10
मूर्ति पुजा याये मज्यू
1 यःपिं दाजुकिजापिं, मोशानापं जूपिं झी तापाःबाज्यापिन्त मरुभूमिइ छु जूगु खः जिं छिमित लुमंकाबी मास्ति वः। इपिं फुक्कं सुपाँय्या क्वसं जुयाः लाल समुद्र छिनावंगु खः।
2 थुकथं मोशानापं जूपिं मनूतय्गु बप्तिस्मा सुपाँय् व समुद्रय् जुल।
3 इपिं फुक्कसिनं छता हे आत्मायागु नसा नल,
4 अले आत्मायागु हे लः त्वन। इमिसं थःनापनापं वनाच्वंगु आत्माया ल्वहंधीयागु लः त्वन। थ्व हे ल्वहंधी ख्रीष्ट खः।
5 अथेसां इपिं मध्ये यक्व हे मनूत नाप परमेश्वर तंम्वयादिल। अय्जूगुलिं इपिं मरुभूमिइ तुं सिनावनेमाल।
6-7 इमित थथे यानादीगुलिं झीसं नं इमिसं थें मूर्ति पुजा यायेगु, बांमलाःगु मभिंगु मतिइ तये मज्यू धकाः थुकिं बांलाक सी दु। इमिगु थ्व हे खँ धर्मशास्त्रय् नं थथे च्वयातःगु दु – “इपिं फ्यतुनाः भ्वय् नयेत्वने धुंकाः दनाः यःयःथें सन।”
8 इपिं मध्ये गुलिंसिनं याःथें झीसं नं व्यभिचार याये मज्यू। व्यभिचार याःगुलिं इपिं छन्हुं हे नीस्वद्वःम्ह सित।
9 इपिं मध्ये गुलिंसिनं याःगु थें झीसं नं प्रभुयागु मन स्वये मज्यू। इमिसं अथे याःगुलिं इमित सर्पं न्याकाः स्यानादिल।
10 इमिसं थें झीसं नं प्रभु नाप कचकच याये मज्यू। इमिसं अथे कचकच याःगुलिं इमित नाश याइम्ह दूत छ्वयाहयाः स्यानादिल।
11 इमित अथे जूगु खँ झीसं नं सीके फयेमा धकाः व झीत ख्याच्वः बीत नं च्वयातःगु खः। झीपिं च्वनाच्वनागु संसार आः फुना वनिन।
12 दनाच्वनागु दु धकाः धाइम्ह मनू बांलाक होश याना च्वनेमाली, मखुसा क्वदली।
13 मनूतय्सं सह याये मफइगु जाँचय् छिपिं लाःगु मदु। परमेश्वर विश्वास याये बहःम्ह खः। सह याये हे मफय्क छिमित वय्कलं जाँचय् लाकादी मखु। तर छिमिसं सह याये फयेमा धकाः जाँच नापनापं बचय् जुइगु लँ नं बियादी। थुकथं छिमिसं उकियात सह याये फइ।
14 अथे जूगुलिं यःपिं दाजुकिजापिं, मूर्ति पुजा यायेगुपाखें तापाक च्वँ।
15 बुद्धि दुपिं मनूत भाःपियाः जिं छिमित धयाच्वनागु दु। जिं धयागु खँ छिमिसं जाँचय् याना स्व।
16 परमेश्वरयात सुभाय् बियाः झीसं त्वनेगु दाखमद्य ख्रीष्टयागु हि लुमंकेत मखु ला? अथे हे झीसं कुचा कुचा थलाः नयेगु मरि नं ख्रीष्टयागु म्ह लुमंकेत मखु ला? उकिं झीपिं परमेश्वर नाप मिलय् जुयाच्वनागुलिं झीपिं परमेश्वरया मनूत खः।
17 छपा हे जक मरि कुचा कुचा थलाः झीसं नयेगु जूगुलिं यक्व जूसां झीपिं छम्ह हे खः।
18 यहूदीतय्गु चलन छकः नं बिचाः याना स्व। परमेश्वरयात बलि छायेहःगु प्रसाद नःपिं मनूत परमेश्वर नाप मिलय् जूपिं मखु ला?
19 जिं छु धयाच्वनागु दु? मूर्ति नं छुं मखु, अले थ्वयात छायेहःगु प्रसाद नं छुं मखु।
20 जिं धायेत्यनागु खँ छु धाःसा मूर्तियात छाःगु फुक्कं भूतआत्मातय्त छाःगु खः, परमेश्वरयात छाःगु मखु। अय्जूगुलिं छिपिं भूतआत्मा नाप मिलय् जुयाच्वने मते धयागु जिगु धापू खः।
21 छिमिसं प्रभुयागु ख्वल्चां व भूतआत्मातय्गु ख्वल्चां छक्वलं त्वनेफइ मखु। अथे हे छिमिसं प्रभुयागु टेबिलं व भूतआत्माया टेबिलंनापं नये फइ मखु।
22 थज्याःगु ज्याखँ यानाच्वन धाःसा झीपिं खनाः प्रभु लय्तायादी मखु। छु झीपिं प्रभु स्वयाः बल्ला ला?
23 गुम्हय्सिनं थथे नं धाइ – “झीसं थःत यःगु न्ह्यागुं याये ज्यू।” अथे खःसां झीत फुक्क ज्यां भिंकी मखु। “झीसं थःत यःगु न्ह्यागुं याये ज्यू।” अथे खःसां फुक्क खं झीत बांलाकी मखु।
24 थःत भिं जुइगु जक याना जुइ मते। मेपिंन्त भिं यायेगु नं स्वयेमाः।
25 मतिइ संका मतसे बजारय् मियातःगु ला न्यानाः नये ज्यू।
26 धर्मशास्त्रय् नं च्वयातःगु दु – “पृथ्वी व पृथ्वीइ च्वंगु दक्व फुक्कं प्रभुयागु हे खः।”
27 परमेश्वरयात म्हमस्यूम्ह सुं मनुखं छिमित भ्वय् सःतल धाःसा, अले छिपिं वने न्ह्याःसा मतिइ छुं हे संका मतसे तये हःगु न्ह्यागुं न।
28 नयेत्यय्काः सुनानं छिमित – “थ्व ला मूर्तियात छाःगु प्रसाद खः” धकाः धाल धाःसा व मनूयात संका जुइक छिमिसं नये मते।
29 छंगु लागि व प्रसाद नये मज्यूगु मखु बरु अथे धाःम्ह मनूया लागि नये मजिल। सुनानं थथे नं धायेफु – “वं धायेवं तुं जिं नये मज्यू धयागु छु दु?
30 परमेश्वरयात सुभाय् बियाः नये त्यनागुली जितः सुनानं छाय् मभिंके माःगु?”
31 अय्जूगुलिं छिमिसं नःसां त्वंसां न्ह्यागु याःसां परमेश्वरया महिमाया निंतिं या।
32 छिमिसं यानाः यहूदीतय्त, यहूदीमखुपिन्त अले परमेश्वरयागु मण्डलीयात पंगः वय्के मते।
33 जिं यानाच्वना थें तुं छिमिसं नं यायेगु स्व। जिं थःत जक भिंकेगु मस्वसे न्ह्यागु याःसां कर्पिन्त निं भिंकेगु स्वयाच्वना। गथे यानाः इपिं फुक्कसिनं परमेश्वरयात विश्वास याये फइ धकाः मतिइ तयाः जिं फुक्कसितं भिनिगु ज्याखँ यानाच्वना।