8
शाऊलं विश्वासीतय्त दुःखकष्ट ब्यूगु
1 थथे स्तिफनसयात स्याःगुलिइ शाऊलयागु नं ल्हाः दु।
अबलय् हे यरूशलेमय् च्वंपिं विश्वासीतय्त फयां फये मफय्क दुःख जू वल। थथे दुःख जूगुलिं फये मफयाः फुक्क विश्वासीत यहूदिया व सामरिया न्यंक उखेंथुखें छ्यालब्याल जुया वन। प्रेरितत धाःसा गनं मवँसे यरूशलेमय् हे च्वनाच्वन।
2 सुं विश्वासीतय्सं वयाः स्तिफनसयात यंकाः थुना बिल। थथे व सीगुलिं इपिं तसकं नुगः मछिंकाः ख्वल।
3 शाऊलं धाःसा विश्वासीतय्त स्यंका हे त्वःते धकाः छेँय् छेँय् वनाः विश्वासी मिसातय्त मिजंतय्त सातुसालाः यंकाः झ्यालखानाय् कुना बीगु यानाच्वन।
सामरियाय् भिंगु खँ न्यंकूगु
4 उखें थुखें जूपिं विश्वासीतय्सं भिंगु खँ न्यंका जुल।
5 अथे हे फिलिपं नं सामरियाय् वनाः ख्रीष्टयागु भिंगु खँ न्यंका जुल।
6-7 अन च्वंपिं यक्व मनूतय्सं वं धाःगु खँ न्यंगुलिं, वं भूत आत्मातय्त पिहां हुँ धकाः धाःथें ततःसकं हालाः पिहां वंगुलिं, पक्षवातं कया च्वंपिन्त व लंग्रातय्त लाय्का ब्यूगुलिं नं फुक्कसिनं वयागु खँ बांलाक न्ह्याइपुसे च्वंक न्यं।
8 अय्जूगुलिं शहरय् च्वंपिं मनूत लय् तायाच्वन।
जादुयागु ज्या याइम्ह सिमोन
9 अन सिमोन नां दुम्ह छम्ह मनू दु। जादुयागु ज्या यानाः वं शहरय् च्वंपिं मनूतय्त अजूचाय्काः थःत तःधंम्ह मनू खः धकाः धया जुयाच्वन।
10 अथेजूगुलिं वयात चिधंपिं निसें तःधंपिन्सं तक नं -- “परमेश्वरयागु तःधंगु शक्ति दुम्ह मनू थ्व हे खः” धकाः मानय् याना तल।
11 थथे सिमोनं ताःई निसें सामरीतय्त जादु याना क्यनाच्वंगुलिं इमिसं वयागु खँ न्यं।
12 अय्नं फिलिपं इमित परमेश्वरयागु राज्य व येशू ख्रीष्टयागु भिंगु खँ न्यंकल। इमिसं वं धाःगु खँय् विश्वास यानाः मिसा मिजं सकसिनं बप्तिस्मा काल।
13 सिमोनं नं विश्वास यानाः बप्तिस्मा कयाः फिलिप नाप हे जुल। वं तसकं अजूचायापुगु ज्या व चिं याना क्यंगु खनाः सिमोन छक्क जुयाच्वन।
14 यरूशलेमय् च्वंपिं प्रेरिततय्सं सामरियाय् च्वंपिं मनूतय्सं नं परमेश्वरयागु वचन न्यन धकाः सीवं यूहन्ना व पत्रुसयात इमिथाय् छ्वया हल।
15 इमिसं अन वयाः इमिगु लागि पवित्र आत्मा झायादीमा धकाः प्रार्थना यात।
16 प्रभु येशूयागु नामं बप्तिस्मा काये धुंकूसां इपिं आः तकं पवित्र आत्मां मजाःनि।
17 अथेजूगुलिं इमिसं इमिगु छेनय् ल्हाः तया बिल, अले इपिं पवित्र आत्मां जाल।
18 थथे इमिसं ल्हाः तयेवं इपिं पवित्र आत्मां जाःगु खनाः सिमोनं थथे धकाः इमित धिबा ब्यू वल --
19 “थ्व शक्ति जितः नं बियादिसँ। अले जिं न्ह्याम्हय्सिके ल्हाः तयेवं इपिं पवित्र आत्मां जायेमा।”
20 पत्रुसं धाल -- “थ्व धिबा नापं तुं छ नं नाश जुया वनेमा। छं स्वये परमेश्वरयागु वरदान धिबां न्याये दइ धकाः च्वना ला?
21 थ्व ज्याखँय् छं ल्हाः तये फइ मखु, छाय्धाःसा परमेश्वरयागु न्ह्यःने छंगु नुगः वँचु।
22 अथेजूगुलिं छं पश्चाताप यानाः पापं लिच्यु। अले प्रभुयात प्रार्थना याःसा छंगु पाप क्षमा जुइ फु, छाय्धाःसा छंगु नुगः तसकं हे वँचु धकाः जिं स्यू।
23 छ तसकं नुगः मूम्ह व पापया पन्जाय् लानाच्वंम्ह खः धकाः नं जिं स्यू।”
24 अले सिमोनं थथे लिसः बिल -- “छिं जितः धयादीगु छुं हे मजुइमा धकाः छिमिसं हे प्रभुयात बिन्ति यानादिसँ।”
25 थथे पत्रुस व यूहन्नां सामरियाय् च्वंपिन्त प्रभुयागु वचन व थःपिनिगु साक्षी न्यंकाः सामरिया जुकाः यरूशलेम लिहां वंबलय् लँय् लाःगु गामय् नं प्रभुयागु भिंगु खँ न्यंका वन।
फिलिप व इथियोपियाय् च्वंम्ह सरकारि मनू
26 छन्हु छम्ह स्वर्गदूतं वयाः फिलिपयात थथे धाल -- “याकनं दच्छिन पतिइ यरूशलेमं गाजापाखे वनेगु मरुभूमिया लँय् हुँ।”
27 अले फिलिप उघ्रिमय् दनाः वन। वं लँय् इथियोपिया देशयाम्ह महारानीया छम्ह तःधंम्ह दांभरिंयात नाप लात। व छम्ह नपुंसक खः। व यरूशलेमय् परमेश्वरयात आराधना यानाः
28 लिहां वया च्वंम्ह खः। व बग्गिलय् च्वनाः यशैया धाःम्ह अगमवक्तां च्वःगु सफू ब्वना वयाच्वंगु खः।
29 अले पवित्र आत्मां फिलिपयात धाल -- “व बग्गिया लिक्क हुँ।”
30 फिलिप ब्वाँय् वन, व मनुखं यशैया धाःम्ह अगमवक्तां च्वःगु सफू ब्वना वयाच्वंगु न्यनाः फिलिपं न्यन -- “छिं ब्वनाच्वनागु खँ थू ला?”
31 अले वं धाल -- “सुनानं स्यना मबीकं गय् यानाः थुइकेगु?” अले वं फिलिपयात थः नाप तुं बग्गिलय् च्वनेत बिन्ति यात।
32 वं ब्वनाच्वंगु सफूयागु ब्व थथे खः --
“स्यायेत यंकूम्ह फै थें
वय्कलं छुं नवाना मदी।
सँ चाकीबलय् भ्याःचा
सुम्क च्वं थें
वय्कलं नं थःगु म्हुतुप्वाः
तिनाच्वन।
33 वय्कःयात क्वह्यंकाः
बांलाक न्याय तकं मयात।
वय्कःया सन्तानयागु खँ
सुनां कनी?
छाय्धाःसा वय्कःयात
पृथ्वीइ स्याना बिल।”
34 अले व मनुखं फिलिपयात धाल -- “थ्व सुयात धाःगु खः? अगमवक्तां थःयात हे धयाच्वंगु ला कि सुं मेम्हय्सित हे धयाच्वंगु? जितः थुइकादिसँ।”
35 अले फिलिपं धर्मशास्त्रयागु थ्व खं निसें कयाः येशूयागु भिंगु खँ तक कन।
36 इपिं वँवं छथाय् लः दुथाय् थ्यन। अले वं फिलिपयात धाल -- “स्वयादिसँ, थन लः दु। जितः बप्तिस्मा कायेत छुकिं पनी?”
37 फिलिपं धाल -- “छिं दुनुगलंनिसें विश्वास यानादियागु खःसा बप्तिस्मा कयादी फु।” अले वं लिसः बिल -- “येशू ख्रीष्ट परमेश्वरया काय् खः धकाः जिं विश्वास याना।”
38 अले वं बग्गि दिके बियाः इपिं निम्हं लखय् क्वहां वन। फिलिपं वयात बप्तिस्मा बिल।
39 इपिं निम्हं लखं पिने थहां वःबलय् प्रभुयागु आत्मां फिलिपयात ज्वना यंकल। थथे वं फिलिपयात हानं गुबलें मखन। अले व लय्लय् तायाः थःगु लँय् वन।
40 फिलिप धाःसा अश्दोद शहरय् थ्यनाच्वन। अनंनिसें वं कैसरिया मथ्यंतले लँय् लाःगु गां पतिकं भिंगु खँ न्यंका वन।