्डली ख्रीष्टया म्ह खः, अले मण्डलीया छ्यं मुक्ति बीम्ह ख्रीष्ट खः अथे हे मिसातय् हामा वया भाःत खः।
24 अय्जूगुलिं गथे मण्डली ख्रीष्ट येशूं धाःथें च्वनी, अथे हे मिसात नं थः भाःतं धाःथें च्वनेमाः।
25 ख्रीष्ट येशूं मण्डलीयात थःगु प्राण बिया तकं माया यानादिल। अथे हे मिजंतय्सं नं थः कलाःयात माया यायेमाः।
26 ख्रीष्ट येशूं मण्डलीयात शुद्ध यायेत थःगु वचनं व लखं सिलाः शुद्ध यानादिल।
27 थःगु हे निंतिं धकाः वय्कलं थज्याःगु पवित्रगु, छुं हे दोष मदुगु, खू मदुगु, स्यमकूंगु व बांलाःगु मण्डली दय्कादिल।
28 अथे हे थःगु म्हयात माया याना तः थें मिजंतय्सं थः कलाःयात माया यायेमाः। थः कलाःयात माया याःम्ह मनुखं थःत हे माया याइ।
29 सुनानं थःगु म्हयात हेला याइ मखु, बरु ख्रीष्ट येशूं मण्डलीयात यानादी थें बांलाक म्हाला-साला याना तइ।
30 छाय्धाःसा झीपिं वय्कःयागु म्हया ब्वत खः।
31 थथे च्वयातःगु दु – “अय्जूगुलिं मनूत थः मां बौयात त्वःताः कलाःनापं च्वंवनी। अले इपिं निम्हं छम्ह हे जुइ।”
32 थ्व छगू तःधंगु गुप्ति खँ खः। अय्नं जिं छिमित ख्रीष्ट व मण्डलीया बारे खँ ल्हाना च्वनागु दु।
33 न्ह्यागु जूसां मिजंतय्सं थः कलाःयात थःत थें माया यायेमाः। अथे हे मिसातय्सं नं थः भाःतयात हनाबना तयेमाः।