3
पावलं यहूदीमखुपिन्थाय् सेवा याःगु
1 छिपिं यहूदीमखुपिं मनूतय्त परमेश्वरयागु भिंगु खँ न्यंका जुयागुलिं जि ख्रीष्टया च्यः पावल थथे झ्यालखानाय् कुंका च्वने माल।
2 छिमित हे न्यंकेत परमेश्वरं दया माया यानाः जितः थ्व भिंगु खँ न्यंकेगु ज्या बियादीगु खः धकाः ला छिमिसं सि हे स्यू।
3 परमेश्वरं वय्कःयागु गुप्ति खँ जितः सीके बियादिल। थ्व हे खँ जिं न्हापा नं चिहाकय्क च्वये धुन।
4 जिं च्वया हयागु थ्व खँ ब्वन धाःसा जिं ख्रीष्टयागु गुप्ति खँ गुलि स्यू धकाः छिमिसं सीके फइ।
5 थ्व गुप्ति खँ न्हापा न्हापायापिं मनूतय्सं मस्यू। थौंकन्हय् परमेश्वरं वय्कःया पवित्र प्रेरिततय्त व अगमवक्तातय्त थ्व गुप्ति खँ पवित्र आत्मापाखें सीके बियादीगु दु।
6 जिं धयाच्वनागु गुप्ति खँ थ्व हे खः -- परमेश्वरयागु भिंगु खँ न्यना काःगुलिं यहूदीतय्त थें यहूदीमखुपिन्त नं परमेश्वरं उतिकं आशिष बियादी। थुपिं निखलः नं छम्ह हे खः। परमेश्वरं थुमित नं ख्रीष्ट येशूयात विश्वास याक्वसित बी धकाः धयादीगु बियादी।
7 परमेश्वरं दया यानाः हे जितः थथे भिंगु खँ न्यकं जुइम्ह यानादिल। थःगु शक्तिं वय्कलं जितः थथे यानादिल।
8 परमेश्वरया चिधंम्ह स्वयाः नं अज्ज चिधंम्ह मनू जितः हे ख्रीष्टयागु तःजिगु भिंगु खँ यहूदीमखुपिन्त न्यंकः वनेगु ज्या परमेश्वरं लःल्हानादिल।
9 दक्व फुक्कं सृष्टि यानादीम्ह परमेश्वरं न्हापांनिसें थ्व गुप्ति खँ सुयातं सीके बियामदी। आः धाःसा वय्कलं थ्व गुप्ति खँ जिगु पाखें फुक्क मनूतय्त सीके बियादीगु दु।
10 आः ला मण्डलीपाखें आकाशय् राज्य याइपिं व अधिकार दुपिन्त परमेश्वरयागु तःधंगु ज्ञान सीके बीत थथे थ्व गुप्ति खँ उलादीगु खः।
11 परमेश्वरं न्हापांनिसें हे ग्वसाः ग्वयादीगु थ्व ज्या झी प्रभु ख्रीष्ट येशूपाखें पूवंकादिल।
12 ख्रीष्टयात विश्वास यानागुलिं झीपिं मग्यासे हे परमेश्वरया न्ह्यःने वने फु।
13 अय्जूगुलिं जिं थथे दुःखकष्ट सियाच्वनागु खनाः छिमिसं आशा त्वःते मते धकाः जिं इनाप याना च्वना। थुकिं छिमित हे भिं जुइ।
ख्रीष्टयागु माया
14 उकिं जिं पुलिं चुयाः परमेश्वर बाःयात प्रार्थना यानाच्वना।
15 वय्कलं हे स्वर्गय् च्वंपिं व पृथ्वीइ च्वंपिं फुक्कसित जीवन बियादीगु खः।
16 वय्कःयागु तःधंगु आशिषं व वय्कःयागु आत्मापाखें छिमित शक्ति दयेमा, अले व हे शक्तिं छिपिं दुनुगलंनिसें बल्लाना च्वनेमा धकाः जिं प्रार्थना यानाच्वनागु दु।
17 उकिं विश्वासं यानाः ख्रीष्ट छिमिगु नुगलय् च्वनादी। छिमिगु नुगलय् मायां हा काय् फयेमा, अले छिपिं मायायागु लिधंसाय् च्वने फयेमा धकाः जिं प्रार्थना यानाच्वनागु दु।
18 अले छिमिसं नं परमेश्वरया मनूतय्सं थें ख्रीष्टयागु मायायागु हाकः, ब्या, जाः गुलि दु धकाः बांलाक सीके फइ।
19 दक्व ज्ञान बुद्धि स्वयाः नं तःधंगु वय्कःयागु मायायात छिमिसं थुइके फयेमा, अले वय्कःयागु फुक्क भिंगु बांलाःगु खं छिमिगु नुगः जाया च्वनेमा धकाः नं जिं प्रार्थना यानाच्वनागु दु।
20 झीत बियादीगु शक्तिं झीसं फ्वनागु स्वयाः नं अप्वः अले मनय् तयागु स्वयाः नं अप्वः बी फुम्ह परमेश्वर
21 मण्डली व ख्रीष्ट येशूपाखें सदां तःधनेमा। आमेन।